Mateu 13

Chishima cha chikuwa

(Tala nawa Mar 4:1-9; Luk 8:4-8)

1Ha tangwa lizeliene Yesu yatuhuka mu zuwo, yaya ni kutwama ku mbumbulu ya chitende. 2Mbunga yinene yaamukunguluka. Kashika Yesu yanjila mu wato, yatwama mo, ye mbunga yaamana ku mbumbulu. 3Neye yaalongesa yuma yinji ni yishima ngwenyi:

“Achivwenu! Umwe mutu watuhukile mu kukuwa. 4Muze akuwile mbuto, yimwe yiiholokela ku sesa lia jila. Tujila yeeza, yaayilia. 5Yikwo yiiholokela homa ha mawe, haze kuhabwile ko mavu anji. Mbuto yiisoka nikawashi, mumu te kuheshi ndama ya mavu. 6Alioze muze tangwa hiliasasaminya, yibuta yilekama, yiyuma chau, mumu te kuyishi miji. 7Mbuto yikwo yiiholokela mukachi ka mingonga. Ye mingonga yiitatuka, yiikeketesa yibuta. 8Alioze mbuto yikwo yiiholokela ha mavu abema, yiiyima mihuko; yimwe kulakaji, yikwo makumi asambano, yikwo makumi atatu.” 9Yesu yaweza ho ngwenyi: “Banjikenu kanawa, nyi nuli ni matwi!”

Chikuma chize Yesu atelele yishima

(Tala nawa Mar 4:10-12; Luk 8:9-10)

10Tumbaji yaamukundama nikumuhula ngwo: “Kuchi unahanjika no mu yishima?” 11Neye yakumbulula ngwenyi: “Yenu hananwehe cho kunyingika yijimbikilo ya Wanangana wa mwilu, alioze ayo ka. 12Mumu yoze ukwete, makamuwezela yikwo, hanga akabwe nayo yakulumbama. Alioze yoze keshi nayo, makamuchiza chibwe yize yikepe ali nayo. 13Nakuhanjika no mu yishima, mumu kaakutala alioze keeshi kumona; kaakubanjika, alioze keshi kwivwa, chibwe keeshi kunyingika. 14Chenacho chinamanunuka hakutwala kuli ayo maliji waze ahanjikile mukwa munanyi wa Zambi, Izaya, ngwenyi:

‘Munukatala kubanjika, hindu kunuchi kunyingika.

Munukatala kutala, hindu kunuchi kumona.

15Mumu mbunge ja atu wano hijinaleme.

Matwi jo haanafulamana ha kwivwa,

Meso jo haanafukiwa ha kumona,

Kuchina meso jo maamona,

Matwi jo meevwa,

Mbunge jo mujinyingika,

Mba maatewuluka kuli yami

hanga ngwawuke.

Chenacho anambe Zambi.’

16Alioze yenu nunawaha, mumu meso jenu kaakumona, ni matwi jenu kaakwivwa. 17Chamwenemwene ngunanwambulwila ngwami, akwa munanyi a Zambi anji ni akwa ululi anji evwile usona ha kumona yize nwakumona yenu, alioze kaayimwene ko, ni kwivwa yize nwakwivwa yenu, alioze kaayivwile ko.”

Yesu yalumbununa chishima cha chikuwa

(Tala nawa Mar 4:13-20; Luk 8:11-15)

18“Ivwenu ulumbunwiso wa chishima cha chikuwa. 19Waze akubanjika ku longeso lia Wanangana wa Zambi, alioze kulialumbunukine, kaalifwa ngwe sesa lia jila kuze kwakuholokela mbuto. Sakwonga kakwiza ni kuchanga yize akuwile mu mbunge jo. 20Akwo kaalifwa ngwe mavu a ha mawe kuze kwakuholokela mbuto. Enoo akwivwa longeso, akulitambula hazehene ni uwahililo. 21Hindu ye mbuto miji kuyishi kuya kusuku. Kaakunyongonona ha shimbu likepe, mba muze luyinda hanji yihungumiona yakwiza mumu ha longeso, hazehene maatalinga. 22Akwo akutambula mbuto mukachi ka mingonga. Enoo akwivwa longeso, alioze yibikalo ya hashi hano ni kwonga cha ubite yakukeketesa longeso, mba muliseka. 23Atu akwo akutambula mbuto ha mavu abema. Kaakwivwa longeso, kaakulinyingika pundu, kaakwima mihuko, amwe kulakaji, akwo makumi asambano, akwo makumi atatu.”

