Tɩntɩŋŋaa 1

1Mɩ nandɔŋɔ Tɩafɩlos, mɩ-na Luuk laa sɩpaaŋ ŋmʋnsɛ teniŋ a pɩŋ nɛ. Teŋ-la lɛ mɩ dagɛ wɩalɩŋ kala Yesu sɩ ŋaa arɩ wɩalɩŋ kala ʋ sɩ daga, bʋa-la lɛ ʋ sɩ suomo tɩtɩŋ ʋ tɩntɩŋŋaa 2a kaa mʋ tapʋlɩɩ-la Wɩa sɩ joŋu a kaa jɩl Wɩa-jaŋ. Wɩa Dɩŋ-zɔmʋŋ doluŋ lɛ ʋ dagɛ ʋ nanzɔɔba-la ʋ sɩ tʋɔsa tɩntɩmɩɩ-la ba sɩ jaŋ tɩtɩŋ nɛ aŋ-na jɩl Wɩa-jaŋ. 3Ʋ sɩ sii sʋʋŋ lɛ, ʋ kɛŋ ʋ tɩtɩa kʋ dagɛ ʋ nanzɔɔba-la a yʋgɛ nɛ tapʋlaa mahɩŋ balɩa pɛgɛ. Wombiee yʋga nɛ ʋ to kɛŋ ʋ tɩtɩa dagɛba arɩ ʋ weye, aŋ bʋl Wɩa kuorii-la wɩaa a pɩba. 4Bʋa kʋbala lɛ, ʋ dɩ ba hɔnɔ didii kɩaa ʋ bʋla pɩba, “Má sɩ́ Jerusalɛm lɛ lɩɩ, má gbɛrɛ mɩ Nyɩmma zile kʋ-la ʋ sɩ sɩ ʋ jaŋ joŋo pɩma, kʋ-la wɩaa mɩ fa sɩ bʋla pɩma. 5Jɔɔŋ fa kɛŋ lɩɩŋ nɛ a fufo nɩaa Wɩɩchʋɔlɛ lɩɩŋ. Ama ʋ bɩ dieni, ka dɩ Wɩa joŋ ʋ Dɩŋ-zɔmʋŋ hɛ ma lɛ.”

Yesu jɩl Wɩa-jaŋ

6Yesu arɩ ʋ nanzɔɔba sɩ hilimi ŋɩɩ, ba pɩɛsʋ, “La Tɩɩna, tapʋlaa deemba lɛ, ŋ jaŋ bɩra leŋ dɩ Iziral tɩŋŋaa dii kuoruŋ?”

7Ŋɩɩ nɛ Yesu bʋla pɩba, “Mɩ Nyɩmma nɛ kɛŋ doluŋ a hɛ bʋa-la koo tapʋlɩa-la wɩalɩŋ sɩ jaŋ ŋaa. Ʋ tuo ma wɩɩ dɩ ma jɩŋ. 8Ama dɩ Wɩa nɛ joŋ ʋ Dɩŋ-zɔmʋŋ hɛ ma lɛ, ma jaŋ kɛŋ doluŋ, a dii mɩ dansɩa a bʋl mɩ wɩaa Jerusalɛm arɩ Judiya tinteeŋ kala arɩ Samarɩa lɛ, a kaa mʋ dʋnɩa sɛmɛ kala lɛ.”

9Yesu sɩ bʋl ŋɩɩ dɛrɛ, Wɩa joŋu kaa jɩl Wɩa-jaŋ, ka ba chɩna bibeŋ. Ŋɩɩ nɛ duoŋ-bɩlɩmbaanɩŋ kʋ tɔʋ, ba bɩra bɩ ʋ na.

10Ba ha sɩ wʋla bibeŋ wɩa-nyuŋ ŋɩɩ ka ʋ jɩjɩl, dɩ nɩaa balɩa nɛ guu chɩŋ ba sɛmɛ ŋɩɩ, a laalɛ gɛrɩ-pʋllʋŋ 11a pɩɛsɛba, “Galilii tɩmma, bɛɛ nɛ tɩɩ ma chɩnaa beŋ wɩa-nyuŋ? Yesu deeŋ Wɩa sɩ joŋo ma sɩpaaŋ a kaa jɩl Wɩa-jaŋ, ʋ jaŋ mɩɩra kɔ arɩ ma sɩ naʋ dɩ ʋ jɩl Wɩa-jaŋ ŋɩɩ.”

