Tɩntɩŋŋaa 22

1Ŋɩɩ nɛ ʋ bʋla pɩba, “Mɩ nyɩmmaba arɩ mɩ naambiiriŋ, má jegile nɩɩ wɩɩ-la mɩ sɩ kɛnɛ dɩ mɩ bʋla laa mɩ tɩtɩa.” 2Ba sɩ nɩa dɩ ʋ bʋl wɩaa Hiburu yikoro lɛ aa pɩba, ba kala ŋaa fʋɩɩ. Ŋɩɩ nɛ Pɔɔl bʋl, 3“Mɩ ŋaa Juu tɩɩna nɛ. Ba lʋlmɛ Taasɩs lɛ nɛ, Siliisia tinteeŋ. Mɩ hambiiriŋ lɛ nɛ ba kɛmmɛ kaa kɔ daha a bemmi. Gamalɩɛl nɛ dagɛmɛ. Ʋ dagɛmɛ la naabalɩmaba wombii-la ba sɩɩ to arɩ sɩɩfɩɛsɩŋ. Mɩ tou woruŋ a joŋ mɩ tɩtɩa kala pɩ Wɩa, arɩ ma ma sɩ hɛ daha jɩnɩmba a ŋɩŋaa ŋɩɩ. 4Mɩ to naasɩŋ a dɔgɩsɛ nɩalɩŋ fa sɩɩ to Yesu wombii-la a chɩchɛ dɩ mɩ kpʋba. Mɩ ŋaa ba kɛsɛba a vɔɔba a kɛmba tɔ dɩa, baalaa arɩ haalaa kala. 5Wɩɩsʋllɩ sɩpaalaaraa kʋhɩaŋ, arɩ kʋhɩasɩ-la kala sɩ yie hilime vʋvʋʋrɛ wɩaa ma jaŋ wuo bʋla pɩma arɩ wɩɩŋ deeŋ mɩ sɩ bʋla ŋaa wʋtɩtɩɩ nɛ. Ba ŋmʋnsɛ tenniŋ pɩmɛ dɩ mɩ kaa mʋ Damasɩkʋs a joŋo pɩ Juu tɩmma-la sɩ hɛ nɩmɛ. Ba ŋaa ŋɩɩ dɩ mɩ wuo kɛsɛ nɩalɩŋ sɩ laa Yesu wɩaa dii nɩmɛ a vɔɔba, a kaa kɔ Jerusalɛm a dɔgɩsɛba.

6Mɩ sɩ lɩɩ joŋ wombiiŋ a mʋmʋ Damasɩkʋs a mʋ kpagɛ taŋ-la arɩ wɩɩ-hɛɛ-siesee, pʋlʋmʋŋ guu lɩɩ wɩa-nyuŋ a faasa chaana hɛ mɩ lɛ. 7Mɩ tuu tel tinteeŋ aŋ nɩɩ nʋʋ yikoro dɩ ʋ bʋl mɩ teeŋ a bʋl, ‘Sɔɔl, Sɔɔl, bɛɛ nɛ tɩɩ ŋ to naasɩŋ a dʋdɔgɩsɛmɛ ŋ-la?’ 8Ŋɩɩ nɛ mɩ pɩɛsɛ, ‘Kʋbɛɛ nɛ, mɩ Tɩɩna?’ Yikoro-la bʋl, ‘Mɩ-na Yesu sɩ lɩɩ Nazarɛt nɛ, nɩɩ-la ŋ sɩ to naasɩŋ a dʋdɔgɩsɛ.’ 9Mɩ dɩ nɩalɩŋ fa sɩɩ vɛŋ, ba na pʋlʋŋ-la nɛ, aŋ bɩ nɩɩ-la fa sɩɩ bʋl wɩaa mɩ teeŋ yikoro nɩa. 10Ŋɩɩ nɛ mɩ pɩɛsɛ, ‘Mɩ ŋaa wʋbɛɛ, mɩ Tɩɩna?’ Mɩ Tɩɩna bʋl, ‘Sii jʋʋ Damasɩkʋs, nɩmɛ ba jaŋ dagɩŋ wɩɩ-la kala mɩ sɩɩ chɛ dɩ ŋ ŋaa.’ 11Pʋlʋŋ-la chʋʋlɛ mɩ sɩaa, mɩ bɩra bɩ na, ŋɩɩ nɛ mɩ dɩ nɩalɩŋ fa sɩɩ vɛŋ kɛŋ mɩ nɩsɩŋ lɛ a lɛrɛ jʋʋ Damasɩkʋs.

