Kịẹn-aḅịḅị 5

Fịafịa-a Atomi

1KỊNỊNYANAḄỌ ḅe nwẹnị Mozizi ḅẹẹ, 2“Tọn Izirẹlịapụ ma pịrị mịnẹ ini ịna kobiri-ogbo ḅụ sofịnị-obi-kọnḅọ goḅọ-goḅọ na, ḅụụ ḅụ ye sara sara paka-ḅoarị ḅọ goḅọ-goḅọ na, ḅụụ kẹ ḍụẹịn na kpeleki tẹ fịafịa-a ḅọ goḅọ-goḅọ na; 3ini ḅẹ owiapụ na, ereme na, ọmịnị ịn pakama ḅa kobiri-ogbo mẹ ḅio, mịẹtẹ ini ịna kobiri-ogbo mẹ tẹ arị ịna ogbo-ḅio angarị anga mẹ pilema ḅịa ḅara.” 4Tẹ Izirẹlịapụ ma ọkọ mịẹm, tẹ kobiri-ogbo mẹ ḅio ịn dee pakamam. KỊNỊNYANAḄỌ ḅe wẹrịtẹ Mozizi ḅẹẹ ḅara mie Izirẹlị ḅẹ apụ ma mịẹ ḅara.

Mịẹ-sima Aị Gbẹẹ

5 # Lẹv 6.1-7 KỊNỊNYANAḄỌ ḅe nwẹnị Mozizi ḅẹẹ, 6“Izirẹlịapụ ma ḅẹẹ: owiḅọ anịanịa ẹrẹḅọ nwẹnị KỊNỊNYANAḄỌ ḅe ḅụ nyana minini kan tẹ si kẹ jen tomḅọ mịẹ-mịẹ, 7mḅọ amịna si mẹ tẹ mḅọ mịẹ ye ḍuko-pakama ḅa. Anịsakị mḅọ mḅọ mịẹ-sima ye mẹ gbẹẹ ḅinma ḅa, tẹ anị laa ye kẹ sọnọa akiri ḍiya ḅẹ gbọrụ kiri kẹ anị ḅụ sụa ḅa, tẹ kẹ anị ḅọ mẹ tẹ mịẹ-sima mẹ nyana ḅọ mẹ pịrị ḅa. 8Kụma tomḅọ mẹ fịị tẹ mḅọ na kpeki mịnaḅọ tẹ mịẹ-sima ye mẹ kẹ gbẹẹ ḅẹ ḅọ ofori ḅẹḅẹ, anị KỊNỊNYANAḄỌ ḅe nye sọ tẹ sime agbamịẹḅọ ḅe pịrị ḅa, si-wẹrịso pịrị ḅẹrẹ fama; ejimina ḅe tẹ kẹ si-wẹrịso mḅọ pịrị ḅẹrẹ fama ḅẹ ye ḅe sọ kẹ sụa. 9Anịsakị agbamịẹye goyegoye, Izirẹlị ḅẹ apụ ma wẹrị fịafịama aị mamgba tẹ ọkị-ḅo agbamịẹḅọ ḅe pịrị ye, pịrị ye ọ̀ nye sọ ḅa; 10anịsakị tomḅọ goḅọ-goḅọ wẹrị fịafịama aị sime mḅọ pịrị ḅa; ḅẹẹye-ḅẹẹye tẹ ḅẹ tomḅọ, tomḅọ kẹ agbamịẹḅọ pịrị ye, pịrị ye mḅọ nye sọ ḅa.”

