Tɩntɩŋŋaa 2

Wɩa Dɩŋ-zɔmʋŋ kʋ tuu

1Ba gbieli-bal kʋbala chɛɛŋ kʋ yi baa yɩrɛ Pɛntɩkɔs. (Tapʋlɩɩ-la nɛ ba yie kɛŋ ba baga kʋ-bumbumba kʋ mʋ pɩ Wɩa.) Chɛɛ-la ba kʋ hilimi dɩ-bala. 2Goŋ kʋbala guu lɩɩ wɩa-nyuŋ kʋ tuu a nagɛ pel-duoŋ, a su dɩa-la tʋɔŋ ba fa sɩ hɔnɔ. 3Ŋɩɩ nɛ ba na kɩaa a nagɛ nyiŋ-gel-biisiŋ. Ba nagɩsɩŋ nagɛ nandelimee. Ba lɩɩ pɩsɛ. Nyiŋ-gel-bie kala togili nʋʋkala sɩ hɛ dɩa-la lɛ. 4Ba sɩ togili nʋʋkala lɛ ŋɩɩ, Wɩa Dɩŋ-zɔmʋŋ hɛba kala lɛ, a pɩba doluŋ ba suomo bʋbʋl yikori dosunuŋ.

5Juu tɩŋŋaa dɔnsʋŋ ma fa hɛ Jerusalɛm lɛ aa fá Wɩa, a lɩɩ dʋnɩa sɛmɛ-na kala. 6Nɩ-daŋ sɩ nɩɩ goŋ deeŋ, ba kala kʋ hilimi. Ba sɩ hilimi ŋɩɩ, ba nɩa dɩ baa bʋl wɩaa ba tɩtɩa yikorusuŋ lɛ. Ʋ ŋaaba wʋkpuŋkpere. 7Ba faasa hirigi a bʋla pɩ dɔŋɔ, “Nɩaa deemba kala ŋaa Galilii tɩŋŋaa nɛ. 8Ɛɛ nɛ saa laa nɩɩ dɩ baa bʋl wɩaa la yikorusuŋ lɛ? 9La dɔnsʋŋ lɩɩ Paatɩa, dɔnsʋŋ lɩɩ Miidia, dɔnsʋŋ lɩɩ Ɩlam. La dɔnsʋŋ lɩɩ Mesopotemia, dɔnsʋŋ lɩɩ Judiya, dɔnsʋŋ lɩɩ Kapadoosia, dɔnsʋŋ lɩɩ Pɔntɔs, dɔnsʋŋ ma lɩɩ Esia. 10La dɔnsʋŋ lɩɩ Firijia, dɔnsʋŋ lɩɩ Pamfiilia, dɔnsʋŋ lɩɩ Ijipiti, dɔnsʋŋ ma lɩɩ Libiya sɛmɛ dɔŋɔ sɩ kpagɛ taŋ-la ba sɩɩ yɩrɛ Siriini. La dɔnsʋŋ ma ŋaa nʋhʋɔraa a lɩɩ Rom. 11La dɔnsʋŋ ŋaa Juu tɩmma nɛ, la dɔnsʋŋ ŋaa nɩaa sɩ bɩ Juu tɩŋŋaa ŋaa aŋ tuto Juu tɩŋŋaa Wɩɩchʋɔlɛ wombiiŋ. La dɔnsʋŋ lɩɩ Kiriiti, dɔnsʋŋ lɩɩ Arebia. La kalaa bʋl yikori dabaŋ dabamba nɛ, ka la nɩɩ dɩ baa bʋl wɩaa la yikorusuŋ lɛ. Wɩa sɩ tɩŋ tɩntɩŋ-duori-la wɩaa nɛ ba bʋbʋl ŋɩɩ.” 12Ba kala hirigi, a bɩ jɩŋ wɩɩ-la tʋɔŋ ba sɩ hɛ, ba pɩpɩɛsɛ dɔŋɔ, “Bɛɛ kʋŋ wɩɩ nɛ ŋ-la?”

13Dɔnsʋŋ ma sisieriba lɛ dɩ ba bugo nɛ.

