Yoano 9

Yesu yawuka mutu wasemukine kapuputa

1Muze te Yesu anabalika kumwe kuma, yamona mutu wasemukine kapuputa. 2Tumbaji twenyi yaamuhula ngwo: “Longeshi, mumu yika mutu yono wasemukine kapuputa, ha milonga yenyi mwene hanji ya yisemi jenyi?” 3Yesu ngwenyi: “Hi ha milonga yenyi mwene ko, chibwe ya yisemi jenyi. Kali kapuputa ha kusolola yitanga ya Zambi muli iye. 4Chatutamba kumanununa yitanga ya yoze wangutumine shimbu kuchili mwalwa. Ufuku uneza kuze niumwe mahasa kulinga milimo. 5Shimbu nguchili hashi nguli pangu lia hashi.” 6Muze hamba maliji wano, Yesu yafwila mate hashi yalinga ndambo ni mate waze, yakwitakwita meso ja kapuputa ni ndambo yize, 7yamwamba ngwenyi: “Yako usane ku meso mu shima lia Silome.” (Kulumbunuka ngwo: “Hatumiwa.”) Kapuputa yaya, yasana ku meso, yahiluka ni kumona.

8Enyembo ni waze amumwene hatangu nikuunjila yaamba ngwo: “Mutu awu hi yoze ko te wakutwama nikuunjila, nyi?” 9Akwo yaamba ngwo: “Yomwene.” Akwo ngwo: “Ka, hi iye ko, alioze kalifwa nenyi.” Mwe mutu ngwenyi: “Yami mwene.” 10No yaahula ngwo: “Ngwe kuchi alawisanga meso je?” 11Neye ngwenyi: “Mutu yoze anavuluka ngwo Yesu, mwe walinganga ndambo, yakwita meso jami, yangwamba ngwenyi: ‘Yako usane mu shima lia Silome’. Nayanga, ni muze hinasana, yingulaule ku meso.” 12No yaamuhula ngwo: “Kulihi ali mutu yoze?” Neye ngwenyi: “Chanyingikine.”

Afariseu yaahula kapuputa

13Atu yaatwalila Afariseu#9:13 afariseu: tala 1:24. mutu yoze wabwile kapuputa. 14Te tangwa lia kuhwima lia Ayuda muze Yesu alingile ndambo ha kulawisa meso ja mutu yoze. 15Kashika Afariseu yaamuhula nawa chize habutuka kumona. Neye yaakumbulula ngwenyi: “Kangukwitanga ndambo ha meso, yingusana, mba haliabwila ngunamono.” 16Amwe a kuli Afariseu yaamba ngwo: “Mutu yoze walinganga Chuma chino hi wa kuli Zambi ko, mumu keshi kufunga Shimbi ya tangwa lia kuhwima.” Alioze akwo ngwo: “Ngwe kuchi mutu mahasa kulinga yilayi yino nyi kali Chivulumunyi?” Yaalihandununa ha chikuma chino.

17Afariseu yaahula nawa kapuputa ngwo: “Yena kuchi unambe hakutwala kuli mutu yoze wakulawisanga meso?” Iye ngwenyi: “Kali mukwa munanyi wa Zambi.” 18Alioze, muze kanda achitambika yisemi jenyi, te kaasolo kufuliela ngwo, yono mwe wabwile kapuputa, alioze haliabwila kanamono. 19Afariseu yaahula yisemi jenyi ngwo: “Yoze mwe mwanenu, nyi? Nunashindakenya ngwenu, mwenawo wasemukine kapuputa, nyi? Ngwe kuchi mba haliabwila kanamono?” 20Yisemi ngwo: “Tunanyingika ngwetu, kali mwanetu, ni tunanyingika ngwetu, wasemukine kapuputa. 21Alioze kutwanyingikine chize anamono haliabwila. Kutwanyingikine yoze wamulawisa meso. Muhulenu, hakola kulu, kumakumbulula iye mwene.” 22Yisemi jenyi yaamba chino mumu yeevwila Ayuda woma. Mumu Ayuda alitesele kulu kutuhiwsa ku zuwo lia kuwayila mweswe mutu matayiza ngwenyi, Yesu mwe Chilamwina yoze Zambi alakenyene. 23Kashika yisemi yaamba ngwo: “Hakola kulu, muhulenu.”

24Afariseu yaatambika chisuho cha muchaali yoze wabwile kapuputa, yaamwamba ngwo: “Hanjika umwenemwene ku meso ja Zambi. Tunanyingika ngwetu, mutu yono kali Chivulumunyi.” 25Neye ngwenyi: “Chanyingikine nyi kali Chivulumunyi nyi ka. Chuma chimuwika ngunanyingika ngwami, nabwile kapuputa, haliabwila ngunamono.” 26Yaamuhula ngwo: “Kuchi akulinganga? Ngwe kuchi akulawisanga meso?” 27Neye ngwenyi: “Nanulwezanga kulu, alioze kunwanguvwile. Kuchi kevwe nunazange kwivwa nawa chisuho chikwo? Kota ni yenu nawa nunazange kubwa tumbaji twenyi, nyi?” 28Yaamutuka ni kumwamba ngwo: “Katuka! Yena uli kambaji ka mutu yoze, yetu tuli tumbaji twa Mose. 29Tunanyingika ngwetu, Zambi hanahanjika ni Mose, alioze yono, kutwanyingikine chibwe kuze anakatuka.” 30Neye ngwenyi: “Chino chikomokeso! Kuma, kunwanyingikine kuze anakatuka, nyi? Hindu hangulawisa meso. 31Tunanyingika ngwetu, Zambi keshi kwivwa yivulumunyi. Alioze kakwivwa yoze wakumulemesa ni kulinga yize anazange. 32Kanda twivwa kama ngwo, umwe mutu hanalawisa meso ja yoze wasemukine kapuputa. 33Nyi mutu yono hi wa kuli Zambi ko, kachi kahashile kulinga nichimwe.” 34Yaamukumbulula ngwo: “Yena wasemukine pundu mu shili, unazange kutulongesa, nyi?” Mba yaamuhanga liakulu ku zuwo lia kuwayila.

Upuputa hakutwala ku yuma ya Zambi

35Yesu yevwa ngwo, Afariseu#9:35 afariseu: tala 1:24. haamuhanga. Mba muze hamuwana nawa, yamuhula ngwenyi: “Yena unafuliela Mwana Mutu,#9:35 mwana mutu: tala 1:51. nyi?” 36Neye ngwenyi: “Ngwambulwile yo, hanga ngumufuliele.” 37Yesu yamwamba ngwenyi: “Unakamumona kulu: Mwenawo unahanjika nenyi haliabwila.” 38Mwe mutu ngwenyi: “Mwene, ngunafuliela.” Mba yafulamana ku meso ja Yesu.

39Yesu yamba ngwenyi: “Ha ubatwilo nejilile hano hashi, hanga tupuputa amone, ni hanga waze akumona alumuke tupuputa.” 40Amwe Afariseu, waze te ali hamwe nenyi, yeevwa maliji wano, yaamuhula ngwo: “Kuma ni yetu nawa tuli tupuputa, nyi?” 41Yesu ngwenyi: “Nyi te nuli tupuputa, kachi kunushi ni uhiso, alioze mumu nunambe ngwenu: ‘Twakumona,’ kashika nuli ni uhiso ndoo haliabwila.”

Currently Selected:

Yoano 9: CHK1970

Highlight

Copy