Tɩntɩŋŋaa 24

Juu tɩŋŋaa bʋl Pɔɔl teeŋ

1Tapʋlaa banɔŋ sɩ kiele, Wɩɩsʋllɩ sɩpaalaaraa kʋhɩaŋ baa yɩrɛ Ananɩas sii mʋ Sɩzarɩya, Fɛlɩs teeŋ, nɩɩ-la sɩ chɩŋ ba kuoru-balɩŋ nyuŋ. Ʋ dɩ Juu tɩŋŋaa kʋhɩasɩŋ dɔnsʋŋ arɩ sarɩya-diiru kʋbala baa yɩrɛ Tatulas, ba kala nɛ mʋa. Ba sɩ mʋ ʋ teeŋ, ba suomo bʋbʋl wɩɩ-la sɩ tɩɩ ba bʋbʋl Pɔɔl teeŋ. 2Ba sɩ yɩrɛ Pɔɔl ʋ kʋ jʋʋ, Tatulas nɛ ba laa sɩpaaŋ yɩrɛ dɩ ʋ dagɛ wɩɩ-la Pɔɔl sɩ ŋaa chei. Ŋ-la nɛ ʋ suomi, “La tinteeŋ kʋhɩaŋ, ŋ nɛ wuo benla woruŋ a leŋ la hɔŋ arɩ fɩɛlɩŋ. Ŋ wasɛ wɩaa yʋgɛ nɛ a pɩla la tinteeŋ deeŋ lɛ. 3Bʋa na-kala la tinteeŋ kala lɛ la tʋɔŋ tɔrɔ woruŋ wɩaa deemba lɛ. La saa lɔllʋŋ kɩŋkɛŋ. 4Mɩ bɩ chɛ dɩ mɩ bʋl wɩaa dieni. Mɩ saa sʋlʋŋ dɩ ŋ kɛŋ kenyiri aŋ jegile nɩɩ wʋkuu-la la sɩ kɛnɛ dɩ la bʋla pɩŋ. 5La na dɩ baala deeŋ ŋaa wʋhɛɛrʋ nɛ. Juu tɩŋŋaa sɩ hɛ dʋnɩa sɛmɛ-na kala lɛ, ʋ yie mʋ lee-la a ŋaa taawɛɩ. Ʋ nɛ ŋaa Nazarɛt nɩaa Wɩɩ-chʋɔlaa kʋhɩaŋ ma. 6Ʋ faa chɛ dɩ ʋ ŋaa disiniŋ nɛ Wɩa dɩa lɛ. Ŋɩɩ nɛ la kɛnʋ [a faa chɛ dɩ la diiu sarɩya la naabalɩmaba wombiiŋ sɩ dagɛ ŋɩɩ. 7Ŋɩɩ nɛ laalɩyuoroo kʋhɩaŋ ba sɩɩ yɩrɛ Lisias kʋ kɛnʋ lorigo laa arɩ doluŋ la teeŋ. 8Ʋ nɛ bʋla pɩ la nɩalɩŋ kala sɩɩ bʋl Pɔɔl teeŋ dɩ la kɔ ŋ teeŋ a bʋla pɩŋ wɩɩ-la sɩ tɩɩ la bʋbʋl ʋ teeŋ]. Dɩ ŋ nɛ pɩɛsɛ baala deeŋ, ŋ tɩtɩa jaŋ jɩŋ arɩ wɩalɩŋ kala la sɩ bʋla a tɩgɛ ʋ lɛ ŋaa wʋtɩtɩɩba nɛ.” 9Ŋɩɩ nɛ Juu tɩŋŋaa ma sii pɛ a bʋl dɩ wɩɩ-la kala ʋ sɩ bʋla ŋaa wʋtɩtɩɩ nɛ.

