Kịẹn-aḅịḅị 3

Erọnị Owiapụ-awọmẹ

1KỊNỊNYANAḄỌ ḅe Sayịnayị Tụndụ ọgọnọ ḅụ Mozizi na ẹkwẹn sakị mịna apụ ma mie Erọnị na, Mozizi na ḅụụ ḅụ paka-ḅo tẹ apụ. 2#Kịẹ 26.60Mịna ẹrẹ ma anie Erọnị owiapụ-awọmẹ ma ẹrẹ: Nadabụ anie tarị iyi tụḅọ ḅe na, Abihu na, Ẹlịyeza na, pịkị Itama na. 3Mịna ẹrẹ ma anie Erọnị owiapụ-awọmẹ ma ẹrẹ, pulo sịḅị saratẹ agbamịẹapụ ma; inima tẹ ọ̀ ḅara kẹ sịḅị ḅụ gbana tẹ agbamịẹapụ kọrịnama kiri ḅụ kọrịnama kọrị ḅẹ apụ ma.

4 # Lẹv 10.1,2; Kịẹ 26.61 Kụma Nadabụ na, Abihu na Sayịnayị ịkpa mẹ ḅio KỊNỊNYANAḄỌ ḅe tọrọkọ ḅụ fịafịa-a fịnị sụa sakị ḅụ KỊNỊNYANAḄỌ ḅe tọrọkọ ḅụ fịịm; tẹ ini awọ iyi-a. Mie ḅụ Ẹlịyeza na, Itama na ịna ḍaḅọ Erọnị ḍumo-sakị ḅụ agbamịẹapụ ḅara kẹ fịrịmẹnjịm.

Ịn Livayị Furo-ḅẹ-apụ Ma Tọnm Ịn Fịrị Mẹnjị Agbamịẹapụ Ma Pịrịị

5KỊNỊNYANAḄỌ ḅe nwẹnị Mozizi ḅẹẹ, 6“Livayị furo-ḅẹ-apụ ma ọkị-ḅo, tẹ ịn kẹ Erọnị, Agbamịẹḅọ ḅe tọrọkọ sịẹma, mịẹtẹ ịn fịrị mẹnjị ọ̀ pịrị ḅarị ḅara. 7Kobiri Akpụrụ-warị mẹ tọrọkọ ịn sime ịn pịrị fịrị mẹnjị ori na, bebe tomina-ogbo mẹ na pịrị ḅa, Akpụrụ-warị mẹ ḅụ fịrị mẹnjị ḅara ḅụ. 8Ini Kobiri Akpụrụ-warị mẹ ḅio simearị kọrịnama-kọrịaị mamgba ḍikiḍiki ḅa, tẹ Ọḅọkụ-Igbe koko Akpụrụ-warị mẹ ḅụ fịrịmẹnjịapụ ḅara ḅụ ini Izirẹlịapụ ma nyana akọrịnama kọrị ịn pịrị ḅa. 9Anịsakị ị́ Livayị furo-ḅẹ-apụ ma kẹ Erọnị na ori owiapụ-awọmẹ na pịrị ḅa: Izirẹlịapụ ma ogbo-ḅio ḅụ ịn gbọrsịḅị ịn kẹ ọ̀ pịrị tẹ. 10Tẹ ị́ Erọnị na ori owiapụ-awọmẹ na tọn tẹ ini ịna agbamịẹ kọrịnama kọrị ḅa; kụma sikima jụmọ, sọma ḅo kpeki ḅọ, kpeki ḅọ fịị ḅụ sọ ḅa.”

11KỊNỊNYANAḄỌ ḅe nwẹnị Mozizi ḅẹẹ, 12#Pks 13.2“Ḍikii, Izirẹlịapụ ma ḅụ furo finji tarị tụḅọ mẹ goḅọ-goḅọ nakara, arị Izirẹlịapụ ma ogbo-ḅio ḅụ Livayị furo-ḅẹ-apụ ma ọkị tẹẹ. Livayị furo-ḅẹ-apụ ma sime ị̀ pịrị ḅa. 13Kẹ gotẹ ọkọ ḅẹẹarị, tarị awọmẹ mamgba ì nye anị ene mẹ tẹ àrị Ijiputi ama mẹ ḅio tarị awọmẹ mamgba ḅaa ene mẹ ḅụ àrị Izirẹlị ḅụ tarị awọmẹ mamgba mịẹ fịafịama ị̀ ḅụụ pịrịm, tomina awọmẹ na, nama iyi aị na ḅụ ịn sime ị̀ pịrị ḅa. Yẹrị anie KỊNỊNYANAḄỌ ḅee.”

