Yoano 10

Chishima cha kafunga ni mapanga

1“Chamwenemwene ngunambe ngwami: Yoze keshi kunjila ku chikolo cha tanga lia mapanga, alioze manjilila ku sali lieka, mwenawo mwiji kanda muhuza. 2Alioze yoze wakunjilila ku chikolo, mwe kafunga ka mapanga. 3Mukwa kufunga chikolo mamwazulwila. Mapanga meevwa liji lia kafunga muze maatambika ha majina, maatuhwisa haze. 4Ni muze haatuhwisa eswe haze, kafunga maatetekelela ni mapanga maamukaula, mumu kaananyingika liji lienyi. 5Alioze mapanga keechi kukaula chilambala, mumu kanyingikine liji lienyi.”

6Yesu yaatela, chishima chino, alioze kuchaalumbunukinyine ko.

Yesu mwe kafunga mubema

7Kashika Yesu yaamba nawa ngwenyi: “Chamwenemwene ngunanwambulwila ngwami, yami nguli chikolo cha tanga lia mapanga. 8Eswe waze aliangile kwiza kulutwe liami kaali eji ni mihuza, alioze mapanga keevwile ko. 9Che chikolo cha tanga yami. Yoze manjila kuli yami, mamulamwina. Neye manjila ni matuhuka, mawana yakulia yenyi. 10Mwiji kakwiza shina lume ha kwiya, ni kushiha, ni kwonona. Yami nejile hanga atu abwe ni mwono; mwono wakulumbama.

11“Yami nguli Kafunga mubema. Kafunga mubema kanakunjika mwono wenyi hali mapanga jenyi. 12Mutu yoze wakulingila lume mbongo, hi kafunga ko, hi mwenya mapanga ko. Mumu, muze mamona kangunga kaneza, mahichika mapanga, machina. Ha chino, kangunga makwata mapanga ni kwamwanga. 13Machina, mumu kali mukwa kulingila mbongo. Keshi kunyonga mapanga. 14-15Yami nguli kafunga mubema. Ngwe chize Tata kanangunyingika, nyi yami ngunanyingika Tata, chimuwika ni yami ngunanyingika mapanga jami, ni mapanga jami kaanangunyingika. Ngunakunjika mwono wami mumu hali mapanga jami. 16Mapanga akwo nguli no waze keeshi mu tanga lino. Changutamba kwaneha nawa. Maakevwa liji liami, mba maakabwa chendo chimuwika ni kafunga umuwika.

17“Tata kakunguzanga, mumu ngunakunjika mwono wami ha kuuwanda nawa. 18Mutu niumwe mahasa kuchiza mwono wami, alioze ngunaukunjika nikulita ni chize ngunazange yami mwene. Chiyulo nguli nacho cha kuukunjika ni chiyulo nguli nacho cha kuutambula nawa. Chenacho Tata anguhele Shimbi ha kulinga.”

19Ayuda yaalihandununa nawa mumu ha maliji wano. 20Anji mukachi ko yaamba ngwo: “Mwiku wa luchisa akwete, kanazaluka, kuchi kevwe nunamwivu?” 21Akwo yaamba ngwo: “Mukwa mwiku wa luchisa kahashile kuhanjika chocho. Mwiku wa luchisa muuhasa kulawisa tupuputa, nyi?”

Ayuda yaalituna Yesu

22Ha mwaka wa chishika atu yaalinga mu Yerusaleme chiwanyino cha Kujilila Zuwo lia Zambi lia Ayuda. 23Yesu yendangana mu chisambwe cha Solomone#10:23 chisambwe cha Solomone: chisambwe cha manguji ku chivumbuko cha zuwo lia Zambi. mu zuwo lia Zambi. 24Ayuda yaamukunguluka, yaamuhula ngwo: “Ndoo mwiji muka muutupwisa ni chisweswe? Nyi mwe Chilamwina yoze Zambi alakenyene yena, twambulwile cho mwazu.” 25Yesu ngwenyi: “Hingunanwambulwila cho kulu, hindu kunwangufulielele. Yitanga yize nakulinga mu jina lia Tata kuyakungushindakenya. 26Alioze kunushi kufuliela, mumu hi nuli a ku mapanga jami ko. 27Mapanga jami kaakwivwa liji liami, ni yami ngunaanyingika, no kaakungukama. 28Nakwapwisa ni mwono wa miaka yeswe. Keechi kafwa nichimwe ndoo ku miaka yeswe. Mutu niumwe kechi kaachangumuna ku kwoko liami. 29Tata yoze wanguhele o, kali munene Wahiana eswe. Mutu niumwe makaachangumuna ku kwoko lienyi. 30Tata ni yami tuli umuwika.”

31Ayuda yaanda nawa mawe hanga amwase. 32Yesu yaamba ngwenyi: “Yitanga yinji hingunalingi ku meso jenu mu chiyulo cha Tata. Ku yitanga yize yeswe, ha chitanga chika nunazange kungwashila mawe?” 33Ayuda ngwo: “Kutwazangile ku kwasa mawe ha chitanga chimwe chibema, alioze mumu wakushililika Zambi. Yena uli mutu lume, alioze wakulipwisa ngwe Zambi.” 34Yesu ngwenyi: “Hichinasonewa mu Shimbi jenu, Zambi ngwenyi: ‘Nuli mazambi.’ 35Tunanyingika ngwetu, yuma yize Mukanda wa Zambi unambe yakulinduluka matangwa eswe, ni Zambi hanavuluka atu waze ahanyine liji lienyi ngwenyi: ‘mazambi’. 36Alioze yami, Tata wanguhele kubwa munangi, Tata wangutumine hano hashi. Ngwe kuchi munuhasa kwamba ngwenu, nakushililika Zambi? Mumu nambile ngwami: ‘Nguli Mwana Zambi,’ nyi? 37Nyi Chishi kulinga yitanga ya Tata, kanda nungufuliela. 38Alioze, nyi nakuyilinga, chibwe kunushi kungufuliela, ngufulielenu mumu ha yitanga yami, hanga nunyingike ngwenu, Tata kali muli yami ni yami nguli muli Tata.”

39Ayuda yaazanga nawa kumukwata, alioze Yesu yaseunuka.

40Yesu yaya nawa musali lia Yordau, kuze te Yoano akupapachishila, yatwama ko. 41Atu anji ejilejile kuli iye, yaambamba ngwo: “Yoano kalingile chilayi nichimwe, alioze yize yeswe ambile hakutwala kuli mutu yono yili yamwenemwene.” 42Atu anji afulielele Yesu kwe kuze.

Currently Selected:

Yoano 10: CHK1970

Highlight

Copy