Matiyo 7

Jizọsị Kịnị Sọkịrị Gbolomaye Tolumam

(Luk 6.37-38,41-42)

1“Ja apụ ḅụụ si ḍọkị ma, mịẹtẹ Tamụnọ sọ ị́ ḅụụ si ḍọkị ḅịa ḅara, 2#Mak 4.24kẹ gotẹ ọkọ ḅẹẹarị, Tamụnọ ị́ kẹ ja apụ kọn, kọn ḅara ḍiki tẹ sọ kọn ḅa, anịsakị ị́ kẹ ye tọn ja apụ pịrị, pịrị ye mẹ la ḅara mie Tamụnọ ḍiki tẹ tọn sọ pịrị ḅarịye. 3Anie ḅụ, ị́ tiegotẹ ḅara kẹ ị́ mịnaḅọ tọrụngbọ ḅio simearị fun kalịye mẹ tọkịmarị, tẹ ḅe tọrụngbọ gbaịn wararị sịn ikiḅa mẹ kẹ ye-sịn-a? 4Tiye ị́ ḅiokpọma tẹ ị́ ị́ mịnaḅọ ḅe ḅẹẹ ḅẹ, ‘Sisi ye arị ị́ tọrụngbọ ḅio simearị fun kalịye mẹ tala sin ị́ pịrị,’ tẹ ḅe sịn ikiḅa ị́ tọrụngbọ gbaịn wararị ogbo ḅụ? 5Ị́yẹrị mịẹ tomi ḍie ḅọ! Tarị, tarị ị́ tọrụngbọ gbaịn wararị sịn ikiḅa mẹ sin, anịtẹrẹmẹ ị́ inetẹ ye ẹrị banabanama tẹ ị́ mịnaḅọ ḅe tọrụngbọ ḅio simearị fun kalịye mẹ sin pakama ḅo ḅa.

6“Ị́ ḅụụ yela ye kẹ koroma obiri amẹẹ ma pịrị ma, ịn mịẹ ḅarịye anie pịkị tẹ owu kẹ ị́ paka. Yela lama tẹ pọkọ sụa aị kẹ opuropo amẹẹ ma tọrọkọ koroma ma, ịn mịẹ ḅarịye anie ḅụọ kẹ arị nanga kiri pịrị.

Jizọsị Tolumam Wa Ḅii, Ḍọkịị Pịkị Ḅakụụ

(Luk 11.9-13)

7“Ó ḅii, ọmịna aḅara la ḅa; ọ́ ḍọkịị, ọ́ ḍọkị ẹrị ḅa; ọ́ ḅakụụ, ḅọkọ mẹ finji ọ́ pịrị ḅa. 8Kẹ gotẹ ọkọ ḅẹẹarị, ḅiiḅọ-ḅiiḅọ nyana ḅa, tẹ ḍọkịḅọ-ḍọkịḅọ pịkị ḍọkị-ẹrị ḅa, anịsakị ḅọkọ mẹ pịkị finji ḅakụarị ḅọ pịrị ḅa. 9Ọmịnị awọ iyi apụ ma ḅụ tọ ḍaḅọ emi tẹ mḅọ tụḅọ mḅọ ḅara fịturu ḅii kụma ḍụḅarị kẹ anị kiri ḍima tẹ kẹ mḅọ pịrị ḅẹ? 10Anịanịa, mḅọ inji ḅii kụma ododo kẹ mḅọ pịrị pẹị ḅẹ? 11Ọmịnị si-mịẹapụ sọ, paa iḅi aị kẹ ọmịna awọmẹ pịrị-pịrị ḅara nimi wararị. Ndẹẹ ọmịna Ḍaḅọ So-ḅio simearị ḅọ ḅe rẹ ḅarị kpọma anị ḅara nẹngị ḅara kẹ iḅi aị kẹ ọ̀ ḅara ye ḅiiarị apụ pịrị ḅịa ḅara!

12 # Luk 6.31 “Ó ḅiiarị mịnẹ ja apụ mịẹ ọ́ pịrị nwẹn ḅẹẹ ḅara, ọmịnị sọ ọkọ mịẹ ịn pịrịị. Miemẹ anie Mozizi Oloko mẹ fiearị ye mẹ, pịkị ịkịankoro apụ ma toluma aị ma.

Kpasịtẹ Ogigo-ḅọkọ

(Luk 13.24)

13“Ọ́ kpasị wararị ogigo-ḅọkọ mẹ ḅụ ḅọrọ sọ-muu, ḅọrọ mu fa ḅio sọ, etela mẹ finjima wararị ẹrẹsị, tẹ pịkị ḅụụ-fụkama-a, tẹ tọnwa apụ ḅọrọ anịanga muarị. 14Kụma ḅọrọ mu ḍumo la-la ogigo-ḅọkọ mẹ kpasị wararị, tẹ mẹnjị mu anị la etela mẹ pịkị ḅụụ-fụkama wararị, anịsakị boowa apụ ngẹrị mie anị ḍọkị-ẹrịarị.

