Yoano 7

Anakwo ja Yesu te keeshi kumufuliela

1Kulutwe lia yuma yino, Yesu yabutuka kwendangana mu chifuchi cha Galilea.#7:1 Galilea: tala 2:1 Kazangile ko kwenda mu chifuchi cha Yudea, mumu Ayuda yaazanga kumushiha. 2Chiwanyino cha Ayuda cha Yikulika te hichabwa hakamwihi. 3Kashika anakwo ja Yesu yaamwamba ngwo: “Katuka kuno, yako ku chifuchi cha Yudea, hanga tumbaji twe akamone yize wakulinga. 4Niumwe masweka yize akulinga, nyi kanazange amunyingike. Yena wakulinga yitanga ngwe yize. Chinalite uye ukayilinge ku meso ja akwa hashi eswe, hanga akamone.” 5(Chibwe anakwo te keeshi kumufuliela.) 6Yesu yaamba ngwenyi: “Tangwa liami kanda lichiheta, alioze hali yenu heswe tangwa linabeme. 7Akwa hashi kaahashile kunuvutwokela, alioze yami kaakunguvutwokela mumu nakwashindakenya ngwami, yitanga yize akulinga yili ya ungulungulu. 8Yeenu kwenu ku chiwanyino. Yami Chayile ku chiwanyino chino haliabwila, mumu tangwa liami kanda lichiheta.” 9Muze te hamba maliji wano, yasala ku Galilea.

Yesu ku chiwanyino cha Ayuda cha Yikulika

10Muze anakwo haaya ku chiwanyino, Yesu neye yaya, hindu hi ku meso ja atu ko, alioze ku tenga. 11Ayuda yaamufupafupa ha tangwa lia chiwanyino, ngwo: “Kulihi ali?” 12Yaamunyinyita chinji mukachi ka mbunga. Amwe ngwo: “Kali mutu mubema.” Akwo ngwo: “Ka! Kakupiangula atu.” 13Alioze niumwe wahanjikile mwazu hakutwala kuli iye, mumu yeevwila Ayuda woma.

14Muze matangwa ja chiwanyino haabwa hakachi, Yesu yanjila mu zuwo lia Zambi lia Ayuda, yaabutuka kulongesa. 15Ayuda yaalishimwoka nikwamba ngwo: “Haa puu! Ngwe kuchi mutu yono Unanyingika yuma yino yeswe? Mumu kalilongesele ko.” 16Yesu ngwenyi: “Longeso lize ngunalongesa hi lia kuli yami ko, alioze lia yoze wangutumine. 17Yoze wakuzanga kulinga chize Zambi anazange, manyingika nyi longeso liami lili lia Zambi hanji lia yami mwene. 18Mutu yoze wakuhanjika mu chiyulo chenyi mwene, kakufupa lufuma wenyi mwene. Alioze yoze Wakufupa lifuma wa yoze wamutumine, kakuhanjika umwenemwene, keshi kaliongelo. 19Mose hananwehe Shimbi, nyi? Hindu niumwe hakachi kenu wakujifunga. Kuchi kevwe nwakuzanga kungushiha?” 20Mbunga ngwo: “Mwiku wa luchisa ukwete. Iya unazange kukushiha?” 21Yesu ngwenyi: “Chitanga chimuwika chinene ngunakalinga, ni nunalishimwoka. 22Mose hananwehe Shimbi yakupwisa ana malunga ngalami (hindu hi Mose ko wayibutwile, alioze tushakulu twenu); ni nwakutayiza kupwisa mwana lunga ngalami chibwe ha tangwa lia kuhwima. 23Nyi yenu nwakupwisa mwana lunga ngalami ha tangwa lia kuhwima, mumu kunwazangile kushiha Shimbi ja Mose, mba kuchi nunevu wuli mumu hali yami ha chize ngunakapwisa mutu mungunu ha tangwa lia kuhwima? 24Muze nwakubatula milonga, litwaminenu kutala ku meso, alioze batulenu nikulita ni ululi.”

Yesu mwe Chilamwina yoze Zambi alakenyene

25Amwe atu a mu Yerusaleme yaahula ngwo: “Awu mwene, hi yoze ko akuzanga kushiha, nyi? 26Talenu kanahanjika mwazu, alioze ayo keeshi kumwamba nichimwe! Kuma akwa lutwe kaananyingika chamwenemwene ngwo, awu mwe Chilamwina yoze Zambi alakenyene, nyi? 27Alioze muze Chilamwina yoze Zambi alakenyene makeza, niumwe makanyingika kuze anakatuka. Hakutwala kuli yono tunanyingika kuze anakatuka.”

