Luka 18

Chishima cha ngaji ni twamishi

1Yesu yaatela chishima chino ha kwalweza ngwenyi: chaatamba kulemba matangwa eswe, kanda ahonga. 2“Yimubwa ngaji mu limwe limbo, te keshi kuvwila Zambi woma, ni keshi kulemesa mutu niumwe. 3Yimubwa nawa umwe pwo yoze te hanafwisa lunga. Mwe pwo yezaza kanji kuli ngaji ha kumubatwila mulonga wenyi, ngwenyi: ‘Ngukale kama kuli mukwa kole yami!’ 4Mwe ngaji yalituna yisuho yinji, alioze mwabwamuze yalihanjikisa ngwenyi: ‘Chamwenemwene Chishi kuvwila Zambi woma, ni Chishi kulemesa mutu niumwe, 5alioze mumu twamishi yono wakunguhongesa, mungumukala hanga kechi keza nawa tangwa ha tangwa ni kunguketeka!’ ” 6Mba Mwene Yesu yawezela ngwenyi: “Achivwenu chize anambe ngaji yoze wa uhenge. 7Kuma Zambi kechi kakala waze atongwele iye mwene, waze akukololoka mwalwa ni ufuku, nyi? Kuma makashimbula ha kwakwasa, nyi? 8Ngunanwambulwila ngwami, makaakala nikawashi. Alioze, muze mwe Mwana Mutu#18:8 MWANA MUTU: tala 5:24. makeza, makawana ufulielo hano hashi, nyi!”

Chishima cha Kafariseu ni mukwa kulambwisa lijimu

9Yesu yatela chishima chino waze te akulinyonga ngwo, tuli akwa ululi, ni akulelesa akwo. 10Ngwenyi: “Atu aali akandukile ni kulemba mu zuwo lia Zambi, umwe te Kafariseu,#18:10 Kafariseu: tala 5:17. mukwo mukwa kulambwisa lijimu. 11Kafariseu yamana ha ukawenyi, yalilembela ngwenyi: ‘Zambi, ngunakusakwila, mumu Chishi ngwe atu akwo: akwa mbenga, ni yihenge, ni yitanji, hanji ngwe yono mukwa kulambwisa lijimu. 12Nakulitwamina kulia yisuho yaali#18:12 yisuho yaali: mumaali ni mumatano. ha semane yimuwika mu kuwayila Zambi, nakukwaha Chihanda cha muchikumi cha yize yeswe nakuyuka.’ 13Mukwa kulambwisa lijimu yamana kusuku. Kahamukine chibwe kuhetuka, alioze yalilamba ha bambo ngwenyi: ‘Aa Zambi! Nguvwile kama keke, yami Chivulumunyi!’ ” 14Yesu yawezaho nwenyi: “Ngunanwambulwila ngwami, mutu yono yahiluka ku mahienyi mukwa kusamba ku meso ja Zambi, alioze hi yoze mukwo ko. Mumu yoze malilemesa, Zambi makamulelesa; ni yoze malilelesa, Zambi neye makamulemesa.”

Yesu yawahisa ana

(Tala nawa Mat 19:13-15; Mar 10:13-16)

15Amwe atu yaanehena Yesu ana akemba, hanga aase moko. Tumbaji yaamona, yaakanjisa atu waze. 16Alioze Yesu yatambika ana, yamba ngwenyi: “Tayizenu ana eze kuli yami. Kanda nwakanjisa, mumu Wanangana wa Zambi wa atu ngwe wano. 17Chamwenemwene ngunanwambulwila ngwami, yoze keshi kutambula Wanangana wa Zambi ngwe mwana mukepe kechi kanjila mo nichimwe.”

