Tɩntɩŋŋaa 27

Pɔɔl jʋʋ lɩɩŋ daboro a duoro mʋ Rom

1Ŋɩɩ nɛ ba vʋʋrɛ dɩ la jʋʋ lɩɩŋ daboro a mʋ Ɩtalɩ tinteeŋ. Ba joŋ Pɔɔl hɛ laalɩyuoroo kʋhɩaŋ kʋbala ba sɩɩ yɩrɛ Julias nɩsɩŋ lɛ a pɛ nɩalɩŋ dɔnsʋŋ ba sɩ kaa tɔ bɩnɩŋ dɩa lɛ. Julias lɩɩ Rom nɛ, a fa ŋaa Rom kuoru-balɩŋ laalɩyuoroo kʋhɩaŋ. 2La mʋ jʋʋ lɩɩŋ daboro sɩ lɩɩ taŋ kʋbala ba sɩɩ yɩrɛ Adɩramɩtam a kɛŋ ʋ tɩtɩa hɛ dɔŋɔ lɛ dɩ ʋ mʋ tasɩ-la sɩ hɛ mʋgʋ-balɩŋ niiŋ Esia tinteeŋ. Ŋɩɩ nɛ la sii a mʋmʋ. Baal kʋbala baa yɩrɛ Arɩsɩtakʋs ma fa hɛ la tʋɔŋ nɛ. Ʋ fa ŋaa Masidoonia tɩɩna nɛ a lɩɩ Tɛsalonaaka. 3Taŋ ka pʋl dɩ la mʋ yi taŋ kʋbala baa yɩrɛ Sɩdɔŋ. Julias fa kɛŋ zile Pɔɔl teeŋ a pʋ wombiiŋ dɩ ʋ mʋ na ʋ nandɔnsʋŋ, dɩ ʋ nɩɩ chɛ kʋŋ ma, dɩ ba pɛ ʋ lɛ. 4La bɩra sii nɩmɛ a mʋmʋ. La sɩɩ mʋ, dɩ peliŋ lu lɩɩ lee-la la fa sɩ chaasa. La mɩɩra mʋ to tinteeŋ kʋbala lɩɩŋ sɩ gollo chu, baa yɩrɛ Saapʋrɔs. La to sɛmɛ-la sɩ kɛrɛ peliŋ. 5La kpɛrɛ to Siliisia arɩ Pamfiilia tinteeŋ niiŋ, a mʋ yi lee kʋbala baa yɩrɛ Maara. Ʋ fa hɛ Laasa tinteeŋ nɛ. 6Nɩmɛ nɛ laalɩyuoroo kʋhɩaŋ-la na lɩɩŋ daboro dɔŋɔ dɩ ʋ lɩɩ tabal-la ba sɩɩ yɩrɛ Alɛkɩzandɩrɩa a mʋmʋ Ɩtalɩ. Ʋ ŋaa la jʋʋ. 7La fɩɛla duori ŋɩɩ deeŋ deeŋ tapʋl daŋ a na hɛɛŋ kɩŋkɛŋ, aŋ lɛɛlɛ kʋ kpagɛ taŋ kʋbala baa yɩrɛ Sɩnaadas. Pel-la bɩ sɛyɛ dɩ la to nɩmɛ. Ŋɩɩ nɛ la bɩra duoro kpɛrɛ to tinteeŋ kʋbala lɩɩŋ sɩ gollo chu, baa yɩrɛ Kiriiti, a kʋ yi lee kʋbala baa yɩrɛ Salimoni. La kpɛrɛ to tintee-la sɛmɛ-la sɩ kɛrɛ peliŋ. 8La sɩ kpɛrɛ to lɩɩ-la niiŋ ŋɩɩ, la na hɛɛŋ woruŋ aŋ-na kʋ yi lee kʋbala baa yɩrɛ Fɛɛ Heevins. Ʋ fa kpagɛ taŋ kʋbala baa yɩrɛ Lasɩa.

