Matiyo 8
8
Jizọsị Sofịnị-Obi Kọn Owiḅọ Gwọm
(Mak 1.40-45; Luk 5.12-16)
1Jizọsị tụndụ mẹ ọgọnọ sime tẹ ideri-ḅo tẹso opu tomi ogbo-ogbo ò ḍuka gbii-gbiima mum. 2Anịtẹso sofịnị-obi kọn-arị gbọrụ tomḅọ ọ̀ dama-ḅom. Ọ̀ nwẹnị Jizọsị tọrọkọ kparakị tẹ ḅẹẹ, “Ị̀ Nyanaḅọ, ị́ ḍụkụ ḅẹ namịna ị́ kọkọ inetẹ ị̀ gwọ tẹ à fịafịa ḅa.”
3Mie ḅụ Jizọsị nwẹnị amịna ḅara sụn-pakama tẹ kẹ tomḅọ ḅe lama, tẹ pakịrị, “À ḍụkụm, gwọ tẹ fịafịaa!” Anị gbọrụ kiri obi mẹ nwẹnị tomḅọ ḅe ḅụ so. 4#Lẹv 14.1-32Anịtẹso Jizọsị nwẹnị tomḅọ ḅe ḅẹẹ, “Pokii! À nwẹn kẹ ị́ gwọ ye mẹ ḅẹlẹma gbọrụ tomḅọ sọ pịrị ma, kụma da-da agbamịẹḅọ ḅe dama-mu tẹ ori í pekele-ḍiki, tẹ ị́ gwọ tẹ mẹ ḍie-pakama ḅụ nwẹnị Mozizi oloko mẹ tọn koroma ḅara ḅụ, anị ḅẹ agbamịẹye mẹ koroma.”
Jizọsị Romu Ḅẹ Ọmụ-alaḅọ Fịrịmẹnjịḅọ Gwọm
(Luk 7.1-10)
5Jizọsị mẹnjị Kepanọmụ ama ḅio sọ-mu tẹso gbọrụ Romu ḅẹ ọmụ-alaḅọ ori na bịama tẹ ọ̀ tẹkẹm ọ̀ ḅarasụa ọ̀ pịrịị. 6Ọmụ-alaḅọ ḅe mẹẹ, “Sisi, àrị ị́ tẹkẹm, ị̀ nyanaḅọ, ị̀ fịrịmẹnjịḅọ obi lamarị, tẹ warị ḅio iḅila ọgọnọ ḅọlọlọ wararị. Tẹ inetẹ saakị mẹnjị-a, tẹ anị kpọma ọ̀ ḅụụ-fụkamarị.”
7Jizọsị nwẹnị ḅẹẹ, “À mu mịẹtẹ ori oju iḅi ḅa.”
8Ọmụ-alaḅọ ḅe nwẹnị ọ̀ pakịrị, “Ị̀ nyanaḅọ, gbala-gbala ḅarana ḅo ma. Àrị ị́ mẹnjị ị̀ warị ḅio sọ-ḅo na gbasị-a. Ị́yẹrị paa tọn, ị́ fịrịmẹnjịḅọ ḅe oju iḅi ḅa. 9Yẹrị sọ ị̀ nẹngị tẹ ḅẹrẹtọn ị̀ pịrịarị apụ emi, tẹ ì ḅioju sọ ì suku-ḅio ọmụapụ emi. À tọn gbọrụḅọ pịrịm, ‘Muu’ ḅẹẹ kụma ò mum; à pịkị tọn jụmọ pịrịm, ‘Ḅoo’ ḅẹẹ kụma ò ḅom; tẹ à tọn ị̀ fịrịmẹnjịḅọ pịrị mịnẹ, ‘Mie mịẹẹ,’ ḅẹẹ kụma ori anị mịẹm.”
