Marku 9
9
1Yesu yamba nawa ngwenyi: “Chamwenemwene ngunanwambulwila ngwami atu akwo anamana kuno keechi kafwa ndoo maakamona Wanangana wa Zambi uneza ni tachi.”
Mujimba wa Yesu yiwalumuka
(Tala nawa Mat 17:1-13; Luk 9:28-36)
2Muze matangwa asambano haabalika, Yesu yatwala hamwe nenyi Petulu, ni Tiangu (Jake), ni Yoano. Yaakandwisa ha mulundu usuku, haze yabwa ukawo. Kwenako kusoloka chenyi yichalumuka. 3Mahina jenyi yaabeyima kuhiana, yaatoma lume. Mukwa kukosa niumwe hano hashi mahasa kwatomesa chichize. 4Hohene Eliya ni Mose yaasoloka, te pande anate ni Yesu. 5Petulu yambila Yesu ngwenyi: “Longeshi, chinawaha tubwe kuno. Tutungenu yikulika yitatu, cha yena, ni cha Mose, ni cha Eliya.” 6Te kanyingikine chize anambe, mumu ayo eswe yeevwa woma unji. 7Lelwa yilisoloka, yiliazulamina chizulie. No yeevwa liji mu lelwa ngwo: “Yono mwe Mwanami yoze nakuzanga kuhiana, mwivwenu.” 8Susumuku tumbaji yaatala sali ni sali, alioze kaamwene mutu niumwe shina Yesu wika.
9Muze te anapalumuka ha mulundu, Yesu yaaha koki ngwenyi: “Kanda mwambulwila niumwe yize hinwamona ndoo Mwana Mutu#9:9 mwana mutu: tala 2:10. makahinduka ku kufwa.” 10No yaafunga liji lino, alioze yaalihula mukachi ko chize kuhinduka ku kufwa muchibwa. 11Yaahula Yesu ngwo: “Kuchi mba alongeshi a Shimbi akwamba ngwo, chatamba Eliya kwiza hatangu?” 12Yesu ngwenyi: “Chenacho, Eliya chamutamba kwiza hatangu ni kululika yuma yeswe. Alioze kuchi mba hichinasonewa mu Mukanda wa Zambi ngwo: ‘Mwana Mutu chamutamba kwivwa lamba linji, mamupwisa wamokomoko’? 13Alioze ngunanwambulwila ngwami, Eliya haneza kulu. Atu haanamulingi chize cheswe azangile, ngwe chize hichinasonewa hakutwala kuli iye.”
Yesu yatuhwisa mwiku wa luchisa muli mwana
(Tala nawa Mat 17:14-21; Luk 9:37-43a)
14Muze haaheta kuli tumbaji akwo, yaamona mbunga yinene anaajingilika. Alongeshi a Shimbi te analihangujola ni tumbaji. 15Ha kumona Yesu, mbunga yaalishimwoka kuhiana, yaazomboka fuji kuli iye, yaamumeneka. 16Yesu yahula tumbaji twenyi ngwenyi: “Yika nunalihangujola no?” 17Umwe lunga wa mu mbunga yamukumbulula ngwenyi: “Longeshi, nakunehenanga mwanami wa lunga, mumu mwiku wa kanaye akwete. 18Kweswako mwiku muumukwachila, muumulimbula. Mba mwana matutumuna fulufulu, malikobola ku mazo, mujimba muuma chau. Naliumbanga kuli tumbaji twe hanga atuhwise mwiku uze, alioze kaahashile.” 19Yesu yamba ngwenyi: “Mhmm! Ayenu akwa kuyambashana! Ndoo mwiji muka Changutamba kubwa hamwe ni yenu? Ndoo mwiji muka Changutamba kulihumikiza ni yenu? Ngunehenenu mwe mwana.” 20Yaamuneha. Mwiku wa luchisa, ha kumona Yesu, yiutunyisa mwana. Mwe mwana yalimbuka hashi, yalangumuka ni kututumuna fulufulu. 21Yesu yahula tato ngwenyi: “Miaka yingahi akubwa chechize?” Tato ngwenyi: “Chize ku ukemba wenyi. 22Yisuho yinji mwiku wa luchisa te wakumulimbwola mu kahia ni mu meya hanga amushihe. Alioze, nyi muuhasa kulinga chimwe Chuma, tuvwile kama keke, utukwase.” 23Yesu ngwenyi: “Kuwamba ngwe: ‘Nyi muuhasa.’ Yuma yeswe muyihasa kubwa kuli yoze unafuliela.” 24Hazehene tato yakololoka ngwenyi: “Ngunafuliela. Ngukwase kama, ufulielo wami ukepe.”
25Yesu, ha kumona mbunga ni kukundama fuji, yakalumukina mwiku wa luchisa ngwenyi: “Yena mwiku wa kanaye kanda kafwa matwi, ngunakwambe ngwami, tuhuka muli iye. Kanda umunjila mo nawa.” 26Mwiku wa luchisa yiukololoka ni liji linene, yiumutunyisa kuhiana, mba yiutuhuka. Mwana yabwa ngwe mufu lume, chocho anji yaamba ngwo: “Hafwa.” 27Alioze Yesu yakwata mwana ku kwoko, yamukatwisa, mba mwana yakatuka, yamana.