9La hɔŋ nɩmɛ a dieni, Juu tɩŋŋaa tapʋl-bal-la ba sɩ yie pɩɩsɛ ba disiniŋ ta kʋ kieli. Bʋa-la lɛ lɩɩŋ duoruŋ yie hɛɩ nɛ. Ŋɩɩ nɛ Pɔɔl bʋl wɩɩŋ deeŋ chagɩlɛba a bʋl, 10“Mɩ naambiiriŋ, mɩ na arɩ la wombii-la vɛnɩŋ jaŋ kperila. Má leŋ dɩ la hɔŋ daha. Dɩ la nɛ sɩ la mʋ, la lɩɩŋ daboro arɩ la chʋgʋsʋŋ jaŋ chei, la dɔnsʋŋ ma jaŋ sʋʋ.” 11Ama laalɩyuoroo kʋhɩaŋ-la fa bɩ Pɔɔl teeŋ jegile nɩɩ, aŋ mɩɩra to lɩɩŋ daboro-la kʋhɩaŋ arɩ lɩɩŋ daboro-la tɩɩna nii. 12Ba sɩ lee-la lɩɩŋ daborosuŋ sɩɩ chɩŋ bɩ zɔŋ arɩ ba sɩ jaŋ hɔŋ nɩmɛ waarɩŋ bʋa lɛ. Ba jesiŋ kala fa cho dɩ la jʋʋ lɩɩŋ daboro-la, a wʋwalɩmɛ dɩ la nɛ wuolo, dɩ la mʋ yi taŋ kʋbala baa yɩrɛ Fiinis a hɛ nɩmɛ waarɩŋ bʋa lɛ. Fiinis nɛ fa ŋaa lee-la lɩɩŋ daborusuŋ sɩ yie chɩŋ a hɛ Kiriiti tinteeŋ. Ʋ fa hɛ wɩɩpɔsʋŋ nadiiŋ arɩ wɩɩjʋʋlʋŋ pɛgɛ nɛ, a bɩra pɩŋ wɩɩpɔsʋŋ nagʋa arɩ wɩɩjʋʋlʋŋ pɛgɛ maa a kɛrɛ peliŋ.