12Baal kʋbala fa hɛ nɩmɛ, baa yɩrɛ Ananɩas. Ʋ faa fá Wɩa nɛ a tuto wɩalɩŋ Mosis fa sɩ ŋmʋnsa bil dɩ nɩaa tuto. Juu tɩmma-la kala fa sɩ hɛ Damasɩkʋs lɛ zizilu. 13Ʋ kɔ mɩ teeŋ a chɩŋ mɩ sɛmɛ a bʋla pɩmɛ, ‘Mɩ naambii Sɔɔl, kɛŋ ŋ sɩaa suri.’ Bʋa-la tɩtɩa lɛ mɩ sɩaa suri, mɩ bee naʋ. 14Ŋɩɩ nɛ Ananɩas bʋla pɩmɛ, ‘Wɩa-la la dɩ la naabalɩmaba sɩɩ to nɛ lɩɩsɩŋ dɩ ŋ jɩŋ wɩɩ-la ʋ sɩɩ chɛ dɩ ŋ ŋaa. Ʋ leŋ ŋ na Wɩa tʋɔpʋl Tɩɩna a nɩɩ ʋ yikoro ma ʋ sɩ bʋl wɩaa pɩŋ. 15Ŋ jaŋ ŋaa ʋ pɛ-naara, a bʋla pɩ nɩaa wɩɩ-la ŋ sɩ nɩa aŋ pɛ na. 16Bɛɛ nɛ saa tɩɩ ŋ hɔnɔ dieni? Sii mʋ a leŋ dɩ ba foŋ Wɩɩchʋɔlɛ lɩɩŋ a chɛsɛ ŋ wʋbɔŋŋɔɔ ta Yesu yɩrɩŋ lɛ.’

Wɩa yɩrɛ Pɔɔl dɩ ʋ bʋl Wɩa wɩaa a pɩ nɩalɩŋ sɩ bɩ Juu tɩŋŋaa ŋaa

17Ŋɩɩ nɛ mɩ mɩɩra mʋ Jerusalɛm a jʋʋ Wɩa dɩɩ-bal-la a chʋchʋɔlɛ Wɩa. Mɩ sɩɩ chʋɔlɛ Wɩa ŋɩɩ, 18mɩ na La Tɩɩna Yesu a nagɛ duosoo tʋɔŋ. Ʋ bʋla pɩmɛ, ‘Sii lɩɩ Jerusalɛm lɛ lɩma, bɛɛ wɩaa nɩalɩŋ sɩ hɛ daha bɩ jaŋ sɛɩ wɩalɩŋ ŋ sɩ jaŋ bʋla pɩba a tɩgɛ mɩ lɛ.’ 19Ŋɩɩ nɛ mɩ bʋla pɩ Yesu, ‘Mɩ Tɩɩna, ba jɩma woruŋ arɩ lee-na kala mɩ sɩ mʋa, mɩ yie jʋʋ Wɩɩchʋɔlɛ dɩɩsɩŋ a kɛsɛ nɩalɩŋ sɩ laa ŋ wɩaa dii nɩmɛ, a ŋmooba aŋ kɛmba tɔ dɩa. 20Bʋa-la lɛ ba fa sɩ kpʋ Sɩtɩɩvɩŋ, sɩ ŋaa nɩɩ-la sɩ pɛ na ŋ wɩaa a bʋlba wɩaa pɩpɩ nɩaa, mɩ-na Pɔɔl ma fa hɛ nɩmɛ nɛ a sɛɩ dɩ ba kpʋʋ. Ba sɩɩ kpʋʋ, mɩ nɛ fa pɔ nɩaa deemba gɛnnɩŋ ba sɩ wuro, aŋ ka ba kpʋʋ.’ 21Ŋɩɩ nɛ mɩ Tɩɩna bʋla pɩmɛ, ‘Sii daha, mɩ jaŋ tɩmɩŋ dɩ ŋ mʋ dɩ-bolii, nɩalɩŋ sɩ bɩ Juu tɩŋŋaa ŋaa leriŋ.’ ”

