Luka 19

Yesu ni Zakeu

1Yesu yanjila ni kubalika ndusu mu limbo lia Yeriku.#19:1 Yeriku: tala 10:30. 2Mwata wa akwa kulambwisa lijimu wabwile ko, jina lienyi Zakeu, te pichi. 3Yazanga kumona Yesu chize abwa. Alioze wabwile mwihi ni kahashile kumumona mumu ha mbunga. 4Mba yazomboka kulutwe, yanyina ku mutondo musuwa, hanga amone Yesu muze mabalika ko. 5Muze Yesu haheta ko, yahetuka, yamona Zakeu, yamwamba ngwenyi; “Lipupwise usunuke, Zakeu, mumu Changutamba kubwa ku mahie musono.” 6Zakeu yalipupwisa kusunuka, yamutambula ni chiseke. 7Eswe achimwene, yaalinyenyeta ngwo: “Mutu yono haya maha chivulumunyi!” 8Alioze Zakeu yamana kikilii, yambila Mwene ngwenyi: “Talenu, Mwene! Munguhana Chihanda cha hakachi cha yikumba yami kuli yiswale. Nyi natambwile kuli umwe mbongo ni kaliongelo, mungumuhilwishila jo yisuho yiwana.” 9Yesu yamba ngwenyi: “Musono uno akwa jiko lino haalamwina, mumu mutu yono neye kali mwana wa Abrahama. 10Mumu Mwana Mutu#19:10 mwana mutu: tala 5:24. haneza mu kufupa ni kulamwina akwa kutoka.”

Chishima cha mbongo kumi

(Tala nawa Mat 25:14-30)

11Yesu yaatela chishima waze te anabanjika maliji wano, mumu wabwile hakamwihi ni Yerusaleme, ni atu yaanyonga ngwo, Wanangana wa Zambi himuusoloka shimbu lizeliene. 12Neye yamba ngwenyi: “Umwe mutu wa lufuma wayile ku chimwe chifuchi kusuku ha kutambula wanangana, akahiluke nawa. 13Shimbu kanda achiya, yatambika tuvumbi twenyi kumi. Mutu mweswe yamwaha lumbongo wa oru, ngwenyi: ‘Sepenu najo ndoo mungukahiluka.’ 14Alioze atu ja mu chifuchi chenyi yaamuvutwokela, yaatuma tunganda kunyima lienyi ni kumwamba ngwo: ‘Kutusolo mutu yono kubwa mwanangana wetu.’

15“Mutu yoze yatambula wanangana, yahiluka mu chifuchi chenyi. Mba yatambika tuvumbi waze ahele mbongo, hanga anyingike jize afumbwile. 16Mutangu yeza nikwamba ngwenyi: ‘Mwanangana, lumbongo yoze wanguhele hinafumbula nenyi mbongo kumi ja oru.’ 17Mwanangana yamwamba ngwenyi: ‘Walinga kanawa, kavumbi mubema! Mumu washishika ha yuma yikepe, ngunakupwisa mukwa kuyula wa membo kumi.’ 18Kavumbi wa muchaali yeza nikwamba ngwenyi: ‘Mwanangana, lumbongo yoze wanguhele hinafumbula nenyi jitano ja oru.’ 19Mwanangana yamwamba ngwenyi: ‘Ngunakupwisa mukwa kuyula wa membo atano.’ 20Kavumbi mukwo yeza, nikwamba ngwenyi: ‘Mwanangana, lumbongo we wa oru yono. Namufungile ni kumusweka mu chitambala. 21Nevwike kwami woma, mumu uli mutu mukalu. Wakwanda chize hi cha yena ko, wakuhela chize kuwatumbile.’ 22Mwanangana yamwamba ngwenyi: ‘Kavumbi mubi, mungukubatwila nikulita ni maliji je. Kuma te Unanyingika ngwe, nguli mutu mukalu ni kwanda chize hi cha yami ko ni kuhela chize chatumbile. 23Mba kuchi kuwahanyine lumbongo wami kuli mukwa kufumbula mbongo? Kachi ha kuhiluka chami hinajitambula ni mbwezo.’ 24Mba yambila waze abwile ko ngwenyi: ‘Mutambulenu lumbongo yoze wa oru, mwehenu yo yoze uli ni kumi.’ [ 25No yaamwamba ngwo: ‘Mwanangana, yoze kali kulu ni mbongo kumi!’]#19:25 Yisoneko yikwo yikulu kuyishi ni maliji wano. 26Yakumbulula ngwenyi: ‘Ngunambe ngwami yoze ukwete, makamuweza alioze yoze keshi nacho, makamuchiza chibwe chize chikepe ali nacho. 27Alioze hakutwala kuli akwa kole jami, waze kaanguzangile kubwa mwanangana wo, anehenu kuno, ashihenu ku meso jami!’ ”