Lɩɩ-peliŋ lu mʋgʋ-balɩŋ lɛ

13Ŋɩɩ nɛ peliŋ fɩɛla lu a lɩɩ wɩɩpɔsʋŋ nadiiŋ dɩɩraa a kʋkɔ. Nɩalɩŋ bɩɩna arɩ ba jaŋ na wombiiŋ a vɛŋ arɩ ba fa sɩ bɩɩna ŋɩɩ ba tʋɔŋ lɛ. Ŋɩɩ nɛ ba kɛŋ hɔɔ-bal-la ba sɩ yie kaa chagɛ lɩɩŋ daboro-la a kaa lɩɩsɛ a hɛ lɩɩŋ daboro-la tʋɔŋ, aŋ duoro kpɛrɛ to Kiriiti tinteeŋ niiŋ. 14Ʋ bɩ diene dɩ pel-duoŋ faasa lu a lɩɩ wɩɩpɔsʋŋ nagʋa arɩ wɩɩpɔsʋŋ dɩɩrɩŋ pɛgɛ. Ʋ lɩɩ tinteeŋ lɩɩŋ sɩ gollo chu nɛ a kʋkɔ. 15Ʋ kʋ ŋmoo lɩɩŋ daboro-la, la bɩ pel-la wuo chaasɛ. Ŋɩɩ nɛ la leŋ pel-la kɛŋ lɩɩŋ daboro-la mʋ lee-la ʋ sɩ lu mʋmʋ. 16Ŋɩɩ nɛ la to lee kʋbala lɩɩŋ sɩ gollo chu baa yɩrɛ Kaada, a to wɩɩpɔsʋŋ nadiiŋ dɩɩrɩŋ. Ʋ kɛrɛ pel-la mʋa. Nɩmɛ la na hɛɛŋ woruŋ aŋ-na wuo kɛŋ lɩɩŋ dabori-bie-la la fa sɩ joŋo vɔɔ lɩɩŋ daboro-la harɩŋ. 17Ba lɛrɛ lɩɩŋ dabori-bie-la kʋ jʋʋ lɩɩŋ daboro-la tʋɔŋ a kɛŋ ŋmɛsɩŋ vɔbʋ, aŋ vɔɔ lɩɩŋ daboro-la kala kpaŋ kpaŋ. Fawʋllʋŋ fa kɛmba arɩ ba jaŋ vɛnɛ mʋ jʋʋ hagɩlɩ-bumbugulo-la tʋɔŋ sɩ golli Libiya tinteeŋ a pɛ nɩmɛ. Ŋɩɩ nɛ ba kɛŋ gɛnnɩ-la ba fa sɩ joŋo vɔɔ lɩɩŋ daboro-la nyuŋ dɩ peliŋ kaa vɛŋ a kaa ta ba sʋʋsa tuu, aŋ leŋ pel-la kɛŋ lɩɩŋ daboro-la aa vɛŋ. 18Pel-la faasa lu ŋɩɩ nɛ deeŋ deeŋ. Taŋ sɩ pʋla ba suomo chaarɛ chʋgʋsʋ-la sɩ hɛ lɩɩŋ daboro-la tʋɔŋ a yuo tɩta. 19Chɛ tori chɛɛŋ, la tɩtɩa chaarɛ lɩɩŋ daboro-la kɩaa ba sɩ kaa wasɛ lɩɩŋ daboro-la dɔnsʋŋ a yuo ta. 20La tapʋlaa yʋga wɩa sɩ bɩ pɔsɔ, chɛnwʋlaa ma bɩ lɩa. Ka pel-la ha faasa lulu kɩŋkɛŋ. Pel-la sɩ faasa lulu ŋɩɩ, la bɩra bɩ yɩɛla arɩ la jaŋ kɛŋ mɩɩsɩŋ.

21Nɩalɩŋ diene ba bɩ kɩaa die. Ŋɩɩ nɛ Pɔɔl sii chɩŋ ba sɩpaaŋ a bʋla pɩba, “Nandɔmba, ʋ fa maga dɩ ma jegile nɩɩ mɩ teeŋ nɛ dɩ la sɩ́ Kiriiti lɛ lɩɩ. Ma nɛ fa ŋaa ŋɩɩ, la kɩaa deemba kala sɩ cheye, ba fa bɩ chei. Kɩalɩŋ ma kala sɩ lɛlɛ fa bɩ jaŋ lɛl. 22Ama mɩɩ sʋlma, má nyɩrɛ bɔyɛ. Lɩɩŋ daboro dʋndʋŋa nɛ jaŋ lɛl, ama ma kʋŋkala bɩ jaŋ sʋʋ. 23Wɩa-la sɩ tɩɩmɛ, mɩ tɩma pʋpʋ, ʋ tɩndaara dɩa kɔ mɩ teeŋ nɛ tɩtaŋɩŋ 24a bʋla pɩmɛ, ‘Pɔɔl, sɩ́ fawʋllʋŋ fá. Ŋ jaŋ mʋ chɩŋ kuoru-balɩŋ Siiza sɩpaaŋ. Wɩa tɩŋ ŋ wɩaa nɛ a leŋ ŋ dɩ nɩalɩŋ kala sɩ hɛ lɩɩŋ daboro tʋɔŋ, kɛŋ mɩɩsɩŋ.’ 25Ŋɩɩ wɩaa, mɩ naambiiriŋ, má nyɩrɛ bɔyɛ. Mɩ laa Wɩa dii arɩ wɩɩ-la kala ʋ sɩ bʋla pɩmɛ, ʋ jaŋ sɛnɛ ŋaa. 26Ama pel-la ta jaŋ yigi lɩɩŋ daboro-la mʋ pɛ chɩŋ dundol-bie kʋbala lɛ lɩɩŋ sɩ gollo chu.”