Chishima cha mwambu wamokomoko

24Yesu yaatela chishima chikwo ngwenyi: “Wanangana wa mwilu walifwa ngwe mutu yoze wakuwile mbuto yibema mu munda wenyi. 25Umwe ufuku, shimbu te atu anabombo mu tulo, mukwa kole yenyi yeza, yatumba mwambu wamokomoko mukachi ka tiriku yize yibema, mba yaya kwenyi. 26Muze mbuto hiyasoka ni mieho hiyakola, mwambu wamokomoko neyo yiisoka. 27Akwa milimo a mwenya munda yeeza ni kumuhula ngwo: ‘Mwata, kuwatumbile mbuto yibema mu munda we, nyi? Kulihi mba unakatuka mwambu wamokomoko?’ 28Neye yaakumbulula ngwenyi: ‘Mukwa kole halinga chino.’ Mba akwa milimo yaamuhula ngwo: ‘Unazange tuye tukatukule mwambu uze wamokomoko, nyi?’ 29Neye ngwenyi: ‘Ka, kuchina muze munukatukula mwambu uze wamokomoko, munukatukula nawa tiriku kumuwika. 30Yechenu yitatuke hamuwika ndoo ha tangwa lia kubatula. Ha tangwa lize mungukambila akwa kubatula ngwami tukulenu hatangu mwambu wamokomoko, yikasenu yichita nukayoche, mba kungilenu tiriku mu machila jami.’ ”

Chishima cha lunona wa chibuta cha mostarde

(Tala nawa Mar 4:30-32; Luk 13:18-19)

31Yesu yaatela chishima chikwo ngwenyi: “Wanangana wa mwilu walifwa ngwe lunona wa chibuta cha mostarde, yoze anijile mutu ni kumutumba mu munda wenyi. 32Mwenawo mukepe Wahiana nona jeswe. Alioze muze hichasoka, chakubwa chinene chahiana yibuta yeswe. Mba tujila kaakwiza ni kutunga yaswa ku mitango yawo.”

Chishima cha yitumbo ya mbolo

(Tala nawa Luk 13:20-21)

33Yesu yaatela chishima chikwo ngwenyi: “Wanangana wa mwilu walifwa ngwe yitumbo ya mbolo yize anjile umwe pwo. Yayichinga mu njongo jitatu ja wunga, ndoo weswe yiufutunuka.”

Chikuma chize Yesu atelele yishima

(Tala nawa Mar 4:33-34)

34Yesu yalongesa mbunga yuma yize yeswe ni yishima. Kahanjikile no liji nilimwe shina ni yishima. 35Yalinga chino hanga chikamanunune liji lize Zambi ahanjikile kuli mukwa munanyi wenyi, ngwenyi:

“Munguhanjika no ni yishima.

Mungwalumbunwina yuma ya kuhengeka chize ku kutangiwa cha hashi.”