Livayị Furo-ḅẹ-apụ Ma Kịnị Kịẹn Mẹ

14KỊNỊNYANAḄỌ ḅe nwẹnị Sayịnayị ịkpa mẹ ḅio Mozizi ḅẹẹ, 15“Ḍa warị-warị na, furo-furo na ḅụ Livayị owiapụ-awọmẹ ma kịẹẹn; gbọrụ akalụ sịḅị ḅụ ḅọrọtẹ owiḅọ goḅọ-goḅọ ḅụ saakị iwo ị́ kịẹn ḅa.” 16Mie ḅụ KỊNỊNYANAḄỌ ḅe ẹkwẹn-ḅịḅị mẹ ḅẹẹ tẹ tọn ọ̀ pịrị ḅara ḅụ, Mozizi ịn kịẹnm. 17Anịsakị mịna apụ ma anie ịna ẹrẹ ḅụ Livayị owiapụ-awọmẹ ma: Gasọnị na, Kohatị na Mẹrarị na. 18Mịna apụ ma anie ịna; afuro ḅụ Gasọnị owiapụ-awọmẹ ma ẹrẹ: Libini na, Simeyi na.

19Ịna afuro ḅụ Kohatị owiapụ-awọmẹ ma anie: Amịramụ na, Iza na, Hẹbụrọnị na, Uziyẹlị na.

20Ịna afuro ḅụ Mẹrarị owiapụ-awọmẹ ma anie: Mali na, Musi na. Mịna apụ ma anie ịna aḍapụ awarị ḅụ Livayị furo-ḅẹ-apụ ma afuro ma.

21Gasọnị ḅụ mie Libini furo-ḅẹ-apụ ma na, Simeyi furo-ḅẹ-apụ ma na sime ye. 22Ịn wẹrịtẹ gbọrụ akalụ sịḅị ḅụ ḅọrọtẹ owiapụ ḅụ ọkị iwo kịẹn ḅara ḅụ owiapụ mamgba ịna kịẹn-ḅịḅị anie: kịnị ẹndẹ sọnọa si finji ofori kịnị puku. (7,500). 23Gasọnị furo-ḅẹ-apụ ma Akpụrụ-warị mẹ ọḅụjụ ịrụa-ideriarị-anga anga ḅụ akpụrụ-warị pike tẹ kobiri tẹ sime ḅa. 24Ẹlisafụ, Lahẹlị owiḅọtụḅọ ḅe Gasọnị furo mẹ ḅẹ aḍapụ warị mẹ tọrọkọ-tarịḅọ ḅara kẹ ini na sime ḅa. 25Anịsakị Gasọnị owiapụ-awọmẹ ma Kobiri Akpụrụ-warị mẹ ḅụ ḍikiḍiki ḅarịye anie Ọḅọkụ Igbe koko Akpụrụ-warị mẹ; Akpụrụ-warị mẹ na kẹ anị gbaịn-arị ye mẹ na; 26nụngọ mẹ ḅẹ sololo aị ma na, nụngọ mẹ ḅẹ ḅọkọ kikimaye mẹ tẹ Ọḅọkụ-Igbe mẹ simearị pakịrị anga emi ye mẹ na anị ḅẹ aḍigi ma na mịna aị mamgba ḅẹ afịrị mẹnjị na.

