Tɩntɩŋŋaa 25

Pɔɔl sʋla dɩ ba kɛnʋ mʋ tinteeŋ kuoru-balɩŋ teeŋ

1Fɛsɩtɔs sɩ kʋ laa tinteeŋ, ʋ hɔŋ Sɩzarɩya lɛ tapʋlaa batori nɛ aŋ sii mʋ Jerusalɛm. 2Ʋ sɩ mʋ Jerusalɛm ŋɩɩ, Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩŋ kʋ bʋl wɩalɩŋ Pɔɔl sɩ ŋaa cheiba pʋ, aŋ sʋlʋ 3dɩ ʋ pɛ ba lɛ a ŋaa dɩ Pɔɔl kɔ Jerusalɛm. Ba fa vʋʋra nɛ dɩ ba lɩɩ faa wombiiŋ lɛ a kpʋʋ. 4Ŋɩɩ nɛ Fɛsɩtɔs bʋl, “Ba kɛŋ Pɔɔl tɔ dɩa nɛ Sɩzarɩya tinteeŋ lɛ, mɩ ma jaŋ mɩɩra mʋ nɩmɛ lɛɛlɛ. 5Má leŋ dɩ ma sɩpaalaaraa dɔnsʋŋ to mɩ harɩŋ mʋ Sɩzarɩya, a bʋl wɩalɩŋ ma sɩ kɛnɛ a tɩgɛ baal-la lɛ, dɩ ma nɛ sɩ ʋ ŋaa wɩɩ nɛ a chei.”

6Fɛsɩtɔs fa chʋa nɩalɩŋ teeŋ Jerusalɛm lɛ arɩ tapʋlaa chori koo fii nɛ aŋ-na mɩɩra mʋ Sɩzarɩya. Ʋ taŋ sɩ pʋla, ʋ mʋ hɔŋ sarɩya dɩ-diiliŋ aŋ ŋaa ba kɛŋ Pɔɔl kaa kɔ. 7Pɔɔl sɩ kɔ, Juu tɩmma-la sɩ lɩɩ Jerusalɛm kɔ, ba kʋ gollu chu a bʋl dɩ wɩalɩŋ Pɔɔl sɩ cheye yʋga nɛ sɩɩfɩɛsɛ, ama ba bɩ wuo dagɛ arɩ wɩalɩŋ ba sɩ bʋla a tɩgɛ ʋ lɛ ŋaa wʋtɩtɩɩba. 8Ŋɩɩ nɛ Pɔɔl ma bʋl wɩaa dɩ ʋ laa ʋ tɩtɩa. Ʋ sɩ, “Mɩ bɩ Juu tɩŋŋaa naabalɩmaba wombii-la ba sɩɩ to wɩɩkala cheye, mɩ bɩra bɩ wɩɩ ma kala cheye a tɩgɛ Wɩa dɩɩ-balɩŋ ma lɛ koo Rom kuoru-balɩŋ ma lɛ.” 9Fɛsɩtɔs ma faa chɛ dɩ Juu tɩmma-la tʋɔŋ tɔrɛ ʋ nyuŋ nɛ, ŋɩɩ nɛ ʋ pɩɛsɛ Pɔɔl, “Ŋ jaŋ cho dɩ ŋ mʋ Jerusalɛm dɩ mɩ dii ŋ sarɩya nɩmɛ a tɩŋ wɩaa deemba ba sɩ bʋla a tɩgɛ ŋ lɛ koo?” 10Ŋɩɩ nɛ Pɔɔl bʋl, “Aɩ, mɩ jaŋ cho dɩ mɩ mʋ kuoru-balɩŋ teeŋ. Ʋ maga dɩ ʋ nɛ diimi sarɩya. Ŋ tɩtɩa jɩma woruŋ arɩ mɩ bɩ wɩɩ ŋaa chei Juu tɩŋŋaa lɛ. 11Dɩ mɩ nɛ fa ŋaa wɩɩ chei a magɛ dɩ ba kpʋmɛ, mɩ faa sɛɩ nɛ, ama dɩ wɩalɩŋ kala ba sɩɩ bʋl ŋaa wʋnyɩɛrɩŋ nɛ, nʋʋkala tuo dɩ ʋ wuo jommi hɛ ba nɩsɩŋ lɛ dɩ ba kpʋmɛ. Mɩɩ sʋlʋŋ dɩ ŋ leŋ dɩ mɩ mʋ kuoru-balɩŋ teeŋ dɩ ʋ nɛ diimi sarɩya.” 12Ŋɩɩ nɛ Fɛsɩtɔs arɩ ʋ nɩhɩasɩŋ kɛŋ nyusuŋ hɛ dɔŋɔ lɛ. Ka ʋ bʋla pɩ Pɔɔl, “Na ŋ sɩ ŋ jaŋ mʋ kuoru-balɩŋ teeŋ dɩ ʋ nɛ dii ŋ sarɩya. Ŋ saa jaŋ mʋ.”

