Luka 20

Chihula hakutwala ku chiyulo cha Yesu

(Tala nawa Mat 21:23-27; Mar 11:27-33)

1Limwe tangwa, muze te Yesu analongesa atu mu zuwo lia Zambi lia Ayuda nikwambujola Sango Jibema, mahako a lutwe a Zambi, ni alongeshi a Shimbi hamwe ni makulwana yaakundama, 2yaamwamba ngwo: “Twambulwile, ni chiyulo chaya wakulinga nacho yuma yino? Iya wakuhele chiyulo cha kuyilinga?” 3Yesu ngwenyi: “Ni yami nawa mungunuhula chihula. Ngwambulwilenu: 4chiyulo cha Yoano ha kupapachisa, cha kwilu nyi? Shina cha hashi?” 5No yaabutuka kulihangujola ngwo: “Nyi twakumbulula ngwetu: ‘Cha kwilu,’ iye matuhula ngwenyi: ‘Kuchi mba kunwamufulielele?’ 6Alioze, nyi twakumbulula ngwetu: ‘Cha hashi,’ mbunga maatwasa mawe ni kutushiha, mumu haanakunuka ngwo, Yoano kali mukwa munanyi wa Zambi.” 7Mba yaakumbulula ngwo: “Kutwanyingikine.” 8Yesu ngwenyi: “Ni yami nawa chichi kunwambulwila ni chiyulo chaya nakulinga nacho yuma yino.”

Chishima cha njimi abi

(Tala nawa Mat 21:33-46; Mar 12:1-12)

9Hohene Yesu yaatela chishima chino ngwenyi: “Umwe mutu watumbile munda wa vinyu, yaukunjika ku moko ja njimi, mba yaya mu wenyi matangwa anji. 10Muze mwaka wa kuhela hiwaheta yatuma umwe kavumbi kuli njimi hanga akatambule yimwe mihuko. Alioze e njimi yaalamba mwe kavumbi, yaamukatwisa mokomoko. 11Mwenya munda yatuma nawa kavumbi mukwo. No yaamulamba, yaamutuka, yaamukatwisa mokomoko. 12Yatuma nawa kavumbi wa muchitatu. Njimi yaamulemeka, yaamumbila haze. 13Mba mwenya munda yamba ngwenyi: ‘Kuchi mungulinga? Mungutuma mwanami yoze nazanga kuhiana, hanji maakamusa vumbi.’ 14Alioze muze e njimi amumwene, yaalihanjikisa ngwo: ‘Awu mwe swana. Tumushihenu, hanga munda wa vinyu ukabwe niwetu!’ 15Yaamumbila haze lia munda, yaamushiha.”

Yesu yahula ngwenyi: “Mwenya munda kuchi mba makalinga njimi waze? 16Makeza ni kwashiha, mba makakunjika munda ku moko ja njimi eka.” Muze haachivwa, atu yaamba ngwo: “Kanda chikabwa kama nilimwe tangwa.” 17Yesu yaatala nee, yahula ngwenyi: “Maliji wano a mu Mukanda wa Zambi kuchi analumbunuka? Ngwo:

‘Liwe lize alitunyine tungi

hiliabwa liwe lia mu mbango, lize liakolesa zuwo.’

18“Mutu yoze malimbukila ha liwe lino, kumakamakuka. Nyi lie liwe muliholokela hali umwe, kumulikamufwenuna ngwe fufuta.”

Chihula hakutwala ku lijimu lia mwanangana wa Aroma

(Tala nawa Mat 22:15-22; Mar 12:13-17)

19Alongeshi a Shimbi ni mahako a lutwe a Zambi yaafupa mana a kukwata Yesu ha shimbu lizeliene, mumu yaanyingika ngwo, kata chishima chino ha kwahisa, alioze yeevwila atu woma. 20Kashika yaabutuka kulaa Yesu ni kumutumina ngendeshi. Wano yaalionga kubwa ni mbunge jibema, alioze yaatela Yesu muheto ni yihula. Yaafupa tangwa lia kumukunjika ku chiyulo cha mukwa kuyula, 21yaamuhula chihula chino ngwo: “Longeshi, tunanyingika ngwetu, yize wakwamba ni yize wakulongesa yinalite. Kuushi woma ha yize akunyonga atu, alioze wakulongesa umwenemwene nikulita ni Shimbi ja Zambi. 22Twambulwile kama, muchilita ni Shimbi jetu kulambula lijimu kuli mwanangana wa Aroma,#20:22 mwanangana WA AROMA: ha matangwa waze Tiberiu yoze wayulile ha miaka 14-37. nyi ka?” 23Alioze Yesu yanyingika ulembekese wo, yaakumbulula ngwenyi: 24“Ngulwezenu mwe lumbongo.#20:24 LUMBONGO: lumbongo wa prata wa Aroma, jina lienyi denariuse. Chizulie chino ni Chisoneko chino yaya?” No yaakumbulula ngwo: “Ya mwanangana wa Aroma.” 25Mba Yesu yaamba ngwenyi: “Nyi chocho, hilwisenu mwanangana wa Aroma yize niyenyi ni Zambi yize niyenyi.” 26Kaahashile kumukwata ku liji nilimwe ku meso ja atu. Kashika yaahola kuluu, yaalishimwoka ha kumbululo lienyi.