Pichi mukwa kuyula

(Tala nawa Mat 19:16-30; Mar 10:17-31)

18Umwe mukwa kuyula, Kayuda, yahula Yesu ngwenyi: “Longeshi mubema, Chuma chika Changutamba kulinga hanga ngukabwe ni mwono wa miaka yeswe?” 19Yesu ngwenyi: “Kuchi unanguvuluka ngwe, mubema? Wakuhi mubema niumwe, shina Zambi wika. 20Unanyingika Shimbi ngwo: ‘Kanda Ulinga utanji, kanda ushiha mutu, kanda wiya, kanda ushindakenya mahuza, lemesa tatenu ni noko.’ ” 21Mwe lunga yakumbulula ngwenyi: “Shimbi jino jeswe hingunajifungu chize ku wanuke wami.” 22Ha kwivwa chino, Yesu yamwamba ngwenyi: “Hindu chimuwika unahono. Lanjisa yeswe yize uli nayo, utetele yiswale mbongo jize, muukabwa ni ubite mwilu. Mba Wize ungukaule.” 23Alioze lunga yoze, muze hachivwa, yevwa chinyengo chinji, mumu te pichi.

24Yesu yamona chize evwile chinyengo, yamba ngwenyi: “Chikalu pichi kunjila mu Wanangana wa Zambi! 25Chikalu kashitu munene, kamelu, kubalika ndusu mu chituwa cha ndongo. Alioze chikalu kuhiana pichi kunjila mu wanangana wa Zambi.” 26Waze achivwile yaamuhula ngwo: “Nyi chocho, iya kevwe mahasa kulilamwina?” 27Yesu ngwenyi: “Chize atu akusa kenu, Zambi kakuchihasa.”

28Hohene Petulu, yamba ngwenyi: “Tala yetu hitunahichika yeswe, hitunakukaula.” 29Yesu yaamba ngwenyi: “Chamwenemwene ngunanwambe ngwami, nyi umwe mahichika zuwo, chibwe pwo, hanji ayayo ni anakwo, chibwe yisemi, hanji ana mumu ha Wanangana wa Zambi, 30makatambula kuhiana ha mwakono, ni makabwa ni mwono wa miaka yeswe ha mwaka uze muwizaho.”

Yesu yambulula chisuho chamuchitatu kufwa chenyi ni uhindukilo wenyi

(Tala nawa Mat 20:17-19; Mar 10:32-34)

31Yesu yatwala tumbaji kumi ni aali ku tenga, yaamba ngwenyi: “Banjikenu! Tunayi ku Yerusaleme. Kwenako muyimanunukina yeswe yize asonekene akwa munanyi a Zambi ha chikuma cha Mwana Mutu. #18:31 mwana mutu: tala 5:24. 32Maakamukunjika kuli yilambala. No maakamukekuna, maakamuluka, maakamufwila mate, 33maakamulamba ni fimbo (shikote), maakamushiha. Alioze ha tangwa lia muchitatu kumakahinduka.” 34Alioze tumbaji maliji wano ahanjikile Yesu kaanyingikine ko ni kaalumbunukinyine ko, yaayambashana.

Yesu yalawisa meso ja kapuputa

(Tala nawa Mat 20:29-34; Mar 10:46-52)

35Muze Yesu hakundama ku limbo lia Yeriku,#18:35 Yeriku: tala 10:30. umwe kapuputa te kanatwama ku sesa lia jila nikuunjila. 36Yevwa mbunga kaanabalika, yaahula ngwenyi: “Yika?” 37No yaamukumbulula ngwo: “Yesu Kanazare kanabalika.” 38Mba yakololoka ngwenyi: “Yesu, Mwana wa David!#18:38 mwana wa David: jina likwo lia Chilamwina yoze Zambi alakenyene, yoze makahinga mwanangana David. Nguvwile kama keke!” 39Waze te anatetekela, yamukanjesa ngwo: “Hola!” Alioze yakololoka kuhiana ngwenyi: “Mwana wa David, nguvwile kama keke!” 40Yesu yamana, yamba hanga amunehene yo. Muze mwe kapuputa heza, Yesu yamuhula ngwenyi: 41“Yika unazange ngukulingile?” Neye ngwenyi: “Mwene, ngulaule kama ku meso.” 42Yesu yamwamba ngwenyi: “Laula! Ufulielo we hiwakuwuka.” 43Hazehene yalaula, yakaula Yesu ni kuchichimieka Zambi. Muze mbunga haachimona, yaachichimieka Zambi.

Currently Selected:

Luka 18: CHK1970

Highlight

Copy