Kịẹn-aḅịḅị 4

Livayị Furo Ḅụ Kohatị Pụmbụ Mẹ Nyana Kọrịnama

1KỊNỊNYANAḄỌ ḅe nwẹnị pịkị Mozizi na Erọnị na ḅẹẹ, 2Livayị owiapụ-awọmẹ ma ogbo ḅio ḅụ ó Kohatị owiapụ-awọmẹ ma kịẹn ịna afuro na, ịna aḍapụ awarị na ḅụ. 3Kụra suei ọkị mu kụra amesi oyi finji sịḅị ḅụ ḅọrọtẹ apụ kịẹn, inimgba tẹ inetẹ Kobiri Akpụrụ-warị mẹ ḅio sọ-mu tẹ kọrịnama kọrị ḅarị apụ. 4Miemẹ anie Kobiri Akpụrụ-warị mẹ ḅio Kohatị owiapụ-awọmẹ ma kọrịnama: anie fịafịa-tẹịn aị ma ḅụ.

5Akpụrụ-warị mẹ sin tẹ anị saakị so sakị la tẹ ḅẹḅẹ, Erọnị na, ori owiapụ-awọmẹ na sọ-mu tẹ kiki-pẹlẹ-ḅịtẹ mẹ sin koroma ḅa, tẹ anị kẹ Ḅụụ ḍie-pakama Ọḅọkụ-Igbe mẹ gbaịn ḅa. 6Anịtẹso ịn gbọrụ oḅori oju apara ye gbaịnye kẹ anị ọgọnọ gbana ḅa, tẹ bulo-bulo gbọrụ ḅịtẹ finjima aniemẹ gbaịn ḅa, tẹ nwẹnị anị ḅẹ nangwọtẹ asịn ikiḅa ma kẹ akaka ma ḅụ suu ḅa.

7Anịsakị ịn kẹ KỊNỊNYANAḄỌ ḅe pịrị fịturu ma gbana dẹbịlẹ mẹ, ịn bulo-bulo ḅịtẹ finjima anị gbaịn ḅa, tẹ anị ọgọnọ ḅụ ye sụa opu ẹfẹrẹ ma na, kụnụaị sụa ẹfẹrẹ ma na, kala ẹfẹrẹ ma na, agbamịẹ iru sụa ịkpangị ajongo ma na kẹ gbana ḅa sakị mamgba anị ọgọnọ gbana sime, sime fịturu mẹ sọ anị ọgọnọ sime ḅa. 8Anịtẹso ini awụ ḅịtẹ finjima anị gbaịn tẹ oḅori oju apara ye gbaịnye mẹ ḅẹ gbọrụ ye kẹ pịkị anị gbaịn ḅa, tẹ nwẹnị anị ḅẹ nangwọtẹ asịn ikiḅa ma kẹ anị akaka ḅụ suu ḅa.

9Anịsakị ịn bulo-bulo ḅịtẹ ọkị tẹ kẹ sime bele pịrị tọnjọ-sịẹmaye mẹ na anị ḅẹ atọnjọ na, kẹ arị ḅụ dọkịtẹ aḅịḅị kịrị sin-arị aị ma na kẹ arị suku-saakịarị pẹmpẹmtẹ apanị na kẹ tọnjọ tọnjị pulo sụarị aị mamgba na gbaịn ḅa; 10tẹ kẹ anị ḅẹ kọrịnama kọrịarị aị mamgba kẹ anị na sụa oḅori oju apara gbọrụ ye gbaịnye kẹ anị gbaịn tẹ anị kẹ anị dogi amasịn mẹ ọgọnọ gbana ḅa.

