Mateu 27

Yesu ku meso ja Pilatu

(Tala nawa Mar 15:1; Luk 23:1-2; Yoa 18:28-32)

1Chichamene cheswe, mahako a lutwe a Zambi eswe ni makulwana ja Ayuda yaatwama Yesu punga hanga amushihise. 2No yaamukasa, yaamutwala nikumukunjika kuli mukwa kuyula, Pilatu.#27:2 pilatu: Karoma, mukwa kuyula wa yifuchi ya Yudea, ni Samaria, ni Idumea mu wanangana wa Aroma ha miaka 26—36.

Yudase yalisukika

(Tala nawa Yil 1:18-19)

3Muze Yudase, yoze wamukunjikile kuli akwa kole jenyi, hamona ngwenyi, Yesu haamuhisa, yevwa chinyengo, yahilwisa makumi atatu a mbongo kuli mahako a lutwe ni kuli makulwana, 4yamba ngwenyi: “Hinavulumuna ni kukunjika yoze keshi chitela cha kufwa.” Alioze yaamukumbulula ngwo: “Mba ayo milonga yetu, nyi? Ayize yinakutale yena mwene!” 5Yudase yambila mbongo mu zuwo lia Zambi, yaya yalisukika.

6Mahako a lutwe yaanda je mbongo nikwamba ngwo: “Kuchalitele kujisa mu mushete wa mu zuwo lia Zambi, mumu jili ndando ja manyinga.” 7Muze haalitesa, yaalanda munda wa tengi ni mbongo jize, ya kufunda mo yilambala. 8Kashika munda uze akuuvuluka ngwo; “Munda wa Manyinga” ndoo ni musono.

9Chenacho chamanunukine liji lize ahanjikile Zambi kuli mukwa munanyi wenyi, Jeremia, ngwenyi: “No yaatambula makumi atatu a mbongo (ndando yize mbunga ya Israele anyongene ya kumulanjisa.) 10No yaalanda najo munda wa tengi ngwe chize angushikile Mwene Zambi.”

Pilatu yahula Yesu yihula

(Tala nawa Mar 15:2-5; Luk 23:3-5; Yoa 18:33-38)

11Yesu yamana ku meso ja mukwa kuyula Pilatu. Neye yamuhula ngwenyi: “Mwe mwanangana wa Ayuda yena, nyi ka?” Yesu ngwenyi: “Kuwamba.” 12Alioze kakumbulwile ko nichimwe ku kusuma cha mahako a lutwe a Zambi ni makulwana ja Ayuda. 13Hohene Pilatu yamuhula ngwenyi: “Kuushi kwivwa yuma yibwa haha anakusumu nayo, nyi?” 14Alioze Yesu kakumbulwile liji nilimwe. Ha chino mwe mukwa kuyula yalishimwoka kuhiana.

Pilatu yakunjika Yesu ku kufwa

(Tala nawa Mar 15:6-15; Luk 23:13-25; Yoa 18:39—19:16)

15Ha chiwanyino cheswe cha Kubalika mukwa kuyula ndako abwile nayo ya kutusula funge umuwika, yoze te mbunga meeta. 16Ha tangwa lize, funge abwile nenyi wa lufuma mubi, jina lienyi te Yesu Baraba. 17Pilatu yahula mbunga yize akungulukile ngwenyi: “Iya nunazange ngunutuswile, Yesu Baraba, hanji Yesu yoze anavuluka ngwo, Kristu?” 18Mumu te kananyingika pundu ngwenyi, haakunjika Yesu mumu ha ukwa.

19Shimbu te Pilatu machitwama ha chitwamo cha ubatwilo, mwazovu wenyi yamutumina liji ngwenyi: “Kanda Ulinga nichimwe kuli yono mukwa ululi, mumu ufuku wa musono nabindanga kuhiana mu chilota hakutwala kuli iye.”

