Yoano 18

Yudase yakunjika Yesu

(Tala nawa Mat 26:47-56; Mar 14:43-50; Luk 22:47-53)

1Muze halemba chino, Yesu yakatuka ni tumbaji twenyi, yaya musali lia chitwetwe cha Kidrone,#18:1 chitwetwe cha KIDRONE: ku chivumbuko cha Yerusaleme, mukachi ka limbo ni mulundu wa Olive. kuze te kuli munda. Yesu yanjila mo ni tumbaji twenyi. 2Yudase, yoze wakunjikile Yesu kuli akwa kole jenyi, yanyingika kuma kuze, mumu Yesu ni tumbaji twenyi ayileyile ko yisuho yinji. 3Yudase yaya ku munda uze hamwe ni mbunga ya tujita ni tufunga#18:3 tufunga: tala 7:32. twa zuwo lia Zambi. Mahako a lutwe a Zambi ni Afariseu#18:3 afariseu, tala 1:24. aatumine. Yaaheta ku munda, te ndeya anambata, ni kahia ku masoka mukalekwoka, ni yuma yakwasa nayo jita. 4Yesu yanyingika yuma yeswe yize muyiza hali iye. Kashika yaakundama, yaahula ngwenyi: “Iya nunafupu?” 5No ngwo: “Yesu Kanazare.” Yesu ngwenyi: “Yami uno.”

Yudase, yoze wamukunjikile, te kwe ali hamwe no. 6Muze Yesu akumbulwile ngwenyi: “Yami uno,” hazehene yaahiluka unyimenyime, yaalimbuka hashi. 7Yesu yaahula nawa ngwenyi: “Iya nunafupu?” Ayo ngwo: “Yesu Kanazare.” 8Yesu ngwenyi: “Hinanulweza kulu ngwami, yami uno. Nyi yami nunafupu, echenu wano aye kwo.” 9Yamba chino, hanga liji lize ahanjikile iye mwene likamanunuke ngwenyi: “A kuli waze wanguhele chatokesele niumwe.” 10Simone Petulu mukwale abwile nawo, yautomona, yabatula litwi lia chindume lia kavumbi ka mwata wa mahako (Jina lia ndungo yoze te Malko.) 11Alioze Yesu yambila Petulu ngwenyi: “Kala! Tomeka mukwale we mu chindalo. Unanyongo ngwe, chichi kanwa musenge wa lamba uze Tata anguhele, nyi?”

Yaatwala Yesu maha Anase

12Ye mbunga ya tujita hamwe ni mukulwana wo ni tufunga#18:12 tufunga: tala 7:32. twa Ayuda yaakwata Yesu yaamukasa. 13Hatangu yaamutwala maha Anase, Anase#18:13 ANASE: mwe mwata wa mahako ha miaka ngwe 6-15. te Ukwe wa Kaifa mwata wa mahako ha mwaka uze. 14Kaifa wahele Ayuda longeso ngwenyi: “Chinalite mutu umuwika kufwila atu anji.”

Petulu yalikala Yesu

(Tala nawa Mat 26:69-70; Mar 14:66-68; Luk 22:55-57)

15Simone Petulu ni umwe kambaji mukwo yaakaula Yesu. Mwata wa mahako te kananyingika kambaji yoze. Kashika yanjila mu zuwo lia mwata yoze hamwe ni Yesu. 16Alioze Petulu yasala haze ku chikolo. Kambaji yoze mukwo yatuhuka, yahanjika ni pwo yoze te wakufunga chikolo, mba yanjisa Petulu. 17Mwana pwo, mukwa kufunga chikolo, yahula Petulu ngwenyi: “Ni yena uli kambaji ka mutu yoze, nyi?” Petulu ngwenyi: “Ahaa! Ka kwami.”

18Chishika chabwile ko. Kashika ndungo ni tufunga yaawika kahia ka makala, te kaanamana nikwota kahia. Petulu neye kanoto kahia hamwe no.

Mwata wa mahako yasopesa Yesu

(Tala nawa Mat 26:59-66; Mar 14:55-64; Luk 22:66-71)

19Mwata wa mahako yahula Yesu hakutwala kuli tumbaji twenyi ni ha longeso lienyi. 20Yesu yamukumbulula ngwenyi: “Nahanjikile mwazu mukachi ka atu eswe. Nalongesele tangwa ha tangwa mu mazuwo a kuwayila ni mu zuwo lia Zambi lia Ayuda, kuze te kwakukungulukila Ayuda. Chahanjikile nichimwe ku tenga. 21Kuchi mba unanguhula yami? Hula waze anakevwa yize ngunakaalongesa. Ayo kaananyingika kanawa yuma yize ngunakaalongesa.” 22Muze Yesu hamba maliji wano, kafunga umuwika yoze te uliko yamulamba mbangala, ngwenyi: “Haa! Chenacho unakumbulula mwata wa mahako, nyi?” 23Yesu ngwenyi: “Nyi nahanjika chibi tulweze chibi chize. Alioze nyi nahanjika kanawa, kuchi hiwangulamba?”

