Yoano 8

Pwo yoze wakwachikile mu utanji

1Alioze Yesu yaya ku mulundu wa Olive.#8:1 mulundu WA olive: ku chivumbuko cha Yerusaleme musali lia chitwetwe Kidrone. 2Muze hikwabatwoka ngwangwangwa, Yesu yahiluka ku zuwo lia Zambi lia Ayuda. Atu eswe yaamukunguluka. Neye yatwama mba yabutuka kwalongesa. 3Alongeshi a Shimbi ni Afariseu#8:3 afariseu: tala 1:24. yaamunehena pwo yoze wakwachikile mu utanji, yaamumika ku meso ja atu eswe, 4yaambila Yesu ngwo: “Longeshi, pwo yono kaakwachikanga ha shimbu lizeliene te analingi utanji. 5Mose hanatwehe Shimbi ya kushiha mapwo ngwe yono ni mawe. Yena kuchi unambe?” 6Yaamba chino ha kumweseka hanga amusume mulonga. Alioze Yesu yahetama hashi ni kusoneka ni munwe. 7Muze anyongonwene kumuhula. Yesu yahetuka nikwamba ngwenyi: “Mweswe hakachi kenu kanda achivulumuna kama aliange kumwasa liwe.” 8Mba yahetama nawa nikusoneka hashi. 9Muze heevwa maliji wano, yaatuhuka umuwika umuwika, hatangu makulwana. Yesu yasala ukawenyi ni pwo yoze te unamana ku meso jenyi. 10Yesu yahetuka nawa, yamuhula ngwenyi: “Mama, alihio, niumwe kakuhishile, nyi?” 11Yakumbulula ngwenyi: “Ewa, niumwe, Mwene.” Yesu ngwenyi: “Ni yami chakuhishile nichimwe. Yako kwe, alioze kanda uvulumuna nawa.”]#8:11 Yisoneko yikwo kuyishi ni maliji wano (7:53—8:11); yikwo haanayisa ku Yoano 21:24; yikwo ku Luka 21:38; Chisoneko chimuwika ku Yoa 7:36.

Yesu lie pangu lia hashi

12Yesu yaamba nawa ngwenyi: “Lie pangu lia hashi yami. Yoze wakungukaula mabwa ni pangu lia mwono, kechi kenda nichimwe mu milima.” 13Afariseu#8:13 afariseu: tala 1:24. yaamwamba ngwo: “Wakulishindakenya yena mwene. Yize wakuhanjika atu keechi kuyalula.” 14Yesu ngwenyi: “Chibwe nakulishindakenya yami mwene, hindu shindakenyo yami yili yamwenemwene, mumu ngunanyingika kuze nakatukile ni kuze ngunayi. Alioze yenu kunwanyingikine kuze nakatukile ni kuze ngunayi. 15Yenu nwakubatula nikulita ni ndako ja atu, yami Chishi kubatwila niumwe. 16Alioze chibwe ngubatule, hindu ubatwilo wami muulita, mumu hi nguli ukawami ko, alioze Tata yoze wangutumine kali hamwe ni yami. 17Hichinasonewa mu Shimbi jenu ngwo: ‘Nyi atu aali kaanashindakenya shindakenyo yimuwika, shindakenyo yize yili yamwenemwene.’ 18Nakulishindakenya yami mwene, ni Tata yoze wangutumine kakungushindakenya nawa.” 19No yaamuhula ngwo: “Yolihi Tatenu?” Yesu ngwenyi: “Kunwanyingikine chibwe yami chibwe Tata. Nyi nwangunyingika, kachi mununyingika nawa Tata.”

20Yesu yaalongesa maliji wano mu zuwo lia Zambi, homa haze te hatwama mishete ya chawana. Mutu niumwe wamukwachile, mumu te ola yenyi kanda yichiheta.

Kunwahashile kuya kuze yami ngunayi

21Yesu yaamba nawa ngwenyi: “Yami ngunayi kwami. Munukangufupa, alioze munukafwa mu milonga yenu. Kuze ngunayi kunwahashile kwiza ko.” 22Ayuda yaalihanjikisa ngwo: “Makalishiha, nyi? Mumu kanambe ngwenyi: ‘Kuze ngunayi kunwahashile kwiza ko.’ ” 23Yesu ngwenyi: “Yenu nuli akwa hashi hano, alioze yami mwilu ngunakatuka. Nuli akwa hashi, alioze yami hi nguli mukwa hashi ko. 24Kashika hinanwamba ngwami, munukafwa mu milonga yenu. Mumu munukafwa mu milonga yenu, shina munufuliela ngwenu, ‘Yami Nguli Yoze Nguli.#8:24 yami nguli yoze nguu: limwe jina lia Zambi iye mwene, tala Kut 3:14.’ ” 25Yaamuhula ngwo: “Yena iya?” Yesu ngwenyi: “Nguli yoze hingunanwambulwila kulu chize ku kabutu. 26Yuma yinji nguli nayo ya kwamba ni kubatula hakutwala kuli yenu. Yoze wangutumine kakuhanjika umwenemwene. Nakuhanjika kuli akwa hashi yize lume nalilongesele kuli iye.”

27Keevwile ko ngwo, kanahanjika hakutwala kuli Tata. 28Kashika Yesu yaamba ngwenyi: “Muze hinwazundula#8:28 Hinwazundula: tala 3:14. mwe Mwana Mutu,#8:28 mwana mutu: tala 1:51. mba munukanyingika ngwenu, ‘Yami Nguli Yoze Nguli.’ Munukanyingika ngwenu, Chishi kulinga nichimwe ukawami. Nakuhanjika lume yize Tata angulongesele. 29Yoze wangutumine kali hamwe ni yami. Kanguhichikile ko ukawami, mumu nakulinga yize yakumuwahila matangwa eswe.” 30Muze Yesu ahanjekele yuma yino, anji amufulielele.

