Mateu 23

Yesu yatungununa alongeshi a Shimbi ni Afariseu

(Tala nawa Mar 12:38-39; Luk 11:43, 46; 20:45-46)

1Hohene Yesu yambila mbunga ni tumbaji twenyi ngwenyi: 2“Alongeshi a Shimbi ni Afariseu#23:2 afariseu: tala 3:7. haanatambula yilemu ya kulumbununa Shimbi ja Mose. 3Kashika chanutamba kwononoka ni kulinga yeswe yize ananwambe, alioze kanda nwimbulula ndako jo, mumu keeshi kulinga yuma yize analongesa. 4Kaakukasa yiteli yilemu ni kuyitwika ha yipaya ya atu, alioze ayo ene kaakulituna kwakwasa kuyimbata chibwe ni munwe wo umuwika. 5Kaakulinga yitanga yo ni mazangi ku meso ja atu. Kaakukashila ha mahuma ni ha moko jo mishete ha kusamo yiitanda ya Mukanda wa Zambi. Kaakuzezumuna mahina a lubula. 6Kaakuzanga mihela ya vumbi mu yiwanyino ni yitwamo ya kulutwe mu mazuwo a kuwayila. 7Kaakuzanga kwameneka mu yitanda ni kwavuluka ngwo: ‘Alongeshi.’ 8Alioze yenu kanda nulivuluka ngwenu: ‘Alongeshi,’ mumu yenu eswe nuli asongo ni mutu, longeshi umuwika lume nukwete. 9Kanda nuvuluka mutu niumwe hano hashi ngwenu: ‘Tata,’ mumu nuli ni Tatenu umuwika lume, yoze uli mwilu. 10Chibwe kanda nulivuluka ngwenu: ‘Mwata,’ mumu nuli ni mwata umuwika lume, mwe Chilamwina yoze Zambi alakenyene. 11Yoze munene Wahiana hakachi kenu chamutamba kubwa kavumbi kenu. 12Yoze malilemesa, Zambi makamulelesa; yoze malilelesa, Zambi makamulemesa.”

Yesu yahisa ulembekese wa alongeshi a Shimbi ni Afariseu

(Tala nawa Mar 12:40; Luk 11:39-42, 44, 52; 20:47)

13“Lamba lienu alongeshi a Shimbi ni Afariseu, yilembekese! Mumu nwakukasa chajilo cha Wanangana wa mwilu ku meso ja atu! Kunushi kunjila mo yenwene, ni waze akuzanga kunjila mo kunushi kwatayiza!

[ 14“Lamba lienu alongeshi a Shimbi ni Afariseu, yilembekese! Mumu nwakufutukila yuma ya mapwo waze haanafwisa malunga, mba nwakulemba Chipinji chisuku ha kusoloka ngwe nuli akwa ululi! Kashika makanumwesa lamba liahiana!]#23:14 Yisoneko yikwo yikulu kuyishi ni maliji wano.

15“Lamba lienu alongeshi a Shimbi ni Afariseu, yilembekese! Mumu nwakujingajinga hashi heswe ni ha meya hanga nutayijise kambaji umuwika! Muze mataa, hinwamwalumuna yisuho yaali kutela mu kahia kuhiana yenwene!

16“Lamba lienu tusongo tupuputa! Mumu nwakwamba ngwenu: ‘Nyi mutu malishinga ni zuwo lia Zambi, kakwachikile ko ku Shingo lize. Alioze, nyi malishinga ni oru ya mu zuwo lia Zambi, kakwachika.’ 17Yihepuke, tupuputa! Chika chinahiana, oru, hanji zuwo lia Zambi lize liakupwisa oru ulinange? 18Nwakwamba nawa ngwenu: ‘Nyi mutu malishinga ni chilumbilo cha milambu, kakwachikile ko ku Shingo lize. Alioze, nyi malishinga ni mulambu uze uli ha chilumbilo, kakwachika ku Shingo lize.’ 19Tupuputa! Chika chinahiana, mulambu, hanji chilumbilo chize chakupwisa mulambu ulinange? 20Yoze malishinga ni chilumbilo cha mulambu, kanachilingi ni chilumbilo ni yeswe yize yiliho. 21Yoze malishinga ni zuwo lia Zambi, kanalishingi ni zuwo lia Zambi ni mwe Zambi yoze watwama mo. 22Yoze malishinga ni lilu, kanalishingi ni chitwamo cha Zambi ni mwe Zambi yoze watwama ho.

