Marku 8

Yesu yalisa atu tununu awana

(Tala nawa Mat 15:32-39)

1Ha matangwa waze mbunga yinene yaamukunguluka nawa. Kaabwile ko ni Chuma nichimwe cha kulia. Yesu yatambika tumbaji twenyi ni kwamba ngwenyi: 2“Mbunga yino keke nguneevwila, mumu kaali kulu hamwe ni yami matangwa atatu, keeshi nawa nichimwe cha kulia. 3Nyi namba ngwami ‘Hilukenu, nuye ku mahienu,’ kaalile nichimwe, maalezumuka mu jila, mumu akwo kusuku anakakatuka.” 4Tumbaji twenyi yaakumbulula ngwo: “Muma muno mu puya. Kulihi mutu mawana yakulia ya kulisa mbunga yibwa haha?” 5Yesu yaahula ngwenyi: “Mbolo jingahi nuli najo?” Ayo ngwo: “Shimbiali.”

6Neye yambila mbunga atwame hashi, yanda mbolo shimbiali, yasakwila Zambi, yajibalula, yajihana kuli tumbaji twenyi, ajitetele ye mbunga. No yaajianyina. 7Yabwa nawa ni tumwe tuyishi. Muze Yesu hasakwila Zambi mumu ha tuyishi, yambila tumbaji twenyi atwanyine nawa atu. 8Atu eswe yaalia, yaakuta. Mba tumbaji yaazalisa tupaya shimbiali ni yibalubalu yize yasalile. 9Kwoka cha atu ngwe tununu awana. Hazehene Yesu yaashika. 10Mba Yesu ni tumbaji twenyi yaanjila mu wato, yaaya ku chifuchi cha Dalmanuta.#8:10 Dalmanuta: ku mbumbulu ya chitende cha Galilea, ku chitokelo.

Afariseu yeeta chilayi

(Tala nawa Mat 16:1-4)

11Afariseu#8:11 AFARISEU: tala 2:16. yeeza, yaabutuka kuhamika ni Yesu. Ha kumweseka yaamwita chilayi chize muchaalweza ngwo, chiyulo chenyi cha mwilu. 12Yesu yatwa chikolo mikuma nikwamba ngwenyi: “Kuchi kevwe yenu atu ja mwakono nunafupu chilayi? Chamwenemwene ngunanwambulwila ngwami, chilayi nichimwe manwaha yenu atu ja mwakono.” 13Mba Yesu yaahichika, yanjila mu wato, yazauka musali lia chitende.

Yitumbo ya mbolo ya Afariseu ni ya Aherode

(Tala nawa Mat 16:5-12)

14Tumbaji yaavulama kumbata mbolo yinazuku. Yabwa lume ni mbolo yimuwika mu wato. 15Yesu yaakanyamisa ngwenyi: “Talenu kananwa, keyelenu yitumbo ya mbolo ya Afariseu ni ya Aherode.#8:15 aherode: tala 3:6.” 16Tumbaji yaalihanjekesa ngwo: “Kanambe chino mumu kutushi mbolo.” 17Yesu yachinyingika, yaahula ngwenyi: “Kuchi kevwe nunalihanjekesa ngwenu: ‘Kanambe chino mumu kutushi mbolo’? Kanda nuchinyingika, nyi? Kanda chinulumbunukina, nyi? 18Meso nuli no, kunushi kumona, nyi? Matwi nuli no, kunushi kwivwa, nyi? Kunushi kwiwuluka 19mbolo jize jitano nabalwile kuli atu tununu atano, nyi? Tupaya a yibalubalu angahi nwanjile?” No yaamba ngwo: “Tupaya kumi ni aali.” 20Yesu ngwenyi: “Muze nabalwile mbolo shimbiali kuli tununu awana, tupaya a yibalubalu angahi nwanjile?” Ayo ngwo: “Shimbiali.” 21Neye yamba ngwenyi: “Kanda chinulumbunuka, nyi?”

