Yoano 16
16
1“Hinanwambulwila chino hanga kunuchi katalinga mu ufulielo wenu. 2Atu maakanukatwisa mu mazuwo jo a kuwayila. Tangwa mulikeza muze yoze makanushiha, makanyonga ngwenyi, kanalingila Zambi. 3Yuma yino maakayilinga mumu kaanyingikine Tata chibwe yami. 4Alioze hingunanwambulwila yuma yino hanga, muze mwaka wakuyilinga muukeza, munukewuluka ngwenu, hingunanwambulwila cho kulu.”
Milimo ya Mwiku wa Linanga
“Yuma yino chanwambulwile yo ha kabutu, mumu yami nabwile hamwe ni yenu. 5Haliabwila ngunayi kuli Tata yoze wangutumine. Mutu niumwe hakachi kenu unanguhula ngwenyi: ‘Kuli unayi?’ 6Alioze nunevu chinyengo kuhiana mumu hinanwambulwila yuma yino. 7Alioze ngunanwambulwila umwenemwene ngwami, chinalite hali yenu, yami nguye. Mumu, nyi Chayile, Chikwashi kechi keza kuli yenu. Alioze, nyi naya, mungukanutumina ye. 8Muze makeza, makakumika akwa hashi ha shili, ni ha ululi, ni ha ubatwilo wa Zambi. 9Akwa hashi kaakupiasuka ha chikuma cha shili, mumu keeshi kungufuliela. 10Kaakupiasuka ha chikuma cha ululi, mumu ngunayi maha Tata ni kunuchi kungumona nawa. 11Kaakupiasuka ha chikuma cha ubatwilo, mumu Zambi hanahisa kulu Mwata wa hashi hano.#16:11 MWATA WA HASHI HANO: tala 12:31.
12“Yuma yikwo yinji nguli nayo yakunwambulwila, alioze kunwahashile kuyivwa haliabwila. 13Muze Mwiku wamwenemwene muukeza, muukanusongwela umwenemwene weswe. Kuuchi kahanjika mu chiyulo cha uyowene, alioze muukahanjika yize yeswe muukevwa, muukanunyingikisa yuma yize muyikeza ho. 14We Mwiku wa Linanga muukangulemesa, mumu muukatambula ya yami ni kunwambulwila yo. 15Yize yeswe Tata ali nayo, yili ya yami. Kashika nanwambanga ngwami, Mwiku wamwenemwene muukatambula yize ya yami ni kunwambulwila yo.”
Chinyengo muchikalumuka uwahililo
16“Kwasala hakepe kunuchi kungumona mba ha shimbu likepe munukangumona nawa.” 17Amwe a kuli tumbaji twenyi yaalihula ngwo: “Kanambe ngwenyi: ‘Kwasala hakepe kunuchi kungumona, mba ha shimbu likepe munukangumona nawa.’ Kanambe nawa ngwenyi: ‘Mumu ngunayi kuli Tata.’ 18Kulumbunuka kuchi? Chize anambe ngwenyi: ‘ha shimbu likepe,’ kulumbunuka kuchi?” 19Yesu yanyingika ngwenyi, tumbaji kaanazange kumuhula. Kashika yamba ngwenyi: “Nanwambanga ngwami: ‘Kwasala hakepe kunuchi kungumona, mba ha shimbu likepe munukangumona nawa.’ Nunalihula ha chikuma chino mukachi kenu, nyi? 20Chamwenemwene ngunanwambulwila ngwami, mu nukalinyenga, alioze akwa hashi maakawahilila. Munukanenganyana, alioze chinyengo chenu muchikalumuka uwahililo. 21Muze pwo himasema mwana, mabwa ni chinyengo mumu ola yenyi ya lamba hiyaheta. Alioze muze mwana hasemuka, mavulama lamba lienyi, mawahilila mumu mwana hasemuka. 22Chimuwika ni yenu. Haliabwila nunevu chinyengo, alioze munukangumona nawa, mba munukawahilila, uwahililo uze mutu niumwe mahasa kuuchiza.
23“Muze tangwa lize hiliaheta, kunuchi kanguhula nawa Chuma nichimwe. Chamwenemwene ngunanwambulwila ngwami, Tata makanwaha yuma yeswe yize munuketa mu jina liami. 24Ndoo haliabwila kanda nuchita Chuma nichimwe mu jina liami. Etenu, mba munukatambula; hanga nukabwe ni uwahililo kuhiana.”
Yesu hanakumbu yibi ya hano hashi
25“Hingunanwambulwila yuma yeswe ni yishima. Tangwa mulikeza muze chichi kahanjika ni yishima, alioze mungukanwambulwila pundu yuma yeswe yakutwala kuli Tata. 26Muze tangwa lize hiliaheta, munuketa kuli Tata yuma yeswe mu jina liami, hindu Chambile ngwami, yami mungukanwichila yo, 27mumu Tata iye mwene kakunuzanga. Kakunuzanga mumu nwakuzanga yami, ni mumu nwakululiela ngwenu, nakatukile kuli Zambi. 28Nakatukile kuli Tata, hinguneza hano hashi. Haliabwila, ngunakatuka hashi hano ha kuya kuli Tata.”
29Mba tumbaji twenyi yaamwamba ngwo: “Tala, haliabwila unahanjika mwazu, hi ni yishima ko. 30Haliabwila tunanyingika ngwetu, Unanyingika yuma yeswe. Mutu kechi kukuhula nawa. Ha chino tunafuliela ngwetu, kuli Zambi wejile.” 31Yesu ngwenyi: “Nunafuliela haliabwila, nyi? 32Ola muyiheta, hiyaheta kulu, yize munukamwangana umuwika umuwika, mutu mweswe ku zuwo lienyi. Munukanguhichika ukawami, hindu Chishi ukawami, mumu Tata kali hamwe ni yami. 33Hinanulweza yuma yino yeswe hanga nukabwe ni uhwimino ha kulinunga ni yami. Munukabwa ni lamba linji hano hashi, alioze hamukenu, hingunakumbu hashi.”
Currently Selected:
Yoano 16: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
