Mateu 24

Yesu yambulula kubuzuka cha zuwo lia Zambi

(Tala nawa Mar 13:1-2; Luk 21:5-6)

1Yesu yatuhuka mu zuwo lia Zambi lia Ayuda. Muze te anayi, tumbaji twenyi yaamukundama nikumulweza chize chatungiwile zuwo lia Zambi. 2Mba Yesu yaamba ngwenyi: “Nunamono yeswe ayize? Chamwenemwene ngunanwambulwila ngwami, liwe nilimwe kulichi kasala liakunangika helu lia likwo, eswe kumaakabuzula”.

Kabutu ka lamba

(Tala nawa Mar 13:3-13; Luk 21:7-19)

3Shimbu Yesu machitwama ha mulundu wa Olive,#24:3 mulundu WA olive: tala 21:1. tumbaji yaamukundama ku tenga nikwamba ngwo: “Twambulwile kama mwiji muka yize yeswe muyikabwa ko. Chilayi chika muchikalweza kwiza che ni songo lia mwakono?”

4Yesu yaakumbulula ngwenyi: “Kanyamenu, nyi ka, maakanupiangula. 5Mumu anji maakeza mu jina liami nikwamba ngwo: ‘Yami mwe Chilamwina yoze Zambi alakenyene.’ Kumaakapiangula anji. 6Munukevwa lundunjila wa jita hakamwihi ni sango ja jita kusuku, alioze kanda nukasungalala. Chatamba yino yeswe kubwa, alioze songo kanda lichibwa. 7Vungu ni vungu kumaakasa jita. Wanangana kumuukalimika ni wanangana ukwo. Zala yinji muyikabwa, ni minyiko ya hashi kweka ni kweka. 8Yuma yino yeswe muyikalifwa ngwe kabutu ka yikola ya kusema.

9“Hohene atu maakanukwata, maakanumwesa lamba, maakanushiha. Eswe maakanuvutwokela mumu ha jina liami. 10Ha matangwa waze, anji maakalikala ufulielo wo, maakalikunjika amwe ni akwo, maakalivutwokela amwe ni akwo. 11Akwa munanyi a kupiangula anji maakasoloka, maakapiangula anji. 12Uhulia muukoka. Ha chino zango lia atu anji mulikekema. 13Alioze yoze makanyongonona ndoo ku songo, kumakamulamwina. 14Sango jino Jipema ja Wanangana kumaakajambujola hashi heswe hanga ajishindakenye kuli atu eswe, mba songo mulikabwa.”

Lamba linji

(Tala nawa Mar 13:14-23; Luk 21:20-24)

15“Munukamona: ‘Chipupu cha Kuvwisa Woma’, chinamana muma mwa chijila yoze Zambi ambile kuli mukwa munanyi wenyi Daniel.” (Yoze wakutanga ase yuma yino chinyingi!) 16“Hohene waze maakabwa mu Yudea chaatamba kuchinyina ku milundu. 17Yoze makabwa ha fulumba lia zuwo lienyi akasunuke, alioze kanda akanjila mu zuwo akande yuma yize yili mo. 18Yoze makabwa ku minda kanda akahiluka akande cikuto chenyi. 19Ha matangwa waze tufumbakaji lamba linji maakamona ni waze maakamwisa ana. 20Lembenu Zambi hanga kuchina chenu kanda chikabwa kama ha mwaka wa chishika chibwe ha tangwa lia kuhwima. 21Mumu ha matangwa waze lamba linji mulikabwa ko. Chize ku kutanga cha hashi ndoo musono uno lamba ngwe lize kanda lichibwa kama, ni kulichi kabwa nawa nichimwe ngwe lize kulutwe. 22Nyi Zambi kachijile ko amwe matangwa waze a lamba, kachi mutu niumwe makalilamwina. Alioze matangwa akwo Zambi hanaachiza mumu hali atu jenyi waze atongwele iye mwene.

23“Hohene, nyi umwe mutu makanwamba ngwenyi: ‘Talenu, Chilamwina yoze Zambi alakenyene kuno kwali!’ hanji ngwenyi: ‘Kwali akuze!’ kanda nukamufuliela. 24Mumu yilamwina a mahuza ni akwa munanyi a kupianguka kumaakasoloka ni kulweza yilayi yinene ni yipupu hanga apiangule, nyi muchihasa kubwa, chibwe waze Zambi hanatongola. 25Ivwenu hinalianga kunwambulwila cho.

