Yoano 12

Maria yawayisa Yesu maji a vumba libema

(Tala nawa Mat 26:6-13; Mar 14:3-9)

1Te hikwasala matangwa asambano ni chiwanyino cha kwiwuluka Kubalika, Yesu yaya ku Betania#12:1 betania: tala 11:1. kuze te atwama Lazaru, yoze ahindwishile ku kufwa. 2Kwenako amulingililile yakulia ya chingoloshi. Marta yaavumbika, Lazaru yabwa wa ku mbunga ya atu waze te ali ku mesa hamwe ni Yesu. 3Maria yanda Chipinji cha litro cha maji a vumba libema a ndando yinji, a kulinga ni nardu. Yaakwita ku molu ja Yesu mba yajikusumuna ni kambu jenyi. Zuwo lieswe yilinuka ni vumba lia maji waze. 4Umwe wa kuli tumbaji twa Yesu, Yudase Kakeriote, yoze makamukunjika kuli akwa kole jenyi, yahula ngwenyi: 5“Kuchi kevwe kalanjishile maji wano ni kulakaji jitatu ja mbongo, ni kujaha yiswale?” 6Kambileko chino mumu wanyongene yiswale, alioze mumu yabwa mwiji. Iye te mwe wakusweka mushete wa mbongo jo, yalialia jize asele mo. 7Alioze Yesu yamba ngwenyi: “Mwechenu kwenyi! Hafunga maji wano ndoo ku tangwa lia kufunda chami. 8Yiswale munukabwa no matangwa eswe, alioze kunuchi kabwa ni yami matangwa eswe.”

Makulwana ja Ayuda yaatwama Lazaru punga

9Mbunga yinene ya Ayuda yeevwa ngwo, Yesu ku Betania ali. No yaaya kwe kuze, hi mumu hali Yesu wika ko, alioze nawa ha kutala Lazaru, yoze Yesu ahindwishile ku kufwa. 10Kashika mahako a lutwe a Zambi yaatwama punga hanga ashihe nawa Lazaru, 11mumu Ayuda anji ehukile akwa lutwe jo ni kufuliela Yesu mumu hali Lazaru.

Yesu mwe Mwanangana yanjila mu Yerusaleme

(Tala nawa Mat 21:1-11; Mar 11:1-11; Luk 19:28-40)

12Muze hikwacha, mbunga yize ejile ku chiwanyino cha kwiwuluka Kubalika yeevwa ngwo, Yesu kaneza ku Yerusaleme. 13No yaanda mitango ya ngaji, yaatuhuka mu limbo ni kumubatwiza, yaakololoka ngwo: “Vulie! Zambi awahise yoze uneza mu jina lia Mwene. Zambi awahise Mwanangana wa Israele!” 14Yesu yawana mwana chimbulu, yatwama ho, ngwe hichinasonewa mu Mukanda wa Zambi ngwo:

15“Kanda wivwa woma, limbo lia Zione!

Tala Mwanangana we kaneza,

kanatwama hali mwana chimbulu.”

16Hatangu tumbaji twenyi kaanyingikine yuma yize, alioze muze Yesu hanjila mu uhenya wenyi, yeewuluka ngwo, kuma yuma yino yasonewene mu Mukanda wa Zambi hakutwala kuli Yesu, nawa ngwo, atu alingile yuma yino mumu hali iye.

17Mbunga yize te ali hamwe ni Yesu muze atambikile Lazaru atuhuke mu fuka ni kumuhindwisa ku kufwa, yaambujola yize amwene. 18Kashika mbunga yeeza ni kumubatwiza-mumu te heevwa hakutwala ku chilayi chize alingile. 19Afariseu#12:19 afariseu: tala 1:24. yaalihanjikisa ngwo: “Nunamono ngwenu, kutwahashile kulinga nichimwe. Talenu, atu eswe haabutuka kumukaula.”

Agresia yaafupa Yesu

20Amwe Agresia yaabwa mukachi ka waze ayile ku Yerusaleme mu kuwayila ha chiwanyino. 21Yaakundama kuli Filipe (wa ku Betsaida#12:21 Betsaida: tala 1:44. limbo lia mu Galilea), yaamulembejeka ngwo: “Mwata tunazange kumona Yesu.” 22Filipe yaya ni kuchambulwila Andre, mba eswe aali yaaya ni kwambulwila Yesu. 23Yesu ngwenyi: “Ola hiyaheta yize Mwana Mutu#12:23 mwana mutu: tala 1:51. matambula uhenya Wahiana. 24Chamwenemwene ngunanwambulwila ngwami, lunona wa tiriku kahashile kwima mihuko shina maholoka hashi akafwe. Nyi wafwa, mba mema mihuko yinji. 25Yoze mazanga mwono wenyi, mautokesa. Alioze yoze mavutwokela mwono wenyi hano hashi, makaufunga ndoo ku miaka yeswe. 26Nyi umwe mazanga kunguvumbika, chamutamba kungukaula, hanga kavumbi kami nawa makabwa kuze yami nguli. Tata makalemesa yoze wakunguvumbika.”

