Zakaria 12
12
Mwene Zambi makalamwina Yerusaleme
1Mwene Zambi yalongesa maliji wano hakutwala kuli Aisraele. Kali Mwene Zambi yoze wazazulwile lilu, yoze watangile hashi, yoze wapwishile mutu mukwa mwono. Kanambe ngwenyi: 2“Mungukapwisa Yerusaleme ngwe musenge wa vinyu. Mavungu waze amujingilika maakaunwa, mba maakatalinga ngwe atu waze haazengewa. Muze maakaseleka Yerusaleme, maakaseleka nawa membo eswe akwo a mu Yuda. 3Alioze ha matangwa waze, mungukapwisa Yerusaleme ngwe liwe lilemu. Vungu heswe lize makeseka kulizundula, makalemana. Mavungu eswe a hashi maakalikata akase nenyi jita. 4Ha matangwa waze mungukevwisa tuvwalu two eswe mwongo; eswe waze akwendela ho mungukaazalwisa. Mungukafunga Ayuda, alioze tuvwalu twa akwa kole jo mungukaapupuchisa meso. 5Mba majimo ja Yuda maakalihanjekesa ngwo: ‘Mwene Zambi Mukwa Ndundo Jeswe hatakamisa atu jenyi waze atwama mu Yerusaleme.’
6“Ha matangwa waze mungukapwisa majimo ja Yuda ngwe kahia kaze mukalekwoka mu usaki hanji mu munda wa mbuto yize hiyahia. Maakonona mavungu eswe waze aajingilika. Akwa Yerusaleme maakatwama mu uhwimino mu limbo.
7“Yami, Mwene Zambi, hatangu mungukakwasa tujita twa Yuda kukumba, hanga chichi kalemesa vungu lia David ni akwa Yerusaleme kuhiana Ayuda akwo. 8Ha matangwa waze Mwene Zambi makafunga akwa Yerusaleme. Mba chibwe alelu kuhiana mukachi ko maakabwa ni tachi ngwe chize abwile David. Vungu lia David maakasongwela ngwe kanganda ka Mwene Zambi, ngwe Zambi iye mwene. 9Ha matangwa waze mungukonona mavungu eswe waze maakeseka kwasa jita ni Yerusaleme.
10“Vungu lie David ni akwa Yerusaleme akwo, mungukaaha mbunge ya keke ni zango ya kulemba. Kumaakatala yoze atuwile kunga, yoze ashihile. Kumaakalinyenga hali iye ngwe waze analinyenge hali mwana wa wika. Maakamulila mbimbi chikolo, ngwe waze haatokesa mwano mutangu wa lunga. 11Ha matangwa waze maakalila mbimbi mu Yerusaleme ngwe chize atu mu chana cha Megido akulila Hadade Rimone#12:11 HADADE RIMONE: kota limwe jina lia Bale, zambi ya yibuta ya Akanana ni Asiria. Atu yaanyonga ngwo, zambi yono neye te kakufwa muze yibuta yakuma, ni kakuhinduka muze yibuta yakusokoloka. Atu te kaakulila kufwa chenyi.. 12-14Jiko ni jiko mu chifuchi makanenganyana ayo ene: akwa jiko lia David, ni akwa Levi, ni akwa Shimei, ni majiko eswe akwo. Jiko ni jiko makanenganyana ayo ene, malunga ni malunga, mapwo ni mapwo.”
Currently Selected:
Zakaria 12: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
