Marku 7

Ndako ja tushakulu

(Tala nawa Mat 15:1-9)

1Afariseu#7:1 afariseu: tala 2:16. ni amwe alongeshi a Shimbi yaakatuka ku limbo lia Yerusaleme, yaakunguluka kuli Yesu. 2No yaamona tumbaji twenyi akwo, te anali ni moko a majilo, kulumbunuka ngwo, keeshi kusana nikulita ni ndako ja chijila cha Ayuda.

3Mumu Afariseu, kumana Ayuda eswe, kaakufunga Shimbi ja tushakulu. Keeshi kulia, nyi kanda achisana ku moko nikulita ni ndako yo. 4Ha kukatuka ku yitanda, te keeshi kulia ndoo haakosa yuma yize alandanga. Shimbi jikwo jinji nawa te akufunga, ngwe kukosa misenge, ni milondo, ni yenga ya utale, ni mihela.

5Afariseu ni alongeshi a Shimbi yaahula Yesu ngwo: “Kuchi kevwe tumbaji twe keeshi kufunga Shimbi ja tushakulu? Kuchi kevwe anali ni moko a majilo?” 6Yesu yamba ngwenyi: “Izaya kanawa ahanjikile munanyi hakutwala kuli yenu, yilembekese, ngwe chize hichinasonewa mu Mukanda wa Zambi ngwo:

‘Atu wano kaakungulemesa ni makanwa jo,

alioze mbunge jo jili kusuku ni yami.

7Chamokomoko akunguwayila,

mumu kaakulongesa ndako ja atu ngwe Shimbi jami,’ Chenacho anambe Zambi.”

8Yesu yamba nawa ngwenyi: “Nwakuhichika Shimbi ja Zambi ni kukakaminya ndako ja atu.”

9Neye yaamba nawa ngwenyi: “Kanawa nwakwehuka Shimbi ja Zambi hanga nuhase kulalaminya ndako jenu! 10Mumu Mose hanambe: ‘Lemesa tatenu ni noko’; nawa ‘Yoze mahanjika yibi hali tato hanji naye, chatamba kumushiha’ 11Alioze yenu nwakwamba ngwenu, yoze mambila naye hanji tato ngwenyi: ‘Kukwasa cha yikumba yami yize nazanga kukwasa nayo yena, hiyabwa korbane,’ (kulumbunuka ngwo, hinayihana kuli Zambi), 12kunushi kumutayiza nawa kukwasa tato hanji naye. 13Chenacho nwakupwisa liji lia Zambi ngwe Chuma chamokomoko mumu ha ndako jize nwakulongesa. Yuma yinji yikwo yalifwa ni yino nwakulinga.”

Yuma yize yakuvulumwisa mutu

(Tala nawa Mat 15:10-20)

14Yesu yatambika nawa mbunga ngwenyi: “Banjikenu, yenu eswe, hanga chikanulumbunukine ngwo, 15chize chakukatuka haze ni kunjila muli mutu kuchishi kumuvulumwisa, alioze yize yakutuhuka mu mbunge ya mutu, ye yakumuvulumwisa. (16Yoze uli ni matwi, evwe kwenyi!)”

17Muze hakatuka ku mbunga, hanjila mu zuwo, tumbaji twenyi yaamuhula ulumbunwiso wa chishima chize. 18Yesu ngwenyi: “Kuchi, ni yenu nawa kunushi malinjekela, nyi! Kuma kunwanyingikine ngwenu, nichimwe chize muchikatuka haze ni kunjila muli mutu muchihasa kumuvulumwisa, nyi? 19Mumu kuchishi kunjila mu mbunge yenyi, alioze mu jimo lienyi, mba yakutuhuka ku mujimba wenyi.” Ha liji lino Yesu yaanyingikisa ngwenyi, yakulia yeswe atu maahasa kuyilia kanawa.

20Yesu yamba nawa ngwenyi: “Yuma yize yakutuhuka mu mbunge ya mutu yenayo yakumuvulumwisa. 21Mumu muchima lia mbunge ya mutu mwakutuhuka manyonga abi, e akumuzondola ni kulinga utanji ni twamishi, ni kwiya, ni kushiha atu, 22ni kulinga utanji ni waze ali ku malo, ni kwivwa lwahu wa mbongo, ni kulinga yibi kuli atu akwo, ni kubwa ni kalimbalimba, ni kwivwa usolo ubi ni ukwa, ni kushililika, ni kulisuta, ni kubwa ni uhepuke. 23Yino yeswe yakutuhuka mu mbunge ya mutu, yenayo ye yaamuvulumwisa.”

Umwe pwo, chilambala, yafuliela Yesu

(Tala nawa Mat 15:21-28)

24Yesu yakatuka ko, yaya ku chifuchi chize chakusulangana ni limbo lia Tiru,#7:24 TIRU: tala 3:8. yanjila mu limwe zuwo. Kazangile niumwe kunyingika kuze te ali, hindu kahashile kuswama. 25Kuma umwe pwo wabwile ni mwanenyi mukepe wa pwo, yoze te ukwete mwiku wa luchisa. Muze hevwa sango ja Yesu, yeza kuli iye nikawashi, yafulamana ku molu jenyi. 26Mwe pwo chilambala, yasemukina ku Fenishia mu chifuchi cha Siria, yaliumba kuli Yesu atuhwise mwiku wa luchisa muli mwanenyi. 27Yesu yamwamba ngwenyi: “Achecha hatangu ana achikute, mumu kuchalitele kwanda yakulia ya ana ni kuyimbilila tuwa.” 28Pwo ngwenyi: “Chochene Mwene, alioze chibwe tuwa kushi lia mesa kaakulia yifwenyufwenyu ya yakulia ya ana ja atu.” 29Mba Yesu yamba ngwenyi: “Mumu ha kumbululo lino, muuhasa kuhiluka ku mahie. Mwiku wa luchisa hiwatuhuka muli mwane.” 30Yahiluka ku mahienyi kuwana mwanenyi kanabombo ha muhela, mwiku wa luchisa hiwamutuhuka.

Yesu yawuka kafwa matwi kanda kanaye

31Yesu yakatuka mu chifuchi chakusulangana ni Tiru, yaya mu jila ya Sidone#7:31 TIRU… SIDONE: tala 3:8. ndoo mu chifuchi cha Membo Kumi#7:31 CHITENDE CHA GALILEA: tala 1:16. ni kuhiluka ku chitende cha Galilea.#7:31 membo kumi: tala 5:20. 32Atu yaamunehena kafwa matwi kanda mukwa chilimi, yaamulembela amuse kwoko. 33Yesu yaya nenyi ha ukawenyi, yamusa minwe mu matwi, yafwila mate, mba yasa munwe ku limi lienyi. 34Yesu yatala kwilu, yatwa mikuma, yamwamba ngwenyi: “Efata,” kulumbunuka ngwo: “Jikuka.” 35Hazehene matwi jenyi yaajikuka. Limi lienyi yilitusuka. Neye yabutuka kuhanjika mwazu. 36Yesu yaaha koki chikolo ngwenyi: “Kanda nwambulwila niumwe.” Alioze chibwe waahele koki chikolo, hindu yaachinyingikisa kuhiana. 37Atu yaalishimwoka kuhiana, yaamba ngwo: “Hanalingi yuma yeswe kanawa. Kakwivwisa chibwe afwa matwi, kakuhanjikisa tunaye.”

Currently Selected:

Marku 7: CHK1970

Highlight

Copy