Yoano 14
14
Yesu ye jila yakuya kuli Tata
1Yesu yambila tumbaji twenyi ngwenyi: “Mbunge jenu kanda jilibikala. Fulielenu Zambi, fulielenu nawa yami. 2Mu zuwo lia Tata muyili yibatulo yinji. Ngunayi mu kunululikila muhela. Chahashile kunwambulwila cho, nyi hi chamwenemwene ko. 3Muze hinanululikila muhela, mungukeza nawa. Mungukanwanda yami mwene, hanga ni yenu nukabwe kuze yami nguli. 4Nunanyingika jila yakuheta kuma kuze ngunayi.” 5Tomase yamukumbulula ngwenyi: “Mwene, kutwanyingikine kuze unayi. Ngwe kuchi tunahase kunyingika jila?” 6Yesu ngwenyi: “Yami nguli ye jila, ni we umwenemwene, ni we mwono. Niumwe meza kuli Tata shina ni yami. 7Nyi nunangunyingika yami, nunanyingika nawa Tata. Chize ku haliabwila munumunyingika, hinwamumona.”
8Filipe yamwamba ngwenyi: “Mwene, tulweze kama mwe Tata, mba tuhutuke.” 9Yesu ngwenyi: “Filipe, shimbu libwa haha nguli hamwe ni yenu, hindu kuwangunyingikine, nyi? Mutu yoze hangumona, hamona nawa mwe Tata. Mba kuchi unambe ngwe: ‘Tulweze kama mwe Tata’? 10Kuushi kufuliela ngwe, yami nguli muli Tata ni Tata muli yami, nyi? Maliji eswe hingunahanjika nenu, hi a yami mwene ko. Alioze Tata yoze uli muli yami mwe wakulinga yitanga yenyi. 11Ngufulielenu muze ngunambe ngwami, yami nguli muli Tata, ni Tata muli yami. Alioze nyi ka, ngufulielenu mumu ha ye yitanga. 12Chamwenemwene ngunanwambulwila ngwami, yoze unangufuliela, neye makalinga yitanga yize nakulinga. Makalinga yitanga yinene yahiana yino, mumu ngunayi kuli Tata. 13Mungukalinga yuma yeswe yize munuketa mu jina liami, hanga uhenya wa Tata ukasoloke muli mwe Mwana. 14Nyi munungwita chimwe Chuma mu jina liami, mungukachilinga.”
Yesu yalakenya kutuma Mwiku wa Linanga
15“Nyi nwakunguzanga, munufunga Shimbi jami. 16Mungukaliumba kuli Tata hanga anwehe Chikwashi mukwo, hanga akabwe hamwe ni yenu miaka yeswe, we Mwiku wamwenemwene. 17Akwa hashi kaahashile kuutambula, mumu kaahashile kuumona, chibwe kuunyingika. Alioze yenu nunaunyingika, mumu kuuli hamwe ni yenu, ni muukabwa muli yenu.
18“Chichi kanuhichika ana ashiwa. Mungukeza nawa kuli yenu. 19Ha shimbu likepe akwa hashi keechi kangumona nawa, alioze yenu, munukangumona, mumu yami nguli ni mwono, ni yenu nawa munukabwa ni mwono. 20Ha tangwa lize, munukanyingika ngwenu, nguli muli Tata, ni yenu muli yami, ni yami muli yenu.
21“Yoze wakufunga Shimbi jami ni wakujononokena, mwenawo wakunguzanga. Tata mazanga yoze wakunguzanga, ni yami nawa mungumuzanga ni mungulisolola kuli iye.” 22Yudase (hi Kakeriote ko) yamuhula ngwenyi: “Mwene, kuchi muulisolola kuli yetu, alioze hi kuli akwa hashi ko?” 23Yesu ngwenyi: “Yoze wakunguzanga, mononokena longeso liami. Tata mamuzanga, mba Tata ni yami mutukeza ni kutwama muli iye. 24Yoze keshi kunguzanga, keshi kwononokena maliji jami. Longeso lize nwakungwivwa, hi lia yami ko, alioze lia Tata yoze wangutumine.
25“Hinanwambulwila yuma yino shimbu nguchili hamwe ni yenu. 26Mwe Chikwashi, Mwiku wa Linanga, yoze Tata makatuma mu jina liami, makanulongesa yeswe, makanwiwulula yuma yeswe yize hinanwambulwila.
27“Uhwimino ngunanuhichikila. Uhwimino wami ngunanwehe. Chanuhele wo ngwe chize akwa hashi akuhana. Kanda nulibikala, kanda nwivwa woma. 28Hinwevwa chize hinamba ngwami: ‘Ngunayi, alioze munguhiluka kuli yenu.’ Nyi nwakunguzanga, munuwahilila ha kunyingika ngwenu, ngunayi kuli Tata, mumu Tata kali munene Wahiana yami. 29Hinanwambulwila cho shimbu kanda, hanga muze yuma yino muyikabwa, nukafuliele. 30Chichi kuhanjika nawa chinji hamwe ni yenu, mumu Mwata wa hashi hano#14:30 Mwata WA Hashi hano: tala 12:31. kaneza. Keshi chiyulo nichimwe hali yami, 31alioze chatamba akwa hashi kunyingika ngwo, nakuzanga Tata, kashika nakulinga yize yeswe angwambile Tata ha kuyilinga.
“Katukenu, tuyenu.”
Currently Selected:
Yoano 14: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