Pɩɩta bʋl Wɩa wɩaa a pɩ nɩaa

14Pɩɩta arɩ Yesu nanzɔɔba-la fii arɩ kʋbala fa sɩ hɛ nɩmɛ ŋɩɩ, Pɩɩta sii chɩŋ a faasa bʋl, “Mɩ naambiiriŋ Juu tɩmma arɩ ma nɩalɩŋ kala sɩ hɛ Jerusalɛm lɛ, má wuoli ma dɩgɩlaa dɩ mɩ bʋl wɩɩ-la sɩ ŋaa a pɩma. 15Ma bɩɩna nɩaa deemba bugo nɛɛ? Ba bɩ bugo chʋchʋɔ-fɩɛla deeŋ. 16Jowɛl ma fa bʋl wɩɩŋ deeŋ sɩ ŋaa wɩaa nɛ. Ʋ fa ŋaa Wɩa wʋlaabʋllʋ nɛ. Ʋ sɩ,

17‘Wɩa bʋla, ŋ-la nɛ mɩ jaŋ ŋaa tapʋlaa dɩdɛrɩŋ:

Mɩ jaŋ joŋ mɩ Dɩŋ-zɔmʋŋ hɛ nʋʋkala lɛ.

Ma hambolibiisiŋ arɩ ma toloo jaŋ bʋl wɩaa mɩ Dɩŋ-zɔmʋŋ doluŋ lɛ.

Ma bapʋɔsɩ-biisiŋ ma jaŋ nɩna wɩaa a nagɛ duosoo tʋɔŋ.

Ma banɩhɩasɩŋ ma jaŋ duduosi duosoo.

18Chɛɛ-la mɩ jaŋ joŋ mɩ Dɩŋ-zɔmʋŋ hɛ

baala-la arɩ haala-la sɩ ŋaa mɩ tɩntɩnnaa lɛ

dɩ ba kaa bʋbʋl mɩ wɩaa.

19Mɩ jaŋ ŋɩŋaa wʋkpuŋkperisiŋ wɩa-nyuŋ,

aŋ ŋɩŋaa wʋmagɩlaa ma tinteeŋ lɛ.

Chalɩŋ, nyiniŋ arɩ nyʋɔ-bine jaŋ hɛ nɩmɛ.

20Wɩɩpɔsʋŋ jaŋ biri.

Chɛnɛ ma jaŋ fɩɛsɛ a nagɛ chalɩŋ,

ka dɩ La Tɩɩna tapʋl-bal-la ʋ sɩ jaŋ laa yɩrɩŋ-na yi.

21Nɩɩ-la kala sɩ yɩrɛ

La Tɩɩna yɩrɩŋ, ʋ jaŋ laaʋ ta.’ ”

22Ŋɩɩ nɛ Pɩɩta bɩra bʋl, “Iziral tɩmma, má jegile nɩɩ wɩaa deemba mɩ sɩɩ chɛ mɩ bʋla pɩma. Yesu sɩ lɩɩ Nazarɛt nɛ Wɩa lɩɩsa pɩma. Wʋmagɩlaa arɩ wʋkpuŋkperisiŋ Wɩa sɩ to ʋ lɛ ŋaa ma sɩɩŋ lɛ nɛ dagɛ ŋɩɩ. Ma ma jɩma nɛ. 23Wɩa jɩma nɛ aŋ leŋ Yesu jʋʋ ma nɩsɩŋ. Ma nɛ leŋe wʋbɔŋ ŋaaraa kpaasʋ mɛrɛ daagɛsɛ nyuŋ ʋ sʋʋ. 24Ama Wɩa chɩsʋ sʋʋŋ lɛ nɛ, a lɩɩsɛ hɛɛ-la ʋ sɩ na bʋa-la lɛ ʋ sɩɩ sʋʋ. Sʋʋŋ fa bɩ ʋ wuo kaa bibil. 25Devit fa bʋl wɩɩŋ deeŋ nɛ a tɩgɛ ʋ lɛ:

‘Mɩ yie na mɩ Tɩɩna nɛ mɩ sɩpaaŋ bʋa na-kala,

ʋ kpagɛmɛ nɛ, wɩɩkala bɩ jaŋ wuo jigisimi.