11Anịsakị golu-golu agbamịẹ-anga mẹ ọgọnọ ịn bulo-bulo ḅịtẹ finjima anị gbaịn ḅa, tẹ ye-gbaịn oḅori oju-apara kẹ anị gbaịn tẹ anị ḅẹ nangwọtẹ asịn ikiḅa ma kẹ akaka ma ḅụ suu ḅa, 12tẹ ịn nwẹnị fịafịa-namakọrịaị ma tẹ ịn kẹ Fịafịa Yọ mẹ ḅụ fịrị mẹnjịarị aị ma kẹ bulo-bulo ḅịtẹ ḅio sụa, tẹ ye-gbaịn oḅori oju-apara kẹ arị gbaịn tẹ arị kẹ yedogi-amasịn mẹ ọgọnọ gbana ḅa. 13Anịsakị ini agbamịẹ-anga mẹ ọgọnọ sime afọn ma sin, tẹ pọpụlụ nwẹn-sịn tọrụ sụa ḅịtẹ finjima anị gbaịn ḅa; 14tẹ ngwongwo mamgba tẹ ịn kẹ anịanga kọrịnama kọrịarị anyịmgbọ tan apanị ma na, ḅuru-gbọn-ḅala ma na, sọpụrụ ma na, opu apanị ma na, agbamịẹ-anga mẹ ḅẹ ngwongwo mamgba na tan anị ọgọnọ gbana ḅa; tẹ ịn nwẹnị oḅori oju-apara gbọrụ ye gbaịnye finjima anị gbaịn ḅa, anị ḅẹ nangwọtẹ asịn ikiḅa ma kẹ anị akaka suu ḅa. 15Anịsakị akpụrụ-warị mẹ sin paka ḅara ḅụ Erọnị na ori owiapụ-awọmẹ na Fịafịa Yọ mẹ na, Fịafịa Yọ mẹ ḅẹ kọrịnama-kọrịaị mamgba na gbaịn fama tẹso, aniemẹ ḅọrọ sakị, Kohatị owiapụ-awọmẹ ma ḅo mịna aị ma dogi ḅa, kụma ịn ḅara kẹ fịafịa aị ma lama nyana-a anieofori ịn ḅofa fịị.

Mịna aị ma anie Kobiri Akpụrụ-warị mẹ ḅẹ aị ma tẹ Kohatị owiapụ-awọmẹ ma dogi ḅarị aị ma.

16“Ẹlịyeza, Erọnị owiḅọtụḅọ, agbamịẹḅọ ḅe tọnjọ tọnjị pulo mẹ na, kụnụ lamarị kụnụaị ma na, sakị mamgba mịẹarị mgbọlụ agba mẹ na, fịafịa-pulo mẹ na onyo-sẹịn tẹ ḍikiḍiki ḅa, pịkị Akpụrụ-warị mẹmgba na, anị ḅio sime aị ma na Fịafịa Yọ mẹ ḅẹ ye sụa ẹfẹrẹ ma na kẹ sụa tọrụ kẹ arị ḅụ wẹrị ḅa.”

17KỊNỊNYANAḄỌ ḅe nwẹnị Mozizi na Erọnị na ḅẹẹ, 18“Ọ́ ḍụkụ tẹ Livayị furo-ḅẹ-apụ ma ogbo-ḅio ḅụ Kohatị furo-ḅẹ-apụ ma fịị ma; 19kụma ọ́ mị-ḅara kẹ ini na mịẹ, mịẹtẹ ịn sọma-ḅo Fịafịa-tẹịn Aị ma kpeki sakị ịn fịị ḅịa ḅara Erọnị na ori owiapụ-awọmẹ na sọ-mu ḅa tẹ ịn mịẹ ḅẹ ye tọn ọrụḅọ-ọrụḅọ pịrị, tẹ mḅọ dogi ḅa 20kụma ịn gbọrụ sakị kịngẹ sọ kẹ sọ-mu tẹ sime tẹ toluma Fịafịa Aị ma ḍiki ḅịa, ịn ḅofa fịị.”