28Muze te Yesu analongesa mu zuwo lia Zambi lia Ayuda, yakololoka ngwenyi: “Kuma chamwenemwene nunangunyingika? Chamwenemwene nunanyingika kuze ngunakatuka? Chalijilile yami mwene. Yoze wangutumine kali wamwenemwene. Mwenawo kunwamunyingika. 29Alioze yami ngunamunyingika, mumu kuli iye ngunakatuka. Mwe iye mwe wangutumine.” 30No yeeseka kumukwata, alioze niumwe wamusele kwoko mumu te ola yenyi#7:30 ola yenyi: tala 2:4 kanda yichiheta. 31Alioze mukachi ka mbunga anji yaamufuliela nikwamba ngwo: “Muze Chilamwina yoze Zambi alakenyene makeza, kuma makalinga yilayi yahiana ya mutu yono, nyi?”

Akwa kuyula yaatuma tufunga hanga akwate Yesu

32Afariseu#7:32 AFARISEU: tala 1:24. yeevwa kulinyenyeta cha mbunga hakutwala kuli Yesu. Kashika ayo ni mahako a lutwe a Zambi yaatuma tufunga#7:32 tufunga: Alevi, te akulujika ni kufunga zuwo lia Zambi. twa zuwo lia Zambi hanga akamukwate. 33Yesu ngwenyi: “Shimbu likepe nguli hamwe ni yenu, mba munguya kuli yoze wangutumine. 34Munukangufupa, alioze kunuchi kanguwana, mumu kunwahashile kuya kuze yami mungukabwa.” 35Ayuda yaalihula ngwo: “Kulihi maya kuze kutuchi kamuwana? Maya ku membo ja Agresia, kuze Ayuda haanamwangashana, ha kulongesa Agresia nyi? 36Kanambe ngwenyi: ‘Munukangufupa, alioze kunuchi kanguwana,’ nawa ngwenyi: ‘Kunwahashile kuya kuze mungukabwa.’ Kulumbunuka kuchi?”

Njiji ja meya a mwono

37Tangwa liakusula lia chiwanyino yilibwa tangwa linene. Ha tangwa lize Yesu yakatuka nikwamba ngwenyi: “Nyi umwe mevwa pwila, eze kuli yami anwe, 38ngwe hichinasonewa mu Mukanda wa Zambi ngwo: ‘Yoze mangufuliela, njiji ja meya a mwono mujikapukumuka muli iye.’ ” 39(Yachamba hakutwala ku Mwiku wa Linanga uze akwa kufuliela maakatambula. Alioze shimbu lize Mwiku te kanda uchiza, mumu Yesu kanda achinjila mu uhenya wenyi.)

Mbunga yaalihandununa mumu hali Yesu

40Muze heevwa longeso lino, atu akwo mukachi ka mbunga yize yaamba ngwo: “Chamwenemwene mutu yono mwe mukwa munanyi wa Zambi!” 41Akwo yaamba ngwo: “Yono mwe Chilamwina yoze Zambi alakenyene!” Alioze akwo ngwo: “Kuma Chilamwina yoze Zambi alakenyene makatuka ku Galilea, nyi? 42Mukanda wa Zambi unambe ngwo: ‘Chilamwina yoze Zambi alekenyene makabwa wa ku vungu lia David, mu limbo lia Betleheme.#7:42 Betleheme: mu Yudea, kilometro 8 ku sude ya Yerusaleme.’ ” 43Kashika mbunga yaalihandununa mumu hali Yesu. 44Akwo yaazanga kumukwata, alioze niumwe wamusele moko.

Kuyambashana cha akwa lutwe ja Ayuda

45Tutunga twa zuwo lia Zambi yaahiluka kuli mahako a lutwe a Zambi ni Afariseu.#7:45 afariseu: tala 1:24. No yaahula ngwo: “Kuchi kevwe kunwamunehene kuno?”

46Tufunga yaakumbulula ngwo: “Haanga! Niumwe mutu kanda ahanjika kama ngwe yoze!” 47Afariseu yaamba ngwo: “Haa! Kota ni yenu nawa kanwonganga. 48Mukachi ka akwa kuyula jetu ni Afariseu umuwika uli mo yoze hanamufuliela, nyi? 49Ka, alioze mbunga yino keeshi kunyingika Shimbi ja Mose, kaanashingiwa!” 50Nikodemu, yoze wayile ni kutala Yesu ha ufuku, te wa kuli Afariseu, yaamba ngwenyi: 51“Nikulita ni Shimbi jetu, tunahase kuhisa mutu muze kanda tumwivwa, hanji kanda tunyingika chize anakalinga, nyi?” 52Yaamukumbulula ngwo: “Haa! Ni yena nawa uli Kagalilea, nyi? Hengula mu Mukanda wa Zambi, umone ngwe, niumwe mukwa munanyi wa Zambi wakukatuka ku Galilea” [ 53Mba mutu mweswe yaya ku zuwo lienyi.

Currently Selected:

Yoano 7: CHK1970

Highlight

Copy