Mateu 19

Yesu yalongesa hakutwala ku kushiha ulo

(Tala nawa Mar 10:1-12)

1Muze Yesu hamanununa maliji wano, yakatuka ku Galilea,#19:1 GALILEA: tala 2:22. yaya ku njiza ya Yudea musali lia lwiji Yordau. 2Mbunga jinene yaamukaula; Yesu yawuka ko mieji jo.

3Afariseu#19:3 afariseu: tala 3:7. yaamukundama hanga amweseke. Yaamuhula ngwo: “Muchilita ni Shimbi lunga kulakula pwo lienyi ha chikuma cheswe, nyi?” 4Yesu ngwenyi: “Kunwatangile mu Mukanda wa Zambi, nyi? Ngwo: ‘Ha Ubutukilo Zambi yaatanga lunga ni pwo,’ 5Neye yamba ngwenyi. ‘Ha chino lunga makahichika tato ni naye akalinunge ni pwo lienyi, mba ayo aali maakabwa mutu umuwika.’ 6Chenacho hi aali nawa ko, alioze mutu umuwika. Kashika, chize Zambi hananungu, mutu kanda achihandununa.” 7Afariseu yaahula Yesu ngwo: “Kuchi mba Mose wahanyine Shimbi ngwenyi, mutu chatamba kwaha pwo lienyi mukanda wa kulakula, mba akamweche?” 8Yesu ngwenyi: “Mose wanutayijile kulakula mapwo jenu mumu nukwete mbunge jikalu. Alioze ha Ubutukilo kuchabwile chocho. 9Ngunanwambe ngwami, nyi mutu malakula pwo lienyi, shina ha utanji, nyi mambata weka, lunga yoze halinga utanji.”

10Tumbaji twenyi yaamwamba ngwo: “Nyi chikuma cha lunga ni pwo chinabu chocho, kuma kuchatambile kumbata.” 11Yesu ngwenyi: “Hi atu eswe ko maahasa kutayiza liji lino, shina lume waze Zambi hanaahe lio. 12Mumu ha yikuma yeka ni yeka malunga kahashile kumbata: amwe mumu asemukine yiheu, akwo yaapwisa yiheu kuli atu, akwo keeshi kumbata mumu ha Wanangana wa mwilu. Yoze mahasa, atayize longeso lino.”

Yesu yawahisa ana

(Tala nawa Mar 10:13-16; Luk 18:15-17)

13Atu yaanehena Yesu ana hanga aase moko, aalembele. Alioze tumbaji yaakanjisa atu waze. 14Yesu ngwenyi: “Tayizenu ana eze kuli yami. Kanda nwakanjisa, mumu Wanangana wa mwilu wa atu ngwe wano.” 15Neye yaasa moko, mba yakatuka ko.

Mukweze pichi

(Tala nawa Mar 10:17-31; Luk 18:18-30)

16Umwe mutu yakundama kuli Yesu, yamuhula ngwenyi: “Longeshi, Chuma chibema chika Changutamba kulinga hanga ngukabwe ni mwono wa miaka yeswe?” 17Yesu ngwenyi: “Kuchi unanguhula hakutwala ku chibema? Umuwika lume mubema. Nyi unazange kubwa ni mwono, funga Shimbi.” 18Neye yahula ngwenyi: “Shimbi jika?” Yesu ngwenyi: “Kanda ushiha mutu; kanda Ulinga utanji; kanda wiya; kanda ushindakenya mahuza; 19lemesa tatenu ni noko; Zanga mwenyembo we ngwe chize wakulizanga yena mwene.” 20Mwe mukweze ngwenyi: “Shimbi jino jeswe hingunajifungu. Chika changusala kulinga nawa?” 21Yesu ngwenyi: “Nyi unazange kubwa mungunu, yako ulanjise yeswe yize uli nayo, utetele yiswale mbongo jize, muukabwa ni ubite mwilu. Mba Wize ungukaule.” 22Alioze mukweze yoze, muze hachivwa, yakatuka ni chinyengo, mumu te pichi.

23Mba Yesu yambila tumbaji twenyi ngwenyi: “Chamwenemwene ngunanwambulwila ngwami, chikalu pichi kunjila mu wanangana wa mwilu. 24Ngunanwambe nawa ngwami, chikalu kashitu munene, kamelu, kubalika ndusu mu chituwa cha ndongo. Alioze chikalu kuhiana pichi kunjila mu wanangana wa Zambi.” 25Ha kwivwa maliji wano, tumbaji yaalishimwoka kuhiana, yaahula ngwo: “Nyi chocho, iya kevwe mahasa kulilamwina?” 26Yesu yaatala nee, yaamba ngwenyi: “Atu kenu maachisa, alioze hi Zambi ko, mumu Zambi kakuhasa yuma yeswe.”

27Hohene Petulu yamwamba ngwenyi: “Tala yetu hitunahichika yeswe, hitunakukaula. Yika mutukabwa nayo?” 28Yesu ngwenyi: “Chamwenemwene ngunanwambulwila ngwami, muze Mwana Mutu#19:28 mwana mutu: tala 8:20. makatwama ha chitwamo che nyi cha uhenya mu Mwaka Waha, yenu kumi ni aali waze nunangukaula, munukatwama ha yitwamo ya wanangana ni kubatwila mavungu kumi ni aali a Israele. 29Ni yoze hanahichika mazuwo, chibwe ayayo ni anakwo, hanji mandumbu, Chipwe tato, hanji naye, Chipwe ana, hanji minda mumu hali yami, makatambula yisuho kulakaji helu, ni makatambula nawa mwono wa miaka yeswe. 30Alioze anji waze ali atangu haliabwila kumaakabwa asula. Chimuwika nawa, anji waze ali asula haliabwila humaakabwa atangu.”

Currently Selected:

Mateu 19: CHK1970

Highlight

Copy