Yesu yambulula kufwa chenyi

27“Haliabwila mbunge yami hiyalibikala. Kuchi mungwamba? Ngwambe ngwami: ‘Tata, ngulamwine kama ha yize muyinguwana ha ola yino,’ nyi kuchi? Ka, ha chikuma chino nejilile, ha kumona ola yino ya lamba. 28Tata, lemesa jina lie!” Hohene yeevwa liji mwilu ngwo: “Hingunalilemesa kulu, ni mungulilemesa nawa.”

29Mbunga yize te anatwama ko yevwa liji. No yaamba ngwo: “Kota kukulunguza cha vula!” Akwo ngwo: “Kota kanganda ka mwilu wahanjika nenyi!” 30Alioze Yesu ngwenyi: “Liji lino kuliahanjikile mumu hali yami, alioze mumu hali yenu. 31Haliabwila ye ola ya ubatwilo wa akwa hashi, haliabwila Mwata wa hashi hano#12:31 Mwata WA Hashi hano: Sakwonga, mwe mukwa lutwe wa yuma yibi. mambiliwa haze. 32Mba yami, muze makanguzundula kwilu,#12:32 MAKANGUZUNDULA KWILU: tala 3:14. mungukakoka atu eswe.” 33(Ku maliji wano yaalweza kufwa chenyi chize makafwa.) 34Mbunga yaamukunguluka, yaamba ngwo: “Hitunevu mu Shimbi jetu ngwo, Chilamwina yoze Zambi alakenyene makatwama ndoo ku miaka yeswe. Mba kuchi muuhasa kwamba ngwe, chatamba kuzundula Mwana Mutu?#12:34 mwana mutu: tala 1:51. Mwana Mutu yono iya?” 35Yesu ngwenyi: “Pangu lili mukachi kenu, alioze ha shimbu likepe wika. Endenu shimbu nuchili ni pangu, hanga ufuku kuuchi kanuwana. Mumu mutu yoze menda mu milima keshi kunyingika kuze maya. 36Tayizenu pangu shimbu nuchili nalio, hanga nukabwe atu ja pangu.”

Ayuda kaafulielele ko Yesu

Muze Yesu hamba yuma yino, yakatuka, yaswama. 37Chibwe halinga yilayi yinji ku meso jo, hindu kaafulielele ko, 38hanga liji lize ahanjikile Izaya, mukwa munanyi wa Zambi likamanunuke ngwenyi:

“Mwene, iya Wafulielele sango jetu?

Kuli iya Mwene hanalweze tachi jenyi?”

39Kaahashile ko kufuliela mumu Izaya yamba nawa ngwenyi:

40“Zambi hanapupuchisa meso jo,

hanakalisa mbunge jo,

hanga meso jo keechi kamona,

hanga mbunge jo kujichi kwivwa,

kuchina matewuluka kuli yami

hanga ngwawuke.”

41Izaya yamona uhenya wa Yesu, kashika yachamba hakutwala kuli iye.

42Chibwe chocho, hakachi ka akwa kuyula ja Ayuda anji amufulielele. Alioze mumu hali Afariseu#12:42 afariseu: tala 1:24. kaamutayijile ko ku meso ja atu, kuchina maakatwisa ku zuwo lia kuwayila lia Ayuda, 43mumu yaazanga lufuma wa atu kuhiana lufuma wa Zambi.

Ubatwilo ku maliji a Yesu

44Yesu yakololoka ngwenyi: “Yoze wakungufuliela, hi yami wika ko akufuliela, alioze kakufuliela nawa yoze wangutumine. 45Yoze unangumono, kanamono nawa yoze wangutumine. 46Yami hinguneza hashi ngwe pangu, hanga yoze mangufuliela, kechi kenda mu milima. 47Nyi umwe mevwa maliji jami, alioze kechi kwoononokena, hi yami ko mungukamubatwila. Mumu chejile ngukahise akwa hashi, alioze hanga ngukaalamwine. 48Yoze Wakungumona ni keshi kutayiza maliji jami, kali ni yoze mamuhisa. Liji lize nalongesele lie mulikamuhisa ha tangwa lia kusula. 49Mumu chalongesele ni chiyulo cha yami mwene, alioze Tata yoze wangutumine, iye mwene hanangwehe chize Changutamba kwamba ni kulongesa. 50Ngunanyingika ngwami, Shimbi jize Tata akuhana jikwete mwono wa miaka yeswe. Chize nakwamba, nakuchamba ngwe chize Tata anguhele Shimbi.”

Currently Selected:

Yoano 12: CHK1970

Highlight

Copy