Yoano 11

Kufwa cha Lazaru

1Umwe mutu, wa ku Betania,#11:1 betania: kilometro 3 ku chivumbuko cha Yerusaleme. jina lienyi te Lazaru, yayiza. Betania che chihunda cha Maria#11:1 MARIA: tala 12:1-8. ni yayo Marta. 2(Maria yono mwe wawayishile molu ja Mwene Yesu ni maji, mba yajikusumuna ni kambu jenyi. Ndumbwenyi Lazaru mwe wayijile.) 3Mandumbu waze aali yaatuma mutu ni kwambulwila Yesu ngwo: “Mwene, sepa lie kanayiji.” 4Muze Yesu hevwa sango jize, yamba ngwenyi: “Musongo uno hi wa kufwa ko, alioze wakulweza uhenya wa Zambi, hanga atu akachichimieka nawo Mwana Zambi.”

5Te Yesu kakuzanga Marta, ni mwanakwo, ni Lazaru. 6Muze hevwa ngwo, Lazaru kanayiji, yatwama ko matangwa aali. 7Mba yambila tumbaji twenyi ngwenyi: “Tuhilukenu ku chifuchi cha Yudea.” 8Tumbaji ngwo: “Longeshi, shimbu linoliene Ayuda anakamba kukwasa mawe, hindu unazange kuhiluka ko nawa, nyi?” 9Yesu ngwenyi: “Mwalwa ukwete ola kumi ni jaali, cheka? Nyi mutu menda mwalwa, kahashile kuhukana, mumu kanamono pangu lia hashi. 10Alioze, nyi menda ufuku, mahukana, mumu keshi pangu.” 11Muze Yesu hamba maliji wano, yawezaho ngwenyi: “Sepa lietu Lazaru haya tulo, alioze ngunayi ngukamuhindwise.” 12Tumbaji ngwo: “Mwene, nyi mu tulo ali, kumakahinduka.” 13Te Yesu kanambe ngwenyi, Lazaru hafwa, alioze tumbaji yaanyonga ngwo, kanahanjika hakutwala ku tulo. 14Kashika Yesu yahanjika mwazu ngwenyi: “Lazaru hafwa. 15Ngunawahilila mumu chabwile ko hanga nukangufuliele, alioze tatuyenu ko.” 16Mba Tomase (yoze akuvuluka ngwo mwana wa pasa) yambila tumbaji akwo ngwenyi: “Ni yetu nawa, tuyenu ko, tukafwe hamwe ni Longeshi.”

Yesu we uhindukilo ni we mwono

17Muze Yesu haheta, yawana Lazaru anakamufunda kulu, te matangwa awana haabalika. 18Betania kali hakamwihi ni Yerusaleme, ngwe kilometro jitatu. 19Ayuda anji ejile maha Marta ni Maria hanga akaasangulwise hakutwala ku kufwa cha ndumbwo.

20Muze Marta hevwa ngwo, Yesu heza, yaya ni kumubatwiza, alioze Maria yasala mu zuwo. 21Marta yambila Yesu ngwenyi: “Mwene, nyi te unakabwa kama kuno, kachi ndumbwami kafwile! 22Alioze ngunanyingika ngwami, chibwe haliabwila Zambi makwaha yeswe yize muumwita.” 23Yesu ngwenyi: “Ndumbwe kumahinduka ku kufwa.” 24Marta ngwenyi: “Ngunanyingika makahinduka ku kufwa ha uhindukilo wa afu ha tangwa liakusula.”

25Yesu ngwenyi: “Yami nguli we uhindukilo ni we mwono. Yoze wakungufuliela, chibwe afwe, kumabwa ni mwono, 26Ni yoze uli ni mwono, ni kakungufuliela, kechi kafwa nichimwe. Unachifuliela, nyi?” 27Marta ngwenyi: “Ewa Mwene, hingunafuliela ngwami, yena mwe Chilamwina yoze Zambi alakenyene, mwe Mwana Zambi yoze chatamba kwiza hano hashi.”

Yesu yalila

28Muze hamba yuma yino, Marta yaya ni kutambika mwanakwo Maria, yamwambila ku tenga ngwenyi: “Longeshi kwali akuze. Kanakutambika.” 29Kashika Maria yakatuka, yanyangumuka nikawashi ni kuya kuli Yesu. 30(Yesu te kanda achinjila mu chihunda, alioze yabwa kuma kuze amubatwijilile Marta). 31Muze Ayuda, waze te ali mu zuwo hamwe ni Maria ni kumusangulwisa, haamumona nikutuhuka nikawashi, yaamukaula. Yaanyonga ngwo, kanayi ku fuka ni kulilila ko.

