Mateu 22
22
Chishima cha chiteleka cha umbachiso
(Tala nawa Luk 14:15-24)
1Yesu yahanjika nawa ni yishima kuli atu ngwenyi: 2“Wanangana wa mwilu uli ngwe chino. Umwe mwanangana walulikile umbachiso wa mwanenyi wa lunga. 3Mba yatuma tuvumbi twenyi ni kutambika waze alakenyene ku umbachiso. Alioze kaatayile ko kwiza. 4Mba yatuma tuvumbi akwo ni liji lino ngwenyi: ‘Ambilenu waze nalakenyene ngwenu, haliabwila chiteleka chami hichahia; kuji a ngombe jami ni yimuna ya maji hinaashiha. Yeswe hiyaswa. Tweyenu ku umbachiso!’ 5Alioze waze alakenyene yaachilelesa, yaayaya ku milimo yo, awu ku munda wenyi, awu ni kulanjisa yuma yenyi, 6akwo yaakwata tuvumbi twenyi, yaalamba, yaashiha. 7Mwanangana yatenuka, yatuma tujita twenyi mu kushiha akwa kushiha waze ni kwocha limbo lio. 8Hohene yambila tuvumbi twenyi ngwenyi: ‘Chiteleka cha umbachiso hichahia, alioze waze nalakenyene katelele kuchilia. 9Yeenu, kashika, mu majila anene anene nutambike ku umbachiso eswe waze munuwana.’ 10E tuvumbi yaaya mu majila, yaakungulula eswe waze awanyine, abi ni abema. Chenacho zuwo lia umbachiso yilizala ni atu.
11“Mwanangana yanjila ni kutala waze alakenyene, yamona mo mutu yoze te kazalile ko mazalo ja umbachiso, 12yamwamba ngwenyi: ‘A mbayi, ngwe kuchi wanjilanga muno kuushi mahina ja umbachiso?’ Alioze mwe mutu yahola kuluu. 13Hohene mwanangana yambila tuvumbi ngwenyi: ‘Mukasenu moko ni molu, mumbilenu mu milima, haze. Kwenako atu maakalilila ni kulicheka ku mazo.’ ” 14Yesu yaweza ho liji ngwenyi: “Mumu Zambi kakutambika anji, alioze kakutongola akepe.”
Chihula hakutwala ku lijimu
(Tala nawa Mar 12:13-17; Luk 20:20-26)
15Hohene Afariseu yaaya ni kutwama punga ngwe chize maahasa kutela Yesu muheto ni chihula. 16Yaamutumina tumbaji two ni amwe a kuli Aherode#22:16 aherode: mbunga ya Ayuda waze azangile vungu lia Herode Munene ha kwayula, hi Karoma ko., ngwo: “Longeshi, tunanyingika ngwetu, yena kuuli wamwenemwene, wakulongesa Shimbi ja Zambi ni umwenemwene. Kuushi woma ha chize akunyonga atu, kuushi kutala ulemu wo. 17Tulweze kama kuchi Unanyongo, muchilita ni Shimbi jetu kulambula mwanangana wa Aroma#22:17 mwanangana WA aroma: ha matangwa waze Tiberiu yoze wayulile ha miaka 14-37. lijimu, nyi ka?” 18Alioze Yesu yanyingika manyonga jo abi, yaamba ngwenyi: “Yenu yilembekese! Kuchi kevwe nunangweseka? 19Ngulwezenu mwe lumbongo wa lijimu.” No yaamulweza lumbongo#22:19 LUMBONGO: lumbongo wa prata wa Aroma, jina lienyi denariuse. umuwika. 20Mba Yesu yaahula ngwenyi: “Chizulie chino ni Chisoneko chino yaaya?” 21No yaakumbulula ngwo: “Ya mwanangana wa Aroma.” Yesu ngwenyi: “Hilwisenu mwanangana wa Aroma yize niyenyi, Zambi neye yize niyenyi.”
22Muze heevwa kumbululo lino, yaalishimwoka kuhiana, yaamuhichika, yaaya kwo.
