Matiyo 9
9
Jizọsị Ngụrọ-kọn Owiḅọ Gwọm
(Mak 2.1-12; Luk 5.17-26)
1Anịtẹso Jizọsị nwẹnị arụ mẹ ḅụkụlọ tẹ pịkịma so ḅẹ tẹ tọrụ mẹ saḅa mu ori ama la, 2tẹ anịjụ ḅụ kịnị nwẹnị ngụrọ-kọnḅọ kẹ iḅila na ḅo Jizọsị la. Ò tomi ma nyana minini la ḅara ẹrị sakị ori ngụrọ-kọnḅọ ḅẹ ḅẹẹm, “Ḅiokpọ nyana-a, ị̀ tụḅọọ! Ị́ asi ma ịn wẹrịso ị́ pịrị tẹẹ.”
3Anịtẹso oloko tolumapụ ma ḅẹ apụ nwẹnị ini-ini-ini ogboku ḅụ ḅẹẹ, “Ḅị tomḅọ ḅe Tamụnọ fie-simarị ḅara ḍikii!”
4Jizọsị in kuromarị ye mẹ nimi tẹ ḅẹẹm, “Ó tiegotẹ nwẹn sime asi-aị kẹ ḅiokoromarị? 5Mịna maa ẹkwẹn ma ḅụ tiye sarasara osi ye nẹngị, ḅẹẹ mịnẹ, ‘Ị́ asi ịn wẹrịso ị́ pịrị tẹ’, anịanịa ḅẹẹ mịnẹ, ‘Saakị tẹ mẹnjịị?’ 6Ọkọẹrẹsị à mịẹtẹ ó nimi ḅa, mịnẹ Tomḅọ Tụḅọ ḅe ọ̀ kụrọ nyana wararị tomikiri ḅụ kẹ si-wẹrịso tomi pịrị.” Mie ḅụ ọ̀ nwẹnị ngụrọ-kọnḅọ ḅe ḅẹẹ, “Saakị sịẹ, í iḅila ọkị, tẹ so warị muu!”
7Tomḅọ ḅe nwẹnị saakị sịẹ tẹ mẹnjị so warị mu. 8Tomi ma paka ye mẹ ẹrị sakị ịn ḅalafa tẹ Tamụnọ tokinim, ọ̀ kẹ tomi pịrị kụrọ gotẹ.
Jizọsị Matiyo Sịn Ọkịm
(Mak 2.13-17; Luk 5.27-32)
9Jizọsị nwẹnị anịanga mẹ ḅụ so tẹ mẹnjị ma-muarị ogbo ḅo ama-igbigi da gbọrụḅọ, tẹ ịn kẹ Matiyo sịn ḅọ lẹgị tẹ nama kọrịarị anga ḅụ ọ̀ la. Jizọsị nwẹnị ọ̀ ḅẹẹ, “Ḅo ì ḍukamẹnjịị.”
Matiyo nwẹnị saakị tẹ Jizọsị ḍukamẹnjị.
10 #
Luk 15.1,2 Jizọsị Matiyo warị fịye fịarị sakị, tọnwa ama-igbigi da apụ na ama sịkịtẹ apụ na ḅo Jizọsị na ò ḍukamẹnjịapụ ma na ḅụ sọ tẹ fịye mẹ fịm. 11Farịsiiapụ ma ḅẹ apụ nwẹnị miemẹ ẹrị tẹ Jizọsị ḍukamẹnjịapụ ma gbela, “Ọmịna ye-tolumaḅọ ḅe tiegotẹ nwẹn sime atomi na ḅara gboloma ye fịarị?”
12Jizọsị nwẹnị in ḍuko ye mẹ naa tẹ ịn pakịrị, “Oju iḅi wararị apụ ḅịrịḅọ ḍọkị ḍọkị-a, kụma obiarị apụ mie ḅịrịḅọ ḍọkị ḍọkị ye. 13#Mat 12.7; Hos 6.6Ó mu mị Fịafịa Ḍiri mẹ ḍuko ye mẹ fiearị ye ḍọkị-nimii, ‘Iḅi anga kẹ tomi na kọn mie à ḅiiarị ye, nama kẹ mịẹ agba-a.’ À tomi kẹ ye sịn-arị apụ sịn ḅụụ pịrị ḅẹ ḅo-a, kụma tomi sịkịtẹ apụ.”
