Marku 6

Akwa Nazare yaalituna Yesu

(Tala nawa Mat 13:53-58; Luk 4:16-30)

1Yesu yakatuka ko, yaheta ku limbo kuze akolelele. Tumbaji twenyi yaaya nenyi. 2Ha tangwa lia kuhwima yabutuka kulongesa mu zuwo lia kuwayila lia Ayuda. Atu anji abwile mo. Muze heevwa longeso lienyi, yaalishimwoka kuhiana, yaalihula ngwo: “Yuma yino kulihi ayiwana? Mana aka atambula? Ngwe kuchi analingi yikomokeso yino? 3Awu hi mukwa kusonga mabaya ko, nyi? Hi mwana wa Maria ko, nyi? Hi yayo ya Tiangu (Jake), no Jose, ni Yudase, ni Simone ko, nyi? Mandumbu jenyi keeshi hakachi ketu, nyi?” Mba yaalituna ye. 4Yesu yaamba ngwenyi: “Kuma kweswe mukwa munanyi wa Zambi kaakumulemesa, alioze mu limbo lienyi mwene, ni ku vungu lienyi, ni ku jiko lienyi, keeshi kumusa vumbi.” 5Kahashile ko kulinga chikomokeso nichimwe, shina yasa moko hali mieji akepe, yaawuka. 6Yesu yalishimwoka mumu kaafulielele ko.

Yesu yatuma tumbaji kumi ni aali

(Tala nawa Mat 10:5-15; Luk 9:1-6)

Yesu yendangana mu membo eswe akujingilika ni kulongesa. 7Yatambika tumbaji twenyi kumi ni aali, mba yabutuka kwatuma aali aali. Yaaha chiyulo cha kutuhwisa nacho mwiku wa luchisa. 8Yaaha Shimbi yino ngwenyi: “Kanda numbata Chuma nichimwe mu wenyi: chibwe yakulia, hanji chibakumuna, chibwe mbongo nijimwe mu miya, shina lume lukanda ku kwoko. 9Nuzala sapato, alioze kanda nuzala yikuto yaali.” 10Yaamba nawa ngwenyi: “Lieswe zuwo munukanjila, twamenu kwe kuze ndoo munukakatuka ko. 11Nyi atu a kuma kuze keechi kanatambula hanji kunwivwa, katukenu ko ni kukukumuna fufuta ya ku molu jenu ha kwatoweza.” 12No yaatuhuka, yambujola ngwo, atu alumuke ku mbunge. 13Yaatuhwisa mwiku wa luchisa unji, yaawayisa mieji anji maji ni kwawuka.

Kufwa cha Yoano Chipapachisa

(Tala nawa Mat 14:1-12; Luk 9:7-9)

14Mwanangana Herode#6:14 Herode: Herode Antipase, mukwa kuyula Galilea. Tala 1:14. yevwa lufuma wa Yesu, mumu jina lienyi yilifumana. Amwe atu yaambamba ngwo: “Yoano Chipapachisa hahinduka ku kufwa. Kashika kali ni ndundo ja kulinga yikomokeso yino.” 15Alioze akwo ngwo: “Kali Eliya.” Akwo ngwo: “Kali mukwa munanyi wa Zambi ngwe waze a ku shakulu.”

16Alioze muze Herode hachivwa, yamba ngwenyi: “Mwe Yoano, yoze natapile mutwe, mwenawo Zambi hamuhindwisa.” 17Herode mwe watumine akwate Yoano, yamusa mu zuwo lia lamba mumu hali Herodia. Yino yeswe yabwile mumu Herode wambachile Herodia, chibwe wabwile pwo lia yayo Filipe. 18Yoano te hambila Herode ngwenyi: “Kuchalitele ni Shimbi kumbata pwo lia yayenu.” 19Kashika, Herodia yahalila Yoano, yazanga kumushiha, alioze kahashile, 20mumu Herode yevwila Yoano woma, yanyingika ngwenyi, kali mukwa ululi kanda munangi. Kashika, yamufunga kanawa. Herode yakakashana kuhiana muze amuvwile, alioze yawahilila kumwivwa.

21Alioze tangwa lia mihalo ya Herodia yiliheta. Herode yalulika chiwanyino cha tangwa lia kusemuka chenyi, yatambika akwa lufuma a mu wanangana wenyi, ni miata a jita, ni atu a lufuma a mu Galilea.#6:21 Galilea: tala 1:19. 22Mwana wa Herodia wa pwo yanjila, yahangana, yawahila Herode ni waze eswe abwile nenyi ku mesa. Mwanangana yambila mwana pwo ngwenyi: “Ngwite cheswe Chuma unazange, mungukwaha cho.” 23Yamulakenya ni Shingo ngwenyi: “Cheswacho muungwita, mungukwaha cho ndoo ku Chihanda cha hakachi cha wanangana wami.” 24Mwana pwo yaatuhuka, yahula naye ngwenyi: “Yika mungwita?” Naye ngwenyi: “Mutwe wa Yoano Chipapachisa.” 25Mwana pwo yahiluka nikawashi kuli mwanangana, yamwita ngwenyi: “Ngwehe Mutwe wa Yoano Chipapachisa haliabwila lume ha chenga.” 26Mwanangana yevwa chinyengo chinji. Alioze mumu hali mashingo jenyi, ni hali waze te anatwama nenyi ku mesa kahashile kumuhangulula. 27Hazehene mwanangana yatuma umwe kajita hanga anehe mutwe wa Yoano. Mwe kajita yatuhuka, yaya ku zuwo lia lamba, yatapa Yoano Chipapachisa. 28Yaneha mutwe wenyi ha chenga, yamwaha wo mwe mwana pwo. Neye yautwalila naye. 29Muze tumbaji twa Yoano haachivwa, yeeza ni kwanda mujimba wenyi, yaaya ni kuufunda.