28Muze Yesu hanjila mu zuwo, tumbaji twenyi yaamuhula ha ukawo ngwo: “Kuchi mba yetu kutwahashile kutuhwisa mwiku uze wa luchisa?” 29Yesu yamba ngwenyi: “Mwiku ngwe uno kuushi kutuhuka, shina ha kulemba Zambi, mba muutuhuka.”
Yesu yambulula nawa kufwa chenyi ni uhindukile wenyi
(Tala nawa Mat 17:22-23; Luk 9:43b-45)
30Yesu ni tumbaji twenyi yaakatuka ko, yaabalika ndusu mu chifuchi cha Galilea.#9:30 GALILEA: tala 1:9. Yesu te kazangile mutu niumwe kuchinyingika, 31mumu yalongesa tumbaji twenyi. Yaamba ngwenyi: “Maakunjika Mwana Mutu#9:31 mwana mutu: tala 2:10. ku moko ja atu waze maakamushiha. Mba ha tangwa lia muchitatu kumakahinduka.” 32Tumbaji keevwile ko kanawa ulumbunwiso wa liji lino, alioze yeevwa woma kumuhula.
Iya munene Wahiana?
(Tala nawa Mat 18:1-5; Luk 9:46-48)
33No yaaheta ku Kafarnaume.#9:33 Kafarnaume: tala 1:21. Muze te ali mu zuwo, Yesu yaahula ngwenyi: “Yika nwabwanga ni kulihangujola mu jila?” 34Yaahola kuluu, mumu mu jila yaalihamika mukachi ko ngwo: “Iya munene Wahiana?” 35Yesu yatwama, yatambika tumbaji kumi ni aali ni kwamba ngwenyi: “Nyi umwe mazanga kubwa mutangu, chamutamba kubwa kunyima lia akwo eswe, kanda kavumbi ko.” 36Yesu yanda kanuke, yamumika mukachi ko, yamusa mu kondo, yamba ngwenyi: 37“Yoze matambula umwe wa kuli twanuke wano akepe mujina liami, mangutambula yami. Yoze mangutambula, hi yami wiko ko matambula, alioze matambula nawa yoze wangutumine.”
Yoze keshi kulimika ni yetu, kali niwetu
(Tala nawa Luk 9:49-50)
38Yoano yambila Yesu ngwenyi: “Longeshi, twamwene umwe mutu te kanatuhwisa mwiku wa luchisa mu jina lie. Twamukanjishile, mumu hi wa ku mbunga yetu ko.” 39Alioze Yesu yakumbulula ngwenyi: “Kanda numukanjisa, mumu mutu niumwe yoze malinga chikomokeso mu jina liami, mahasa nawa kungwamba yibi nikawashi. 40Mumu yoze keshi kulimika ni yetu, kali niwetu. 41Yoze manwaha musenge wa meya a kunwa mumu nuli a Kristu chamwenemwene ngunanwambulwila ngwami, mutu yoze makatambula chawana chenyi.”
Yeseko ya uvulumwino
(Tala nawa Mat 18:6-9; Luk 17:1-2)
42“Yoze mavulumwisa umwe wa kuli twanuke wano akepe waze akungufuliela, chinalite amukase liwe linene ha kota ni kumumbila mu kalunga lwiji. 43Nyi kwoko lie liakukuvulumwisa, libatule. Shinoho ukanjile mu mwono wamwenemwene ni kwoko limuwika, kuhiana chize muufunga moko je eswe aali akakumbile mu kahia kaze kukeshi kuhasa kujima, [ 44Muze ‘vuno lio keshi kufwa mo, ni kahia kukeshi kujima mo.’]#9:44Yisoneko yikwo yikulu kuyishi ni maliji wano. 45Nyi kulu lie liakukuvulumwisa, libatule. Shinoho ukanjile mu mwono wamwenemwene ni kulu limuwika, kuhiana chize muufunga molu je eswe aali akakumbile mu kahia. [ 46Muze ‘vuno lio keshi kufwa mo, ni kahia kukeshi kujima mo.’]#9:46 Yisoneko yikwo yikulu kuyishi ni maliji wano. 47Nyi liso lie liakukuvulumwisa, litombongone. Shinoho ukanjile mu Wanangana wa Zambi ni liso limuwika, kuhiana chize muufunga meso je eswe aali akakumbile mu kahia. 48Muze ‘vuno lio keshi kufwa mo, ni kahia kukeshi kujima mo.’ 49Mumu mutu mweswe makamuvunjila ni kahia.
50“Mungwa Chuma chibema. Alioze nyi mungwa hiwasamuka, neka mauyemesa? Bwenu ni mungwa muli yenwene, bwenu ni uhwimino hakachi kenu.”
Currently Selected:
Marku 9: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