26Ŋɩɩ wɩaa mɩ tʋɔŋ tɔrɔ nɛ, mɩ bʋbʋl tʋɔ tɔrɛ wɩaa.

Mɩ ŋaa nuhuobiiŋ nɛ a jaŋ sʋʋ.

Mɩɩ yɩɛlɛ wɩalɩŋ Wɩa sɩ jaŋ ŋaa lɛ nɛ.

27Dɩ mɩ nɛ sʋba, ŋ bɩ jaŋ leŋ dɩ mɩ ka bʋa tʋɔŋ,

koo a leŋ dɩ mɩ-na ŋ Tɩntɩnnɩ-tɩtɩɩ-la yaraa pʋa.

28Ŋ dagɛmɛ wombie-la mɩ sɩ jaŋ to a kɛŋ mɩɩsɩŋ nɛ.

Ŋ jaŋ leŋ dɩ mɩ kɛŋ tʋɔtɔrʋŋ ŋ sɩpaaŋ.’ ”

29Ŋɩɩ nɛ Pɩɩta bɩra bʋl, “Mɩ naambiiriŋ, mɩ jaŋ chaasa bʋl la naabalɩma Devit wɩaa pɩma. Ʋ sʋba nɛ, ba joŋu hugi, ʋ vaamɩŋ ha pɩna nɛ la jaŋ lɛ a kaa kɔ jɩnɩŋ. 30Ʋ fa ŋaa Wɩa wʋlaabʋllʋ nɛ a wuo jɩŋ wɩalɩŋ Wɩa sɩ sɩ ʋ jaŋ ŋaa pʋ. Wɩa ŋmɩɛsa pʋʋ nɛ arɩ ʋ jaŋ leŋ dɩ ʋ-na Devit doho nɩaa dɔŋɔ dii kuoruŋ ʋ nyuŋ lɛ. 31Devit sɩ na wɩɩ-la Wɩa fa sɩɩ chɛ dɩ ʋ ŋaa, ʋ wuo bʋl arɩ Kirisito jaŋ sii sʋʋŋ lɛ, a bɩra bʋl arɩ Wɩa bɩ jaŋ leŋ dɩ ʋ ka bʋa tʋɔŋ dɩ ʋ yaraa pʋa. 32Yesu deeŋ nɛ Wɩa chɩsɛ sʋʋŋ lɛ ʋ kɛŋ mɩɩsɩŋ. La kala na wɩɩŋ deeŋ nɛ a jɩŋ ʋ lɛ. 33Wɩa chɩsʋ ʋ sii jɩla hɔŋ Wɩa nadiiŋ, nɩduoŋ dɩhɔnʋŋ, a bɩra pʋ ʋ Dɩŋ-zɔmʋŋ arɩ ʋ fa sɩ bʋl ŋɩɩ. Dɩŋ-zɔmʋŋ deeŋ Yesu sɩ joŋo hɛ la lɛ jɩnɩŋ, ʋ nɛ wɩalɩŋ ma sɩɩ na a nɩnɩɩ ma. 34Devit tɩtɩa fa bɩ Wɩa-jaŋ jɩla, ama aŋ bʋla tɩgɛ Yesu lɛ,

“La Tɩɩna bʋla pɩ mɩ Tɩɩna:

Hɔŋ mɩ nadiiŋ, nɩduoŋ dɩhɔnʋŋ,

35see dɩ mɩ yuo dii ŋ dʋndɔŋŋɔɔ kala dɛrɛ.”

36Ma Iziral tɩŋŋaa, ma jɩŋ ʋ sɛnɛ ŋaa wʋtɩtɩɩ arɩ Yesu deeŋ ma sɩ kaa kpaasɛ daagɛsɛ nyuŋ, ʋ nɛ Wɩa leŋ ʋ ŋaa La Tɩɩna. Ʋ nɛ bɩra Kirisito ma.”