Chihula hakutwala ku uhindukila wa afu
(Tala nawa Mar 12:18-27; Luk 20:27-40)
23Tangwa lizeliene amwe Asaduseu yeeza kuli Yesu. (Waze akwamba ngwo: “Afu keeshi kuhinduka.”) 24Yaamwambangwo: “Longeshi, Mose hanalongesa Shimbi yino ngwenyi: ‘Nyi umwe lunga hafwa, kahichikile mwana, mwanakwo chamutamba kumbata pwo yoze hanga asemene yayo ana.’ 25Yikubwa amwe asongo ni atu shimbiali mukachi ketu. Mutangu yambata pwo. Mwe lunga yafwa, kahichikile ko mwana. Chenacho yahichika pwo kuli chihata chenyi. 26Chimuwika nawa ni yoze wa muchaali, ni wa muchitatu, ndoo ni wa muchishimbiali. 27Hakusula, mwe pwo neye yafwa. 28Ha tangwa lia uhindukilo wa afu, makabwa pwo liaya? Mumu eswe shimbiali yaamumbata.”
29Yesu ngwenyi: “Nwakubinda, mumu kunwanyingikine Mukanda wa Zambi, chibwe ndundo ja Zambi. 30Mumu ha uhindukilo wa afu, atu maakabwa ngwe tunganda a mwilu, malunga ni mapwo keechi kalimbata, ni keechi kalihangisa malo. 31Alioze hakutwala ku uhindukilo wa afu, kanda nuchitanga kama nilimwe tangwa, chize anwambile Zambi, nyi? Ngwenyi: 32‘Nguli kwami Zambi ya Abrahama, ni ya Isake, ni ya Yakoba.’ Kulumbunuka ngwo: Zambi kali Zambi ya akwa mwono hi Zambi ya afu ko.”
33Muze mbunga jize achivwile, yaalishimwoka kuhiana ha longeso lienyi.
Shimbi yilemu yahiana
(Tala nawa Mar 12:28-34; Luk 10:25-28)
34Muze Afariseu heevwa ngwo. Yesu haholesa Asaduseu#22:34 afariseu… asaduseu: tala 3:7. kulungungaa, yaalikungulula. 35Mba umwe wa kuli ayo, longeshi ya Shimbi, yazanga kweseka Yesu, yamuhula ngwenyi: 36“Longeshi, Shimbi yika yilemu yahiana mukachi ka Shimbi jeswe?” 37Yesu ngwenyi: “Zanga Mwene Zambi ye ni mbunge ye yeswe, ni mwono we weswe, ni manyonga je eswe. 38Yenayo ye Shimbi yitangu ni yilemu kuhiana. 39Shimbi ya muchaali yinalifu nayo ngwo: ‘Zanga mwenyembo we ngwe chize wakulizanga yena mwene.’ 40Shimbi jeswe ja Mose ni longeso heswe lia akwa munanyi a Zambi jinaswila mu Shimbi jino jaali.”
Chihula hakutwala kuli David ni Chilamwina yoze Zambi alakenyene
(Tala nawa Mar 12:35-37; Luk 20:41-44)
41Muze Afariseu haalikungulula, Yesu yaahula chihula chino ngwenyi: 42“Kuchi nunashinginyeka hakutwala kuli Chilamwina yoze Zambi alakenyene, kali mwana waya?” No yaamukumbulula ngwo: “Mwana wa David.” 43Yesu yaahula ngwenyi: “Mba kuchi David, ku tachi ja Mwiku wa Linanga, yamuvuluka ngwenyi: ‘Mwene’? Mumu David yamba ngwenyi:
44‘Mwene Zambi hanambila Mwene wami ngwenyi:
Twama ku chindume chami
ndoo mungukasa akwa kole je kushi lia molu je.’
45Nyi David yamuvuluka ngwenyi: ‘Mwene,’ mba ngwe kuchi Chilamwina yoze Zambi alakenyene mahasa kubwa mwanenyi?”
46Niumwe wa kuli ayo wahashile kumukumbulula, chibwe ni liji limuwika ka. Chize ku tangwa lize, mutu niumwe wahamukine nawa kumuhula yihula.
Currently Selected:
Mateu 22: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
