Yoano 17

Yesu yalembela tumbaji twenyi

1Muze Yesu hamba yuma yino, yatala kwilu, mba yamba ngwenyi: “Tata, ola hiyeza, lemesa Mwane, hanga Mwane neye akulemese. 2Mumu hiunamwehe chiyulo hali atu eswe, hanga ahane mwono wa miaka yeswe kuli eswe waze wamuhele. 3Uno we mwono wa miaka yeswe, kunyingika yena mwe Zambi wamwenemwene ni Yesu Kristu yoze watumine. 4Hingunasolola uhenya we hano hashi. Hingunamanununa milimo yize wanguhele kulinga. 5Tata, haliabwila muze nguli ku meso je, ngwehe uhenya uze nabwile nawo hamwe ni yena muze te hashi kanda habwa.

6“Hingunakusolola kuli atu waze wanguhele a kuli akwa hashi. Kaali atu je, hiunangwehe o. Haanononokena liji lie. 7Haliabwila kaananyingika ngwo, yeswe yize wanguhele yinakatuka kuli yena. 8Mumu hingunaalongesa maliji waze wangwambile, haanaatayiza. Kaananyingika ngwo, kaali amwenemwene, ni kaanafuliela ngwo, yena wangutumine.

9“Ayo ngunalembela. Chalembelele akwa hashi, alioze waze wanguhele, mumu niye. 10Yeswe yize nguli nayo niye. Yeswe yize uli nayo niyami. Uhenya wami hiunasoloka muli ayo. 11Chishi nawa hano hashi, alioze ayo kaali hano hashi. Yami nguneza kuli yena. Tata wa Linanga, afunge mu chiyulo cha jina lie, jina lize wanguhele, hanga abwe umuwika ngwe yena ni yami tuli umuwika. 12Muze ngunakabwa hamwe no, ngunakaafunga mu chiyulo cha jina lie, jina lize wanguhele. Ngunakaafunga kanawa. Niumwe wa kuli ayo Watokele, shina yoze mukwa kutoka, hanga Mukanda wa Zambi umanunuke. 13Alioze haliabwila nguneza kuli yena. Chino hinamba hano hashi, hanga ayo abwe ni uwahililo wami, uwahililo Wahiana. 14Hingunahe liji lie, ni akwa hashi haanaavutwokela, mumu ayo hi akwa hashi ko, ngwe yami hi nguli mukwa hashi ko. 15Chalembele hanga ukachize hashi, alioze hanga ukaafunge kuli mwe mubi#17:15 mwe MUBI: Sakwonga, tala 12:31. 16Ayo hi a hashi ko, ngwe yami hi nguli wa hashi ko. 17Apwise liakulu atu je ku umwenemwene. Liji lie we umwenemwene. 18Ngunakaatuma kuli akwa hashi ngwe chize yena wangutumine kuli akwa hashi. 19Nakulihana liakulu kuli yena mumu hali ayo, hanga ni ayo alihane liakulu kuli yena.

20“Chalembelele ayo wika, alioze ni waze maakangufuliela ku longeso lio. 21Tata, ngunalembe hanga ayo eswe akabwe umuwika, akabwe muli yetu ngwe yena uli muli yami ni yami muli yena, akabwe mutu umuwika hanga akwa hashi akafuliele ngwo, yena wangutumine. 22Hingunaahe uhenya uze wanguhele, hanga abwe umuwika ngwe chize yena ni yami tuli umuwika. 23Yami muli ayo ni yena muli yami, hanga abwe lume umuwika, akwa hashi anyingike ngwo, yena wangutumine ni wakwazanga ngwe chize wakuzanga yami.

24“Tata hiunangwehe o. Ngunazange ayo akabwe hamwe ni yami kuze yami mungukabwa, hanga akamone uhenya wami, uhenya uze wanguhele. Mumu wanguzangile shimbu te hashi kanda habwa. 25Tata wa ululi, akwa hashi kaakunyingikine ko, alioze yami ngunakunyingika, ni wano kaananyingika ngwo, yena wangutumine. 26Hingunaanyingikisa jina lie, ni mungunyongonona kwanyingikisa lio hanga zango lize wakunguzanga nalio libwe muli ayo, ni yami mwene ngubwe muli ayo.”

Currently Selected:

Yoano 17: CHK1970

Highlight

Copy