Mateu 20

Chishima cha njimi mu munda wa vinyu

1“Wanangana wa mwilu uli ngwe chino. Umwe mwenya vinyu watuhukile chichamene cheswe ni kutetela milimo kuli njimi. 2Yalitesa kwafeta nikulita ni Shimbi, lumbongo umuwika mu tangwa limuwika. Mba yaatuma ni kulinga milimo mu munda. 3Yatuhuka nawa ha ola ya mu chilivwa ya chichamene, yamona akwo te anamana mu yitanda ni kulelumioka, 4yaamba ngwenyi: ‘Ni yenu nawa, yeenu ku munda wami wa vinyu. Mungunufweta cheswacho chinalite.’ 5Atu waze yaaya. Mwenya munda yatuhuka nawa tangwa ha muchima, ni ha ola ya muchitatu ya chingoloshi yalinga nawa chizechene. 6Mba ngwe ha ola ya muchitano ya chingoloshi yatuhuka, yawana akwo te anamana, yaahula ngwenyi: ‘Kuchi nunamana hano tangwa heswe nganganga ni kulelumioka?’ 7No yaakumbulula ngwo: ‘Mutu niumwe watwahanga milimo.’ Mwenya munda yaamba ngwenyi: ‘Ni yenu nawa, yeenu ku munda wami wa vinyu nulinge.’

8“Muze te tangwa hiliendala chikolo, mwenya munda yambila kafufuchi kenyi ngwenyi: ‘Tambika akwa milimo, wafwete fweto yo. Butuka kuli akwa kusula ndoo kuli atangu.’ 9Atu waze ahele milimo ha ola ya muchitano ya chingoloshi yeeza, yaatambula mutu ni mutu lumbongo. 10Muze waze atangu heeza, yaanyonga ngwo, maatambula kuhiana. Hindu ni ayo nawa yaafweta mutu ni mutu lumbongo. 11Ha kumutambula, yaalinyenyeta ku meso ja mwenya munda, ngwo: 12‘Puu! Waze asula ola yimuwika lume haalinga. Alioze yena hiwaafweta ngwe yetu twalinganga tangwa lia muundu mu chivukuminya cha tangwa!’ 13Alioze mwenya munda yakumbulula kuli umwe mukachi ko ngwenyi: ‘Mukwetu, chakulakile. Twalitesanga kulinga milimo ha lumbongo mu tangwa limuwika, cheka nyi? 14Anda yoze niwe, yako kwe. Ngunazange kumwaha yono mukwa kusula ngwe chize hinakwaha yena. 15Chishi chiyulo cha kulinga chize ngunazange ni ubite wami, nyi? Hanji Unevu ukwa mumu hinaaha jinji, nyi?’ ” 16Mba Yesu yaweza ho liji ngwenyi: “Akwa kusula kumaakabwa atangu, ni atangu kumaakabwa akwa kusula.”

Yesu yambulula chisuho cha muchitatu kufwa chenyi ni uhindukilo wenyi

(Tala nawa Mar 10:32-34; Luk 18:31-34)

17Shimbu te Yesu machikanduka ku limbo lia Yerusaleme, yatwala tumbaji kumi ni aali ku tenga, muze te anende, yaamba ngwenyi: 18“Banjikenu! Tunayi ku Yerusaleme. Kwenako maakakunjika Mwana Mutu#20:18 mwana mutu: tala 8:20. kuli mahako a lutwe a Zambi ni alongeshi a Shimbi. No maakamuhisa hanga akafwe, 19maakamukunjika kuli yilambala. No maakamukekuna, maakamulamba ni fimbo (shikote), maakamuhata ha kulusu. Alioze ha tangwa lia muchitatu Zambi makamuhindwisa.”

Chihula cha naye ya Tiangu (Jake) ni Yoano

(Tala nawa Mar 10:35-45)

20Hohene naye ya ana ja Zebedeu a malunga yakundama kuli Yesu hamwe no, yafulamana ku meso jenyi ni kumwita chimwe Chuma. 21Yesu yamuhula ngwenyi: “Yika unazange?” Neye ngwenyi: “Tayiza kama hanga ana jami wano atwame umuwika ku chindume che, mukwo ku chimeso mu Wanangana we.” 22Yesu ngwenyi: “Kunwanyingikine chize nunechi. Munuhasa kunwa musenge wa lamba uze mungunwa yami, nyi?” No yaamukumbulula ngwo: “Mutuhasa.” 23Yesu ngwenyi: “Kumunukanwa musenge wami, alioze hi cha yami ko kubatula yoze makatwama ku chindume chami hanji ku chimieso. Mihela yize yili ya waze Tata hanaalulikila yo.”

24Muze tumbaji akwo kumi haachivwa, yeevwila asongo ni mutu wuli. 25Mba Yesu yaatambika eswe nikwamba ngwenyi: “Nunanyingika ngwenu, akwa kuyula ja atu kaakuyula ni tachi, ni anene jo kaakuyula ni chiyulo cheswe. 26Alioze hi chocho ko hakachi kenu. Nyi umwe hakachi kenu mazanga kubwa munene, chamutamba kubwa kavumbi kenu. 27Nyi umwe hakachi kenu mazanga kubwa mutangu chamutamba kubwa ndungo yenu, 28ngwe chize Mwana Mutu kejile ko akamulingile alioze akalingile atu ni kuhana mwono wenyi ngwe ndando ya kukula atu anji.”

Yesu, yalawisa meso ja tupuputa aali

(Tala nawa Mar 10:46-52; Luk 18:35-43)

29Shimbu maachituhuka mu limbo lia Yeriku, mbunga yinene yaakaula Yesu. 30Tupuputa aali te anatwama ku sesa lia jila. Muze heevwa ngwo, Yesu kanabalika, yaabutuka kukololoka ngwo; “Mwene, Mwana wa David, tuvwile kama keke!” 31E mbunga yaakanjisa hanga ahole, alioze yaakololoka kuhiana ngwo: “Mwene, Mwana wa David, tuvwile kama keke!” 32Yesu yamana, yaatambika, yaahula ngwenyi: “Yika nunazange ngunulingile?” 33Yaamukumbulula ngwo: “Mwene meso jetu alaule kama!” 34Yesu yeevwila keke, yasa moko ha meso jo. Hazehene yaalaula, yaamukaula.

Currently Selected:

Mateu 20: CHK1970

Highlight

Copy