Ye Kẹ Ḅiotọn Pịrịarị Adiapụ Na Simearị Eremịna Aḅẹrẹ

11KỊNỊNYANAḄỌ ḅe nwẹnị Mozizi ḅẹẹ: 12Izirẹlịapụ ma ḅẹẹ, “Ḅẹẹ owiḅọ owiḅọ ta ọ̀ ḅụụ mẹnjị iri tẹ tọrụ si mẹnjị kọn, 13tẹ gbọrụ owiḅọ ere kẹ á sịn tẹ arị na tii, tẹ anị á di ḅe tọrụ ḅụ ḅọị wararị, á mu á ḅụụ pilema tẹ ḅẹsọ, kịnị á kun-a, á da-paka ḅẹ gbọrụ ogbo-sịẹḅọ sọ ofori, ini ikirimarị sakị arị ọlọ ḅọ ofori nwẹn ḅẹẹ sakị; 14tẹ afana tẹmẹ ḅo ọ̀ ḅụụ sọ, tẹ ori ọ̀ ta ma tẹ amịna ḅụụ pilema tẹ ḅọ ma afana anịanịa, afana tẹmẹ mẹ ḅo ori ọgọnọ gbana, tẹ ori ọ̀ ta ma afana ḅẹḅẹ, amụ arị á ḅụụ pilema-a ḅẹsọ, 15anịtẹso owiḅọ ḅe ọ̀ ta ma kẹ agbamịẹḅọ ḅe dama-ḅo ḅa, pịkị árịma ḅụ ḅii ḅarị agbamịẹye, bali nwẹn sin gbẹẹtẹ mgbọlị fịye mẹ ḅẹ gbọrụ kala akpa kẹ oyia akiri ḍiya ḅẹ gbọrụ kiri ọkị-ḅo ḅa, kụma olivu pulo na, fịranịkịnịsẹnịsị nwẹn-sịn kụnụaị na sọ ḅịa, gbala anị anie ye kẹ ḅiotọn-arị diḅọ ọkị-ḅo agbamịẹye, kẹ mịẹtẹ karakaraye mẹ bele paka ḅarị ḅara.”

16Agbamịẹḅọ ḅe nwẹnị árị ọkị-ḅo kpekima tẹ á kẹ KỊNỊNYANAḄỌ ḅe tọrọkọ ḅụ sịẹma ḅa. 17Agbamịẹḅọ ḅe nwẹnị gbọrụ kuku ḅio fịafịa minji ḍuu ọkị, tẹ Ọḅọkụ-Igbe koko Akpụrụ-warị mẹ ḅẹ kiri mẹ ḅụ fọọn ọkị tẹ kẹ minji mẹ ḅio sụa ḅa. 18Agbamịẹḅọ ḅe nwẹnị ẹrẹḅọ ma kẹ KỊNỊNYANAḄỌ ḅe tọrọkọ ḅụ sịẹma tẹ ẹrẹḅọ ma kẹ á sịḅị-ḅẹ-inume mẹ fịna wararị ḅịtẹ fima ḅa á sịḅị ḅụ, tẹ mgbọlụ agbamịẹye mẹ tẹ afana mgbọlụ agbamịẹye mẹ ḅẹ kẹ ḅiokoroma ye mẹ kẹ á ḅara-ḅio sụa ḅa. Anịsakị agbamịẹḅọ ḅe ọ̀ ḅara ḅio ḅụ akụ minji mẹ tẹ wori-nume ọkị-ḅoarị minji mẹ sụa tẹ ọlọ-sịẹma ḅa. 19Anịtẹso agbamịẹḅọ ḅe nwẹnị á mịẹ tẹ á karị ḅa, tẹ ḅẹẹ: “Ị́ í di ḅe suku-ḅio simearị ogbo amụ í gbọrụ owiḅọ sọ na gboloma tẹ pịkị akaka da tẹ muno na kpeleki-a ḅẹḅẹ, mị akụ minji mẹ tẹ wori-nume ọkị-ḅoarị minji mẹ ḅu gberie sọ ị́ lama. 20Kụma ị́ í di ḅe suku-ḅio emi sọ, ị́ mẹnjị iri tẹ í di ḅẹ sikima jen owiḅọ ị́ na gboloma tẹ í pilema tẹ ḅẹḅẹ, 21yee KỊNỊNYANAḄỌ ḅe ị́ atomi ogbo-ḅio ḅụ ị́ kẹ ‘Kịnị ḅioḅumaḅọ’ na, ‘Karịye’ na sọma. KỊNỊNYANAḄỌ ḅe ị́ ḅụọ-ẹtẹnẹ mịẹ tẹ anị siin-sara tẹ nwọnị, tẹ í furo sun-gele. 22Yee mị minji mẹ tẹ wori-nume ọkị-ḅoarị ye mẹ ḅọrọ mu í furo ḅio sọ tẹ í furo sunma gelema, tẹ ị́ ḅụọ-ẹtẹnẹ siin-sara tẹ anị nwọnị.”