27Kohatị ḅụ mie Amịramụ furo-ḅẹ-apụ ma na, Iza furo-ḅẹ-apụ ma na, Hẹbụrọnị furo-ḅẹ-apụ ma na, Uziyẹlị furo-ḅẹ-apụ ma na sime ye. Mịna apụ ma anie Kohatị furo-ḅẹ-apụ ma afuro ma. 28Ịn wẹrịtẹ gbọrụ akalụ sịḅị ḅụ ḅọrọtẹ owiapụ ḅụ ọkị iwo kịẹn ḅara ḅụ, owiapụ mamgba kịẹn-ḅịḅị anie kịnị gbọrụ puku na ẹndẹ oyi si finji na (8,600) Fịafịa Yọ mẹ ḅẹ akọrịnama kọrịarị. 29Kohatị owiapụ-awọmẹ ma afuro ma Ọḅọkụ-Igbe koko Akpụrụ-warị mẹ ḅẹ suku-jụ da pakịrị anga ḅụ akpụrụ-warị pike tẹ kobiri tẹ sime ḅa; 30Ẹlizafanị, Uziyẹlị owiḅọtụḅọ ḅe Kohatị afuro ma ḅẹ aḍapụ ma warị kẹ sịḅịdaḅọ ḅara kẹ ini na sime ḅa. 31Ịn sẹịn onyo anie Ọḅọkụ-Igbe mẹ na, dẹbịlẹ mẹ na, tọnjọ-sịẹmaye mẹ na, agbamịẹ-anga mẹ na mẹ na, fịafịa-namakọrịaị ma tẹ agbamịẹapụ ma kẹ ye mịẹarị aị ma na, kiki-pẹlẹ-ḅịtẹ mẹ na ḍikiḍiki. Mịna aị mamgba gboloma afịrị ma anie ịn mẹnjị afịrị.

32Ẹlịyeza, Erọnị agbamịẹḅọ ḅe owiḅọtụḅọ ḅe Livayị afuro ma tọrọkọ-tarịapụ ma sịḅịdaḅọ sọ ḅa, tẹ tọrụ kẹ inima tẹ Fịafịa Yọ mẹ ḍikiḍikiarị apụ ma ḅụụ wẹrị ḅa.

33Mẹrarị ḅụ mie Mali furo-ḅẹ-apụ ma na, Musi furo-ḅẹ-apụ ma na sime ye. Mịna apụ ma anie Mẹrarị afuro ma. 34Ịn wẹrịtẹ gbọrụ akalụ sịḅị ḅụ ḅọrọtẹ owiapụ ḅụ ọkị iwo kịẹn ḅara ḅụ owiapụ mamgba ịna kịẹn-ḅịḅị anie: kịnị jei ẹndẹ, oyia asi finji (6,200). 35Anịsakị Mẹrarị afuro ma ḅẹ ḍapụ ma awarị ma ḅẹ sịḅịdaḅọ anie Zuriyẹlị, Abiyẹlị owiḅọtụḅọ ḅe Akpụrụ-warị mẹ ḅe tọrọkọ-jụ da pakịrị anga ḅụ mie ini akpụrụ-warị pike tẹ kobiri tẹ sime ḅarịye. 36Ịn tọn Mẹrarị owiapụ-awọmẹ ma pịrị tẹ ini onyo-sẹịn pịrị tẹ ḍikiḍiki ḅarị aị anie Ọḅọkụ-Igbe koko Akpụrụ-warị mẹ ḅẹ amasịn ma na, ẹngbẹsẹ ma na, ḅeriaị ma na, otolo ma na, ịn kẹ arị ḅụ kọrịnama-kọrịaị mamgba na; mịna aị ma na gboloma akọrịnama mamgba na; 37pịkị nụngọ mẹ ikelema-koro ḅụ simearị ḅeriaị ma na, arịḅẹ otolo na, dọlịa na, ḍiki ma na kẹ arị ḅụ sụa sọ.

38Inima tẹ Akpụrụ-warị mẹ tọrọkọ ịrụa-saakịarị-anga da anga mẹ ḅụ akpụrụ-warị pike tẹ kobiri tẹ sime ḅarị apụ anie: Mozizi na, Erọnị na ori owiapụ-awọmẹ na, Fịafịa Yọ mẹ ḅio ḅẹ amịẹ-mịẹaị ma onyo-sẹịn, tẹ arị mịẹarị, tẹ Izirẹlịapụ ma mịẹ ḅẹ ḅii ye, ḅii ye mịẹ ịn pịrịarị apụ ma, anịsakị sikima apụ ḅụ ḅẹḅọ-ḅẹḅọ tẹ sọma ḅo kpeki ḅọ, kpeki ḅọ fịị ḅụ sọ ḅa. 39Tomi mamgba tẹ Livayị furo-ḅẹ-apụ ma ḅụ gbọrụ akalụ sịḅị ḅụ ḅọrọtẹ owiapụ ḅụ ọkị iwo tẹ KỊNỊNYANAḄỌ ḅe tọn ḅara ḅụ furo-furo ḅụ Mozizi na, Erọnị na kịẹn apụ kịnị sọnọ ẹndẹ ofori kịnị tẹra puku (22,000).