Yesu yalisa atu tununu atano

(Tala nawa Mat 14:13-21; Luk 9:10-17; Yoa 6:1-14)

30Tunganda yaahiluka, yaakunguluka kuli Yesu, yaamwambulwila yize yeswe alingile ni yize alongesele. 31Atu anji ejilejile ni ayileyile. Yesu ni tumbaji twenyi yaahona chibwe ola ya kulia. Kashika Yesu yaambila ngwenyi: “Tuyenu kuma kwa ukawetu hanga nuhwime kama hakepe.” 32Mba yaaya ayo ene mu wato kuma kwa ukawo.

33Alioze atu anji aamwene ni kukatuka, yaanyingika, yaazomboka a ku membo eswe, yaahanga kuheta. Yesu ni tumbaji twenyi te kanda achiheta ko. 34Muze te anatuhuka mu wato, Yesu yamona mbunga yize yinene. Yeevwila keke mumu abwile ngwe mapanga waze keeshi kafunga, mba yabutuka kwalongesa yuma yinji. 35Muze te tangwa hiliendala chikolo, tumbaji twenyi yaamukundama, yaamwamba ngwo: “Kuma kuno tuli kwa ukawetu, ni tangwa hiliendala chikolo. 36Shikenu atu wano, hanga aye kuli waze atwama ku minda ni ku yihunda yakujingilika, akalilanjile yakulia.” 37Yesu ngwenyi: “Ahenu yenwene yakulia.” No yaamuhula ngwo: “Tuye tulande mbolo ja kufwika kulakaji jaali ja mbongo tukaahe yakulia, nyi?” 38Yesu ngwenyi: “Mbolo jingahi nuli najo? Yeenu nutale.”

Muze haanyingika, yaamukumbulula ngwo: “Mbolo jitano ni yishi aali.”

39Hohene Yesu yambila tumbaji ngwenyi: “Atwamisenu eswe ngango ni ngango ha mwambu wa wisu.” 40No yaatwama ha ngango ja kulakaji kulakaji ni makumi atano atano. 41Yesu yanda mbolo jitano ni yishi aali, yatala kwilu, yasakwila, mba yabalula mbolo, yajihana kuli tumbaji ajanyine e atu. Yaanyina nawa yishi aali, ayo eswe. 42Eswe yaalia, yaakuta. 43Tumbaji yaazalisa tupaya kumi ni aali a yibalubalu ya mbolo ni yishi yize yasalile ho. 44Waze alile yakulia yize, kwoka cho, tununu atano a malunga.

Yesu yenda ha chitende

(Tala nawa Mat 14:22-33; Yoa 6:15-21)

45Hazehene Yesu yanjisa tumbaji twenyi mu wato, hanga atetekele musali lia chitende ku limbo lia Betsaida, shimbu iye mwene te machishika mbunga. 46Muze haashika, yakanduka ha mulundu mu kulemba. 47Muze tangwa hiliatoka kulu, wato yiubwa mukachi ka chitende, Yesu yasala ukawenyi ha tunda. 48Neye yaamona nikubinda ni miavu ya meya, mumu fuji yiiyabinjisa. Mba hakamwihi ni ndemba mutangu, Yesu yakundama nikwenda ha meya, yazanga kwahiana. 49Muze haamona Yesu kanende ha meya, tumbaji yaanyonga ngwo, mujimu, yaateta chikolo, 50mumu eswe yeevwa woma muze te anamumono. Alioze hazehene Yesu yaamba ngwenyi: “Hamukenu! Yami mwene. Kanda nwivwa woma!” 51Neye yanjila mu wato, mba fuji yiihola. No yaalishimwoka kuhiana, 52mumu te kaanyingikine kanawa chikuma cha mbolo, mumu mbunge jo jakalile.

Yesu yawuka mieji mu chifuchi cha Genezare

(Tala nawa Mat 14:34-36)

53No yaazauka, yaaheta ku tunda mu chifuchi cha Genezare,#6:53 Genezare: chifuchi cha mavu abema ku mbumbulu ya chitende cha Galilea ku norde ku chitokelo. yaakasa wato ku mbumbulu. 54Muze te haatuhuka mu wato, hazehene atu yaayingika Yesu. 55No yaazomboka mu chifuchi chize cheswe, yaamunehena mieji ha mihela yo, muze heevwa ngwo: “Kwali akuze.” 56Kweswe kuze ayileyile mu yihunda, ni mu membo, chibwe kuli waze te atwama ku minda, atu te kaakusa mieji ha yitanda mba yaamulembejeka ni kwatayiza kukwata kama ku songo lia hina lienyi. Eswe waze amukwachile yaahindwoka.

Currently Selected:

Marku 6: CHK1970

Highlight

Copy