Mateu 26

Akwa lutwe ja Ayuda yaatwama Yesu punga

(Tala nawa Mar 14:1-2; Luk 22:1-2; Yoa 11:45-53)

1Muze Yesu hamanununa maliji wano eswe, yambila tumbaji twenyi ngwenyi; 2“Nunanyingika ngwenu, ha matangwa aali mutukabwa ni chiwanyino cha Kubalika. Mba maakakunjika Mwana Mutu akamuhachile ha kulusu.”

3Hohene mahako a lutwe a Zambi ni makulwana ja Ayuda yaalikungulula mu yize ya Kaifa, mwata wa mahako. 4Yaatwama Yesu punga amukwate ku tenga, amushihe. 5Alioze yaamba ngwo: “Hi ha tangwa lia chiwanyino ko, nyi ka, Vunda jinji mujibwa hakachi ka atu.”

Umwe pwo yawayisa Yesu maji a vumba libema

(Tala nawa Mar 14:3-9; Yoa 12:1-8)

6Muze te Yesu ali mu chihunda cha Betania#26:6 betania: tala 21:17. mu zuwo lia Simone, mukwa mbumba 7umwe pwo yamukundama ni kasaji kakulinga ni mawe alemu atoma, te ka maji a vumba libema liahiana a ndando yinji. Yawayisa Yesu maji waze, muze te anatwama ku mesa. 8Tumbaji yaachimona, yeevwa kubihia, yaahula ngwo: “Kuchi kevwe kwonona maji a ndando yinji yibwa haha? 9Te chinalite kulanjisa maji wano ha mbongo jinji ni kujaha yiswale!” 10Alioze Yesu nikunyingika yize te anahanjika, yaamba ngwenyi: “Kuchi nunabikalisa pwo yono? Chize hangulinga, chinabeme. 11Mumu yiswale munukabwa no matangwa eswe, alioze kunuchi kubwa ni yami matangwa eswe. 12Hawayisa mujimba wami ni maji wano, haululika ha kungufunda. 13Chamwenemwene ngunanwambulwila ngwami, kweswako atu maakambujolela Sango jino Jibema hashi heswe, Chuma chize pwo yono halinga, maakachambulula ha kumwiwuluka.”

Yudase yatayize kukunjika Yesu kuli akwa kole jenyi

(Tala nawa Mar 14:10-11; Luk 22:3-6)

14Hohene umwe wa kuli tumbaji kumi ni aali, jina lienyi Yudase Kakeriote, yaya kuli mahako a lutwe a Zambi, 15yaahula ngwenyi: “Yika munungwaha nyi mungunukunjika Yesu?” No yaalula makumi atatu a mbongo, yaamwaha jo. 16Chize ku ola yize Yudase yabutuka kufupa mana a kwaakunjika Yesu.

Yesu yalia chiwanyimo cha Kubalika (Pake)

(Tala nawa Mar 14:12-21; Luk 22:7-14, 21-23; Yoa 13:21-30)

17Ha tangwa litangu lia chiwanyino cha Mbolo Yize Kuyishi Yitumbo, tumbaji yaamukundama nikumuhula ngwo: “Kulihi unazange tukululikile yakulia ya kwiwuluka Kubalika?” 18Yesu ngwenyi: “Yeenu maha Sanganji mu limbo. Mwambenu ngwenu: ‘Longeshi kanambe ngwenyi, ola yami hiyakundama. Maha yena mungulila chiwanyino cha Kubalika hamwe ni tumbaji twami.’ ” 19E tumbaji yaachilinga, yaalulika yakulia ya kwiwuluka Kubalika.

20Muze te tangwa hilianjila kulu, Yesu yatwama ku mesa hamwe ni tumbaji kumi ni aali. 21Shimbu maachilia, Yesu yamba ngwenyi: “Chamwenemwene ngunanwambulwila ngwami, umwe wa kuli yenu mangukunjika kuli akwa kole jami.” 22Tumbaji yeevwa chinyengo chinji, yaabutuka kumuhula umuwika umuwika ngwenyi: “Mwene, hi yami ko, nyi?” 23Yesu yaakumbulula ngwenyi: “Yoze unatate hamwe ni yami mu chenga, mwenawo mangukunjika. 24Mwana Mutu#26:24 mwana mutu: tala 8:20. kumafwa ngwe hichinasonewa mu Mukanda wa Zambi, alioze lamba lienyi mutu yoze, kachi te kasemukine ko kwenyi!” 25Yudase, yoze wamukunjikile kuli akwa kole jenyi, yahula ngwenyi: “Hi yami ko, nyi?” Yesu ngwenyi: “Yena wachamba.”