Sịn Na Anị Ḅẹ Mgbọlụ Na

(Luk 6.43-44)

15“Ọmịnị iruo ịkịankoro apụ ḍiki ḅụụ kịẹn; ini ọ́ ḍọkụma-ḅo ḅarị sakị anana oju mie ịn sụa tẹ ḅo ḅarịye, kụma ḅioju ḅụ ini ma anie karakaramatẹ piri ḅio anana kun pẹị-pẹị anama. 16Ịn mịẹarị aị ḅụ mie ọ́ ḅọrọtẹ in lekiri ḅarịye. Ọwịrịwa, eleleinda mgbọlụ sụa sụa-a, anịsakị ọmị osuka pịkị mgbọlụ sụa sụa-a. 17Obi-a sịn iḅi mgbọlụ sụarị, tẹ obiarị sịn pịkị si mgbọlụ sụarị. 18Obi-a sịn mịẹtẹ si mgbọlụ sụa-sụa ọkụ ofori, tẹ obiarị sịn pịkị iḅi mgbọlụ sụa-sụa ọkụ ofori. 19#Mat 3.10; Luk 3.9Anịsakị iḅi mgbọlụ sụa-a sịn goyegoye ini anị pẹlẹ-gbin tẹ kẹ kọrị fịnị ḅio suu dọkịma ḅa. 20#Mat 12.33Ọkọẹrẹsị iruo ịkịankoro apụ ma mịẹarị aị ḅụ mie ọ́ ḅọrọtẹ in lekiri ḅarịye.

Gbala-gbala Arị Ó Nimi-a

(Luk 13.25-27)

21“ ‘Ị̀ Nyanaḅọ, Ị̀ Nyanaḅọ’ kẹ ị̀ sịn-arị ḅọ goḅọ-goḅọ anie Tamụnọ Ama-da suku-ḅio simearị atomi ma ḅẹ gbọrụḅọ sọ ḅarị ḅọ-a, kụma ị̀ Ḍa So-ḅio simearị ḅọ ḅe ḅiiarị ye mịẹ ḅọ ngẹrị. 22Tamụnọ tomikiri mẹ kọn ḅarị ene mẹ ḅụ tọnwa-apụ ị̀ ḅẹẹ ḅa, ‘KỊNỊNYANAḄỌ, KỊNỊNYANAḄỌ, wa kọkọ ị́ ẹrẹ ḅụ Tamụnọ oku mẹ ḍuko tomi pịrị tẹ pịkị oru dee, tẹ pịkị tọnwa ḅụụ-buama-aị mịẹ!’ 23#Dev 6.8Anịtẹso àrị ịn ḅẹẹ ḅa, ‘Gbala-gbala, àrị ó nimi-a, ini ọ́ fọnọ sikima ị̀ tọrọkọ, ọmịnị si-sịḅịḅio-sụa atomi!’

Ịn Nama Maa Awarị Ḅụ Pakaye

(Luk 6.47-49)

24“Ọkọẹrẹsị, ḅẹḅọ-ḅẹḅọ tẹ mịna ị̀ ẹkwẹn ma naa tẹ arị koro ḅara mịẹ ḅọ mḅọ kịkarị ḅọ anie ye-nimi tomḅọ tẹ amịna warị kẹ ịkụ ọgọnọ nama ḅọ. 25Eene nwẹnị ọsụma sara, opu minji nwẹnị sun tọrụ akaka ma kpọlị iwo, tẹ erise fẹrụ nwẹnị kụrọma fie, tẹ arịmgba nwẹnị mu kụrọma warị mẹ bịan. Kụma anị ḅịkị-a, ini anị kẹ ịkụ ọgọnọ namam ẹrẹsị.

26“Kụma ḅẹḅọ-ḅẹḅọ tẹ mịna ị̀ ẹkwẹn ma naa tẹ arị koro ḅara mịẹ-a ḅọ mḅọ kịkarị ḅọ anie oḅori tomḅọ tẹ amịna warị kẹ onwi ọgọnọ nama ḅọ. 27Eene nwẹnị ọsụma sara, opu minji nwẹnị sun tọrụ akaka mẹ kpọlị iwo, tẹ erise fẹrụ nwẹnị kụrọma fie, tẹ arịmgba nwẹnị mu kụrọma warị mẹ bịan, tẹ anị nwẹnị ḅịkị gbere-gedeima sara. Anị ḅịkị ḅara mẹ kpọma ḅalafamam!”

Jizọsị Nyana Kụrọ Mẹ

28 # Mak 1.22; Luk 4.32 Jizọsị mịna aị ma ḍuko fama tẹso, ọ̀ wẹrịtẹ ye mẹ toluma ḅara mẹ nwẹnị tomina-ogbo mẹ ḅụụ-gbiripuma. 29Oloko Tolumapụ ma ye toluma-toluma ḅara ọ̀ nwẹn kẹ ye toluma-a, anie nakara ḅarana amịna kụrọ nyanaḅọ ḅara mie ọ̀ kẹ ye mẹ toluma yee.

Currently Selected:

Matiyo 7: KBTP

Highlight

Copy