Pɔɔl bʋl wɩaa dɩ ʋ laa ʋ tɩtɩa kuoro Fɛlɩs sɩpaaŋ

10Ŋɩɩ nɛ nɩɩ-la sɩ chɩŋ kuoru-balɩŋ nyuŋ pɩ Pɔɔl wombiiŋ dɩ ʋ bʋl wɩɩ-la ʋ ma sɩ kɛnɛ. Ŋɩɩ nɛ ʋ bʋl, “Mɩ jɩma arɩ ŋ dii sarɩya tinteeŋ deeŋ lɛ ʋ jɩsɩŋ bolie. Mɩ tʋɔŋ saa tɔrɔ mɩ sɩ jaŋ bʋl wɩaa a laa mɩ tɩtɩa ŋ sɩpaaŋ. 11Ŋ jaŋ wuo pɩɛsa nɩɩ ŋ tɩtɩa lɛ arɩ mɩ sɩ kʋ mʋ Jerusalɛm dɩ mɩ chʋɔlɛ Wɩa, ʋ bɩ tapʋlaa fii arɩ balɩa kɩɩ. 12Juu tɩŋŋaa bɩ mɩ na dɩ mɩ dɩ nʋʋkala kɛŋ wɩɩ lɩlɛrɛ Wɩa dɩɩ-bal-la lɛ, mɩ bɩ yuosu ma hɛ Wɩɩchʋɔlɛ dɩɩsɩŋ lɛ koo lee-kala tabal-la lɛ. 13Ba bɩra bɩ jaŋ wuo dagɛ pɩŋ arɩ wɩalɩŋ ba sɩ sɩ mɩ ŋaa chei ŋaa wʋtɩtɩɩba nɛ. 14Wɩɩ-la mɩ sɩ jaŋ bʋla pɩŋ arɩ ʋ ŋaa wʋtɩtɩɩ nɛ ŋ-la: Mɩ maa chʋɔlɛ Wɩa-la la naabalɩmaba sɩɩ to nɛ a ŋaa nʋʋ sɩɩ to Wɩɩchʋɔlɛ wombii-la ba sɩɩ chei. Mɩ ma laa wɩalɩŋ kala Mosis sɩ ŋmʋnsa bil dɩ la to dii nɛ, aa to wɩalɩŋ Wɩa wʋlaabʋllaa sɩ ŋmʋnsa ma kala. 15Mɩ ma laa dii arɩ Wɩa jaŋ chɩsɛ nɩzɔŋŋɔɔ arɩ nɩbɔŋŋɔɔ kala sʋʋŋ lɛ. Nɩaa deemba kala sɩ hɛ daha ma laa wɩaa deemba kala dii nɛ. 16Mɩ yie wʋwalɩmɛ woruŋ dɩ mɩ tʋɔbɩɩnaa kala chesi Wɩa arɩ nuhuobiinee kala sɩpaaŋ. 17Mɩ sɩ lɩɩ Jerusalɛm lɛ ʋ diene, a yi jɩsɩ arɩ jɩsɩ. Lɛɛlɛ nɛ mɩ kɔ a kɛŋ moribiiŋ kaa kɔ dɩ mɩ pɩ mɩ tinteeŋ nɩaa aŋ pɛ kpʋ pʋsʋŋ a ŋaa Wɩɩsʋlʋŋ pɩ Wɩa. 18Ŋɩɩ lɛ nɛ ba namɛ Wɩa dɩɩ-bal-la lɛ, bʋa-la lɛ dɩ mɩ pɩɩsɛ mɩ disiniŋ dɛrɛ. Nɩ-daŋ kala fa tuo mɩ teeŋ, mɩ bɩ yuosu ma kala hɛ. 19Ama Juu tɩŋŋaa dɔnsʋŋ sɩ lɩɩ Esia tinteeŋ ma nɛ fa hɛ nɩmɛ. Dɩ ba nɛ fa kɛŋ wɩɩkala a tɩgɛ mɩ lɛ, ʋ fa maga dɩ ba tɩtɩa nɛ kɔ daha a kʋ bʋl. 20Ŋɩɩ ma dee, leŋ dɩ nɩaa deemba sɩ hɛ daha bʋl wɩɩ-la ba sɩ na dɩ mɩ ŋaa chei bʋa-la lɛ mɩ sɩ chɩŋ nɩalɩŋ sɩ yie hilime vʋvʋʋrɛ wɩaa sɩpaaŋ. 21Wɩɩ-la dʋndʋŋa mɩ sɩ ŋaa nɛ ŋ-la: Mɩ fa chɩŋ ba sɩpaaŋ a faasa bʋla pɩba, ‘Jɩnɩŋ maa diimi sarɩya a tɩŋ mɩ sɩ laa dii arɩ nɩsʋʋnʋŋ jaŋ sii sʋʋŋ lɛ a kɛŋ mɩɩsɩŋ wɩaa nɛ.’ ”