Yesu mwe Mwanangana yanjila mu Yerusaleme

(Tala nawa Mat 21:1-11; Mar 11:1-11; Yoa 12:12-19)

28Muze hamba maliji wano, Yesu yatetekela kulutwe nikuya ku Yerusaleme. 29Shimbu machikundama ku yihunda ya Betfaje#19:29 Betfaje: hehi ni mulundu wa Olive. ni Betania,#19:29 betania: kilometro 3 ku chivumbuko cha Yerusaleme. ha mwanda wa mulundu wa Olive#19:29 mulundu WA olive: ku chivumbuko cha Yerusaleme musali lia chitwetwe Kidrone. yatuma tumbaji aali kulutwe, 30ngwenyi: “Yeenu ku chihunda chize chasulangana ni yenu. Muze munuheta ko, munuwana mwana chimbulu wakukasa, hali yoze mutu niumwe kanda achitwama ho kama nilimwe tangwa. Mujitulenu, nungunehene yo. 31Nyi umwe manuhula ngwenyi: ‘Kuchi kevwe nunamujitula?’ mulumbunwinenu ngwenu: ‘Mwene kali nenyi ni chikala.’ ” 32E tumbaji yaaya, yaawana yuma yeswe ngwe chize aambile Yesu. 33Shimbu lize te anajitula mwana wa chimbulu, enyaho yaahula ngwo: “Kuchi kevwe nunajitula mwana wa chimbulu yono?” 34Yaakumbulula ngwo: “Mwene kali nenyi ni chikala.” 35Mba yatwalila Yesu mwana wa chimbulu. Yaala mahina jo hali kashitu, yaanyinyisa ho Yesu. 36Muze te anayi, atu yaalala mahina jo mu jila. 37Muze himakundama ku Yerusaleme, mu jila yize yapalumuka ku mulundu wa Olive, mbunga ya tumbaji eswe yaawahilila kuhiana, yaabutuka kuchichimieka Zambi ni liji linene ha yipupu yeswe yize haamona. 38Yaambamba ngwo: “Zambi awahise Mwanangana yoze uneza mu jina lia Mwene! Uhwimino mwilu, uhenya kuli Zambi Mwilu Mwahiana!”

39Amwe Afariseu#19:39 afariseu: tala 5:17. waze abwile mukachi ka mbunga yaambila Yesu ngwo: “Longeshi, ambila tumbaji twe ahole kuluu!” 40Yesu yakumbulula ngwenyi: “Ngunanwambe ngwami, nyi ahola, e mawe wano maakololoka!”

Yesu yalilila Yerusaleme

41Muze Yesu hakundama ku limbo, yalimona, yalililila 42nikwamba ngwenyi: “Nyi wanyingikine, chibwe musono uno, yuma yize muyihasa kukwaha uhwimino! Alioze haliabwila yinaswamana ku meso je! 43Mumu matangwa makeza muze akwa kole je maakakujingilika, maakakuseleka ku mambango eswe. 44Maakakwonona pundu yena ni ana je mu chipanga cha limbo lienu. Keechi kakuhichikila liwe nilimwe liakubalakenya ni likwo, mumu te kuwanyingikine mwaka uze Zambi ejile ni kukulamwina!”

Yesu yabemesa zuwo lia Zambi

(Tala nawa Mat 21:12-17; Mar 11:15-19; Yoa 2:13-22)

45Yesu yanjila mu zuwo lia Zambi lia Ayuda, yabutuka kutuhwisa akwa kulanjisa ni akwa kulanda. 46Yaamba ngwenyi: “Hichinasonewa mu Mukanda wa Zambi ngwo: ‘Zuwo liami mulikabwa zuwo lia kuwayila.’ Alioze yenu hinunalipwisa chivwenge cha eji!”

47Tangwa ha tangwa Yesu yalongesa mu zuwo lia Zambi. Mahako a lutwe a Zambi, ni alongeshi a Shimbi, ni akwa lutwe ja atu yaazanga kumushiha. 48Alioze kaahashile kuchilinga, mumu atu eswe yaamwivwa ni mbunge jeswe.

Currently Selected:

Luka 19: CHK1970

Highlight

Copy