Pɔɔl chɩŋ Agɩrɩpa arɩ Bɛɛnɩs sɩpaaŋ

13Tapʋlaa baŋmɛnɛ harɩŋ dɩ kuoru kʋbala ba sɩɩ yɩrɛ Agɩrɩpa arɩ ʋ dɩhaala Bɛɛnɩs kɔ dɩ ba chʋɔlɛ Fɛsɩtɔs Sɩzarɩya lɛ. 14Ba sɩ hɛ nɩmɛ a dieni, Fɛsɩtɔs bʋl Pɔɔl wɩaa kala a pɩba. Ʋ sɩ, “Baal kʋbala nɛ hɛ daha, Fɛlɩs nɛ kɛnʋ kaa tɔ dɩa. 15Mɩ sɩ mʋ Jerusalɛm, Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa nɩhɩasɩŋ kʋ bʋl wɩalɩŋ ʋ sɩ ŋaa cheiba, aŋ bʋl dɩ mɩ diiu sarɩya a joŋ cheeriŋ pʋ. 16Ŋɩɩ nɛ mɩ bʋla pɩba arɩ la-na Rom tɩŋŋaa naabarɩŋ lɛ, la bɩ jaŋ bʋl nʋʋ laa cheeriŋ nɛ aŋ joŋu hɛ ʋ dʋndɔŋŋɔɔ nɩsɩŋ lɛ, see dɩ ba kala balɩa hɔnɔ, dɩ dɔŋɔ bil ʋ niiŋ, dɩ dɔŋɔ ma bil ʋ niiŋ. 17Ŋɩɩ nɛ ba kɔ daha. Ba sɩ kɔ, mɩ bɩ kaa dieni. Ʋ taŋ sɩ pʋla, mɩ mʋ sarɩya dɩ-diiliŋ aŋ ŋaa ba kɛŋ baal-la kaa kɔ. 18Nɩalɩŋ fa sɩɩ bʋl Pɔɔl teeŋ sɩ sii chɩŋ a bʋl wɩaa, ba bɩ wuo dagɛ wʋbɔŋ kala mɩ fa sɩ bɩɩna dɩ Pɔɔl ŋaa. 19Wɩɩ-la ba sɩ bʋla ŋaa wʋkaalɛrɩɩ nɛ ba kaa lɛrɛ a mʋ tɩgɛ ba Wɩɩ-chʋɔlʋŋ lɛ. Baal kʋbala nɛ sʋba, baa yɩrɛ Yesu, Pɔɔl yie bʋbʋl arɩ ʋ sii sʋʋŋ lɛ nɛ a hɛ ʋ mɩɩsɩŋ lɛ. 20Mɩ fa bɩ jɩŋ ŋɩɩ mɩ sɩ jaŋ to a jɩŋ wɩɩŋ deeŋ tʋɔŋ. Ŋɩɩ nɛ mɩ pɩɛsɛ Pɔɔl arɩ ʋ jaŋ sɛɩ a mʋ Jerusalɛm dɩ ba diiu sarɩya nɩmɛ a mʋ tɩgɛ wɩalɩŋ ba sɩ sɩ ʋ ŋaa lɛɛ? 21Pɔɔl bɩ sɛyɛ, aŋ sʋlmɛ dɩ mɩ leŋ dɩ ba benu a kɛnʋ kaa mʋ kuoru-balɩŋ teeŋ dɩ ʋ dii ʋ sarɩya. Ŋɩɩ nɛ mɩ leŋ ʋ ha hɛ bɩnɩŋ dɩa lɛ ba bibenu, a kaa mʋ yi bʋa-la lɛ mɩ sɩ jaŋ leŋ dɩ ba kɛnʋ mʋ kuoru-balɩŋ teeŋ dɩ ʋ dii ʋ sarɩya.” 22Ŋɩɩ nɛ Agɩrɩpa bʋla pɩ Fɛsɩtɔs, “Mɩ tɩtɩa jaŋ cho dɩ mɩ ma nɩɩ baal-la niiŋ nɛ.” Ŋɩɩ nɛ Fɛsɩtɔs bʋla pʋ, “Chie ŋ jaŋ nɩɩ ʋ niiŋ.”

