Mateu 15

Ndako ja tushakulu

(Tala nawa Mar 7:1-13)

1Hohene Afariseu#15:1 AFARISEU: tala 3:7 ni alongeshi a Shimbi yaakatuka ku Yerusaleme, yaaheta, yaahula Yesu ngwo: 2“Kuchi mba tumbaji twe akulituna ndako ja tushakulu twetu? Mumu keeshi kusana ku moko nikulita ni ndako jetu ja chijila muze anambe kulia.” 3Yesu ngwenyi: “Ni yenu, kuchi nwakulituna Shimbi ja Zambi alioze nwakulinga ndako ja yenwene? 4Mumu Zambi hanambe ngwenyi: ‘Lemesa tatenu ni noko,’ nawa ngwenyi: ‘Yoze mambila tato hanji naye chibi, chatamba kumushiha.’ 5Alioze yenu nwakwamba ngwenu, nyi umwe mambila tato hanji naye ngwenyi: ‘Chihanda cha yikumba yami chize nambanga kukwaha yena, hinachilambula kulu kuli Zambi,’ 6mutu yoze kuchamutambile nawa kukwasa tato. Chenacho nwakulituna Shimbi ja Zambi ni kutayiza ndako ja yenwene. 7Yilembekese! Izaya kanawa ahanjikile hakutwala kuli yenu ngwenyi:

8‘Atu wano kaakungulemesa ni makanwa jo,

alioze mbunge jo jili kusuku ni yami.

9Chamokomoko akunguwayila,

mumu kaakulongesa ndako ja atu ngwe Shimbi jami,’ Chenacho anambe Zambi.”

Yuma yize yakuvulumwisa mutu

(Tala nawa Mar 7:14-23)

10Yesu yatambika mbunga, yaamba ngwenyi: “Banjikenu, chika nulumbunukine ngwami, 11chize chakunjila mu kanwa lia mutu, kuchishi kumuvulumwisa, alioze chize chakutuhuka mu kanwa lienyi che chakumuvulumwisa.”

12Hohene tumbaji yaakundama kuli Yesu nikumuhula ngwo: “Unanyingika ngwe Afariseu keevwanga wuli muze Wahanjikanga maliji wano, nyi?” 13Neye yaakumbulula ngwenyi: “Chibuta cheswe chize Tata wa mwilu kachitumbile, makachitukula. 14Echenu Afariseu! Kaali tetekeli tupuputa. Alioze, nyi kapuputa masongwela kapuputa mukwo, eswe aali maaholokela mu wina.” 15Petulu yamwamba ngwenyi: “Tulumbunwine kama chishima chino.” 16Yesu ngwenyi: “Kuchi, ni yenu nawa kunushi malinjekela, nyi? 17Kuma kunwanyingikine ngwenu, chize cheswe mutu malia kuchakunjila mu jimo lienyi, mba kuchakutuhuka mu mujimba wenyi, nyi? 18Alioze yuma yize yakutuhuka mu kanwa yakukatuka mu mbunge, yenayo yakuvulumwisa mutu. 19Mumu mu mbunge mwakutuhuka manyonga abi. E akumuzondwola ni kushiha atu, ni kulinga utanji ni waze ali ku malo, ni kulinga utanji ni twamishi, ni kwiya, ni kuhanjika mahuza, ni kushililika. 20Yenayo yakuvulumwisa mutu, alioze kulia muze mutu kanda achisana ku moko ngwe chize anambe ayo, chize kuchishi kuvulumwisa mutu.”

Umwe pwo, chilambala, yafuliela Yesu

(Tala nawa Mar 7:24-30)

21Yesu yakatuka ko, yaya ku chifuchi chize chakusulangana ni membo ja Tiru ni Sidone.#15:21 Tiru ni Sidone: tala 11:21. 22Umwe pwo wa ku Kanana, te katwama ku chifuchi chize, yeza kuli iye nikukololoka ngwenyi: “Mwene, Mwana wa David, nguvwile kama keke! Mwanami wa pwo kali ni mwiku wa luchisa; wakunumwesa lamba linji.” 23Alioze kamukumbulwile liji nilimwe. Tumbaji twenyi yaamukundama nikumulembela ngwo: “Muhange, mumu kanatukaula ni kutwaha chimbangwinya.” 24Yesu yakumbulula ngwenyi: “Zambi hanangutumu shina lume kuli mapanga a kutoka mukachi ka Israele.” 25Alioze mwe pwo yakundama nikuliumba ha makungunwa ngwenyi: “Mwene, ngukwase kama!” 26Yesu ngwenyi: “Kuchalitele kwanda yakulia ya ana ni kuyimbilila tuwa.” 27Pwo ngwenyi: “Chochene, Mwene, alioze chibwe tuwa kaakulia yifwenyufwenyu yize yakuholoka ku mesa ya akako.” 28Mba Yesu yamukumbulula ngwenyi: “Yena mama, ufulielo we unene! Chibwe ngwe chize unazange.” Mwanenyi yahinduka ha shimbu lizeliene.

Yesu yawuka mieji anji

29Yesu yakatuka ko, yaya ku mbumbulu ya chitende cha Galilea,#15:29 CHITENDE CHA GALILEA: tala 4:18. yakanduka ha mulundu, yatwama ho.

30Mbunga jinene yeeza kuli iye, yaamunehena yitonji, ni tupuputa, ni yilema, ni tunaye, ni mieji akwo anji. Yaatumbika ku molu ja Yesu, neye yaawuka. 31Mbunga yaalishimwoka ha kumona ngwo, tunaye kaanahanjika, yitonji kaanahinduka, yilema kaanende kanawa, tupuputa kaanamono. Atu yaalemesa Zambi ya Israele.

Yesu yalisa atu tununu awana

(Tala nawa Mar 8:1-10)

32Yesu yambila tumbaji twenyi ngwenyi: “Mbunga yino keke nguneevwila, mumu kaali ni yami matangwa atatu, keeshi nawa nichimwe cha kulia. Chazangile kwashika ni zala, nyi ka, hanji maalezemuka mu jila.” 33Tumbaji yaamukumbulula ngwo: “Muno tuli mu puya. Kulihi mutuwana yakulia ya kulisa mbunga yibwa haha?” 34Yesu yaahula ngwenyi: “Mbolo jingahi nuli najo?” Ayo ngwo: “Shimbiali, ni tumwe tuyishi.” 35Mba Yesu yambila mbunga atwame hashi, 36yanda mbolo shimbiali ni e yishi, yasakwila, yabalwola mbolo, yabatwola yishi yipinji yipinji, yayaha tumbaji. No yaayanyina mbunga. 37Eswe yaalia, yaakuta. Tumbaji yaazalisa tupaya shimbiali ni yibalubalu yize yasalile ho. 38Waze alile, kwoka cho ngwe tununu awana a malunga, kuweza mapwo ni ana. 39Muze hashika mbunga, Yesu yanjila mu wato, yahiluka ku njiza ya Magadane.

Currently Selected:

Mateu 15: CHK1970

Highlight

Copy