22Pɔɔl fa sɩɩ bʋl wɩaa ŋɩɩ, nɩalɩŋ kala fa jegile nɩɩ ʋ teeŋ nɛ. Ama ʋ sɩ bʋl wɩɩŋ deeŋ, ba bɩra suomo ŋaa goŋ a bʋl, “Má kpʋ nɩtɔɔŋ deeŋ, ʋ bɩ maga dɩ ʋ hɛ dʋnɩa lɛ.” 23Ba ŋɩŋaa goŋ, aŋ kɛŋ ba gɛnnɩŋ kpikpesi a ŋaa hagɩla yuyuo. 24Ŋɩɩ nɛ Rom laalɩyuoroo kʋhɩaŋ-la bʋl dɩ laalɩyuoro-la kɛŋ Pɔɔl kaa jʋʋ laalɩyuoroo dɩɩ-duo-la. Ʋ sɩ dɩ ba vɩɩrʋ aŋ pɩɛsa na wɩɩ-la sɩ tɩɩ nɩalɩŋ kala lɩɩ ʋ harɩŋ aŋ ŋɩŋaa goŋ ŋ-la. 25Ŋɩɩ nɛ ba vɔbʋ dɩ ba vɩɩrʋ. Ba sɩɩ chɛ dɩ ba vɩɩrʋ, Pɔɔl pɩɛsɛ laalɩyuoroo kʋhɩaŋ-la fa sɩ chɩŋ nɩmɛ, “Ʋ maga dɩ ba vɩɩrɛ nʋʋ sɩ ŋaa Rom tɩɩna aŋ bɩ ʋ sarɩya die, a dagʋ ʋ wʋcheeliŋ nɛɛ?” 26Ʋ sɩ nɩɩ wɩɩ-la Pɔɔl sɩ bʋla, ʋ ma bɩra mʋ ʋ kʋhɩaŋ teeŋ a bʋla pʋ, “Bee na ŋ sɩɩ chɛ dɩ ŋ ŋaa wɩɩ-la, baal-la ŋaa Rom tɩɩna nɛ.” 27Ŋɩɩ nɛ laalɩyuoroo kʋhɩaŋ-la tɩtɩa sii kɔ Pɔɔl teeŋ a pɩɛsʋ, “Ŋ ŋaa Rom tɩɩna nɛɛ? Bʋla pɩmɛ.” Ŋɩɩ nɛ Pɔɔl sɩ, “Oo.” 28Laalɩyuoroo kʋhɩaŋ-la ma bʋl, “Mɩ ma ŋaa dɔŋɔ nɛ. Mɩ ta tiŋ moribiee yʋgɛ nɛ aŋ-na kʋ ŋaa Rom tɩɩna.” Ŋɩɩ nɛ Pɔɔl bʋl, “Ba paala lʋlmɛ dɩ mɩ ŋaa Rom tɩɩna nɛ.” 29Ŋɩɩ nɛ nɩalɩŋ fa sɩɩ chɛ dɩ ba vɩɩrɛ Pɔɔl aŋ pɩɛsʋ, ba sʋʋsa lɩɩ ʋ teeŋ lɩma lɩma. Laalɩyuoroo kʋhɩaŋ-la sɩ kʋ jɩŋ arɩ Pɔɔl ŋaa Rom tɩɩna nɛ, ka ʋ ŋaa ba kɛŋ chɔrʋmɔɔ kaa vɔbʋ, fawʋllʋŋ kɛnʋ ma.

Pɔɔl chɩŋ nɩalɩŋ sɩ yie hilime vʋvʋʋrɛ wɩaa sɩpaaŋ

30Ŋɩɩ nɛ laalɩyuoroo kʋhɩaŋ-la chɩchɛ dɩ ʋ sɛnɛ jɩŋ wɩɩ-la sɩ tɩɩ Juu tɩŋŋaa bʋbʋl Pɔɔl teeŋ ŋɩɩ. Ʋ taŋ sɩ pʋla ʋ ŋaa ba kɛnʋ puri, a ŋaa Wɩɩsʋllɩ sɩpaalaaraa kʋhɩasɩŋ arɩ kʋhɩasɩ-la sɩ yie hilimi a vʋvʋʋrɛ wɩaa kʋ hilimi. Ŋɩɩ nɛ ʋ kɛŋ Pɔɔl kaa lɩɩ a ŋaa ʋ chɩŋ ba sɩpaaŋ.

Currently Selected:

Tɩntɩŋŋaa 22: SIS

Highlight

Copy