Mesa ya Mwene Yesu

(Tala nawa Mar 14:22-26; Luk 22:14-20; 1 Kor 11:23-25)

26Shimbu maachilia, Yesu yanda mbolo, yasakwila Zambi, yayibalula, yayihana kuli tumbaji twenyi nikwamba ngwenyi: “Wenu, nulie. Mbolo yino yili mujimba wami.” 27Yanda nawa musenge wa vinyu, yasakwila Zambi, yaaha wo, ngwenyi: “Unwenu yenu eswe. 28Mumu musenge uno wa vinyu uli manyinga jami waze anakolesa Usendo wa Zambi, waze anamwangana mumu hali atu anji ha ukonekeno wa milonga. 29Ngunanwambulwila ngwami, chichi kanwa nawa vinyu yino ndoo ku tangwa lize mungukanwa vinyu yaha hamwe ni yenu mu Wanangana wa Tata.” 30Hohene yeemba mwaso,#26:30 Mwaso: Ayuda abwile ni ndako ya kwimba Miaso 115-118 muze haamanununa kulia chiwanyino cha Kubalika. mba yaaya ku mulundu wa Olive.#26:30 mulundu WA olive; tala 21:1.

Yesu ngwenyi: “Yena Petulu muulikala yami.”

(Tala nawa Mar 14:27-31; Luk 22:31-34; Yoa 13:36-38)

31Hohene Yesu yambila tumbaji ngwenyi: “Ufuku unowene, yenu eswe munungwehuka, mumu hichinasonewa mu Mukanda wa Zambi ngwo: ‘Mungukashiha Kafunga, mba mbunga ya mapanga maakamwangana mwamwaa.’ 32Alioze muze hinahinduka ku kufwa, mungukanutetekela ku Galilea.” 33Petulu yamwamba ngwenyi: “Chibwe akwetu eswe maakwehuka, hindu yami chichi kukwehuka nichimwe!” 34Yesu ngwenyi: “Chamwenemwene ngunakwambulwila ngwami, ufuku unowene, shimbu ndemba kanda achitambika, kumuukalikala yami katatu ngwe, Kuwangunyingikine.” 35Petulu ngwenyi: “Chichi kulikala yena nichimwe. Chibwe kufwa, Changutamba kufwa hamwe ni yena.”

Tumbaji eswe yaamba chizechene.

Yesu yalemba mu munda wa Getsemane

(Tala nawa Mar 14:32-42; Luk 22:39-46)

36Hohene Yesu yaheta hamwe ni tumbaji twenyi kumwe kuma, jina, liako Getsemane.#26:36 getsemane: umwe munda ha mukandu wa mulundu wa Olive. Neye yaamba ngwenyi: “Twamenu hano shimbu yami ngunayi akuze ni kulemba.” 37Mba Yesu yaya ni Petulu ni ana malunga aali a Zebedeu, yabutuka kwivwa chinyengo chinji ni kulema mu mbunge, 38yaamba ngwenyi: “Chinyengo chinji ngunevu mu mbunge, chinyengo cha kufwa. Salenu hano, nunongame hamwe ni yami.” 39Mba Yesu yasenya kulutwe, yafulamana hashi, yalemba ngwenyi: “Tata, nyi muchilita, unguchize kama musenge uno wa lamba. Hindu kanda chibwa ngwe chize ngunazange yami, alioze ngwe yena unazange.”

40Hohene yahiluka kuli tumbaji waze atatu, yaawana mu tulo, yambila Petulu ngwenyi: “Kuma kunwahashile kunongama kama hamwe ni yami chibwe ola yimuwika, nyi? 41Nongamenu, lembenu, yenu eswe, hanga kunuchi kunjila mu cheseko. Mbunge ya mutu yinalulika, alioze mujimba wenyi ulelu.”

42Yesu yaya chisuho cha muchaali, yalemba ngwenyi: “Tata, nyi kuchalitele kuchiza musenge uno wa lamba, linga ngwe yena unapale.” 43Yahiluka nawa kuli tumbaji twenyi, yaawana mu tulo, mumu te meso kaanaleme.

44Yesu yaahichika nawa, yaya ni kulemba chisuho cha muchitatu, yahanjika maliji waze ene. 45Mba yahiluka nawa kuli tumbaji, yaamba ngwenyi: “Hifungunukenu, nuhwime. Talenu, ola hiyaheta, himakunjika Mwana Mutu#26:45 MWANA MUTU: tala 8:20. ku moko ja yivulumunyi! 46Katukenu, tuyenu, talenu yoze unangukunjika heza kulu!”

Yudase yakunjika Yesu

(Tala nawa Mar 14:43-50; Luk 22:47-53; Yoa 18:3-12)

47Shimbu te Yesu machihanjika, Yudase, umwe wa kuli tumbaji kumi ni aali, yaheta hamwe ni mbunga yinene, te anambata mikwale ni kanda. Mahako a lutwe a Zambi ni makulwana ja Ayuda aatumine. 48Yudase, yoze wakunjikile Yesu amushihe, te hanaahe kulu chinyingi ngwenyi: “Mutu yoze mungumbeja, mwenawo, mukwatenu!”