32Muze Maria haheta kuze te ali Yesu, yamumona, yafulamana ku meso jenyi, yaliumba ngwenyi: “Mwene, nyi te unakabwa kama kuno, kachi ndumbwami kafwile ko!” 33Muze Hamona Maria kanalili, ni e Ayuda waze ejile nenyi, Yesu yevwa chinyengo ni kulibikala mu mbunge. 34Mba Yesu yaahula ngwenyi: “Kulihi nunakamufunda?” Ayo ngwo: “Mwene, tweya umone.” 35Yesu yabutuka kulila. 36Ayuda yaamba ngwo: “Talenu chize te akumuzanga!” 37Alioze amwe hakachi ko yamba ngwo: “Mutu awu walawishile meso ja kapuputa, nyi? Te kahashile kulinga Chuma hanga Lazaru kechi kufwa, nyi?”

Yesu yahindwisa Lazaru ku kufwa

38Yesu yevwa nawa chinyengo chinji, yaya ku fuka, te lia chivwenge. Ku chikolo atu yaasa ko liwe. 39Yesu yamba ngwenyi: “Chizenu liwe.” Alioze Marta, ndumbwa mufu, ngwenyi: “Mwene, hakupuka kulu vumba, mumu kali kulu mu fuka matangwa awana!” 40Yesu ngwenyi: “Chakwambile ngwami, nyi muufuliela, muumona uhenya wa Zambi,#11:40 UHENYA WA ZAMBI: tala 1:14. nyi?” 41No yaachiza liwe. Yesu yatala kwilu, mba yamba ngwenyi: “Tata ngunakusakwila mumu wakunguvwila. 42Ngunanyingika ngwami, matangwa eswe wakungwivwa, alioze hinachamba mumu hali atu waze anangukunguluka, hanga afuliele ngwo, yena wangutumine.” 43Muze hamba maliji wano, yakololoka ni liji linene ngwenyi: “Lazaru, tuhuka mo!” 44Mufu yatuhuka, molu ni moko akukasa ni mahina, ni huma liakujinga ni chitambala. Yesu yaamba ngwenyi: “Mujitulenu, mwechenu aye.”

Akwa lutwe yaatwama Yesu punga

(Tala nawa Mat 26:1-5; Mar 14:1-2; Luk 22:1-2)

45Ayuda anji a kuli waze ejile maha Maria amwene yize alingile Yesu, mba yaamufuliela. 46Alioze amwe hakachi ko yaaya ni kwambulwila Afariseu,#11:46 AFARISEU: tala 1:24. yaalumbunwina yuma yeswe alingile Yesu. 47Hohene Afariseu ni mahako a lutwe yaakungulula Mbunga ya Ngaji ja Ayuda#11:47 MBUNGA YA ngaji JA AYUDA: mbunga ya Ayuda ya chiyulo chahiana. Te yili ni tetekeli 70, mukwa lutwe wo mwe mwata wa mahako. ni kwamba ngwo: “Kuchi mutulinga? Mumu mutu yono kakulinga yilayi yinji! 48Nyi mutumwecha ni kulinga ngwe chino, atu eswe maamufuliela. Ha chino miata ja Aroma maakahulumuka ni kubuzula zuwo lietu lia Zambi ni vungu lietu!” 49Umwe hakachi ko, jina lienyi te Kaifa,#11:49 Kaifa: mwe mwata wa mahako ha miaka 18-36. mwata wa mahako ha mwaka uze, yamba ngwenyi: “Yenu kunwanyingikine nichimwe! 50Kunwanyingikine ngwenu, chinalite mutu umuwika kufwila atu hanga vungu heswe kanda lifwa, nyi?” 51(Chino kachambile ko ku tachi jenyi mwene, alioze mumu te kali mwata wa mahako a lutwe ha mwaka uze. Kashika yambulula shimbu kanda ngwenyi, Yesu makafwila vungu lia Ayuda, 52hindu hi vungu lia Ayuda wika ko, alioze hanga akakungulwile nawa mu mbunga yimuwika atu ja Zambi eswe waze haanamwangana.) 53Mba chize ku tangwa lize, makulwana ja Ayuda yaafupa mana a kushiha Yesu. 54Kashika Yesu kalisolwele ko nawa ku meso ja atu anji mukachi ka Ayuda, alioze yaya ku chifuchi cha kusulangana ni puya, mu limbo lia Efraime#11:54 EFRAIME: kilometro 24 ku norde ku chivumbuko cha Yerusaleme. Kwenako atwamine ni tumbaji twenyi.

55Chiwanyino cha Kubalika cha Ayuda e hichabwa hakamwihi. Atu anji a mu chifuchi yaaya ku Yerusaleme ha kulibemesa mumu ha Kubalika. 56Atu yaafupafupa Yesu. Muze akungulukile mu zuwo lia Zambi, yaalihulahula ngwo: “Kuchi nunashinginyeka, kumeza ku chiwanyino, nyi ka?” 57Mahako a lutwe a Zambi ni Afariseu te haahana Shimbi ngwo: “Mweswawo mamona kuze ali Yesu, eze atulweze, hanga tuhase kumukwata.”

Currently Selected:

Yoano 11: CHK1970

Highlight

Copy