Akwa kutusuka ni ndungo

31Kashika Yesu yambila Ayuda waze amufulielele ngwenyi: “Nyi munwononoka ku longeso liami, chamwenemwene munubwa tumbaji twami. 32Mununyingika umwenemwene, ni umwenemwene muunutusula.” 33Yamukumbulula ngwo: “Tuli a ku vungu lia tata Abrahama, haanga kanda tubwa kama ndungo ja mutu niumwe. Ngwe kuchi muuhasa kwamba ngwe: ‘munutusuka’?” 34Yesu ngwenyi: “Chamwenemwene ngunanwambulwila ngwami, mutu mweswe wakuvulumiona kali ndungo ya shili. 35Ndungo keshi kutwama mu zuwo lia mwene wenyi matangwa eswe, alioze mwana wakutwama mo matangwa eswe. 36Nyi mwe Mwana manutusula, kachi munutusuka chamwenemwene. 37Ngunanyingika ngwami, nuli a ku vungu lia Abrahama, alioze nwakuzanga kungushiha, mumu kunushi kutayiza longeso liami. 38Yami ngunahanjika yize angulwezele Tata, alioze yenu nwakulinga yize anwambile tatenu.”

39Yaamukumbulula ngwo: “Tata yetu kali Abrahama.” Yesu yaakumbulula ngwenyi: “Nyi chamwenemwene nuli ana ja Abrahama, kachi munulinga yitanga yize alingile. 40Alioze haliabwila nwakufupa kungushiha yami muze nakunwambulwila umwenemwene uze nevwile kuli Zambi. Abrahama kalingile ko nichimwe ngwe chino. 41Nwakulinga yitanga yize alingile tatenu.” Ayo ngwo: “Kutwasemukine ku utanji. Tata umuwika tukwete, mwe Zambi.” 42Yesu ngwenyi: “Nyi chamwenemwene Zambi mwe Tatenu, kachi mununguzanga, mumu nakatukile kuli Zambi, ni Flaliabwila nguli hano. Chalijilile yami mwene, alioze iye wangutumine. 43Kuchi kevwe kunushi kwivwa yize nakunwamba? Mumu nuli akalu ha kwivwa liji liami. 44Nuli ana ja Tatenu Sakwonga. Nwakuzanga kulinga yize akuzanga Tatenu. Iye wabwile mukwa kushiha atu chize ku Ubutukilo. Kabwile ko mu umwenemwene nichimwe, mumu muli iye umwenemwene kuushimo. Muze akuhanjika mahuza, kakuhanjika nikulita ni ndako jenyi, mumu kali mukwa mahuza ni tato ya mahuza. 45Alioze yami nakuhanjika umwenemwene, kashika kunushi kungufuliela. 46Iya hakachi kenu mahasa kungukumika ngwenu, hingunavulumuna? Nyi ngunahanjika umwenemwene, kuchi kevwe kunushi kungufuliela? 47Yoze wa kuli Zambi kakwivwa maliji ja Zambi, alioze yenu hi nuli a Zambi ko, kashika kunushi kwivwa.”

Yesu ni Abrahama

48Ayuda yaamuhula ngwo: “Kutwahanjikile kanawa ngwetu, uli Kasamaria, ni mwiku wa luchisa ukwete, nyi?” 49Yesu ngwenyi: “Mwiku wa luchisa Chishi nawo. Nakulemesa Tata, alioze yenu nwakungulelesa. 50Chishi kufupa ulemu wa yami mwene. Kwali yoze wakungufupila wo, neye kakubatula kanawa. 51Chamwenemwene ngunanwambulwila ngwami, yoze wakwononokena liji liami kechi kafwa nichimwe ndoo ku miaka yeswe.” 52Ayuda ngwo: “Eyoo! Haliabwila hitwanyingika pundu ngwetu, mwiku wa luchisa ukwete! Abrahama hanafu, ni akwa munanyi a Zambi haanafu, hindu yena unambe ngwe: ‘Yoze mononokena liji liami kechi kafwa nichimwe ndoo ku miaka yeswe.’ 53Abrahama, tata yetu, hanafu. Unashinginyeka uli munene Wahiana iye, nyi? Akwa munanyi ja Zambi haanafu. Yena wakulipwisa ngwe iya?” 54Yesu ngwenyi: “Nyi mungulilemesa yami mwene, ulemu wami muubwa wamokomoko. Yoze wakungulemesa mwe Tata, yoze nwakwamba ngwenu: ‘mwe Zambi yetu.’ 55Kunwamunyingikine nilimwe tangwa, alioze yami ngunamunyingika. Nyi mungwamba ngwami, chamunyingikine, mungubwa mukwa mahuza ngwe yenu. Alioze ngunamunyingika, ni nakwononokena liji lienyi. 56Tatenu Abrahama yawahilila ni kunyonga ngwenyi, mamona tangwa liami. Yalimona, yawahilila.” 57Ayuda ngwo: “Yena kanda uchibwa ni miaka makumi atano. Kuma hiunamono Abrahama, nyi?” 58Yesu ngwenyi: “Chamwenemwene ngunanwambulwila ngwami, muze te Abrahama kanda achisemuka, ‘Yami Nguli.#8:58 yami nguli: tala 8:24.’ ” 59No yaanda mawe hanga amwase. Alioze Yesu yaswama, yatuhuka mu zuwo lia Zambi.

Currently Selected:

Yoano 8: CHK1970

Highlight

Copy