37Nɩalɩŋ sɩ nɩɩ wɩɩŋ deeŋ Pɩɩta sɩ bʋla, ʋ faasa wʋwalɩmɛba kɩŋkɛŋ. Ŋɩɩ nɛ ba pɩɛsɛ Pɩɩta arɩ Yesu nanzɔɔba-la dɔnsʋŋ, “La naambiiriŋ, bɛɛ kʋŋ nɛ saa la jaŋ ŋaa?” 38Ŋɩɩ nɛ Pɩɩta bʋla pɩba, “Má bɩrɩma lɩɩ ma wʋbɔŋŋɔɔ lɛ, aŋ leŋ dɩ ba foma Wɩɩchʋɔlɛ lɩɩŋ Yesu Kirisito yɩrɩŋ lɛ, dɩ Wɩa joŋ ma wʋbɔŋŋɔɔ chɛma, aŋ joŋ ʋ Dɩŋ-zɔmʋŋ dii zile ma lɛ. 39Wɩalɩŋ Wɩa sɩ bʋla, ma nɛ ʋ bʋla pa, ma dɩ ma biiriŋ arɩ nɩalɩŋ kala sɩ lɩɩ dɩ-boluŋ, nʋʋ na-kala Wɩa sɩ yɩra dɩ ʋ kɔ ʋ teeŋ.” 40Pɩɩta sɩ bʋl ŋɩɩ, ʋ sʋlba a paala chaasa bʋl wɩaa dɔnsʋŋ yʋgɛ a bʋl, “Má lɩɩsɛ ma tɩtɩa nɩbɔŋŋɔɔ deemba tʋɔŋ.” 41Ba tʋɔŋ nɩaa yʋga a laa wɩalɩŋ ʋ sɩ bʋla dii, ba foba Wɩɩchʋɔlɛ lɩɩŋ. Tapʋlɩɩ-la nɩaa yi bʋɩ batori a kʋ pɛ nɩalɩŋ sɩ laa Yesu wɩaa dii lɛ. 42Ba joŋ ba nyuŋ kala hɛ wɩalɩŋ Yesu nanzɔɔba-la sɩɩ dagʋ lɛ arɩ sɩɩfɩɛsɩŋ a kɛŋ nii-bala. Ba kala hɔŋ a didii kʋdiile-la Yesu fa sɩ́ sɩ dɩ ba dii a liliisi ʋ wɩaa, aŋ pɛ gbaara chʋchʋɔlɛ Wɩa.

Nɩalɩŋ sɩ laa Yesu wɩaa dii dɩhɔnʋŋ

43Ŋɩɩ nɛ ba kʋŋkala fɩfá Wɩa, bɛɛ wɩaa Yesu nanzɔɔba-la ŋaa wʋkpuŋkperisiŋ arɩ wʋmagɩlaa yʋgɛ nɛ kɩŋkɛŋ. 44Nɩalɩŋ kala sɩ laa wɩalɩŋ dii, ba kala kʋ hihilimi bʋa na-kala lɛ, ba kɩaa kala ma ŋaa kʋbala. 45Ba yie joŋ ba kɩaa ma yallɛ a kɛŋ moribie-la a kpɩkpaa dɔŋɔ, a magɛ ŋɩɩ nʋʋkala sɩɩ chɛ. 46Tapʋlɩɩ kala ba yie mʋ hilimi Wɩa dɩɩ-bal-la lɛ arɩ ba dɩɩsɩŋ ma lɛ, a kɛŋ tʋɔ-bala a didii kʋdiile-la Kirisito fa sɩ́ sɩ ba dii a liliisi ʋ wɩaa arɩ tʋɔtɔrʋŋ, 47a dɩdɛnnɛ Wɩa. Nɩaa ma kala bɩbɛsɛ ba lɛ. Tapʋlɩɩ-na kala La Tɩɩna yie laa nɩ-falaa ta nɛ, ba kʋʋ pɛ nɩalɩŋ sɩ laa Yesu wɩaa dii lɛ.

Currently Selected:

Tɩntɩŋŋaa 2: SIS

Highlight

Copy