10Jizọsị miemẹ naa sakị anị ọ̀ ḅụụ-buama tẹ ọ̀ nwẹnị ò ḍuka-muarị atomi ma ḅẹẹ, “À karakara mẹ ḍuko ọ́ pịrịarị, jene-jene nwẹn sime opu minini nyana ḅọ amụ à ḍọkị-ẹrịa Izirẹlị ḅụ. 11#Luk 13.29Ó nimi mịnẹ bebe tomikiri mẹ ḅụ tọnwa-apụ ḅo tẹ Ebira-amụ na, Ayịzịkị na, Jekọbụ na ḅụ sọ tẹ lẹgị tẹ ye fị ḅa, Tamụnọ Ama-da ḅo laa sakị. 12#Mat 22.13; 25.30; Luk 13.28Kụma Tamụnọ Ama-da mẹ ḅẹ boma ma nyana na-iḅi apụ ma rẹ mie ịn dee pakama tẹ ịn kanakana ḅio sime tẹ owu tẹ ịna aka farị ḅarịye.” 13Anịtẹso Jizọsị nwẹnị ọmụ-alaḅọ ḅe ḅẹẹ, “So warị muu, í minini ye mẹ ini anị mịẹ ị́ pịrị ḅa.”
Tẹ ọmụ-alaḅọ ḅe fịrịmẹnjịḅọ ḅe oju mẹ nwẹnị iḅi anị gbọrụ sakị mẹ ḅụ.
Jizọsị Tọnwa Obi Apụ Gwọm
(Mak 1.29-34; Luk 4.38-41)
14Jizọsị nwẹnị Pita warị mu. Ò mu sakị ò Pita ta iyingi ẹrịm árị akọm kọn-arị tẹ ḅọlọlọ sime wararị. 15Ọ̀ nwẹnị ḅara kẹ á ḅara lama, tẹ akọm mẹ á ḅụụ so tẹ á saakị tẹ fịrịmẹnjị ọ̀ pịrịm.
16Ḅoḅiri-so ḅụ kịnị tọnwa oru sịḅị ḅio sime apụ kẹ mu tẹ Jizọsị ẹkwẹn gbọrụmgbọ kẹ ịna ḅụụ si-atẹmẹ ma dee-siin, tẹ pịkị obi apụ mamgba gwọm. 17#Ayị 53.4Ò gotẹ miemẹ mịẹ ye ịkịankoro Ayịzaya ḍuko ye paka ḅẹ ḅara, “Ori ọ̀ ḅarana wamịna obi ọkị tẹ wamịna ḅụụ kụrọ-a ma saakị siinm.”
Jizọsị Ḍukamẹnjị Ḅẹ Ḅii Apụ
(Luk 9.57-62)
18Jizọsị ḅo ẹrị tẹ mịnẹ tomina-ogbo ò gbori ikelema tẹ ḅẹ sakị ọ̀ tọn ò ḍukamẹnjịapụ ma pịrịm mịnẹ ịn tọrụ mẹ ḅẹ saḅa-anga muu. 19Tẹ Oloko toluma apụ ma ḅẹ ḅọ nwẹnị Jizọsị dama-ḅo tẹ ọ̀ ḅẹẹ, “Ye-tolumaḅọ, à tẹlẹma wararị ị́ na í mu anga, mu anga mu.”
20Jizọsị nwẹnị ọ̀ pakịrị, “Pụnụ amẹẹ ma ini angarị ịḅụkụ nyana wararị, tẹ feni ma sọ feni-awarị nyana wararị, kụma Tomḅọ Tụḅọ ḅe sịḅị kẹ suu tẹ ịnyọ sara, sara anga kịngẹ sọ nyana-a.”
21Jụmọ tẹ ò ḍukamẹnjị sime ḅọ nwẹnị ḅẹẹ, “Ị̀ nyanaḅọ, yee à tarị pịkịma so mu ị̀ ḍa fịtẹ ḅọ ḍiḅi.”
22Jizọsị nwẹnị pakịrị, “Ị́yẹrị ì ḍuka ḅoo; wẹrịso tẹ fịtẹ-apụ ma ịna fịtẹ-apụ ma ḍiḅi.”
