Mateu 25

Chishima cha ana mapwo kumi

1“Ha tangwa lize, Wanangana wa mwilu muukabwa ngwe chino. Ana mapwo kumi anjile ndeya jo, yaakatuka ni kubatwiza sandungi. 2Atano hakachi ko te yihepuke, ni atano akwa kukanyama. 3E yihepuke yaanda ndeya jo, alioze kaambachile maji anazuku. 4Alioze waze akwa kukanyama yaambata tusaji twa maji hamwe ni ndeya jo. 5Alioze muze sandungi ashimbwile, e ana mapwo eswe yaanongwoka, yaaya mu tulo.

6“Ha muchima ufuku yeevwa mutambi ngwo: ‘Talenu sandungi auze! Tuhukenu ni kumubatwiza!’ 7Hohene ana mapwo waze eswe yaahinduka, yaalulieka ndeya jo. 8E yihepuke yaambila akwa kukanyama ngwo: ‘Twehenu kama amwe maji, mumu ndeya jetu jinajimajima.’ 9Akwa kukanyama yaakumbulula ngwo: ‘Ka, mumu keechi kuzuka hali yetu ni yenu. Shinoho yeenu kuli waze akulanjisa nukalilanjile yenwene.’ 10Shimbu te yihepuke ayile ni kulanda maji, sandungi yaheta. Ana mapwo waze atano, akwa kukanyama, yaanjila hamwe ni sandungi mu zuwo lia ulungi, mba atu yaajila chajilo, ndwa! 11Mwabwamuze ana mapwo waze akwo yaaheta, yaakololoka ngwo: ‘Mwene, Mwene, twazulwile kama!’ 12Alioze sandungi yaakumbulula ngwenyi: ‘Chamwenemwene ngunanwambe ngwami, chanunyingikine kwami.’

13“Kashika, kanyamenu mumu kunwanyingikine tangwa chibwe ola.”

Chishima cha tuvumbi atatu

(Tala nawa Luk 19:11-27)

14“Ha tangwa lize Wanangana wa mwilu muukabwa ngwe chino. Umwe mutu wambile kuya mu wenyi. Yatambika tuvumbi twenyi, yaakunjika yikumba yenyi. 15Yaaha mutu mweswe Chihanda cha mbongo nikulita ni kuhasa chenyi, umuwika tununu atano, mukwo tununu aali, wa muchitatu kanunu. Mba yaya mu wenyi. 16Kavumbi yoze watambwile tununu atano a mbongo, yaya nikawashi, yasepa najo, yafumbula tununu akwo atano. 17Yoze watambwile tununu aali a mbongo, neye yalinga chizechene, yafumbula tununu akwo aali. 18Alioze yoze watambwile kanunu umuwika wa mbongo yaya ni kufula wina mu mavu, yasweka mo mbongo ja mwata wenyi.

19“Muze matangwa anji haabilika, mwata wa tuvumbi waze yeza, yabutuka kwalula mbongo jenyi hamwe no. 20Kavumbi yoze watambwile tununu atano a mbongo yakundama, yanangika mbongo jikwo jitano, ngwenyi: ‘Mwata, wangukunjikile tununu atano a mbongo. Tala, hinafumbula tununu akwo atano.’ 21Mwata wenyi yamwamba ngwenyi: ‘Walinga kanawa, kavumbi mubema kanda wakushishika! Washishikile ha yuma yikepe, kashika mungukukunjika yuma yinji. Tweya uwahilile hamwe ni yami!’ 22Kavumbi yoze watambwile tununu aali a mbongo neye yakundama ngwenyi: ‘Mwata, wangukunjikile tununu aali a mbongo. Tala hinafumbula akwo aali.’ 23Mwata wenyi yamwamba ngwenyi: ‘Walinga kanawa, kavumbi mubema kanda wakushishika. Washishikile ha yuma yikepe; kashika mungukukunjika yuma yinji. Tweya uwahilile hamwe ni yami!’ 24Mba kavumbi yoze watambwile kanunu ka mbongo yakundama, ngwenyi: ‘Mwata, nanyingikine ngwami, yena uli mutu makalu. Wakuhela kuze kuwatumbile, wakucha kuze kuwakuwile. 25Nevwile kwami woma, kashika nayile ni kusweka mbongo je mu mavu. Tala, jino nije.’ 26Mwata wenyi yamukumbulula ngwenyi: ‘Kavumbi mubi, mukwa ngwaza! Kuma te Unanyingika ngwe, nakuhela kuze chatumbile, nakucha kuze chakuwile, nyi? 27Te chibema kachi wahanyine mbongo jami kuli akwa kujifumbula, hanga ha kuhiluka chami kachi hinajitambula ni mbwezo. 28Mutambulenu kanunu yoze wa mbongo, muhanenu kuli yoze uli ni tununu kumi. 29Mumu mutu mweswe yoze ukwete, makamuweza hanga akabwe nayo yakulumbama, alioze yoze keshi nacho, makamutambula chibwe chize chikepe ali nacho. 30Alioze kavumbi yono wamokomoko mumbilenu mu milima, haze. Kwenako atu maakalila ni kulicheka ku mazo.’ ”

