Mateu 21

Yesu mwe Mwanangana, yanjila mu Yerusaleme

(Tala nawa Mar 11:1-11; Luk 19:28-40; Yoa 12:12-19)

1Muze haakundama ku Yerusaleme, yaaheta ku chihunda cha Betfaje ha mwanda wa mulundu wa Olive,#21:1 mulundu WA olive: ku chivumbuko cha Yerusaleme musali lia chitwetwe Kidrone. Yesu yatuma tumbaji twenyi aali kulutwe, 2yaamba ngwenyi: “Yeenu ku chihunda chize chasulangana ni yenu. Hazehene munuwana chimbulu wakukasa hamwe ni mwanenyi. Ajitulenu, nungunehene o. 3Nyi mutu manwamba limwe liji, kumbululenu ngwenu: ‘Mwene kali no ni chikala.’ Hazehene manutayiza kwiza no.”

4Chize chabwile hanga chikamanunune liji lize Zambi ahanjikile kuli mukwa munanyi wenyi ngwenyi:

5“Ambilenu mwana pwo wa Zione ngwenu:

‘Tala mwanangana we kaneza kuli yena,

mukwa kulikehesa, kanende ha chimbulu,

kanende hali mwana wa chimbulu.’ ”

6E tumbaji yaaya, yaalinga ngwe chize ambile Yesu. 7Yaaneha chihwo wa chimbulu ni mwanenyi, yaalala mahina jo hali ayo. Yesu yatwama ho. 8Mbunga yinene yaalala mahina jo mu jila. Akwo yaabatula mitango ya mitondo, yaalala mu jila. 9Mbunga yize atetekelele kulutwe lia Yesu ni yize amukawile yaakololoka ngwo: “Vulie Mwana wa David. Zambi awahise yoze uneza mu jina lia Mwene! Vulie Zambi Mwilu Mwahiana!”

10Shimbu te Yesu ananjila mu Yerusaleme, limbo heswe yaatungumuka, yaahula ngwo: “Awu mwene iya?” 11Mbunga yaakumbulula ngwo: “Awu mwe Yesu, mukwa munanyi wa Zambi wa ku Nazare mu chifuchi cha Galilea.”

Yesu yabemesa zuwo lia Zambi

(Tala nawa Mar 11:15-19; Luk 19:45-48; Yoa 2:13-22)

12Yesu yanjila mu zuwo lia Zambi lia Ayuda, yatuhwisa mo eswe waze alanjishile ni waze alanjile, yalimbula mesa ja akwa kusumbakenya mbongo ni yitwamo ya akwa kulanjisa membe. 13Yaamba ngwenyi: “Hichinasonewa mu Mukanda wa Zambi ngwo: ‘Maakavuluka zuwo liami ngwo, zuwo lia kuwayila,’ Chenacho anambe Zambi. Alioze yenu hinunalipwisa chivwenge cha eji!”

14Tupuputa ni yilema yaakundama kuli Yesu mu zuwo lia Zambi, neye yaawuka. 15Mahako a lutwe a Zambi ni alongeshi a Shimbi yeevwa wuli mumu ha yitanga ya kulishimwoka yize alingile Yesu, ni mumu ha kukololoka cha ana mu zuwo lia Zambi ngwo: “Vulie Mwana wa David!” 16No yaambila Yesu ngwo: “Unevuko yize anambe?” Yesu ngwenyi: “Ewa, kanawa. Kunwatangile nilimwe tangwa mu Mukanda wa Zambi ngwo: ‘Mu makanwa ja twanuke ni waze akwamwa mumutuhuka uhaliso,’ nyi?” 17Mba Yesu yaahichika, yatuhuka mu limbo akaye ku chihunda cha Betania.#21:17 betania: kilometro 3 ku chivumbuko cha Yerusaleme. Kwenako abombele.

Yesu yashinga mutondo mukuyu (figu)

(Tala nawa Mar 11:12-14, 20-24)

18Muze kwilu hikwachia, shimbu machihiluka ku limbo, Yesu yevwa zala, 19yamona mutondo mukuyu ku sesa lia jila, yakundama ko, alioze yawana ko shina mafwo wika. Yambila mutondo ngwenyi: “Kuuchi kema nawa mihuko nichimwe ndoo ku miaka yeswe!” Hazehene mukuyu yiuma weswe chau. 20Ha kuchimona, tumbaji yaalishimwoka kuhiana, yaahula Yesu ngwo: “Ngwe kuchi mukuyu hiwoma lume weswe chau?” 21Yesu ngwenyi: “Chamwenemwene ngunanwambulwila ngwami, nyi mumufuliela, kuyambashana ka, kunuchi kulinga wika chize hinalinga ku mutondo uno mukuyu, alioze munuhasa kwambila nawa mulundu uno ngwenu: ‘Tangumuka, ulimbile mu kalunga lwiji,’ necho kumuchibwa. 22Nyi munufuliela, munukatambula yeswe yize munwita ha kulemba.”