Livayị Furo Ḅụ Gasọnị Pụmbụ Mẹ Nyana Kọrịnama

21KỊNỊNYANAḄỌ ḅe nwẹnị pịkị Mozizi ḅẹẹ, 22“Pịkị Gasọnị owiapụ-awọmẹ ma kịẹn-ḅịḅị sọ ọkịị ịna kpo na, ịna paka-afuro na ḅụ; 23kụra asuei sịḅị ḅụ ḅọrọtẹ owiapụ ḅụ ọkị mu kụra amesi oyi finji la, ị́ inima tẹ Kobiri Akpụrụ-warị mẹ ḅẹ kọrịnama mẹ ḅụ sọ tẹ inetẹ fịrị mẹnjị ḅarị apụ kịẹn ḅa.” 24Miemẹ anie Gasọnị ḅụụ ḅụ paka-ḅo afuro ma kọrịnama, fịrị mẹnjị na, ye dogi na ḅụ. 25Ini mie Akpụrụ-warị mẹ na Kobiri Akpụrụ-warị mẹ na ḅẹ ḅịtẹ awarị ma na, ḅọkọ kpọ aḅịtẹ ma na, kẹ anị gbaịn aḅịtẹ ma na, oḅori oju-apara mẹ tẹ kẹ anị ọgọnọ gbaịn-arị ye mẹ na kẹ sụa dogi ḅarịye, 26nụngọ mẹ ḅẹ aḅịtẹ ma tẹ ịn kẹ Akpụrụ-warị mẹ na, agbamịẹ-anga mẹ na gbori-ikelemakoro aị ma na, nụngọ mẹ ḅẹ onu-ḅọkọ mẹ kpọ ḅịtẹ mẹ na, arịḅẹ aḍigi na, kẹ arịḅẹ afịrị mẹnjịarị aị mamgba na; anịsakị ini mie arị gbolomaye ḅụ aniemẹ mịẹ na-iḅim nwẹn ḅẹẹ aị mamgba mịẹ ḅarịye. 27Gasọnị furo ḅẹ owiapụ-awọmẹ ma mẹnjị ḅarị afịrị mamgba, Erọnị na, ori owiapụ-awọmẹ na tọn ịn pịrị aị sọ ḅa, ye tẹ ịn dogi ḅarị aị mamgba na, ye tẹ ịn nyana tẹ mịẹ ḅarị aị mamgba na ḅụ; ọmịnị ịn dogi ḅarị aị mamgba tọn-tọn ịna aḅara sụa tẹ ịn ḍikiḍiki ḅa. 28Miemẹ anie Gasọnị furo-ḅẹ-apụ ma afuro ḅụ paka-ḅo owiapụ-awọmẹ ma Kobiri Akpụrụ-warị mẹ ḅụ mẹnjị ḅarị fịrị, anịsakị ịna kọrịnama mẹ Itama, Erọnị agbamịẹḅọ ḅe owiḅọtụḅọ ḅe suku-ḅio sime ḅa.

Livayị Furo Ḅụ Mẹrarị Pụmbụ Mẹ Nyana Kọrịnama

29Mẹrarị owiapụ-awọmẹ ma kụma, ịna afuro na, ịna aḍapụ awarị na ḅụ ị́ ịn kịẹn ḅa; 30kụra suei sịḅị ḅụ ḅọrọtẹ owiapụ ḅụ ọkị mu kụra amesi oyi finji la; Kobiri Akpụrụ-warị mẹ ḅẹ kọrịnama kọrị ḅẹ inetẹ fịrị mẹ sọ ḅarị ḅọ goḅọ-goḅọ ị́ ịn kịẹn ḅa. 31Miemẹ anie bebe fịrị mẹ tẹ Kobiri Akpụrụ-warị mẹ ḅụ ini sẹịn ḅarị onyo, anie ye dogi Ọḅọkụ-Igbe koko Akpụrụ-warị mẹ ḅẹ amasịn ma na, anị ḅẹ ẹngbẹsẹ asịn ma na, ḅeriaị ma na, otolo ma na kẹ sụa; 32na nụngọ mẹ ikelema-koro ḅụ simearị ḅeriaị ma na arịḅẹ otolo ma na, dọlịa ma na, ḍigi ma na, arị ḅe kọrịnama-kọrịaị na, kẹ arị ḅụ ḅarasụa kọrịnama kọrị jaị ma kẹ sụa; anịsakị ye tẹ ó ḅiim in dogii, nwẹn ḅẹẹ ye, ḅẹẹ ye, ọmịnị ẹrẹ sịn-sịntẹ ye mẹ kẹ mḅọ pịrị dogii. 33Miemẹ anie Mẹrarị afuro ma ḅẹ owiapụ-awọmẹ ma fịrị; Kobiri Akpụrụ-warị mẹ ḅụ ịna bebe, fịrị mẹ Itama, Erọnị agbamịẹḅọ ḅe owiḅọtụḅọ ḅe ḅara ḅio emii.

