Tɩntɩŋŋaa 26

Pɔɔl bʋl wɩaa dɩ ʋ laa ʋ tɩtɩa Agɩrɩpa sɩpaaŋ

1Ŋɩɩ nɛ Agɩrɩpa bʋla pɩ Pɔɔl, “Wombiiŋ hɛ nɩmɛ dɩ ŋ bʋl wɩaa a laa ŋ tɩtɩa.” Ŋɩɩ nɛ Pɔɔl kɛŋ nɩsɩŋ vigi dɩ ba kɛŋ goŋ aŋ suomo bʋbʋl wɩaa dɩ ʋ laa ʋ tɩtɩa: 2“Kuoro, mɩ jaŋ bʋl mɩ nyuŋ sɩma jɩnɩŋ mɩ sɩ jaŋ wuo bʋl wɩaa a laa mɩ tɩtɩa ŋ sɩpaaŋ wɩaa deemba kala lɛ Juu tɩŋŋaa sɩɩ bʋl mɩ teeŋ, 3bɛɛ wɩaa ŋ-na paala chaasa jɩŋ Juu tɩŋŋaa naaba wɩaa kala nɛ arɩ ba wʋkaa-lɛrɩŋ. Mɩ saa sʋlʋŋ dɩ ŋ kɛŋ kenyiri aŋ jegile nɩɩ mɩ teeŋ.

4Juu tɩŋŋaa kala jɩŋ mɩ fa sɩ nagɛ ŋɩɩ nɛ mɩ hambiriŋ kala lɛ, mɩ sɩ hɛ mɩ tinteeŋ lɛ arɩ Jerusalɛm kala lɛ. 5Ba jɩmmɛ faafaa kala nɛ, dɩ ba nɛ jaŋ sɛɩ a bʋl wʋtɩtɩɩ, ba jɩma arɩ bumbuŋ kala mɩ faa to Farisii tɩŋŋaa Wɩɩchʋɔlɛ wombii-duo-la nɛ. 6Ka jɩnɩŋ ba leŋ mɩ chɩŋ daha dɩ ba diimi sarɩya a tɩŋ mɩ sɩɩ yɩɛlɛ wɩɩ-la Wɩa sɩ sɩ ʋ jaŋ ŋaa pɩ la naabalɩmaba. 7La Iziral tɩŋŋaa tinteyee fii arɩ balɩa-la, la kala ka yɩɛlɛ wɩɩŋ deeŋ nɛ, ŋɩɩ wɩaa nɛ tɩɩ la fɩɛsɛ sɩɩŋ a chʋchʋɔlɛ Wɩa wɩɩhɛyɛ arɩ tɩtaŋɩŋ kala ŋɩɩ. Mɩ sɩɩ yɩɛlɛ wɩaa deemba nɛ tɩɩ, Juu tɩŋŋaa bʋbʋl mɩ teeŋ ŋɩɩ, mɩ nyɩna. 8Bɛɛ nɛ tɩɩ ma Juu tɩŋŋaa bɩ wuo laa dii arɩ Wɩa jaŋ wuo chɩsɛ nɩalɩŋ sɩ sʋba, dɩ ba bɩra sii sʋʋŋ lɛ?

9Mɩ ma tɩtɩa fa laa dii arɩ ʋ maga dɩ mɩ ŋaa wɩɩ-la kala mɩ sɩ jaŋ wuo ŋaa a chei Yesu sɩ lɩɩ Nazarɛt yɩrɩŋ nɛ. 10Ŋɩɩ nɛ mɩ ŋaa Jerusalɛm lɛ. Mɩ laa doluŋ Wɩɩsʋllɩ sɩpaalaaraa nɩhɩasɩŋ teeŋ, aŋ kɛŋ Wɩa nɩaa yʋgɛ a tɔ dɩa. Dɩ ba nɛ sɩ dɩ ba kpʋba ma, mɩ yie sɛɩ nɛ. 11Mɩ vɛnɛ dɔgɩsɛba yʋgɛ Wɩɩchʋɔlɛ dɩɩsɩŋ lɛ, aa fʋgɛba dɩ ba bʋl arɩ ba bɩ Yesu jɩŋ aŋ vɩa ʋ wombii-la. Mɩ baanɩŋ faasa sii nɛ kɩŋkɛŋ ba nyuŋ, mɩ paala mʋ tasɩŋ dɔnsʋŋ sɩ tuo Juu tinteeŋ lɛ, a to naasɩŋ a dɔgɩsɛba nɩmɛ.