22Fɛlɩs sɩ nɩɩ ŋɩɩ, ʋ jɩŋ wombii-la Pɔɔl sɩɩ to wɩaa woruŋ. Ŋɩɩ nɛ ʋ joŋ wɩɩ-la bʋlʋŋ bil aŋ ʋ bʋla pɩba, “Dɩ laalɩyuoroo kʋhɩaŋ Lisias nɛ kɔ, mɩ jaŋ beŋ wɩɩ-la tʋɔŋ a jɩŋ ʋ sɩaa.” 23Ŋɩɩ nɛ ʋ ŋaa laalɩyuori-hɩaŋ kʋbala bibeŋ Pɔɔl, aŋ bʋla pʋ dɩ ʋ kɛnʋ tɔ aŋ leŋ dɩ ʋ nɩna wiese, dɩ ʋ pɩ ʋ nandɔnsʋŋ wombiiŋ dɩ ba kʋ nɩnaʋ dɩ ba bʋbʋl wɩaa. Dɩ ʋ nɩɩ chɛ kʋŋ ma, dɩ ba pɛ ʋ lɛ.

Pɔɔl chɩŋ Fɛlɩs arɩ Dirusila sɩpaaŋ

24Tapʋlaa baŋmɛnɛ harɩŋ Fɛlɩs kɛŋ ʋ haala ba kɔ. Ʋ yɩrɩŋ nɛ Dirusila. Ʋ fa ŋaa Juu tɩɩna nɛ. Ŋɩɩ nɛ Fɛlɩs tɩma yɩrɛ Pɔɔl dɩ ʋ kɔ. Ʋ sɩ kɔ, ʋ bʋl Yesu Kirisito laa diiniŋ wɩaa pʋ ʋ jijegili. 25Ama Pɔɔl sɩ mʋ bʋl wɩaa a tɩgɛ tʋɔpʋla lɛ arɩ ŋɩɩ ŋ sɩ jaŋ wuo kɛŋ ŋ tɩtɩa lɛ, a bɩra bʋl tapʋlɩɩ-la Wɩa sɩ jaŋ dii dʋnɩa nɩaa sarɩya wɩaa ma, fawʋllʋŋ kɛŋ Fɛlɩs. Ŋɩɩ nɛ ʋ bʋl dɩ ʋ mʋ, ka dɩ ʋ nɛ na chɩnɩŋ ʋ jaŋ bɩra yɩrʋ. 26Ŋɩɩ kala lɛ ʋ faa bɩɩnɛ arɩ Pɔɔl jaŋ kpalʋ arɩ moribiiŋ. Ŋɩɩ wɩaa nɛ tɩɩ ʋ yie yɩyɩrʋ tɛtɛ ba yie bʋbʋl wɩaa. 27Jɩsɩŋ balɩa sɩ kiele, baal kʋbala baa yɩrɛ Pɔkɔs Fɛsɩtɔs laa Fɛlɩs leriŋ a ŋaa nɩɩ-la sɩ chɩŋ kuoru-balɩŋ nyuŋ. Fɛlɩs faa chɛ dɩ Juu tɩŋŋaa chou, ŋɩɩ nɛ tɩɩ ʋ leŋ Pɔɔl ha hɛ bɩnɩŋ-dɩa lɛ.

Currently Selected:

Tɩntɩŋŋaa 24: SIS

Highlight

Copy