Jizọsị Erise Deinmam
(Mak 4.35-41; Luk 8.22-25)
23Anịtẹso Jizọsị arụ ḅụkụlọ tẹ ò ḍukamẹnjịapụ ma sọ ò ḍuka mu ḅụkụlọm. 24Ịn dọkụ muarị ogbo, ḅiotọn-a ḅara ḅụ, opu erise nwẹnị fie. Ọnụngọ ḅakụ-ḅakụ arụ mẹ ḅio sọarị tẹ anị ḅile ḅẹ ḅara simearị sakị mono Jizọsị tọrụ ọkị wararị. 25Tẹ ò ḍukamẹnjịapụ ma nwẹnị mu ò jike saakịma, tẹ ọ̀ ḅẹẹ, “KỊNỊNYANAḄỌ, wa ḅile fa ḅẹ-yearị, wa ḅọrọmaa!”
26Jizọsị nwẹnị pakịrị, “Ó tiegotẹ mị ḅara mẹmgba kẹ tẹmẹ-naịn-naịnarị? Ọ́ nyana minini boowa la ḅara ḍiki!” Anịtẹso ọ̀ nwẹnị saakị tẹ tọn fẹrụ mẹ na, ọnụngọ mẹ na pịrị tẹ arị daasịẹ, tẹ tọrụ mẹ nwẹnị yaụ-sime lama.
27Ịna ḅụ ọrụḅọ-ọrụḅọ ḅụụ-buam; tẹ ịn nwẹnị ḅẹẹ, “Mie ḅọrọ tọ-ḅara sime tomḅọ, tẹ fẹrụ na ọnụngọ na sọ ọ̀ ḅịḅị pokiarị!”
Jizọsị Oru Sịḅị Ḅio Sime Maa Owiapụ Gwọm
(Mak 5.1-20; Luk 8.26-39)
28Jizọsị ḅo Gadara iri mẹ la sakị, tọrụ mẹ ḅẹ saḅa anga ḅụ, ọ̀ maa owiapụ, tẹ anịanga ịn ḍụẹịn ḍiḅi-ḍiḅi afukuru ma ḅio sime tẹ paka-ḅo apụ, na bịamam. Mịna owiapụ ma oru ịna aḅụụ ḅio simem, tẹ ịn ḅalafama la ḅara gotẹ gbọrụḅọ-sọ ḅiokpọ tẹ anị etela ḅọrọ ye mu-a. 29Oru sịḅị ḅio sime atomi ma Jizọsị ẹrị gbọrụ sakị ini oloku pakama tẹ ọ̀ ḅẹẹm, “Ị́yẹrị Tamụnọ Tụḅọ, wamịnị na ị́ na tọ mie ye nyana gboloma? Ị́ wa kẹ tọrụsiẹrịma tẹrẹmẹ Tamụnọ tomikiri mẹ kọn ḅarị karakara ene mẹ la ḅẹ ḅo tẹ?”
30In sime tẹ miemẹ kẹ Jizọsị ḅẹẹ anga mẹ na sụma-a anga ḅụ opuropo sime tẹ ye fị simem. 31Mie ḅụ oru ma nwẹnị Jizọsị tẹkẹ tẹ ḅẹẹ, “Sisi, ị́ wa dee-pakamarị ḅẹḅẹ, wa kẹ opuropo ogbo mẹ ḅio fịrịmaa.”
32Jizọsị nwẹnị ịn ḅẹẹ, “Ó muu.” Mie ḅụ ịn nwẹnị paka mu bebe opuropo ogbo mẹ ḅio sọ-mu. Bebe Opuropo ogbo mẹ nwẹnị gbere-gberema mangị mu tọrụ mẹ akaka ḅẹ agba anga ḅụ minji ḅio koro sombi fịị.
33Opuropo ma ḍikiḍiki sime apụ ma nwẹnị mangị ama mẹ ḅio mu tẹ paka ye goyegoye ḅẹlẹma ama mẹ ḅẹ atomi ma pịrị, tẹ oru ma sịḅị ḅio ḅụ sime-sime atomi ma ḅụ mịẹ ye mẹ sọ ịn ḅẹlẹma ịn pịrịm. 34Mie ḅụ bebe ama mẹ nwẹnị paka Jizọsị dama-mu, tẹ ini ori ẹrị tẹso, ini ọ̀ tẹkẹm mịnẹ ori ịna ama iri koroma so ịn pịrị.
Currently Selected:
Matiyo 8: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