27Pel-la sɩ kɛnla kaa vɛŋ ŋɩɩ mʋgʋ-bal-la ba sɩɩ yɩrɛ Adɩra tʋɔŋ, ʋ tapʋlaa fii arɩ banɛsɛ chɛɛŋ tɩta-siesee, nɩalɩŋ sɩɩ duori lɩɩŋ daboro-la bɩɩnɛ arɩ baa mʋ dundolo niiŋ nɛ. 28Ŋɩɩ nɛ ba joŋ kʋŋ hɛ lɩɩ-la lɛ dɩ ba magɩsɛ a na ʋ luŋuŋ. Ba na dɩ ʋ luŋie a magɛ naakieliŋ mahɩŋ balɩa. Mʋapɩlɩɩ ba bɩra magɩsɛ a na dɩ ʋ ŋaa naakieliŋ mara arɩ fii. 29Fawʋllʋŋ fa kɛmba arɩ ba jaŋ mʋ ŋmoo bʋŋ. Ŋɩɩ nɛ ba chaarɛ hɔɔnʋ-la ba sɩ yie kaa chɩchagɛ lɩɩŋ daboro-la a kɩkɩɩ. Ba banɛsɛ nɛ ba fa chaarɛ lɩɩŋ daboro-la harɩŋ a chagʋ kɩɩ, aŋ sʋsʋl Wɩa dɩ taŋ pʋl dɩ ba na pʋlʋmʋŋ. 30Ŋɩɩ nɛ nɩalɩŋ fa sɩɩ duori lɩɩŋ daboro-la lɩɩ a chɩchɛ dɩ ba fá, aŋ ka lɩɩŋ daboro-la arɩ nɩkaanaa. Ba lɩɩsɛ lɩɩŋ dabori-bie-la a hɛ lɩɩŋ tʋɔŋ, a fufugisi arɩ baa chɛ dɩ ba lɩɩ lɩɩsɛ hɔɔ-la ba sɩ kaa chɩchagɛ lɩɩŋ daboro-la sɩpaaŋ nɛ. 31Ŋɩɩ nɛ Pɔɔl jɩŋ a bʋla pɩ laalɩyuoroo kʋhɩaŋ-la arɩ laalɩyuoro-la, “Ma bɩ jaŋ kɛŋ mɩɩsɩŋ, see nɩalɩŋ sɩɩ duori lɩɩŋ daboro-la hɛ lɩɩŋ daboro tʋɔŋ.” 32Pɔɔl sɩ bʋl ŋɩɩ, laalɩyuoro-la keri ŋmɛsɩ-la ba fa sɩ kaa vɔɔ lɩɩŋ dabori-bie-la, a leŋ lɩɩŋ joŋo viiri.

33Taŋ sɩ kpagɛ pʋlʋŋ, Pɔɔl sʋl nɩalɩŋ kala sɩ hɛ lɩɩŋ daboro-la tʋɔŋ dɩ ba dii kɩaa a bʋl, “Tapʋlaa fii arɩ banɛsɛ nɛ ŋ-la ma sɩɩ gbɛrɛ wɩɩ-la sɩ jaŋ ŋaama. Ma bɩ kʋŋkala die. 34Ŋɩɩ wɩaa mɩɩ sʋlma dɩ ma dii kɩaa. Dɩ ma nɛ dii kɩaa, ma jaŋ kɛŋ doluŋ, a kɛŋ mɩɩsɩŋ. Ma kʋŋ nyu-pʋŋ ma bɩ jaŋ lɛl.” 35Pɔɔl sɩ bʋl ŋɩɩ dɛrɛ, ʋ joŋ boroboro, a chʋɔlɛ Wɩa ba kala sɩpaaŋ, aŋ chɔgɛ didii. 36Ba nyuŋ nyaasɛ, ba kʋŋkala ma dii kʋdiilee. 37La nɩalɩŋ kala fa sɩ hɛ lɩɩŋ daboro-la tʋɔŋ fa ŋaa zɔɔ-balɩa arɩ mahɩŋ batori arɩ fii arɩ balɩdʋ nɛ. 38Ba kala sɩ dii kɩaa vɔgɛ, ba chaarɛ mɩa-la fa sɩ hɛ lɩɩŋ daboro-la lɛ a hɛ mʋga-la tʋɔŋ, dɩ lɩɩŋ daboro-la sɩ́ faasa yuŋ.

