Mateu 28
28
Uhindukilo wa Yesu ku kufwa
(Tala nawa Mar 16:1-10; Luk 24:1-12; Yoa 20:1-10)
1Muze te tangwa lia kuhwima hiliabalika, mu lumingu, ha kuvumbuka cha tangwa, Maria Kamandala ni Maria mukwo yaaya ni kutala fuka. 2Susumuku kwabwile munyiko unene hashi. Kanganda ka mwilu yahulumuka, yalangumuna liwe ku sesa lia fuka, yatwama ho. 3Yahenya ngwe muhenyo, mahina jenyi yaabwa atoma ngwe chiwe. 4Tufunga yeevwa woma unji, yaachikima, yaabwa ngwe afu.
5Kanganda ka mwilu yambila mapwo ngwenyi: “Kanda nwivwa woma. Ngunanyingika nunafupu Yesu, yoze anakahachila ha kulusu. 6Amuno keshimo, hahinduka ngwe chize ambile. Tweyenu nutale homa haze te anabombo. 7Yeenu nikawashi nulweze tumbaji twenyi ngwenu: ‘Hahinduka ku kufwa. Haliabwila kananutetekela ku chifuchi cha Galilea. Kwenako munukamumona!’ Hinanwambulwila yo.”
8No yaakatuka nikawashi ku fuka, yeevwa woma unji ni uwahililo unji, yaazomboka ni kulweza tumbaji twenyi. 9Susumuku Yesu yatakana no, yamba ngwenyi: “Mwoyo wenu.” No yaamukundama, yaamukwata ku molu, yaamuwayila. 10Hohene Yesu yaamba ngwenyi: “Kanda nwivwa woma. Yeenu nulweze akwetu aye ku Galilea. Kwenako maakangumona.”
Sango ja tufunga twa fuka
11Shimbu mapwo maachiya, amwe a kuli tufunga waze afungile fuka, yeeza mu limbo, yaambulwila mahako a lutwe yize yeswe yabwile ko. 12Mahako a lutwe yaakunguluka hamwe ni makulwana. Muze haalitesa, yaahana mbongo jinji kuli tufunga, 13mba yaamba ngwo: “Ambenu ngwenu: ‘Tumbaji twenyi ezanga ha ufuku, eyanga mujimba wenyi muze te tuli mu tulo.’ 14Nyi kachi mukwa kuyula machivwa, mutumukununa. Kunuchi kabwa ni mulonga chibwe ukepe.” 15Tufunga yaatambula mbongo, yaalinga ngwe chize aalongesele. Chenacho sango jize jinafumana mukachi ka Ayuda ndoo ni musono.
Yesu yasolokela tumbaji twenyi, yaashika
(Tala nawa Mar 16:14-18; Luk 24:36-49; Yoa 20:19-23; Yil 1:6-8)
16Tumbaji kumi ni kashi yaaya ku Galilea ku mulundu uze aalwezele Yesu. 17Muze amumwene, yaamuwayila, alioze amwe hakachi ko yaayambashana. 18Yesu yaakundama, ngwenyi: “Tata hanangwehe yiyulo yeswe mwilu ni hashi. 19Kashika, yeenu ku mavungu eswe, nukaapwise tumbaji twami, ni kwapapachisa mu jina lia Tata, ni lia Mwana, ni lia Mwiku wa Linanga, 20ni kwalongesa kwononokena yeswe yize nanuhele Shimbi. Nyingikenu ngwenu, nguli hamwe ni yenu matangwa eswe ndoo ku kumanunuka cha mwaka.”
Currently Selected:
Mateu 28: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