23Ʋ taŋ sɩ pʋla, Agɩrɩpa arɩ Bɛɛnɩs kpɩɛrɛ ba tɩtɩa woruŋ nɩaa zuuriba a mʋ jʋʋ sarɩya dɩ-diiliŋ dɩɩ-bal-la. Ba dɩ laalɩyuoroo nɩhɩasɩŋ arɩ taŋ-la nɩbalaa, ba kala kʋ jʋʋ a hɔŋ. Ŋɩɩ nɛ Fɛsɩtɔs ŋaa ba kɛŋ Pɔɔl kʋ jʋʋ. 24Fɛsɩtɔs bʋl, “Kuoro Agɩrɩpa, ŋ dɩ nɩalɩŋ kala sɩ hɛ daha, ma na baala deeŋ. Ʋ wɩaa nɛ tɩɩ Juu tɩmma-la sɩ hɛ Sɩzarɩya deeŋ lɛ arɩ Juu tɩmma-la sɩ lɩɩ Jerusalɛm kala kʋ wʋwalɩmɛmɛ. Baa ŋaa goŋ a bʋl dɩ ʋ bɩ maga dɩ ʋ kɛŋ mɩɩsɩŋ. 25Mɩ-na bɩ wɩɩ-la ʋ sɩ ŋaa chei a maga dɩ ba kpʋʋ na. Ama ʋ tɩtɩa nɛ sʋlmɛ dɩ mɩ leŋ dɩ ʋ mʋ kuoru-balɩŋ teeŋ Rom lɛ dɩ ʋ diiu sarɩya. Mɩ saa jaŋ kɛnʋ mʋ. 26Ama mɩ paala bɩ chaasa jɩŋ wɩɩ-la kala mɩ sɩ jaŋ ŋmʋnsa pɩ kuoru-balɩŋ a mʋ tɩgɛ ʋ lɛ. Ŋɩɩ nɛ tɩɩ mɩ kɛnʋ kaa kɔ ma teeŋ dɩ ma nɩɩ ʋ niiŋ. Ŋ-na kuoro Agɩrɩpa teeŋ nɛ mɩ saa paala kɛnʋ kaa kɔ. Mɩ bɩɩna arɩ ŋ ma nɛ jʋʋ wɩɩ-la tʋɔŋ, ŋ jaŋ wuo na wɩɩ dɩ mɩ wuo ŋmʋnsɛ teniŋ pɩ kuoru-balɩŋ. 27Mɩ-na teeŋ, ʋ bɩ wombii ŋaa dɩ mɩ nɛ leŋe dɩ ba kɛŋ nʋʋ ba sɩ kaa tɔ bɩnɩŋ dɩa kaa mʋ kuoru-balɩŋ teeŋ, aŋ bɩ chaasa bʋl wɩɩ-la ʋ sɩ ŋaa chei.”

Currently Selected:

Tɩntɩŋŋaa 25: SIS

Highlight

Copy