23“Lamba lienu alongeshi a Shimbi ni Afariseu, yilembekese! Mumu nwakuhana Chihanda cha muchikumi cha mbuto yikepe yikepe ya yibuta ya chimbumba ni endru ni kominyo! Alioze nwakulelesa malongeso ahiana a Shimbi! Kafwa ngwe: kubatula ni ululi, ni keke, ni ufulielo. Yenayo chanutamba kulinga ni yize yikwo nawa. 24Yenu tetekeli tupuputa! Nwakusaala kunwa chenu ni kuchiza mo kamwe, alioze nwakumina kashitu munene kamelu!

25“Lamba lienu alongeshi a Shimbi ni Afariseu, yilembekese! Mumu nwakukosa haze lia musenge ni chenga, alioze muchima nunazala ni wiji ni usolo ubi. 26Yena Kafariseu kapuputa! Hatangu kosa muchima lia musenge, mba haze neho muhabema!

27“Lamba lienu alongeshi a Shimbi ni Afariseu, yilembekese! Mumu kunwalifwa ngwe mafuka akutomesa ni pemba, waze akusoloka ngwe abema haze, alioze muchima kaanazala ni yifwaha ya afu ni luchisa mweswe. 28Chimuwika ni yenu, haze nwakusoloka ngwe akwa ululi, alioze muchima nunazala ni ulembekese ni yibi.”

Yesu yambulula lamba lio kulutwe

(Tala nawa Luk 11:47-51)

29“Lamba lienu alongeshi a Shimbi ni Afariseu,#23:29 afariseu: tala 3:7. yilembekese! Mumu nwakutunga mafuka abema ja akwa munanyi a Zambi. Nwakubemesa mafuka ja akwa ululi. 30Nwakwamba ngwenu: ‘Nyi yetu twabwile ha miaka ya tushakulu twetu, kachi kutwalifwile ko no ni kushiha akwa munanyi a Zambi.’ 31Ha chino nwakutayiza yenwene ngwenu, nuli a ku Chikota cha waze ashihile akwa munanyi a Zambi! 32Chenacho manununenu yize abutukile tushakulu twenu! 33Yenu tupela, vungu lia yihili! Ngwe kuchi munuhasa kuchina ubatwilo wa kahia? 34Kashika, talenu, mungunutumina akwa munanyi a Zambi, ni akwa mana, ni alongeshi a Shimbi. Munukashiha amwe, munukahachila akwo ha makulusu, munukalamba amwe ni fimbo (shikote) mu mazuwo jenu a kuwayila ni kwahungumiona ku limbo ni limbo. 35Chenacho lamba munukabwa nalio mumu ha manyinga ja akwa ululi waze amwanganyine hashi keeshi chitela, chize ku manyinga ja mukwa ululi Abele ndoo ku manyinga ja Zakaria, mwana wa Barakia, yoze nwashihile hakachi ka zuwo lia Zambi ni chilumbilo cha mulambu. 36Chamwenemwene ngunanwambulwila ngwami, Zambi makanumwesa lamba, yenu atu ja mwakono, hakutwala ku kufwa cha atu waze!”

Yesu yalima Yerusaleme

(Tala nawa Luk 13:34-35)

37“Yerusaleme, Yerusaleme! Yena wakushiha akwa munanyi a Zambi, wakwasa mawe waze Zambi akukutumina! Yisuho yibwa haha nazangile kukungulula atu je ngwe chize chali cha kasumbi akukungulula ana jenyi mu mapulwa jenyi, alioze kunwachitayijile! 38Talenu zuwo lienu maalihichika liahululu. 39Ngunanwambulwila ngwami, chize ku tangwa lino, kunuchi kangumona nawa nichimwe, ndoo munukamba ngwenu: ‘Zambi awahise yoze uneza mu jina lia Mwene!’ ”

Currently Selected:

Mateu 23: CHK1970

Highlight

Copy