Yesu yalawisa meso ja kapuputa

22Yaaheta ku limbo lia Betsaida.#8:22 Betsaida: ku mbumbulu ya chitende cha Galilea, ku norde ku chitokelo. Kwenako atu anehenene Yesu kapututa, yaaliumba kuli iye hanga amuse moko. 23Yesu yamukwata ku kwoko, yamutwala haze lia limbo. Muze te hamukwita mate ha meso, yamusa moko, yamuhula ngwenyi: “Muuhasa kumona chimwe Chuma, nyi?” 24Neye yeseka. Yamba ngwenyi: “Ngunamono atu ngwe mitondo, alioze yinende.” 25Yesu yamusa nawa moko ha meso. Mutu yoze yeseka nawa kuhiana, yalaula, yamona yuma yeswe zwalala. 26Yesu yamushika aye ku mahio, ngwenyi: “Kanda unjila mu limbo.”

Petulu yashindakenya ngwenyi: “Yesu mwe Chilamwina yoze Zambi alakenyene.”

(Tala nawa Mat 16:13-20; Luk 9:18-21)

27Yesu ni tumbaji twenyi yaakatuka ko, yaaya ku yihunda hehi ni limbo lia Sesarea Filipu.#8:27 SESAREA FILIPU: kilometro 40 ku norde ya chitende cha Galilea. Mu jila Yesu yaahula ngwenyi: “Atu kuchi akunguvuluka ngwo, nguli iya?” 28Yaamukumbulula ngwo: “Akwo kaakwamba ngwo: ‘Yoano Chipapachisa.’ Akwo ngwo: ‘Eliya.’ Alioze akwo ngwo: ‘Umwe mukwa munanyi mukwo wa Zambi.’ ” 29Yesu yaahula ngwenyi: “Alioze yenu, kuchi nwakunguvuluka ngwenu nguli iya?” Petulu yakumbulula ngwenyi: “Yena mwe Chilamwina yoze Zambi alakenyene.” 30Yesu yaaha koki ngwenyi: “Kanda nwambulwila niumwe hakutwala kuli yami.”

Yesu yambulula kufwa chenyi ni uhindukilo wenyi

(Tala nawa Mat 16:21-28; Luk 9:22-27)

31Yesu yabutuka kulongesa tumbaji twenyi ngwenyi: “Chatamba Mwana Mutu kumona lamba linji. Makulwana ja Ayuda, ni mahako a lutwe a Zambi, ni alongeshi a Shimbi maakalituna ye, maakamushiha, mba ha tangwa lia muchitatu kumakahinduka.” 32Liji lino yalihanjika mwazu. Kashika Petulu yamutwala ku tenga, yabutuka kumukanjisa. 33Alioze Yesu yatewuluka, nikutala tumbaji twenyi, yabajila Petulu ngwenyi: “Ngukatuke Sakwonga, mumu kuushi kunyonga ngwe Zambi, alioze ngwe atu.”

34Hazehene yatambika mbunga hamwe ni tumbaji twenyi, yaamba ngwenyi: “Nyi umwe mazanga kungukaula, alitwamine kulinyonga iye mwene, azundule kulusu yenyi, angukaule. 35Mumu yoze mazanga kulamwina mwono wenyi, kumakautokesa. Alioze yoze matokesa mwono wenyi mumu hali yami ni ha Sango Jibema, kumakaulamwina. 36Mutu chika mafumbula nyi mabita hashi heswe, alioze makatokesa mwono wenyi? 37Mutu chika mahasa kuhana ha kuyuka mwono wenyi nawa? 38Mumu yoze manguvwila sonyi, yami ni longeso liami hakachi ka atu ja mwakono, yihulia kanda yivulumunyi, yami Mwana Mutu nawa mungukamuvwila sonyi muze mungukeza mu uhenya wa Tata hamwe ni tunganda a mwilu.”

Currently Selected:

Marku 8: CHK1970

Highlight

Copy