Anịsakị ẹrẹḅọ ma ḅẹẹ ḅa, “À mininim, anị ọkọ simee.”

23Anịtẹso agbamịẹḅọ ḅe mịna wori-anume ma kẹ gbọrụ ḍiri ḅio kẹẹ, tẹ anị sịkịrịma akụ minji mẹ ḅio sụa ḅa. 24Anịsakị ori ẹrẹḅọ ma mịẹtẹ arị akụ minji mẹ tẹ wori-nume mẹ ọkị-ḅoarị minji mẹ ḅuu ḅa, tẹ minji mẹ tẹ wori-nume ọkị-ḅoarị ye mẹ arị oju ḅio sọ-mu tẹ akụarị fụka saakị ḅa. 25Agbamịẹḅọ ḅe nwẹnị ẹrẹḅọ ma ḅara afana mgbọlụ agbamịẹye mẹ ọkị, tẹ anị kẹ KỊNỊNYANAḄỌ ḅe tọrọkọ karakara mgbọlụ agba mịẹ tẹ anị kẹ agbamịẹ-anga mẹ ḅo ḅa. 26Agbamịẹḅọ ḅe nwẹnị mgbọlụ agbamịẹye mẹ ḅụ ḅara-kuḅu ḅin ye ọpụrụ ọkị ḅa anị ḅẹ ḅiokoroma kiri ḅara ḅụ, tẹ agbamịẹ-anga mẹ ọgọnọ anị dọkịma ḅa, anịtẹrẹmẹ mie ori ẹrẹḅọ ma mịẹtẹ á minji mẹ ḅuu ḅarịye. 27Ori á mịẹtẹ á minji mẹ ḅuu tẹso, anịtẹrẹmẹ arị á di ḅe iri, tẹ á ḅụụ pilema tẹ ḅẹḅẹ, minji mẹ tẹ wori-nume ọkị-ḅoarị ye mẹ arị oju ḅio sọ-mu tẹ akụarị fụka saakị ḅa, tẹ sun-gele, tẹ á ḅụọ-ẹtẹnẹ siin-sara tẹ nwọnị, tẹ ẹrẹḅọ ma ḅo árị atomi ogbo-ḅio ḅụ kịnị-ḅioḅumaḅọ sọ ḅa. 28Kụma ẹrẹḅọ ma amụ á ḅụụ pilema-a, tẹ fịafịa wararị ḅẹḅẹ, anịrẹ gberie-sọ á la ḅịa, tẹ á fura, fura tẹ awọ iyi-iyi sara ḅa.

29Miemẹ anie taḅọ á di ḅe kụrọ mẹ suku-ḅio emi so mẹnjị iri tẹ mu amịna ḅụụ pilema afana ḅẹrẹ mẹ ḅẹ oloko mẹ; 30anịanịa afana tẹmẹ ḅo owiḅọ ọgọnọ gbana tẹ ori ọ̀ ta afanarị sakị, anị sakị ḅụ mie ori ọ̀ ta ma kẹ mu KỊNỊNYANAḄỌ ḅe tọrọkọ ḅụ sịẹma tẹ agbamịẹḅọ ḅe mị oloko mẹmgba kẹ á kọn ḅarịye. 31Owiḅọ ḅe mịẹ-irima ọ̀ la ḅịa, kụma ẹrẹḅọ ma mie á mịẹ-irima mẹ dogi ḅarị ḅọ.

Currently Selected:

Kịẹn-aḅịḅị 5: KBTP

Highlight

Copy