Yoano 13

Yesu yasanyisa molu ja tumbaji twenyi

1Te hikwasala tangwa limuwika ni chiwanyino cha kwiwuluka Kubalika. Yesu yanyingika ngwenyi, ola yenyi hiyaheta yakukatuka hashi ni kuhiluka kuli Tato. Matangwa eswe yazanga atu jenyi waze te atwama hano hashi, yaazanga ndoo ku songo.

2Yesu ni tumbaji twenyi te kaanali ha chingoloshi. Sakwonga hanyongesa kulu Yudase, mwana wa Simone Kakeriote, akunjike Yesu kuli akwa kole jenyi. 3Yesu yanyingika ngwenyi, Tato hanamwehe chiyulo cheswe, yanyingika ngwenyi, hanakatuka kuli Zambi ni mahiluka nawa kuli Zambi. 4Yesu yakatuka ku mesa, yazula mahina jenyi a helu, yanda chitambala cha kukusumwina meya (twaya), yalijichika cho mu zalilo. 5Mba yatehuna meya mu mbashila, yabutuka kusanyisa molu ja tumbaji ni kuyikusumuna ni chitambala chize te analijichika mu zalilo. 6Yaheta kuli Simone Petulu. Mwe Simone yamuhula ngwenyi: “Mwene, yena muusanyisa molu jami, nyi?” 7Yesu ngwenyi: “Kuwanyingikine chize ngunalingi haliabwila, alioze kulutwe muukanyingika.” 8Petulu ngwenyi: “Ka! Kuuchi kusanyisa molu jami nichimwe!” Yesu ngwenyi: “Nyi chichi kukusanyisa, kuuchi kubwa kambaji kami nichimwe.” 9Simone Petulu ngwenyi: “Mwene, nyi chocho, kanda ungusanyisa molu wika, alioze ngusanyise ni moko ni mutwe!” 10Yesu ngwenyi: “Yoze hasana mujimba weswe keshi kuzanga kusana nawa shina molu, mumu habema kulu mweswe. Yenu nunabeme, alioze hi eswe ko.” 11(Yesu yanyingika yoze te mamukunjika kuli akwa kole jenyi. Kashika yamba ngwenyi: “Kunwabemene eswe.”)

12Muze Yesu hasanyisa molu jo, yazala nawa mahina jenyi a helu, yatwama ku mesa, mba yaamba ngwenyi: “Nunanyingika chize hinanulinga, nyi? 13Nwakunguvuluka ngwenu: ‘Longeshi’ ni ‘Mwene.’ Nwakwamba kanawa, mumu Chenacho nguli. 14Nyi yami mwe Mwene kanda Longeshi hinanusanyisa molu, ni yenu nawa chatamba kulisanyisa molu umwe ni mukwo. 15Hinanwaha chilweza hanga nukalinge ngwe chize hinanulinga yami. 16Chamwenemwene ngunambe ngwami, ndungo niumwe unahiana mwata wenyi, chibwe kanganda niumwe unahiana yoze wakumutuma. 17Haliabwila hinwanyingika Chuma chino. Munuwahilila nyi munuchilinga!

18“Chambile yenu eswe. Ngunanyingika waze natongwele. Alioze yuma yize yasonewene mu Mukanda wa Zambi chatamba kumanunuka. Ngwo: ‘Yoze wakulia mbolo hamwe ni yami, hangwalumukina.’ 19Hinalianga kunwambulwila cho shimbu kanda, hanga muze muchikabwa nukanyingike ngwenu, ‘Yami Nguli Yoze Nguli,#13:19 YAMI NGULI YOZE NGULI: tala 8:24.’ 20Chamwenemwene ngunanwambulwila ngwami, mutu yoze matambula yoze ngunatumu, mangutambula yami. Ni mutu yoze mangutambula, matambula yoze wangutumine.”

Yesu yambulula ngwenyi: Yudase mamukunjika kuli akwa kole jenyi

(Tala nawa Mat 26:20-25; Mar 14:17-21; Luk 22:21-23)

21Muze Yesu hamba yuma yino, yalibikala. Mba yamba ngwenyi: “Chamwenemwene ngunanwambulwila ngwami, umwe hakachi kenu mangukunjika kuli akwa kole jami.” 22Tumbaji yaalitalatala ni kuyambashana mutu yoze te anambila. 23Umwe wa kuli tumbaji, yoze Yesu azangile, te kanasulangana ni Yesu. 24Simone Petulu yatenya kambaji yoze hanga ahule Yesu ngwenyi, iya anambila. 25Kambaji yoze yashachila hali Yesu nikumuhula ngwenyi: “Mwene, iya mwenawo?” 26Yesu ngwenyi: “Mutu yoze mungutachila lupapa ni kumwaha yo, mwenawo.” Mba Yesu yanda lupapa, yamutata, yamwaha Yudase mwana wa Simone Kakeriote. 27Muze Yudase hatambula lupapa, hazehene Sakwonga yamunjila. Yesu yamwamba ngwenyi: “Chize unambe kulinga, Chilinge nikawashi!”

28(Niumwe wa kuli waze te ali ku mesa Unanyingika chikuma chize amwambilile liji lize. 29Yudase te mwe wakumbata je mbongo. Kashika tumbaji amwe yaanyonga ngwo, Yesu kanazange kumwamba hanga aye ni kulanda yize anahono ha chiwanyino, hanji te kanamuhula hanga ahe yiswale yimwe yuma.) 30Yudase yatambula lupapa, yatuhuka hazehene. Te hikwabwa ufuku.

Shimbi yaha

31Muze Yudase hatuhuka, Yesu yamba ngwenyi: “Haliabwila uhenya wa Mwana Mutu#13:31 mwana mutu tala 1:51. hiwasoloka, uhenya wa Zambi hiwasoloka muli iye. 32Nyi uhenya wa Zambi hiwasoloka muli iye, Zambi neye makasolola muli iye mwene uhenya wa Mwana Mutu, ni makausolola ha shimbu likepe. 33Ana jami, shimbu likepe wika yami mungubwa hamwe ni yenu. Munukangufupa, alioze haliabwila ngunanwambulwila yuma yize hingunambulwila Ayuda, ngwami, kunwahashile kwiza kuma kuze yami munguya. 34Ngunanwehe Shimbi yaha ngwami, lizangenu ni akwenu. Ngwe chize nakunuzanga yami, ni yenu nawa lizangenu. 35Nyi munulizanga ni akwenu, eswe maakanyingika ngwo, nuli tumbaji twami.”

Yesu ngwenyi: “Yena Petulu, muulikala yami.”

(Tala nawa Mat 26:31-35; Mar 14:27-31; Luk 22:31-34)

36Simone Petulu yamuhula ngwenyi: “Mwene, kuli unayi?” Yesu ngwenyi: “Haliabwila kuwahashile kungukaula kuze ngunayi, alioze kulutwe muukangukaula.” 37Petulu yamuhula ngwenyi: “Mwene, ngwe kuchi chahashile kukukaula haliabwila? Ngunalulika kufwa mumu hali yena!” 38Yesu ngwenyi: “Kuma unalulika kufwa hamwe ni yami, nyi? Chamwenemwene ngunakwambulwila ngwami, shimbu ndemba kanda achitambika, kumuulikala yami katatu ngwe, kuwangunyingikine.”

Currently Selected:

Yoano 13: CHK1970

Highlight

Copy