Chihula hakutwala ku uhindukilo wa afu

(Tala nawa Mat 22:23-33; Mar 12:18-27)

27Amwe Asaduseu#20:27 ASADUSEU: yimwe mbunga yikepe ya Ayuda, chibichibi ya mahako waze atayijile shina mikanda ya Ubutukilo ndoo ku Shimbi ya Mukanda wa Zambi. yeeza kuli Yesu. (Waze akwamba ngwo: “Afu keechi kahinduka.”) Yaamwamba ngwo: 28“Longeshi, Mose hanatusonekena Shimbi yino ngwenyi: ‘Nyi umwe lunga hafwa, alioze hahichika pwo keshi mwana, mwanakwo chamutamba kumbata pwo yoze hanga asemene yayo ana.’ 29Yikubwa asongo ni atu shimbiali. Mutangu yambata pwo. Mwe lunga yafwa, kahichikile ko mwana; 30ni chihata chenyi chizechene, 31ni wa muchitatu. Chenacho eswe shimbiali yaafwafwa, kaahichikile ko ana. 32Hakusula mwe pwo neye yafwa. 33Ha tangwa lia uhindukilo wa afu, makabwa pwo liaya? Mumu eswe shimbiali yaamumbata.”

34Yesu ngwenyi: “Miaka yino hano hashi, malunga ni mapwo kaakulimbata ni kaakulihangisa malu, 35alioze malunga ni mapwo waze anatela kuhinduka ku kufwa ni kubwa ni mwono ku mwaka uze muwiza ho, keechi kulimbata chibwe kulihangisa ku malo. 36Kaahashile kufwa nichimwe, mumu kaali ngwe tunganda a mwilu. Kaali ana ja Zambi, mumu hanaahindwisa ku kufwa. 37Mose kanashindakenya pundu ngwenyi, afu kumaakahinduka. Mu Chihanda chize chinahanjika hakutwala ku chibuta chize chawemene, kanavuluka Mwene ngwenyi: ‘Zambi ya Abrahama, ni ya Isake, ni ya Yakoba,’ 38Kulumbunuka ngwo: Zambi kali Zambi ya akwa mwono, hi Zambi ya afu ko, mumu eswe kaali ni mwono ha kumulemesa.” 39Amwe alongeshi a Shimbi yaamba ngwo: “Longeshi, hiwahanjika kanawa!” 40Kashika mutu niumwe kahamukine nawa kumuhula yihula yikwo.

Chihula hakutwala kuli David ni Chilamwina yoze Zambi alakenyene

(Tala nawa Mat 22:41-46; Mar 12:35-37)

41Yesu yaahula ngwenyi: “Ngwe kuchi alongeshi a Shimbi maahasa kwamba ngwo: ‘Chilamwina yoze Zambi alakenyene kali mwana wa David’? 42Mumu David iye mwene kanambe mu mukanda wa Miaso (Masamu) ngwenyi:

‘Mwene Zambi hanambila Mwene wami ngwenyi:

Twama ku chindume chami

43ndoo mungukasa akwa kole je ngwe Chuma cha kunangika molu je!’

44David yamuvuluka ngwenyi: ‘Mwene wami.’ Mba ngwe kuchi Chilamwina yoze Zambi alakenyene mahasa kubwa mwanenyi?”

Yesu yatungununa alongeshi a Shimbi

(Tala nawa Mat 23:1-36; Mar 12:38-40)

45Muze te mbunga anamubanjika, Yesu yambila tumbaji ngwenyi: 46“Kanyaminenu alongeshi a Shimbi waze akuzanga kwendangana ni mahina a lubula, waze akuzanga atu kwameneka ni vumbi mu yitanda, waze akuzanga yitwamo ya kulutwe mu mazuwo a kuwayila ni mihela ya vumbi mu yiwanyino. 47Kaakwiya yuma ya mu mazuwo ja mapwo waze haanafwisa malunga, Kaakulemba Chipinji chisuku ha kulisolola ngwo, tuli abema. Lamba liahiana maakamona!”

Currently Selected:

Luka 20: CHK1970

Highlight

Copy