Pɔɔl to ŋɩɩ ʋ sɩ ŋaa a kʋ laa Yesu wɩaa dii

12Wɩɩŋ deeŋ wɩaa nɛ tɩɩ mɩ sii mʋ Damasɩkʋs. Wɩɩsʋllɩ sɩpaalaaraa kʋhɩasɩŋ tɩmmɛ a pɩmɛ doluŋ. 13Mɩ sɩɩ mʋ wombiiŋ lɛ mɩ nyɩna, arɩ wɩɩ-hɛɛ-siesee mɩ na pʋlʋmʋŋ dɩ ʋ lɩɩ wɩa-nyuŋ a chaana hɛ mɩ dɩ nɩalɩŋ fa sɩɩ vɛŋ lɛ. Ʋ pʋlla kɩɩ wɩɩpɔsʋŋ. 14La kala tuu tel tinteeŋ. Ka mɩ nɩɩ nʋʋ yikoro dɩ ʋ bʋla pɩmɛ Hiburu yikoro lɛ a bʋl, ‘Sɔɔl, Sɔɔl, bɛɛ nɛ tɩɩ ŋ to naasɩŋ a dʋdɔgɩsɛmɛ ŋ-la? Ŋ dɔgɩsɛ ŋ tɩtɩa nɛ, ŋ nagɛ nɛŋ nɩa sɩ kaa vɩvɛŋ nɛ ka ʋ yɩyagɛ daa-la ʋ sɩ koro.’ 15Ŋɩɩ nɛ mɩ pɩɛsɛ, ‘Kʋbɛɛ nɛ, tɩɩna?’ Ŋɩɩ nɛ tɩɩna bʋl, ‘Mɩ nɛ ŋaa Yesu, nɩɩ-la ŋ sɩ to naasɩŋ a dʋdɔgɩsɛ. 16Ama sii chɩŋ, mɩ kɛŋ mɩ tɩtɩa kʋ dagɩŋ dɩ mɩ lɩɩsɩŋ dɩ ŋ tɩŋ tɩntɩŋŋaa pɩmɛ nɛ, a ŋaa nʋʋ sɩ pɛ na mɩ wɩaa, a bʋla pɩ nɩaa ŋɩɩ ŋ sɩ namɛ jɩnɩŋ, arɩ ŋɩɩ ŋ sɩ jaŋ bɩra namɛ maachie. 17Mɩ jaŋ tɩmɩŋ dɩ ŋ mʋ Iziral tɩŋŋaa arɩ nɩalɩŋ sɩ bɩ Juu tɩmma ŋaa kala teeŋ. Dɩ ba nɩɩ walɩmɩŋ, mɩ jaŋ laaŋ ta ba nɩsɩŋ lɛ. 18Mɩ jaŋ tɩmɩŋ dɩ ŋ mʋ bʋl wɩaa a suri ba sɩaa, dɩ ba bɩrɩma lɩɩ birimiŋ lɛ a kʋ jʋʋ pʋlʋmʋŋ tʋɔŋ, a ŋaa dɩ ba lɩɩ Sɩtaanɩ nɩsɩŋ lɛ a kɔ Wɩa teeŋ. Dɩ ba nɛ ŋaa ŋɩɩ a laa mɩ wɩaa dii, Wɩa jaŋ joŋ ba wʋbɔŋŋɔɔ chɛba. Ba jaŋ na leriŋ nɩalɩŋ Wɩa sɩ lɩɩsa tʋɔŋ.’