Livayị Furo-ḅẹ-apụ Ma Furo Finji Tarị Owiapụ Awọmẹ Ma Kiri Ọkịm

40KỊNỊNYANAḄỌ ḅe nwẹnị Mozizi ḅẹẹ, “Izirẹlịapụ ma tarị iyi owiapụ mamgba kịẹn gbọrụ akalụ ḅụ ḅọrọtẹ apụ ḅụ saakị iwo ịna ẹrẹ kẹẹ, kẹẹ koroma ḅara ḅụ. 41Anịsakị ị́ Livayị furo-ḅẹ-apụ ma ọkị ị̀ pịrị ḅa, Izirẹlịapụ ma ogbo-ḅio ḅụ furo finji tarị awọmẹ ma nakara; anịsakị Izirẹlịapụ ma opu anama mamgba ḅụ furo finji tarị awọmẹ ma nakara, Livayị furo-ḅẹ-apụ ma opu anama ma mie ị́ ọkị ị̀ pịrị ḅarịye. Yẹrị anie KỊNỊNYANAḄỌ ḅee.” 42Mie ḅụ Mozizi Izirẹlịapụ ma ḅụ furo finji tarị awọmẹ mamgba kịẹnm KỊNỊNYANAḄỌ ḅe tọn ọ̀ pịrị ḅara ḅụ. 43Tẹ gbọrụ akalụ sịḅị ḅụ ḅọrọtẹ furo finji tarị owiapụ ḅụ ọkị iwo mamgba ịn wẹrịtẹ kịẹn ḅara ḅụ kịnị ini ẹndẹ, tẹra apụ fa kịnị sonioa si oyi finji ofori kịnị tẹra puku (22,273).

44KỊNỊNYANAḄỌ ḅe nwẹnị Mozizi ḅẹẹ, 45“Izirẹlịapụ ma ogbo-ḅio ḅụ furo finji tarị owiapụ mamgba nakara Livayị furo-ḅẹ-apụ ma ọkịị; anịsakị ịna opu anama ma nakara, Livayị furo-ḅẹ-apụ opu anama ma ọkịị, anịsakị Livayị furo-ḅẹ-apụ ma ì nye sọ ḅa; Yẹrị anie KỊNỊNYANAḄỌ ḅee. 46Anịsakị Izirẹlịapụ ma furo finji tarị owiapụ ma kịẹn-ḅịḅị kẹ Livayị furo ḅẹ owiapụ ma kịẹn-ḅịḅị nẹngị ye kịnị oyia asi na, tẹra apụ fa kịnị inia si na (273) ma pakịrị ọkị mẹ gotẹ, 47tomḅọ sịḅị-sịḅị ḅụ í seleḅa sọnọ apakịrị ọkị ḅa; Fịafịa Yọ mẹ ḅẹ kịẹn ḅara gera nwẹn-sịn igbigi mẹ ḅẹ si mịẹ seleḅa gbọrụ pakịrị; 48tẹ igbigi mẹ tẹ kẹ kịẹn ḅara ḅụ gbana apụ ma pakịrị ọkị igbigi mẹ kẹ Erọnị na, ori owiapụ-awọmẹ na pịrịị.” 49Mie ḅụ Mozizi inima tẹ Livayị furo-ḅẹ-apụ ma na pii-pii, ḅẹẹ tẹ gbana wararị apụ ma pakịrị ọkị igbigi mẹ; 50Izirẹlịapụ ma ḅụ furo finji tarị owiapụ ma ḅara ori igbigi mẹ ọkịm, seleḅa pakịrị tẹra ẹndẹ, na sọnọ apakịrị ofori pakịrị ninea si oyi finji na. (1,365) Fịafịa Yọ mẹ ḅẹ seleḅa apakịrị ḅụ. 51Tẹ KỊNỊNYANAḄỌ ḅe ẹkwẹn-ḅịḅị mẹ wẹrịtẹ ḅẹẹ ḅara, Mozizi ḅụụ pakịrị igbigi mẹ kẹ Erọnị na ori owiapụ-awọmẹ na pịrịm KỊNỊNYANAḄỌ ḅe tọn Mozizi pịrị ḅara ḅụ.

Currently Selected:

Kịẹn-aḅịḅị 3: KBTP

Highlight

Copy