49Muze Yudase heza, yakundama kuli Yesu nikawashi nikwamba ngwenyi: “Vulie, Longeshi!” Mba yamumbeja chikolo. 50Yesu ngwenyi: “Mbayi, linga chize hiwejila hano!” Hohene akwo yaakundama, yaakwata Yesu ni tachi. 51Alioze umwe wa kuli waze abwile hamwe ni Yesu yatomona mukwale wenyi, yabatula litwi lia kavumbi ka mwata wa mahako 52Hohene Yesu yamwamba ngwenyi: “Tomeka mukwale we mu chindalo, mumu eswe waze akukwata mukwale, maakatoka ku mukwale. 53Kuwanyingikine ngwe, ngunahase kutambika Tata angukwase ni kungutumina tunganda a mwilu tununu kumi ni aali, nyi? 54Alioze, nyi chocho, ngwe kuchi Mukanda wa Zambi muumanunuka uze unambe ngwo, chatamba kubwa ngwe chino?”

55Ha shimbu lizeliene Yesu yahula mbunga ngwenyi: “Nuneza ni mikwale ni kanda ni kungukwata ngwe nguli muhuza, nyi? Tangwa ha tangwa natwamine mu zuwo lia Zambi nikulongesa, hindu kunwangukwachile ko. 56Alioze yino yeswe hiyabwa hanga yikamanunune maliji ja akwa munanyi waze asonekene mu Mukanda wa Zambi.”

Shimbu lizeliene, tumbaji eswe yaamwehuka, yaachina kwo.

Yesu ku meso ja Mbunga ya Ngaji ja Ayuda

(Tala nawa Mar 14:53-65; Luk 22:54-55, 63-71; Yoa 18:13-14, 19-24)

57Atu waze akwachile Yesu yaamutwala maha Kaifa, mwata wa mahako kwenako kwakungulukile alongeshi a Shimbi ni makulwana ja Ayuda. 58Petulu yakaula Yesu kanonajila kapinji kasuku ndoo ku yiize ya zuwo lia mwata wa mahako, yanjila mu yiize, yatwama ko hamwe ni tufunga amone yize muyibwa. 59Mahako a lutwe ni ngaji eswe akwo a ku Mbunga ya Ngaji ja Ayuda yaafupa shindakenyo ya mahuza hanga ashihise Yesu. 60Alioze kayimwene ko, chibwe anji ejile ni kushindakenya mahuza. Hakusula, atu aali yeeza, 61yaamba ngwo: “Mutu yono hanambe ngwenyi: ‘Ngunahase kwonona zuwo lia Zambi ni kulitunga nawa ha matangwa atatu.’ ”

62Mwata wa mahako yakatuka, yahula Yesu ngwenyi: “Kusolo kukumbulula nichimwe ha yize anakusumu, nyi?” 63Alioze Yesu yahola kwenyi kuluu. Hohene mwata wa mahako yamwamba ngwenyi: “Mu jina lia Zambi ya mwono, utukumbulula ni Shingo ngwe, yena uli Chilamwina yoze Zambi alakenyene, mwe Mwana Zambi, nyi ka?” 64Yesu ngwenyi: “Chochene wamba. Alioze ngunakwambulwila ngwami, chize ku haliabwila munukamona Mwana Mutu#26:64 mwana mutu: tala 8:20. kanatwama ku chindume cha Mukwa Ndundo Jeswe. Munukamumona kaneza ha malelwa a kwilu!” 65Hohene mwata wa mahako yatanuna mahina jenyi nikwamba ngwenyi: “Hashililika Zambi! Mba kuchi tunafupu nawa yela akwo? Hinwevwa kushililika chenyi. 66Kuchi nunanyongo?” No yaamukumbulula ngwo: “Kanahi, kanatela kufwa.”

67Mba yaamufwila mate ku meso, yaamulamba kome, amwe yaamulamba mbangala 68nikwamba ngwo: “Chilamwina yoze Zambi alakenyene tumbula iya wakulamba.”

Petulu yalikala Yesu

(Tala nawa Mar 14:66-72; Luk 22:56-62; Yoa 18:15-18, 25-27)

69Shimbu te Petulu anatwama haze mu yiize, umwe mwana pwo yakundama, yamwamba ngwenyi: “Ni yena nawa wabwanga hamwe ni Yesu wa ku Galilea.” 70Alioze Petulu yalikala cho ku meso ja atu eswe ngwenyi: “Ahaa! Chanyingikine yuma yize unambe.” 71Mba Petulu yaya ku chikolo cha chipanga. Mwana pwo mukwo yamumona, yambila waze abwile ko ngwenyi: “Yono kabwanga hamwe ni Yesu Kanazare.” 72Petulu yalikala nawa ni Shingo ngwenyi: “Mutu yono chamunyingikine!” 73Ha shimbu likepe waze abwile ko yaakundama, yaambila Petulu ngwo: “Chamwenemwene yena uli wa kuli ayo. Kuhanjika che chinasolola kuze unakatuka.” 74Hohene Petulu yabutuka kulikolola ni kulishinga ngwenyi: “Mutu yono chamunyingikine!” Susumuku ndemba yatambika. 75Mba Petulu yewuluka liji lize amwambile Yesu ngwenyi: “Shimbu ndemba kanda achitambika, kumulikala yami katatu ngwe, kuwangunyingikine.” Hohene yatuhuka, yalila kuhiana.

Currently Selected:

Mateu 26: CHK1970

Highlight

Copy