Livayị Furo-ḅẹ-apụ Ma Kịnị Kịẹn Mẹ

34Mozizi na, Erọnị na, tomi ogbo mẹ ḅẹ tọrọkọ tarị apụ ma na Kohatị furo-ḅẹ-apụ ma kịẹnm ịna afuro na, ịna aḍapụ awarị na ḅụ. 35Kụra suei sịḅị ḅụ ḅọrọtẹ apụ ḅụ ọkị iwo mu kụra amesi oyi finji sịḅị ḅụ ḅọrọtẹ apụ la, inetẹ Kobiri Akpụrụ-warị mẹ ḅẹ kọrịnama mẹ ḅẹ fịrị sọ ḅẹ ḅọ goḅọ-goḅọ; 36tẹ furo-furo ma ḅụ ịna kịẹn-ḅịḅị anie kịnị amesi oyi finji ofori kịnị sọnọma ẹndẹ (2,750). 37Miemẹ anie inimgba tẹ Kohatị furo-ḅẹ-apụ ma ḅụ, furo-furo ḅụ Kobiri Akpụrụ-warị mẹ ḅẹ fịrị mẹnjị apụ, inima tẹ Mozizi na, Erọnị na KỊNỊNYANAḄỌ ḅe Mozizi ḅụụ ḅụ ḅọrọtẹ tọn ḅara ḅụ ịn kịẹn apụ.

38Ịna afuro na, ịna aḍapụ awarị na ḅụ Gasọnị owiapụ-awọmẹ ma kịẹn-ḅịḅị. 39Kụra suei sịḅị ḅụ ḅọrọtẹ apụ ḅụ ọkị iwo mu kụra amesi oyi finji sịḅị ḅụ ḅọrọtẹ apụ la, inetẹ Kobiri Akpụrụ-warị mẹ ḅẹ kọrịnama mẹ ḅẹ fịrị sọ ḅọ goḅọ-goḅọ; 40furo-furo na, ịna aḍapụ awarị na ḅụ ịna kịẹn-ḅịḅị anie kịnị sonio ẹndẹ, oyia asi finji, na kịnị suei na (2,630). 41Mie mẹ anie inimgba tẹ Gasọnị owiapụ-awọmẹ ma afuro ḅụ Kobiri Akpụrụ-warị mẹ ḅẹ fịrị mẹnjị apụ, inima tẹ Mozizi na, Erọnị na kịẹn apụ KỊNỊNYANAḄỌ ḅe wẹrịtẹ tọn ḅara ḅụ.

42Ịna afuro na, ịna aḍapụ awarị na ḅụ Mẹrarị owiapụ-awọmẹ ma kịẹn-ḅịḅị. 43Kụra suei sịḅị ḅụ ḅọrọtẹ apụ ḅụ ọkị iwo mu kụra amesi oyi finji sịḅị ḅụ ḅọrọtẹ apụ la, inetẹ Kobiri Akpụrụ-warị mẹ ḅẹ kọrịnama mẹ ḅẹ fịrị sọ ḅẹ ḅọ goḅọ-goḅọ, 44furo-furo ma ḅụ ịna kịẹn-ḅịḅị anie kịnị nine ẹndẹ (3,200). 45Mịna apụ ma anie inima tẹ Mẹrarị afuro ma ḅụ tomi ma tẹ Mozizi na, Erọnị na KỊNỊNYANAḄỌ ḅe Mozizi ḅụụ ḅụ ḅọrọtẹ tọn ḅara ḅụ ịn kịẹn apụ ma. 46Inweni-mgba tẹ Livayị furo-ḅẹ-apụ ma ḅụ inima tẹ Mozizi na, Erọnị na, Izirẹlị ḅẹ tọrọkọ tarị apụ ma na ịna afuro na, ịna aḍapụ awarị na ḅụ, 47kụra suei sịḅị ḅụ ḅọrọtẹ apụ ḅụ ọkị iwo mu kụra amesi oyi finji sịḅị ḅụ ḅọrọtẹ apụ la inetẹ Kobiri Akpụrụ-warị mẹ ḅẹ kọrịnama mẹ ḅẹ fịrị onyo mẹ sẹịn tẹ kọrị ḅarị ḅọ goḅọ-goḅọ ḅụ 48inima tẹ kịẹn apụ anie kịnị puku, kịnị ẹndẹ sọnọa si finji, na kịnị suei na, (8,530). 49KỊNỊNYANAḄỌ ḅe wẹrịtẹ Mozizi ḅụụ ḅụ ḅọrọtẹ tọn ḅara ḅụ, ini ọrụḅọ-ọrụḅọ tọn mḅọ kọrị ḅẹ ye ḅụ suum, fịrị mẹnjị anịanịa ye dogi; mị-ḅara mie ọ̀ kẹ ịn kịẹn ḅara KỊNỊNYANAḄỌ ḅe wẹrịtẹ tọn Mozizi pịrị ḅara.

Currently Selected:

Kịẹn-aḅịḅị 4: KBTP

Highlight

Copy