20Mahako a lutwe ni makulwana ja Ayuda yaakununa mbunga hanga ete atuswile Baraba ni kushihisa Yesu. 21Mukwa kuyula yaahula ngwenyi: “Iya mukachi ka wano aali nunazange ngunutuswile?” No yaakumbulula ngwo: “Baraba.” 22Pilatu yaahula ngwenyi: “Mba kuchi mungulinga ni Yesu, yoze anavuluka ngwo, Kristu?” Eswe yaakumbulula ngwo: “Muhachile ha kulusu!” 23Alioze Pilatu ngwenyi: “Chibi chika kevwe anakalinga?” Hohene atu yaabutuka kukololoka chikolo ngwo: “Muhachile ha kulusu!” 24Muze Pilatu hamona ngwenyi, kahashile kulinga nichimwe, alioze muukubwa Vunda kuhiana, yanda meya, yasana ku moko ku meso ja mbunga nikwamba ngwenyi: “Kufwa cha mutu yono ami ngunasambe kwami. Ayo milonga yenu!” 25Atu eswe yaakumbulula ngwo: “Uhiso ubwe wa yetu ni ana jetu!” 26Hohene Pilatu yatuswila Baraba, yalambisa Yesu ni fimbo (shikote), yamukunjika hanga amuhate ha kulusu.

Tujita yaakekuna Yesu

(Tala nawa Mar 15:16-20; Yoa 19:2-3)

27Hazehene tujita twa Pilatu yatwala Yesu ku yiize ya mukwa kuyula. Mbunga yeswe ya tujita yaamukunguluka, 28yaamuzula mahina jenyi, yaamujika hina lia chizele lichila. 29Yaayinda chipangula cha mbimbo, yaachijika ha mutwe wenyi, yaasa lukanda mu kwoko lienyi lia chindume, yaaliondela ha makungunwa ku meso jenyi nikwamba ngwo: “Vulie, mwanangana wa Ayuda!” 30Yaamufwila mate, yaatambula lukanda ni kumulambalamba ha mutwe. 31Muze haamanununa kumukekuna, yaamuzula hina lia chizele lichila, yaamujika mahina jenyi, mba yaamutwala haze lia limbo hanga amuhate ha kulusu.

Tujita yaahata Yesu ha kulusu

(Tala nawa Mar 15:21-32; Luk 23:26-43; Yoa 19:17-27)

32Shimbu maachituhuka mu limbo, yaatakana ni umwe mutu wa ku Sirene,#27:32 sirene: lie limbo lia wanangana mu chifuchi cha Libia ku norde mu Afrika. jina lienyi Simone. No yaamwaha kulusu ya Yesu ni tachi hanga ayimbate. 33Yaaheta kumwe kuma akuvuluka ngwo, Golgota, kulumbunuka “Homa lia Palanga lia Mutwe.” 34Yaamwaha vinyu yakuchinga ni kasashisa. Alioze muze hayipaka, kayinwine ko.

35No yaamuhata ha kulusu, mba yaalitetela mahina jenyi ha kuta chela. 36Hohene yaatwama ko nikumutala. 37Helu lia mutwe wenyi yaanangika ho Chisoneko chize chalumbunwine chitela chize amusumine nacho, ngwo: “Yono Yesu mwe Mwanangana wa Ayuda.” 38Hohene yaahata mihuza aali ha makulusu hamwe nenyi, umuwika ku chindume, mukwo ku chimeso.

39Atu waze abaliekele kuze yaalihunga mitwe nikumuchoka ngwo: 40“Ehee! Yena wazangile kwonona zuwo lia Zambi, ni kulitunga nawa ha matangwa atatu! Lilamwine yena mwene, nyi mwe Mwana Zambi yena! Sunuka ha kulusu!” 41Chimuwika nawa mahako a lutwe a Zambi, ni alongeshi a Shimbi, ni makulwana ja Ayuda yaamukekuna ngwo: 42“Walamwinyine atu akwo, alioze mwene kahashile kulilamwina. Nyi kali mwanangana wa Israele, asunuke haliabwila ha kulusu, mba mutumufuliela! 43Te kakushachila hali Zambi ni te kakwamba ngwenyi: ‘Nguli Mwana Zambi.’ Matumone chize Zambi mamulamwina!” 44Chibwe mihuza waze ahachiwile hamwe nenyi ha makulusu yaamuchoka nawa chizechene.