Pɔɔl bʋl ŋɩɩ ʋ sɩ tɩŋ tɩntɩŋŋaa pɩ Wɩa

19Ŋɩɩ wɩaa kuoro, mɩ bɩ yikoro-la sɩ lɩɩ wɩa-nyuŋ wɩaa vɩa. 20Ŋɩɩ nɛ mɩ suomo bʋl Wɩa wɩaa Damasɩkʋs lɛ arɩ Jerusalɛm lɛ a kaa mʋ Judiya tinteeŋ kala, arɩ nɩalɩŋ sɩ bɩ Juu tɩmma ŋaa tʋɔŋ. Mɩ bʋla pɩba dɩ ba bɩrɩma lɩɩ ba wʋbɔŋŋɔɔ lɛ aŋ bɩrɩma to Wɩa, a ŋɩŋaa wɩalɩŋ sɩ jaŋ dagɛ arɩ ba bɩrɩma lɩɩ ba wʋbɔŋŋɔɔ lɛ nɛ. 21Wɩɩŋ deeŋ wɩaa nɛ tɩɩ Juu tɩŋŋaa kɛmmɛ Wɩa dɩɩ-bal-la lɛ aa chɛ dɩ ba kpʋmɛ. 22Ama arɩ jɩnɩŋ kala Wɩa haa pɛ mɩ lɛ nɛ, ŋɩɩ nɛ tɩɩ mɩ chɩŋ daha aa bʋl wɩaa deemba kala mɩ sɩ pɛ na aŋ nɩɩ ma a pɩpɩma, ma nɩbalaa arɩ ma nɩbiisiŋ kala. Wɩɩŋ deeŋ mɩ sɩɩ bʋl, ʋ tɩtɩa nɛ Wɩa wʋlaabʋllaa arɩ Mosis kala fa bʋl arɩ wɩɩ-la jaŋ ŋaa. 23Ba fa bʋla arɩ Kirisito jaŋ na hɛɛŋ a sʋʋ, a laa sɩpaaŋ a sii sʋʋŋ lɛ nɩalɩŋ sɩ sʋba kala tʋɔŋ. Ba bɩra bʋla pɩ Juu tɩŋŋaa arɩ nɩalɩŋ sɩ bɩ Juu tɩŋŋaa ma ŋaa ŋɩɩ ba sɩ jaŋ to a na pʋlʋmʋŋ.”

24Pɔɔl sɩɩ bʋl wɩaa dɩ ʋ laa ʋ tɩtɩa ŋɩɩ, Fɛsɩtɔs kpɩaʋ lɛ a bʋl, “Pɔɔl, ŋŋ nyaasɛ nɛ. Ŋ wʋjɩŋ kɩŋkɛŋ kɛnɩŋ nyɩnyaasɛ nɛ.” 25Ŋɩɩ nɛ Pɔɔl bʋl, “Mɩ bɩ nyaasɛ mɩ nyɩna. Wʋtɩtɩɩ nɛ mɩɩ bʋl. Mɩ sɩaa kala nɛ fɩɛla. 26Kuoro Agɩrɩpa, ŋ jɩŋ wɩaa deemba kala nɛ. Ŋɩɩ nɛ tɩɩ mɩ wuo bʋbʋlba arɩ nyuduoŋ. Mɩ jɩma arɩ wɩaa deemba kʋŋkala tuo ŋ sɩ bɩ jɩŋ. Wɩaa deemba kala sɩ ŋaa, ba bɩ wʋfaalɩa ŋaa. 27Kuoro, ŋ laa Wɩa wʋlaabʋllaa wɩaa dii nɛɛ? Mɩ jɩma ŋ laa dii nɛ.” 28Ŋɩɩ nɛ kuoro Agɩrɩpa pɩɛsɛ Pɔɔl, “Ŋ bɩɩna lɛɛlɛ-bie deeŋ ŋ jaŋ wuo leŋ dɩ mɩ laa Yesu wɩaa dii a tutou koo?” 29Ŋɩɩ nɛ Pɔɔl bʋl, “Ʋ ŋaa lɛɛlɛ koo ʋ dieni mʋa, mɩ Wɩɩsʋlʋŋ nɛ dɩ ŋ dɩ nɩkaana-la kala sɩɩ jegile mɩ teeŋ jɩnɩŋ deeŋ, dɩ ma kʋ laa Yesu wɩaa dii a nagɛmɛ. Ama mɩ bɩ chɛ dɩ ma nagɛmɛ arɩ ba sɩ vɔɔmɛ arɩ chɔrʋmɔɔ ŋ-la.”

30Pɔɔl sɩ bʋl wɩaa deemba dɛrɛ, ŋɩɩ nɛ kuoro arɩ nɩɩ-la sɩ chɩŋ kuoru-balɩŋ nyuŋ arɩ Bɛɛnɩs arɩ nɩalɩŋ kala fa sɩ hɔnɔ, ba sii. 31Ba sɩ lɩɩ dɩ-jalɩŋ ŋɩɩ, ba bʋla pɩpɩ dɔŋɔ, “Baala deeŋ bɩ wɩɩkala cheye a magɛ dɩ ba kpʋʋ koo dɩ ba kɛnʋ tɔ dɩa.” 32Ŋɩɩ nɛ Agɩrɩpa bʋla pɩ Fɛsɩtɔs, “Dɩ baala deeŋ fa bɩ wombiiŋ sʋla arɩ ʋ jaŋ mʋ kuoru-balɩŋ teeŋ dɩ ʋ dii ʋ sarɩya, mɩ fa jaŋ bʋl dɩ ŋ joŋu ta.”

Currently Selected:

Tɩntɩŋŋaa 26: SIS

Highlight

Copy