Lɩɩŋ daboro ka chei nɛ

39Taŋ sɩ pʋla, nɩalɩŋ sɩɩ duori lɩɩŋ daboro-la bɩ wuo jɩŋ arɩ ba yi dundolo-la niiŋ nɛ, ka ba yi. Ba na dɩ tinteeŋ nɛ golli lɩɩ-la chu, lɩɩ-la bɩ jal. Lee-la kala taalɛ a kɛŋ hagɩla. Ba bɩɩnɛ ba jaŋ wuo kɛŋ lɩɩŋ daboro-la mʋ chɩŋ hagɩla-la tʋɔŋ. 40Ŋɩɩ nɛ ba keri hɔɔ-bala-la ba fa sɩ yie kaa chɩchagɛ lɩɩŋ daboro-la a lo hɛ lɩɩŋ lɛ. Ba kɛŋ ŋmɛsɩ-la ma puri ba sɩ kaa vɔɔ danyine-la ba fa sɩ kaa kukuosi lɩɩŋ, a dɩdagɛ lɩɩŋ daboro-la wombiiŋ. Ba bɩra wasa kɛŋ gɛnnɩ-la ma ba sɩ kaa vɔɔ lɩɩŋ daboro-la sɩpaaŋ kaa ta ba jɩl, dɩ peliŋ kɛŋ lɩɩŋ daboro-la mʋ lɩɩ-la niiŋ. 41Ama lɩɩŋ daboro-la fá mʋ jʋʋ hagɩlɩ-bumbugulo tʋɔŋ fuo-balaa balɩa sɩ kʋ cheŋ dɔŋɔ a kuro bil. Daboro-la sɩpaaŋ mʋʋrɛ, ʋ bɩ wuo vɛŋ, aŋ ka pel-bal-la ŋaa lɩɩ-peliŋ kʋ ŋmoo lɩɩŋ daboro-la, a leŋ ʋ harɩŋ kala yɛrɛ. 42Ŋɩɩ nɛ laalɩyuoro-la vʋʋrɛ dɩ ba kpʋ nɩalɩŋ ba kɛsɛ tɔ bɩnɩŋ dɩa kala, dɩ ba kʋŋkala sɩ́ wuo lɩɩ a duori lɩɩ-la a fá lɛl. 43Ka laalɩyuoroo kʋhɩaŋ-la faa chɛ dɩ ʋ laa Pɔɔl ta, ŋɩɩ nɛ ʋ bʋla pɩba dɩ ba sɩ́ ŋɩɩ ŋaa. Ʋ ta bʋla pɩba arɩ nɩalɩŋ kala sɩ́ jɩŋ lɩɩŋ a hɛ lɩɩŋ daboro-la tʋɔŋ, dɩ ba laa sɩpaaŋ fɩla tuu a duoro mʋ lɩɩ-la niiŋ, 44aŋ ka dɩ nɩkaana-la ma tuu, dɩ dɔnsʋŋ paa daa-borusuŋ, dɩ dɔnsʋŋ ma paa lɩɩŋ daboro-la dabori-yɛrɩɛ-la, a ma kaa duori lɩɩŋ lɩɩ. Ŋ-la nɛ la kala ŋaa a lɩɩ lɩɩ-la tʋɔŋ suoo.

Currently Selected:

Tɩntɩŋŋaa 27: SIS

Highlight

Copy