Kufwa cha Yesu

(Tala nawa Mar 15:33-41; Luk 23:44-49; Yoa 19:28-30)

45Tangwa ha muchima, chifuchi cheswe yichibwa ni milima bwii, yiitwama ndoo ola jitatu. 46Ha ola ya muchitatu, Yesu yakololoka chikolo ngwenyi: “Eli, Eli, lema sabaktani!” Kulumbunuka ngwo: “Zambi yami, Zambi yami, kuchi mba hiwangwehuka?” 47Amwe waze amanyine ko, muze haachivwa, yaamba ngwo: “Kanatambika Eliya.” 48Hazehene umuwika hakachi ko yazomboka, yanda shiponja, yayizalisa ni vinaigre, yayisa ku songo lia lumbungu, yamweseka yo hanga anwe. 49Alioze akwo yaamba ngwo: “Matumone nyi Eliya meza ni kumulamwina.” 50Yesu yakololoka nawa chikolo, mba yasutula mwono wenyi.

51Ha shimbu lizeliene, chikalakala cha hina cha mu zuwo lia Zambi yichibulika mukachi, chize kwilu ndoo hashi. Hashi yihanyika, mawe yaabulika, 52mafuka yaabakuka, ni akwa kufuliela, waze afwile kulu, Zambi yaahindwisa. 53No yaatuhwoka, ni muze Yesu hahinduka ku kufwa, yaanjila mu Limbo lia Chijila kuze atu anji aamwene.

54Muze mwata wa tujita ni e tujita waze afungile Yesu haamona kunyika cha hashi ni yize yeswe yabwile ko, yeevwa woma unji, yaamba ngwo: “Chamwenemwene yono mwe Mwana Zambi.” 55Mapwo anji yaamana kusuku nikutala. Enoo akatukile ku chifuchi cha Galilea, te kaakukaula Yesu ni kumukwasa. 56Hakachi ko te hali Maria Kamandala, ni Maria naye ya Tiangu (Jake) ni Josefe, ni naye ya ana ja Zebedeu a malunga.

Kufunda cha Yesu

(Tala nawa Mar 15:42-47; Luk 23:50-56; Yoa 19:38-42)

57Muze te tangwa hiliendala, umwe pichi, wa ku limbo lia Arimatea,#27:57 arimatea: limwe limbo kilometro 35 ku norde ku chitokelo cha Yerusaleme. yeza, jina lienyi Josefe. Neye te kambaji ka Yesu. 58Yaya maha Pilatu nikumwita mujimba wa Yesu. Pilatu yatayiza kumwaha wo. 59Josefe yasunwisa we mujimba, yauvunga mu hina litoma liaha, 60yausa mu fuka lienyi liaha, lize atotele mu liwe, yalangumuna liwe linene ku chikolo cha fuka, mba yaya kwenyi. 61Maria Kamandala ni Maria mukwo kwe abwile, te kaanatwama talanganyi ni fuka.

Tufunga ku fuka

62Muze hikwacha, kafwa ngwe tangwa lia kuhwima, mahako a lutwe a Zambi ni Afariseu#27:62 afariseu: tala 3:7. yaakunguluka maha Pilatu, 63yaamba ngwo: “Mwanangana, tunewuluka mukwa kwonga yoze, muze abwile ni mwono, kwamba chenyi ngwenyi: ‘Ha tangwa lia muchitatu mungukahinduka.’ 64Hana Shimbi hanga atu afunge fuka ndoo tangwa lia muchitatu, kuchina tumbaji twenyi meeza ni kwiya mujimba ni kwambila atu ngwo: ‘Hahinduka ku kufwa.’ Mba kwonga chize chakusula muchihiana chitangu.” 65Pilatu yaamba ngwenyi: “Andenu tufunga, yeenu ni kukoleka fuka ngwe chize nunahase.” 66No yaaya, yaakoleka fuka, yaakolesa liwe ni chinyingi, mba yaasa tufunga.

Currently Selected:

Mateu 27: CHK1970

Highlight

Copy