In Ḅuru-ịmọ Gbolomaye Kẹ Jizọsị Gbelam
(Mak 2.18-22; Luk 5.33-39)
14Anịtẹso Minji Sara Jọnị ḍukamẹnjịapụ nwẹnị mu Jizọsị gbela, “Ndẹẹ wamịnị na Farịsiiapụ ma na sakị mamgba ḅuru-ịmọarị tẹ í ḍukamẹnjịapụ ma gbala-gbala ḅuru-ịmọa ḅara?”
15Jizọsị nwẹnị pakịrị, “Ọ́ sịn-arị ere-ịya-alalị mu apụ ere-ịyaḅọ ḅe ini na emi ogbo kururu ḅẹ? Jene-jene ọkọ sime ye amụ paka-a! Kụma ene ḅo ḅa, tomi ịna ogboku ḅụ ere-ịyaḅọ ḅe ọkị so ḅarị sakị, anị sakị rẹ ịn ḅo ḅuru-ịmọm ḅa.
16“Ó nimi mịnẹ gbọrụḅọ-sọ jene amụ minji la-a ịwọ ḅịtẹ pakịrị kẹ ḅuutẹ kapa ḅụ kaantẹ anga gbin gbaịn-gbaịn-a, kẹ gotẹ ọkọ ḅẹẹarị, in kapa mẹ sịkịrị tẹ ịwọ ḅịtẹ mẹ kpoo sakị anị ḅuutẹ kapa mẹ kan wulalama ḅaka ḅa. 17Anịsakị gbọrụḅọ-sọ ḍarịarị ịwọ tomina iru kẹ ḅuutẹ ḅaḅa ḅio sụa, sụa-a, kẹ gotẹ ọkọ ḅẹẹarị, ḅuutẹ ḅaḅa mẹ puutẹ iru mẹ ọsụ fa ḅa. Anie nakara, ịwọ iru mẹ ịwọ ḅaḅa ḅio mie ini anị kẹ sụarị ye, tẹ ḅaḅa mẹ na iru mẹ na nwẹnị kpaịn sime ḅa.”
Jizọsị Fịtẹ Ẹrẹḅọtụḅọ Saakịmam Pịkị Ọmbie Ḅụụ Ḅụ Sararị Ẹrẹḅọ Gwọm
(Mak 5.21-43; Luk 8.40-56)
18Jizọsị paa ẹkwẹn-arị ogbo Juu-ḅẹ-apụ ama-warị mẹ ḅẹ sịḅịdaḅọ nwẹnị ọ̀ dama-ḅo tẹ ọ̀ tọrọkọ kparakị tẹ ḅẹẹ, “Ị̀ tụḅọ mị gbọrụ sakị fịị tẹẹ; paa ḅo tẹ ị́ aḅara kẹ árị ọgọnọ gbanaa, á ḍumo ḅa.”
19Mie ḅụ Jizọsị saakị tẹ ò ḍuka-muarị tẹ ò ḍukamẹnjịapụ ma sọ ọ̀ ḅụụ sọ tẹ mum.
20In muarị sakị, gbọrụ ẹrẹḅọ, tẹ oyi maa kụra finji ḅụ ọmbie gbọrụ sakị sọ kẹ daasịẹ-a ḅara kẹ ḅụụ ḅụ sara sime ḅọ, nwẹnị ori ọḅụjụ ḅụ kẹmẹ-kẹmẹma ḅo tẹ ḅara kẹ ọ̀ kapa suku lama. 21Árị á ḅụụ ḅẹẹm, “À paa ḅara kịngẹ kẹ ọ̀ kapa lama kụma ị̀ ḅụụ iḅi ḅa.”
22Jizọsị pịkị tẹ arị ẹrị tẹ ḅẹẹm, “Ị̀ tụḅọọ, ḅiokpọọ! Ị́ nyana minini mịẹtẹ ị́ gwọ tẹ.” Anị gbọrụ kiri ẹrẹḅọ ma ḅụụ nwẹnị iḅi.
23Anịtẹso Jizọsị mu ama-warị mẹ sịḅịdaḅọ ḅe warị lam. Ò ḅo ḍụẹịn koru nume-suapụ na yaka-yakarị atomi na ẹrị sakị, 24ori mẹẹ, “Ọrụḅọ-ọrụḅọ mịanga pakaa! Ẹrẹḅọtụḅọ ma á fịị-a — mono mie á monoarị ye.” Anịtẹso inimgba nwẹnị ọ̀ ḍẹrị. 25Kụma tomi ma ẹrẹḅọtụḅọ ma ḅio mẹ ḅụ sime tẹ paka fama gbọrụ sakị Jizọsị nwẹnị sọ-mu tẹ á ḅara saakị ọlọ, tẹ á nwẹnị saakị sịẹ. 26Miemẹ gboloma ẹkwẹn anị ama iri mamgba kana-korom.
