Mateu 14

Kufwa cha Yoano Chipapachisa

(Tala nawa Mar 6:14-29; Luk 9:7-9)

1Ha tangwa lize, Herode,#14:1 herode: Herode Antipase, mwana wa Herode Munene, mukwa kuyula yifuchi ya Galilea ni Perea mu wanangana wa Aroma. mwanangana wa chifuchi cha Galilea, yevwa sango ja Yesu. 2Neye yambila tuvumbi twenyi ngwenyi: “Awu mwe Yoano Chipapachisa. Hahinduka ku kufwa, kashika kali ni chiyulo cha kulinga yilayi.”

3Mumu Herode yahana Shimbi ya kukwata Yoano, yamukasa, yamusa mu zuwo lia lamba. Herode yachilinga mumu hali Herodia, pwo lia mwanakwo Filipe. 4Yoano te hambila Herode ngwenyi: “Kuchalitele ni Shimbi kumumbata!” 5Herode yazanga kumushiha, alioze yevwila mbunga woma, mumu eswe yaatayiza ngwo: “Yoano kali mukwa munanyi wa Zambi.”

6Ha chiwanyino cha kusemuka cha Herode, mwana wa Herodia wa pwo yahangana ku meso ja mbunga. Herode yachimona kubema. 7Kashika yamulakenya ni Shingo kumwaha cheswacho meta. 8Naye yamulweza mana, mba mwana pwo yeta mwanangana ngwenyi: “Ngwehe hanohene mutwe wa Yoano Chipapachisa ha chenga.” 9Mwanangana yevwa chinyengo, alioze mumu ha mashingo jenyi ku meso ja atu waze atambikile, yahana Shimbi ya kumwaha wo. 10Yatuma mutu ni kutapa Yoano mu zuwo lia lamba. 11Neye yaneha mutwe wa Yoano ha chenga, yamwaha wo mwe mwana pwo, neye yautwalila naye. 12Tumbaji twa Yoano yeeza ni kwanda mujimba wenyi, yaaufunda, mba yaaya ni kwambulwila Yesu.

Yesu yalisa atu tununu atano

(Tala nawa Mar 6:30-44; Luk 9:10-17; Yoa 6:1-14)

13Ha kwivwa sango jino, Yesu yakatuka ko, yanjila mu wato, yaya kuma kwa ukawenyi. Alioze mbunga yaachinyingika, yaatuhuka mu membo, yaamukaula hashi. 14Ha kutuhuka mu wato, Yesu yamona mbunga yize yinene, yeevwila keke, yabutuka kuwuka mieji jo.

15Muze te tangwa hiliendala chikolo, tumbaji yaakundama kuli Yesu nikwamba ngwo: “Kuma kuno kwa ukawetu, ni tangwa hiliendala chikolo. Shikenu mbunga hanga aye mu yihunda akalilanjile yakulia.” 16Yesu ngwenyi: “Kuchalitele aye, ahenu yenwene yakulia.” 17No yaamwamba ngwo: “Tuli lume ni mbolo jitano ni yishi aali.” 18Yesu ngwenyi: “Jinehenu kuli yami.” 19Mba yambila mbunga atwame ha mwambu. Neye yanda mbolo jitano ni yishi aali, yatala kwilu, yasakwila, yabalula mbolo, yajihana kuli tumbaji. No yaajianyina mbunga. 20Eswe yaalia, yaakuta. Tumbaji yaazalisa tupaya kumi ni aali a yibalubalu yize yasalile ho. 21Waze alile, kwoka cho ngwe tununu atano a malunga, kuweza mapwo ni ana.

Yesu yenda ha chitende

(Tala nawa Mar 6:45-52; Yoa 6:15-21)

22Hazehene Yesu yanjisa tumbaji twenyi mu wato hanga atetekele musali lia chitende, shimbu iye mwene machishika ni mbunga. 23Muze haashika, Yesu yakanduka ha mulundu ukawenyi mu kulemba. Muze te tangwa hiliatoka kulu yabwa ko ukawenyi. 24Wato te hiwabwa kulu mukachi ka chitende nikubinda ni miavu ya meya, mumu fuji yilimika nawo. 25Muze himukucha, Yesu yakundama kuli tumbaji twenyi nikwenda ha meya. 26Alioze ha kumumona kanende ha meya, tumbaji yatungumuka, ngwo: “Mujimu!” Yeevwa woma, yaateta. 27Hazehene Yesu yahanjika no ngwenyi: “Hamukenu! Yami mwene, kanda nwivwa woma!” 28Mba Petulu yamwamba ngwenyi: “Mwene, nyi mwe yena, ngwambe ngwize kuli yena ha meya.” 29Yesu ngwenyi: “Tweya!”

Petulu yatuhuka mu wato, yabutuka kwenda ha meya nikuya kuli Yesu. 30Alioze ha kumona fuji ya tachi, yevwa woma, yabutuka kushimbama mu meya, yateta ngwenyi: “Mwene, ngulamwine!” 31Hazehene Yesu yolola kwoko, yamukwata, yamwamba ngwenyi: “Ufulielo we ukepe! Kuchi te unayambashana?”

32Eswe aali yaanjila mu wato, mba fuji yiihola. 33Waze abwile mu wato yaawayila Yesu. Ngwo: “Chamwenemwene, mwe Mwana Zambi yena!”

Yesu yawuka mieji mu Genezare

(Tala nawa Mar 6:53-56)

34No yaazauka chitende, yaaheta ku tunda mu chifuchi cha Genezare.#14:34 GENEZARE: chifuchi cha mavu abema ku mbumbulu ya chitende cha Galilea ku norde chitokelo. 35Akwa chifuchi yaanyingika Yesu, yaamwanga sango mu chifuchi chize cheswe, yaamunehena mieji eswe, 36nikuliumba kuli iye atayize chibwe kukwata kama ku songo lia hina lienyi. Eswe waze amukwachile yaahindwoka.

Currently Selected:

Mateu 14: CHK1970

Highlight

Copy