Chihula hakutwala ku chiyulo cha Yesu

(Tala nawa Mar 11:27-33; Luk 20:1-8)

23Muze Yesu hanjila mu zuwo lia Zambi, yabutuka kulongesa. Mahako a lutwe a Zambi ni makulwana ja Ayuda yaamukundama nikumuhula ngwo: “Ni chiyulo chaya wakulinga nacho yino yuma? Iya wakuhele chiyulo chino?” 24Yesu ngwenyi: “Ni yami nawa mungunuhula chihula chimuwika. Nyi munungukumbulula cho, mba mungunulweza ni chiyulo chaya nakulinga nacho yino yuma. 25Ngwami: chiyulo cha Yoano cha kupapachisa, cha mwilu, nyi? Shina cha hashi?” No yaabutuka kulihangujola ngwo: “Nyi twakumbulula ngwetu: ‘Cha mwilu,’ iye matuhula ngwenyi: ‘Kuchi mba kunwamufulielele?’ 26Alioze, nyi twakumbulula ngwetu: ‘Cha hashi,’ tunevu woma ku mbunga, mumu atu eswe kaakunyonga ngwo, Yoano kali mukwa munanyi wa Zambi.” 27Mba yaamukumbulula ngwo: “Kutwanyingikine.” Neye ngwenyi: “Ni yami nawa, chichi kunwambulwila ni chiyulo chaya nakulinga nacho yino yuma.”

Chishima cha ana malunga aali

28“Kuchi nunashinginyeka? Umwe mutu yabwa ni anenyi aali a malunga, yambila mukulwana ngwenyi: ‘Mwanami, yako musono ulinge milimo mu munda wa vinyu.’ 29Neye yakumbulula ngwenyi: ‘Chisolo kwami.’ Mwabwamuze yalumuna manyonga jenyi, yaya. 30Mba tata yaya kuli mwanakwo nikwamba maliji wazene. Neye yakumbulula ngwenyi: ‘Ewa, mwane,’ alioze kayile ko. 31Iya mukachi ka wano aali walingile upale wa tato?” No yaamukumbulula ngwo: “Mukulwana.” Mba Yesu yaamba ngwenyi: “Chamwenemwene ngunanwambulwila ngwami, akwa kulambwisa lijimu ni yikoi kaakunutetekela mu Wanangana wa Zambi. 32Mumu Yoano haneza ni kunulweza jila ya ululi, hindu kunwamufulielele ko. Alioze akwa kulambwisa lijimu ni yikoi yaamufuliela. Chibwe nwachimwene, hindu kunwalumukine ku mbunge jenu numufuliele.”

Chishima cha njimi abi

(Tala nawa Mar 12:1-12; Luk 20:9-19)

33“Ivwenu chishima chikwo. Kwabwile umwe mwenya munda, yalima munda wa vinyu, yaujingilika chipanga, yafula ko wina wa kukamina vinyu, yatunga ko zuwo lisuku lia kutalila munda, yakunjika munda ku moko ja njimi, mba yaya mu wenyi. 34Muze mwaka wa kuhela hiwaheta, yatuma tuvumbi twenyi kuli njimi hanga akatambule yimwe mihuko. 35Alioze e njimi yaakwata tuvumbi waze, yaalamba umwe, yaashiha mukwo, ni mukwo yaamwasa mawe. 36Mwenya munda yatuma tuvumbi akwo, anji kuhiana hatangu. Alioze e njimi yaalinga nawa chizechene. 37Hakusula, yaatumina mwanenyi wa lunga ngwenyi: ‘Hanji maakamusa vumbi.’ 38Alioze, muze e njimi amumwene, yaalihanjikisa ngwo: ‘Awu mwe swana, tuyenu tumushihe mba munda wa vinyu ukabwe niwetu.’ 39Yaamukwata, yaamumbila haze lia munda, yaamushiha. 40Muze mwenya munda makeza, kuchi mba makalinga ni njimi waze?”

41No yaamukumbulula ngwo: “Makashiha lume yingulungulu waze. Mba makakunjika munda ku moko ja njimi eka waze maakamwaha yimwe mihuko ha mwaka wayo.”

42Mba Yesu yaahula ngwenyi: “Kunwatangile nilimwe tangwa maliji wano mu Mukanda wa Zambi, nyi? Ngwo:

‘Liwe lize alitunyine tungi

hiliabwa liwe lia mu mbango, lize hakolesa zuwo.

Chuma chino alingile Mwene Zambi,

chili cha kulishimwoka!’

43“Kashika, ngwami, Zambi makanuchiza Wanangana wenyi ni kuuhana kuli atu waze maakema mihuko yawo. [ 44Yoze malimbukila ha liwe lino, kumakamakuka. Nyi lie liwe muliholokela hali umwe, kumulikamufwenya ngwe fufuta.]”#21:44 Yisoneko yikwo yikulu kuyishi ni maliji wano

45Mahako a lutwe a Zambi ni Afariseu#21:45 afariseu: tala 3:7. yeevwa yishima yize atele Yesu, yaanyingika ngwo, yetu anambila. 46Yaafupa mana kumukwata, alioze yeevwila mbunga woma, mumu yaamwalula ngwe mukwa munanyi wa Zambi.

Currently Selected:

Mateu 21: CHK1970

Highlight

Copy