Jizọsị Tọrụngbọ-Pụụntẹ Maa Owiapụ Gwọm
27Jizọsị anịanga so tẹ mẹnjị muarị ogbo tọrụngbọ-pụụntẹ maa owiapụ saakị ò ḍukamẹnjị mẹnjị tẹ olokum, “Devidi Tụḅọ, ọkụrụkụrụ nyana wa pịrịị.”
28Jizọsị mẹnjị warị sọ tẹso, tọrụngbọ-pụụntẹ-apụ ma nwẹnị sọ ọ̀ dama-ḅo tẹ ọ̀ nwẹnị in gbela, “Ó minini mịnẹ arị inetẹ ọ́ gwọ ḅẹ?”
Ịn nwẹnị ọ̀ pakịrị, “Inn, wa nyanaḅọ, í inetẹ wa gwọ ḅa!”
29Anịtẹso Jizọsị ḅara kẹ ịna atọrụngbọ lama tẹ ḅẹẹm, “Ọkọ ḅẹḅẹ, anị ó minini ḅara mẹ paka ọ́ pịrịị!” 30Tẹ ịn nwẹnị sin ye ẹrị kụrọ nyana. Jizọsị nwẹnị tọn kụrọma ịn pịrị tẹ ḅẹẹ, “Gbala-gbala gbọrụḅọ kịngẹ sọ miemẹ ọ́ ḅẹlẹma pịrị ma.”
31Kụma in so tẹ nwẹnị Jizọsị gboloma ḅẹrẹ ḍuko bebe anị ama-iri mẹ kana-koro.
Jizọsị Oḅu Tomḅọ Gwọm
32Tarị Jizọsị na sime, sime atomi ma soarị sakị ja atomi nwẹnị oru ọlọ wararị ẹrẹsị inetẹ ẹkwẹn-a owiḅọ kẹ ḅo Jizọsị pịrị. 33Kụma Jizọsị oru ḅe dee-pakama kiri, kiri tomḅọ ḅe saakị ẹkwẹn tẹ, tẹ ọrụḅọ-ọrụḅọ nwẹnị ḅụụ-gbiripu. In ḍuko-pakamam, “Izirẹlị ḅụ jene-jene amụ wa nwẹn kịkaye ẹrị-a!”
34 #
Mat 10.25; 12.24; Mak 3.22; Luk 11.15 Kụma Farịsiiapụ ma nwẹnị ḅẹẹ, “Oru ma sịḅịdaḅọ ḅe mie kụrọ kẹ ọ̀ pịrị tẹ ọ̀ kẹ oru ma dee-dee pakamarị.”
Jizọsị Ọkụrụkụrụ Nyana Tomi Ma Pịrịm
35 #
Mat 4.23; Mak 1.39; Luk 4.44 Jizọsị nwẹnị mẹnjị mu opu ama na kala-ama mamgba na la fama. Ori ọkọ kẹ mẹnjịarị sakị ori ama-awarị ḅio ye-toluma tẹ Tamụnọ Ama-da tẹ ḅẹrẹtọn ḅarị mẹ ḅẹ Iḅi Oku mẹ ḍuko tomi pịrị tẹ pịkị ịna ḅụ sime ḅụụ kụrọ-a na, obi na gwọm. 36#Kịẹ 27.17; 1 Ama 22.17; 2 Pkị 18.16; Izi 34.5; Mak 6.34Ò tomina-ogbo-ogbo ma ẹrị ye mẹ mịẹtẹ ịna ọkụrụkụrụ ò ḅioḅẹngbọ sọ ḅinm, gbala in sime-ḅara ḅụụ-ḅalaḅalarị tẹ ḅarasụa-pịrịḅọ ofori ḅara. Ịn kịka ye anie anana-ḍikiḍikiḅọ nyana-a anana ogbo. 37#Luk 10.2Mie ḅụ ọ̀ nwẹnị ò ḍukamẹnjịapụ ma ḅẹẹ, “Ḍụọ mẹ ḅio soku ḅarị afịaị ḅakam, kụma arị soku tẹ kobiri warị suu ḅarị kọrịnama-kọrịapụ boowa. 38Ọmịnị soku-ḅẹ afịaị ma nyanaḅọ ḅe tẹkẹ tẹ ọ̀ namakọrịapụ kẹ fịaị soku kọrịnama mẹ fịrịma.”
Currently Selected:
Matiyo 9: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