26“Nyi maakanwamba ngwo: ‘Talenu, mu puya ali!’ kanda nukaya ko. Hanji ngwo: ‘Talenu, kanaswame kuno!’ kanda nukachifuliela. 27Mumu ngwe muhenyo muuhenya chize ku chivumbuko ndoo ku chitokelo Chenacho muchikabwa nawa kwiza cha Mwana Mutu#24:27 mwana MUTU: tala 8:20.. 28Kuze kuli mujimba unafu, kwenako nawa maakakunguluka pupa.”

Kwiza cha Mwana Mutu

(Tala nawa Mar 13:24-27; Luk 21:25-28)

29“Hazehene, kulutwe lia lamba lia matangwa waze, tangwa mulikalaa, kakweji kechi katwa nawa mweji, matongonoshi maakaholoka kwilu, ni ndundo ja mwilu mujikanyikumuka. 30Hohene chilayi cha mwe Mwana Mutu muchikasoloka kwilu. Mba mavungu eswe a hashi maakalila, maakamona Mwana Mutu kaneza ha malelwa ni ndundo jinji ni uhenya Wahiana. 31Chitavi chinene muchikahanjika. Hohene Zambi makatuma tunganda twenyi a mwilu ku mbango jeswe jiwana ja hashi, no maakakungulula waze Zambi hanatongola chize ku songo limwe lia hashi ndoo ku songo likwo.”

Chishima cha mutondo mukuyu (figu)

(Tala nawa Mar 13:28-31; Luk 21:29-33)

32“Lilongesenu chishima cha mutondo mukuyu. Muze mitango yawo hiyovula ni mafwo jawo haabutuka kusokoloka, nwakunyingika ngwenu, kuma lwiza habwa hakamwihi. 33Chimuwika nawa, muze munukamona yuma yino yeswe, munukanyingika ngwenu, kali hakamwihi, ku yikolo. 34Chamwenemwene ngunanwambulwila ngwami, atu waze ali ni mwono haliabwila, keechi kafwa eswe ndoo yuma yize yeswe muyikabwa. 35Lilu ni hashi muyikahwa, alioze maliji jami keechi kwiza kuhwa nichimwe.”

Tata Zambi wika Unanyingika tangwa ni ola

(Tala nawa Mar 13:32-37; Luk 17:26-30, 34-36)

36“Alioze hakutwala ku tangwa lize ni ola yize, niumwe unayinyingika, chibwe tunganda a mwilu, chibwe Mwana ka, shina Tata wika unayinyingika. 37Ngwe chize chabwile ha matangwa ja Noa Chenacho muchikabwa nawa ha kwiza cha Mwana Mutu. 38Mumu ha matangwa waze shimbu te sanga lia meya kanda lichiza, atu yaahaha, yaanwanwa, yaalimbatambata, yaalihangisahangisa ku malu, ndoo ku tangwa lize Noa anjilile mu ulungu, 39te kaanyingikine nichimwe ndoo sanga ha meya liejile ni kwonona eswe. Chenacho muchikabwa nawa ha kwiza cha Mwana Mutu. 40Ha ola yize, malunga aali maakabwa ku minda. Makanda umuwika, makahichika mukwo. 41Mapwo aali maakatwa ku utwilo. Makanda umuwika, makahichika mukwo. 42Kashika kanyamenu, mumu kunwanyingikine ola yize Mwene wenu meza. 43Nyingikenu chino ngwenu, nyi te mwenya zuwo kananyingika kama ola yize ya ufuku mwiji meza, kachi te manongama, kechi kumutayiza kulokola zuwo lienyi. 44Kashika, ni yenu nawa kanyamenu, mumu ha ola yize kunushi kunyonga ngwenu, Mwana Mutu meza.”

Kavumbi wakushishika hanji keshi kushishika

(Tala nawa Luk 12:41-48)

45“Iya kevwe kavumbi wakushishika kanda wakukanyama? Yoze mwata wenyi hanamwehe chiyulo cha kutetela tuvumbi akwo, a ku zuwo lienyi, yakulia ha ola yize yinalite. 46Kawaha kavumbi yoze, nyi mwata wenyi muze mahiluka, mamuwana kanalingi Chenacho! 47Chamwenemwene ngunanwambulwila ngwami, mwata makamwaha kavumbi yoze yilemu ya yikumba yenyi yeswe. 48Alioze, nyi kavumbi yoze kali mubi, malihanjikisa ngwenyi: ‘Mwata wami kanashimbula,’ 49mba mabutuka kulamba tuvumbi ni akwo, ni kuliaha ni kunwanwa ni akwa kuzengewa, 50hohene mwata wenyi meza ha tangwa lize kavumbi kachinyongene ni ha ola yize kachinyingikine. 51Mba makamubatwila ni kumwaha Chihanda chenyi hamwe ni yilembekese. Kwenako makalila nikulicheka ku mazo.”

Currently Selected:

Mateu 24: CHK1970

Highlight

Copy