Mateu 12

Chihula hakutwala ku tangwa lia kuhwima

(Tala nawa Mar 2:23-28; Luk 6:1-5)

1Ha matangwa waze, Yesu yabalikila mu minda ya tiriku ha tangwa lia kuhwima. Tumbaji twenyi yeevwa zala, yaabutuka kumakuna mitwe ya tiriku ni kuyilia. 2Muze Afariseu#12:2 afariseu: tala 3:7 achimwene, yaambila Yesu ngwo: “Tala, tumbaji twe kaanalingi ha tangwa lia kuhwima chize kuchalitele ni Shimbi jetu.” 3Yesu ngwenyi: “Kunwatangile nilimwe tangwa chize alingile mwanangana David, iye mwene ni atu jenyi, muze evwile zala, nyi? 4Yanjila mu zuwo lia Zambi, yalia mbolo ja kutumbieka ku meso ja Zambi, jize Shimbi kujatayijile iye chibwe atu jenyi kujilia—shina mahako a Zambi wika. 5Hanji kunwatangile mu Shimbi ja Mose ngwo, ha tangwa lia kuhwima mahako keeshi kufunga Shimbi ya tangwa lia kuhwima muze akulinga mulimo mu zuwo lia Zambi, nyi? Hindu keeshi kwo chitela. 6Ngunanwambulwila ngwami, munene Wahiana zuwo lia Zambi hano hali. 7Hichinasonewa mu Mukanda wa Zambi ngwo: ‘Chishi kuzanga atu angulambule milambu ya tushitu, alioze ngunazange alivwile keke.’ Nyi kunwanyingika longeso lino, kachi kunwahishile waze keeshi chitela. 8Mumu yami, Mwana Mutu,#12:8 mwana mutu: tala 8:20. nguli Mwene wa tangwa lia kuhwima.”

Mukwa kwoko liasosewa

(Tala nawa Mar 3:1-6; Luk 6:6-11)

9Yesu yakatuka ko, yanjila mu limwe zuwo lia kuwayila. 10Yimubwa umwe mukwa kwoko liasosewa. Amwe waze abwile mo yaazanga kusuma Yesu mulonga. Kashika, yaamuhula ngwo: “Muchilita ni Shimbi kuwuka mutu ha tangwa lia kuhwima, nyi?” 11Yesu ngwenyi: “Nyi umwe hakachi kenu mabwa ni panga umuwika, yoze maholokela mu wina usuku ha tangwa lia kuhwima, kuma mutu yoze kechi kuya ni kumutuhwisa mo, nyi? 12Alioze ulemu wa mutu kuwahianyine wa panga, nyi? Kashika, chinalite ni Shimbi kulingila mutu yibema ha tangwa lia kuhwima.” 13Yesu yambila mweji ngwenyi: “Olala kwoko lie.” Neye yaliolola, mba yilibwa lingunu ngwe likwo. 14Afariseu yaatuhuka, yaatwama punga amone chize maahasa kushiha Yesu.

Kavumbi yoze atongwele Zambi

15Muze Yesu hachivwa, yakatuka ko. Mbunga yinene yaamukaula. Yesu yawuka mieji eswe. 16Alioze yaakanjisa chikolo ngwenyi: kanda akamusolola. 17Yachilinga hanga chikamanunune liji lize Zambi ahanjikile kuli mukwa munanyi wenyi Izaya, ngwenyi:

18“ ‘Talenu kavumbi kami yoze natongwele,

yoze nakuzanga kuhiana, ni yoze nakuwahilila nenyi.

Mungukasa Mwiku wami muli iye,

mba makambulula ubatwilo wami kuli waze hi Ayuda ko.

19Kechi kalitachika ni mutu, chibwe kechi kakololoka.

Mutu niumwe kechi kevwa liji lienyi mu majila.

20Kechi kamakuna lumbungu wa kufwenya,

kechi kajima ndeya yize yinafwinji mwishi.

Makanyongonona ndoo ululi muukumba.

21Mavungu eswe maakasa mbunge ha jina lienyi.’ ”

Yesu ni Belzebu

(Tala nawa Mar 3:20-30; Luk 11:14-23)

22Atu yaanehena Yesu kapuputa kanda kanaye, mumu te mwiku wa luchisa akwete. Yesu yamuwuka, mba mwe mutu yabutuka kuhanjika ni kumona. 23Mbunga jeswe yaalishimwoka, ngwo: “Yono hi Mwana wa David#12:23 mwana wa DAVID: tala 9:27. ko, nyi?” 24Muze Afariseu haachivwa, yaamba ngwo: “Mutu yono kakutuhwisa mwiku wa luchisa shina ni tachi ja Belzebu,#12:24 BELZEBU: tala 10:25. mwata wo.” 25Yesu, ha kunyingika manyonga jo, yaamba ngwenyi: “Nyi akwa wanangana maalihandununa ni kulitachika ene, wanangana uze muukabwa wahululu. Nyi akwa limwe limbo hanji akwa limwe jiko maalihandununa ene, jiko lize hanji limbo lize mulikafwa. 26Nyi Sakwonga matuhwisa Sakwonga, kachi malitachika iye mwene. Ngwe kuchi wanangana wenyi muukalinduluka? 27Nyi yami nakutuhwisa mwiku wa luchisa ni tachi ja Belzebu, ngwe chize nunambe, mba atu jenu ni tachi jaya akuutuhwisa? Atu jenu ayo ene kaananuhisa ha manyonga jenu. 28Alioze, nyi ni tachi ja Mwiku wa Zambi nakutuhwisa najo mwiku wa luchisa, chinalumbunuka ngwo, Wanangana wa Zambi hiuneza kulu mukachi kenu.