Ba lɩɩsɛ Matɩyas ʋ laa Judas nyuŋ

12Ŋɩɩ nɛ Yesu harɩ-tooro-la lɩɩ peel-la ba sɩɩ yɩrɛ Olif a mɩɩra mʋ Jerusalɛm. A chɩŋ peel-la leriŋ a kaa mʋ Jerusalɛm ʋ yi arɩ meel-daaŋ kpaa magɛ dɔŋɔ nɛ. 13Ba sɩ yi Jerusalɛm, ba mʋ jʋʋ lusuŋ nyuŋ dɩa-la ba sɩɩ jʋʋ Jerusalɛm lɛ. Pɩɩta, Jɔɔŋ, Jeems, Anduru, Fɩlɩp, Tɔmas, Batolomi, Matiu, arɩ Alɩfɩyas nanʋala Jeems, Saamɔŋ Zɛlɔt, arɩ Jeems nanʋala Judas, ba kala nɩɩ jʋʋ dɩ-bala. 14Ba dɩ haalaa dɔnsʋŋ arɩ Yesu naaŋ Mɛɛrɩ arɩ Yesu ŋaanaa, ba kala fa ŋaa nii-bala nɛ aa hilimi nɩmɛ, a fɩɛsɛ sɩɩŋ a chʋchʋɔlɛ Wɩa.

15Tapʋlɩɩ kʋbala ba kʋ hilimi, ba fa yi arɩ nɩaa zɔlɔ arɩ mara. Ŋɩɩ nɛ Pɩɩta sii chɩŋ dɩ ʋ bʋl wɩaa. 16Ʋ sɩ, “Mɩ naambiiriŋ, wɩalɩŋ ba sɩ ŋmʋnsa Wɩa teniŋ tʋɔŋ maga dɩ ba kʋ ŋaa wʋtɩtɩɩ nɛ, Wɩa Dɩŋ-zɔmʋŋ fa sɩ to Devit lɛ a bʋl wɩalɩŋ tɩgɛ Judas lɛ, nɩɩ-la sɩ kɛŋ nɩaa kɔ ba kɛŋ Yesu. 17Judas fa ŋaa la dɔŋɔ nɛ, la kala tɩtɩŋ tɩntɩmɩŋ deeŋ. 18Judas sɩ ŋaa wʋbɔŋ-la, ba joŋ moribiee timu, ʋ joŋo yɔɔ tintee kʋbala. Nɩmɛ nɛ ʋ tuu tele yɛrɛ, ʋ tʋɔŋ kɩaa kala jaasɛ. 19Nʋʋkala sɩ hɛ Jerusalɛm lɛ nɛ nɩɩ wɩɩŋ deeŋ. Ba yikoro lɛ ba kɛŋ lee-la kaa yɩyɩrɛ Akɩlɩdama. Ʋ bʋbʋɔŋ nɛ chalɩŋ tinteeŋ.

20Devit ŋmʋnsa hɛ Wɩa teniŋ sɛmɛ dɔŋɔ ba sɩɩ yɩrɛ Wɩa yɩɩlaa a bʋl,

‘a leŋ dɩ ʋ dɩa pɩŋ jikpeeŋ,

dɩ nʋʋkala sɩ́ nɩmɛ jʋʋ.’

Ʋ bɩra ŋmʋnsa

dɩ nʋʋ jaŋ laa ʋ nyuŋ a tɩtɩŋ ʋ tɩntɩŋŋaa.

21Ŋɩɩ wɩaa nʋʋ nɛ maga dɩ ʋ laa ʋ nyuŋ a pɛ la lɛ dɩ la dii dansɩa arɩ La Tɩɩna Yesu sii sʋʋŋ lɛ. Nɩa deeŋ maga dɩ ʋ lɩɩ nɩalɩŋ fa sɩɩ to la harɩŋ, bʋa-la lɛ Yesu sɩ suomo kɛnla gʋgɔllɛ, 22a suomi bʋa-la Jɔɔŋ fa sɩ fo Yesu Wɩɩchʋɔlɛ lɩɩŋ a kaa mʋ yi tapʋlɩɩ-la Wɩa sɩ joŋu kaa jɩl Wɩa-jaŋ.”

23Ŋɩɩ nɛ ba dagɛ nɩaa balɩa, dɔŋɔ yɩrɩŋ nɛ fa Josɛf Basabas. (Ʋ yɩrɩŋ dɔŋɔ ma nɛ fa Jasɩtɩs.) Dɔŋɔ-la ma yɩrɩŋ nɛ fa Matɩyas. 24Ŋɩɩ nɛ ba kala chʋɔlɛ Wɩa a bʋl, “La Tɩɩna, ŋ jɩŋ nʋʋkala tʋɔŋ nɛ. Ŋɩɩ wɩaa dagɛla nɩaa deemba balɩamɩŋ tʋɔŋ kʋ-la ŋ sɩ lɩɩsa, 25dɩ ʋ ŋaa ŋ nanzɔɔ dɔŋɔ a laa Judas nyuŋ, a tɩtɩŋ ʋ tɩntɩŋŋaa, tɩntɩmɩɩ-la Judas sɩ vɩa aŋ mʋ ʋ dɩ-mʋʋlʋŋ.” 26Ŋɩɩ nɛ ba tɔnsɛ, Matɩyas dii. Ba kɛnʋ pɛ Yesu nanzɔɔba fii arɩ kʋbala-la lɛ.

Currently Selected:

Tɩntɩŋŋaa 1: SIS

Highlight

Copy