Yesu yalumbununa chishima cha mwambu wamokomoko

36Yesu yahichika mbunga, yanjila mu zuwo. Tumbaji twenyi yaamukundama nikumuhula ngwo: “Tulumbunwine kama chishima cha mwambu wamokomoko wa mu munda.” 37Yesu ngwenyi: “Yoze wakutumba mbuto yibema, mwe Mwana Mutu,#13:37 mwana mutu: tala 8:20. 38Munda, he hashi. Mbuto yibema, e atu ja Wanangana. Mwambu wamokomoko, e atu ja Sakwonga. 39Mukwa kole yoze watumbile mwambu wamokomoko, mwe Sakwonga. Kubatula cha tiriku, che kumanunuka cha mwaka. Akwa kubatula tiriku, e tunganda a mwilu. 40Ngwe chize akungile mwambu wamokomoko ni kuwocha mu kahia, Chenacho muchikabwa ha kumanunuka cha mwaka. 41Mwe Mwana Mutu makatuma tunganda twenyi a mwilu. Enoo maakachiza mu wanangana wenyi eswe waze akuvulumwisa akwo ni waze akulinga yibi. 42Maakambila mu jiko lia kahia. Kwenako atu maakalila ni kulicheka ku mazo. 43Hohene akwa ululi maakatemuka ngwe tangwa mu Wanangana wa Tato. Banjikenu kanawa nyi nuli ni matwi.”

Chishima cha ubite wakuhengeka

44“Wanangana wa mwilu walifwa nawa ngwe ubite uze wakuhengeka mu munda. Mutu yawana ubite uze, yausweka, yawahilila, yaya ni kulanjisa yeswe yize abwile nayo, yahiluka, yalanda munda uze.”

Chishima cha kakanga

45“Nawa, Wanangana wa mwilu walifwa ngwe mukwa kulanjisa yoze unafupu kakanga wa ndando yinji. 46Muze hawana umuwika, yaya, yalanjisa yeswe yize abwile nayo, yalanda kakanga yoze.”

Chishima cha Wanda wa yishi

47“Nawa, wanangana wa mwilu walifwa ngwe Wanda uze atele mu chitende ni kukunga yishi eka ni eka. 48Muze hiwazala too, akwa kutela yishi yaaukoka ku mbumbulu ya meya, yaatwama ni kusakula yishi, yaasa abema mu yikashi, yaambila waze abi. 49Chenacho muchikabwa ha kumanunuka cha mwaka. Tunganda wa mwilu maakaya ni kuhandununa yingulungulu ni akwa ululi. 50Maakambila yingulungulu mu jiko lia kahia. Kwenako atu maakalila ni kulicheka ku mazo.”

Ubite Waha ni Ukulu

51Yesu yaahula ngwenyi: “Yuma yino nwayivwa kanawa, nyi?” No yaamukumbulula ngwo: “Ewa.” 52Mba yaamba ngwenyi: “Chenacho longeshi mweswe wa Shimbi yoze mabwa kambaji mu Wanangana wa mwilu walifwa ngwe mwenya zuwo yoze matuhwisa mu chibatulo muze akuswekela ubite wenyi, yuma yaha ni yikulu.”

Akwa Nazare yaalituna Yesu

(Tala nawa Mar 6:1-6; Luk 4:16-30)

53Muze Yesu hamanununa kuta yishima yize, yakatuka ko, 54yahiluka ku limbo kuze akolelele, yabutuka kulongesa mu zuwo lio lia kuwayila. Atu eswe yaalishimwoka kuhiana, yaahula ngwo: “Kulihi yono awana mana wano? Ngwe kuchi anahase kulinga yikomokeso yino? 55Awu hi mwana wa mukwa kusonga mabaya ko, nyi? Naye hi Maria ko, nyi? Anakwo hi Tiangu (Jake) ni Josefe ni Simone ni Yudase ko, nyi? 56Mandumbu jenyi eswe keeshi hakachi ketu, nyi? Kulihi awana yuma yino yeswe?” 57Mba yaalituna ye. Yesu yaamba ngwenyi: “Kuma kweswe mukwa munanyi wa Zambi kaakumulemesa, alioze mu limbo lienyi mwene ni mu zuwo lienyi keeshi kumusa vumbi.” 58Kalingile ko yikomokeso yinji mumu kaafulielele ko.

Currently Selected:

Mateu 13: CHK1970

Highlight

Copy