24Mba Anase yamutuma chizechene wakukasa maha Kaifa, mwata wa mahako.

Petulu yalikala nawa Yesu

(Tala nawa Mat 26:71-75; Mar 14:69-72; Luk 22:58-62)

25Simone Petulu kwe abwile nikwota kahia. Waze te anasulangana nenyi yaamuhula ngwo: “Ni yena uli umwe wa kuli tumbaji twa mutu yoze, nyi?” Alioze yalikala ngwenyi: “Ahaa! Ka kwami.” 26Umwe hakachi ka tuvumbi twa mwata wa mahako te uliko, usoko wa mutu yoze Petulu abatwile litwi. Yahula Petulu ngwenyi: “Nakumonanga nenyi mu munda, cheka?” 27Alioze Petulu yalikala nawa. Hazehene ndemba yatambika.

Yesu ku meso ja Pilatu

(Tala nawa Mat 27:1-2, 11-14; Mar 15:1-5; Luk 23:1-5)

28Chichamene cheswe Ayuda yaamuchiza maha Kaifa, yaamutwala ku zuwo lia mukwa kuyula. Ayuda kaanjilile ko mu zuwo lia mukwa kuyula, kuchina maajilula chijila hakutwala ku kulia cha kwiwuluka Kubalika. 29Kashika mukwa kuyula, Pilatu#18:29 PILATU: Karoma, mukwa kuyula yifuchi ya Yudea, ni Samaria, ni Idumea mu wanangana wa Aroma ha miaka 26-36., yatuhuka, yaahula ngwenyi: “Chikuma chika nunasumina mutu yono?” 30Yaakumbulula ngwo: “Nyi te kalingile yibi, kachi kutwakukunjikile ye.” 31Pilatu ngwenyi: “Yeenu nenyi yenwene, mubatwilenu nikulita ni Shimbi jenu.” Ayuda ngwo: “Yetu kutushi chiyulo cha kushiha mutu.” 32(Chenacho chikamanunune liji lize ahanjikile Yesu ha kulweza kufwa chize makafwa.) 33Pilatu yahiluka mu zuwo, yatambika Yesu, yamuhula ngwenyi: “Mwe mwanangana wa Ayuda yena, nyi?” 34Yesu ngwenyi: “Liji lino yena mwene unaliambe, nyi? hanji akwo akwambulwilanga lio hakutwala kuli yami?” 35Pilatu ngwenyi: “Yami nguli Kayuda, nyi? Vungu lie ni mahako a lutwe a Zambi, enoo akukunjika kuli yami. Kuchi unakalinga?” 36Yesu ngwenyi: “Wanangana wami hi wa hano hashi ko. Nyi Wanangana wami muubwa wa hano hashi, kachi tuvumbi twami maalitachika hanga keechi kungukunjika kuli Ayuda. Alioze Wanangana wami hi wa hano hashi ko.” 37Pilatu kashika yahula ngwenyi: “Kuma, yena uli mwanangana, nyi?” Yesu ngwenyi: “Kuwamba, nguli mwanangana. Ha chikuma chino nasemukinyine ni nejilile hano hashi, hanga ngukashindakenye ha umwenemwene. Yoze wa ku umwenemwene, kakwivwa yize nakwamba.” 38Pilatu yamuhula ngwenyi: “Umwenemwene Chuma chika?”

Pilatu yakunjika Yesu ku kufwa

(Tala nawa Mat 27:15-31; Mar 15:6-20; Luk 23:13-25)

Muze hamba maliji wano, Pilatu yatuhuka nawa haze kuli Ayuda, yaamba ngwenyi: “Chamwene chitela nichimwe cha kuhishila mutu yono. 39Alioze nikulita ni ndako yenu, nakunutuswila, ha chiwanyino cha Kubalika, mukwa zuwo lia lamba umuwika. Nunazange ngunutuswile mwanangana wa Ayuda, nyi?” 40No eswe yaakololoka ngwo: “Ka, hi iye ko. Tunazange Baraba.” (Baraba te muhuza.)

Currently Selected:

Yoano 18: CHK1970

Highlight

Copy