29“Ngwe kuchi mutu mahasa kunjila mu zuwo lia chitakame ni kwiya yuma yenyi, nyi hatangu kanda achimukasa? Muze hamukasa, mba mahasa kwiya yuma yeswe mu zuwo lienyi.

30“Yoze keshi hamwe ni yami, kakulimika ni yami. Yoze keshi kukunga hamwe ni yami, kakumwanga. 31Kashika, ngunanwambulwila ngwami, Zambi makonekena atu milonga yo yeswe ni kushililika cho cheswe, alioze yoze mashililika Mwiku wa Linanga, Zambi kechi kamukonekena. 32Yoze malimika ni Mwana Mutu,#12:32 mwana mutu: tala 8:20. Zambi makamukonekena, alioze yoze malimika ni Mwiku wa Linanga, Zambi kechi kanukonekena, chibwe ha mwakono chibwe ha mwaka uze muukeza.”

Mutondo ni mihuko yawo

(Tala nawa Luk 6:43-45)

33“Ha kubwa ni mihuko yibema, chanutamba kubwa ni mutondo Ubema. Nyi nwabwa ni mutondo ubi, ni mihuko yibi munukabwa nayo, mumu mitondo kaanayinyingika ku mihuko yayo. 34Yenu vungu lia yihili! Ngwe kuchi yenu abi munuhasa kuhanjika yibema. Mumu kanwa liakuhanjika yize yinalumbama mu mbunge. 35Mutu mubema kakutuhwisa yuma yibema mu mbunge yenyi yibema. Mutu mubi kakutuhwisa yuma yibi mu mbunge yenyi yibi.

36“Ngunanwambulwila ngwami, ha Tangwa lia Ubatwilo, liji lieswe liamokomoko lize te atu akuhanjeka, maakalilumbununa. 37Mumu ku maliji je makakusambisa hanji kukuhisa.”

Akwa lutwe yeeta chilayi

(Tala nawa Mar 8:11-12; Luk 11:29-32)

38Mba amwe alongeshi a Shimbi ni Afariseu#12:38 AFARISEU: tala 3:7. yaamba ngwo: “Longeshi, tunazange utulweze chilayi.” 39Yesu yaakumbulula ngwenyi: “Yenu atu ja mwakono, yingulungulu, kunushi kulivwa ni Zambi. Nunafupu chilayi, alioze keechi kanwaha cho nichimwe, shina chilayi cha mukwa munanyi wa Zambi, Yona. 40Ngwe chize Yona abwile mu jimo lia yishi munene matangwa atatu a mwalwa ni ufuku, Chenacho nawa, mwe Mwana Mutu makabwa mu kalunga matangwa atatu a mwalwa ni ufuku. 41Ha Tangwa lia Ubatwilo akwa Ninive maakakatukila atu ja mwakono ni kwahisa, mumu ayo alumukine ku mbunge muze evwile kwambujola cha Yona. Ni chikuma chahiana chize cha Yona hano hichili! 42Ha Tangwa lia Ubatwilo, mwanangana wa pwo wa ku Sude makakatukila atu ja mwakono ni kwahisa, mumu yakatuka ku masongo a hashi ha kwivwa maliji a mana a Solomone. Ni chikuma chahiana chize cha Solomone hano hichili!

Kuhiluka cha mwiku wa luchisa

(Tala nawa Luk 11:24-26)

43“Muze mwiku wa luchisa hiwatuhuka muli mutu, muulihiza muma mumu nikufupa uhwimino. Nyi kuwauwanyine ko, 44muulihanjikisa ngwenyi: ‘Munguhiluka mu zuwo liami muze natuhukile.’ We mwiku muuhiluka nikuliwana liawashi, liakukomba, liakululika kananwa. 45Mba muuya ni kuneha mwiku ukwo shimbiali ubi Wahiana uyo. Hakusula kutwama cha mutu yoze muchikabwa chibi chahiana chitangu. Muchikabwa nawa chizechene kuli yingulungulu a mwakono.”

Naye ni anakwo ja Yesu

(Tala nawa Mar 3:31-35; Luk 8:19-21)

46Shimbu te Yesu machihanjika ni mbunga, kuma naye ni anakwo yaaheta, yaamana haze, yaafupa kuhanjika nenyi. 47Umwe mutu yambila Yesu: “Ngwowe, noko ni anakwenu kaanamana haze, kaanazange kukuhanjikisa.” 48Yesu yakumbulula mutu yoze ngwenyi: “Mwe mama iya? Ni anakwetu aya?” 49Mba yolola kwoko lienyi kuli tumbaji twenyi, ngwenyi: “Talenu, mama ni anakwetu enaa! 50Mumu yoze wakulinga upale wa Tata wa mwilu, mwenawo mwe mwanakwetu, ni ndumbwani, ni mama.”

Currently Selected:

Mateu 12: CHK1970

Highlight

Copy