Ubatwilo wa mavungu eswe

31“Muze Mwana Mutu#25:31 mwana MUTU: tala 8:20. makeza mu uhenya wenyi, hamwe ni tunganda twenyi eswe a mwilu, makatwama ha chitwamo chenyi cha uhenya. 32Hohene tunganda twa mwilu maakakungulula mavungu eswe ku meso jenyi. Mba Mwana Mutu makaahandununa mu mbunga jaali ngwe chize kafunga akuhandununa mapanga ni pembe. 33Makasa mapanga ku chindume chenyi, ni pembe ku chimeso. 34Hohene Mwanangana makambila waze ku chindume ngwenyi: ‘Tweyenu, yenu waze Tata hanawahisa, nuhinge wanangana uze anululikilile chize ku kutanga cha hashi. 35Mumu nevwile zala, yinungwaha yakulia. Nevwile pwila, yinungwaha yakunwa. Nabwile chilambala, yinunguzumbula. 36Nabwile ni uvu, yinungujika. Nayijile, yinungunangisa. Nabwile mu zuwo lia lamba, yinwiza ni kungutala.’ 37Akwa ululi maakamukumbulula ngwo: ‘Mwene, mwiji muka twakumwene ni zala, yitukwaha yakulia, hanji ni pwila, yitukwaha yakunwa? 38Mwiji muka twakumwene chilambala, yitukuzumbula, hanji ni uvu, yitukujika? 39Mwiji muka twakumwene ni kuyiza hanji mu zuwo lia lamba, mba yitwiza ni kukutala?’ 40Mwanangana neye makaakumbulula ngwenyi: ‘Chamwenemwene ngunanwambulwila ngwami, muze nwachilingilile umwe wa kuli wano akwetu jami hi alemu ko, kafwa ngwe, yami nwachilingilile.’

41“Hohene Mwanangana makambila waze ku chimeso ngwenyi: ‘Ngukatukenu, yenu hinunashingiwa! Yeenu ku kahia ka miaka yeswe, kaze alulikilile Sakwonga ni tunganda twenyi! 42Mumu nevwile zala, kunwanguhele yakulia. Nevwile pwila, kunwanguhele yakunwa. 43Nabwile chilambala, kunwanguzumbwile. Nabwile ni uvu, kunwangujikile. Nayijile ni nabwile mu zuwo lia lamba, kunwangunangishine.’ 44Mba maakamukumbulula ngwo: ‘Mwene, mwiji muka twakumwene ni zala, hanji ni pwila, hanji chilambala, hanji ni uvu, hanji ni kuyiza, hanji mu zuwo lia lamba, alioze kutwakukwashile?’ 45Mwanangana neye makaakumbulula ngwenyi: ‘Chamwenemwene ngunanwambulwila ngwami, muze kunwachilingilile umwe wa kuli wano akwetu hi alemu ko, kafwa ngwe, kunwachilingilile yami.’ 46Wano maakaya ku lamba lia miaka yeswe, alioze akwa ululi ku mwono wa miaka yeswe.”

Currently Selected:

Mateu 25: CHK1970

Highlight

Copy