Matiyo 3

Minji-sara Jọnị Tamụnọ Ẹkwẹn Kọnm

(Mak 1.1-8; Luk 3.1-18; Jọn 1.19-28)

1Anị sakị mẹ ḅụ Minji Sara Jọnị ḅo Judiya ḅẹ ịkpa mẹ ḅio saakị Tamụnọ ẹkwẹn kọnm. 2#Mat 4.17; Mak 1.15Ọ̀ kọn ẹkwẹn mẹ ḅẹ sịḅị anie, “Ọmịnị ọmịna asi ḅụ pịkị tẹ Tamụnọ ḍọkụma-muu, gbala Tamụnọ Ama-da mẹ ḅo laa ḅẹ tẹ.” 3#Ayị 40.3Ḅị Jọnị ḅe anie ịkịankoro Ayịzaya ḅụụ ḅụ ẹkwẹn tẹ ḅẹẹ ḅọ ḅe,

“Gbọrụḅọ ịkpa mẹ ḅio sime tẹ olokuarị,

‘Etela tẹlẹma KỊNỊNYANAḄỌ ḅe pịrịị,

mẹnjị-ḅọrọ-anga mịẹ gono-gonoma ọ̀ pịrị ọ̀ ḅọrọ muu!’ ”

4 # 2 Ama 1.8 Nambulo ḅe oju ḅẹ isuke anie ịn kẹ Jọnị kapa ḍori yee; tẹ nama oju ḅẹ apara mie ọ̀ kẹ ò ḅiri pono yee, anịsakị ọ̀ fị-fị fịye anie ịn kẹ igurube nwẹn-sịn akịdị na piri-ḅio-ḅẹ ḅẹm na. 5Tẹ Jeruselemu ḅụ na, bebe Judiya ibe mẹ ḅụ na, Jodanị tọrụ mẹ na kpeki ama mamgba na ḅụ kịnị ọ̀ dama-ḅom. 6Ịn nwẹnị ịn mịẹ tẹ asi ḍuko pakama Tamụnọ pịrị-pịrị tẹ Jọnị nwẹnị minji kẹ ịn sara Jodanị tọrụ mẹ ḅio.

7 # Mat 12.34; 23.33 Tomi ma ọkọ kẹ gbii-gbiima ọ̀ dama-ḅoarị ogbo Jọnị nwẹnị ẹrị mịnẹ tọnwa Farịsiiapụ na Sadusiiapụ ma na sọ ọ̀ ḅara minji sara ḅẹ ḅo tẹ. Tẹ ọ̀ nwẹnị ịn ḅẹẹ, “Ọmịnị ododo amẹẹ, tụḅọ ḅọrọ ḍuko ọ́ pịrị mịnẹ ọmịnị inetẹ Tamụnọ ḅara ḅo ḅarị fomu-ḅara mẹ ḅụ so ḅẹ? 8Mịọkụ ọmịnị ọmịna asi ḅụ pịkị Tamụnọ daa tẹ nwẹn ḅẹẹ ye ḍie pakama ḅarị amịẹaị mịẹẹ. 9#Jọn 8.33Ó kuroma ma mịnẹ ọmịnị Ebira-amụ kẹ ọmịna atẹngịḅọ sịn-arị ẹrẹsị, ọ́ Tamụnọ kẹ fịrịma ḅarị fomu-ḅara mẹ ḅụ inetẹ pụkọ-so ḅa. Ó nimi mịnẹ Tamụnọ inetẹ mịna aḍụḅarị ma ọkị awọ sọma Ebira-amụ pịrị ḅa! 10#Mat 7.19Ịn kẹ suku-na-suku-na ḅụ sịn ma pẹlẹ-pẹlẹ-gbin ḅarị kumbu mẹ ini anị kẹ ḅo la tẹẹ; iḅi mgbọlụ sụa-a sịn goyegoye ini anị pẹlẹ-gbin tẹ kẹ wakị kọrị fịnị mẹ ḅio suu ḅa. 11Yẹrị kịngẹ kụma ó si ḅụ pịkị tẹ Tamụnọ daa tẹ nwẹn ḅẹẹ elekima minji mie à kẹ ọ́ sararị ye; kụma ị̀ sakị ḅọrọ tẹso, gbọrụḅọ ḅo tẹ Fịafịa Tẹmẹ ḅe na, kọrị-fịnị na, kẹ minji kẹ ọ́ sara ḅa. Ori ị̀ nẹngị la ḅara ḅụ, ọ̀ kẹ ḅụọ sụarị okuro sọ à dogi gbẹẹ-a. 12Ọ̀ ḅara ḅụ ọ̀ kẹ ẹsịma saratẹ mbịaka gugu ḅẹ ye-guguye emii. Ò gugu famatẹ ḅẹḅẹ ọ̀ fị na-iḅi mbịaka mgbọlị ma tan mu fịye koko anga ḅụ suu wẹrị ḅa, tẹ fun ma tan mu biin-biin-a kọrị fịnị ḅio dọkịma ḅa.”

Minji-sara Jọnị Minji Kẹ Jizọsị Saram

(Mak 1.9-11; Luk 3.21-22)

13Anị sakị mẹ ḅụ Jizọsị nwẹnị Galili ḅụ sime tẹ so Jọnị dama-ḅo Jodanị tọrụ akaka mẹ ḅụ, Jọnị minji kẹ ọ̀ sara ḅarị ḅara. 14Kụma Jọnị nwẹnị Jizọsị ḅioḅẹngbọ ḍima ḅẹ ḅara ḍọkị tẹ ọ̀ ḅẹẹ, “Yẹrị rẹ mie ị́ dama-ḅo tẹ ị́ minji kẹ ị̀ sara ḅẹ ye-a, kụma ị́yẹrị rẹ ị̀ dama-ḅo!”

15Kụma Jizọsị ọ̀ pakịrịm, “Yee anị mị-ḅara sime mịọkụ ḅụ. Gbala mị ḅọkọ ḅụ mie wa ḅọrọ tẹ Tamụnọ ḅiiarị wa mịẹ ḅẹẹ aị mamgba mịẹ fama ḅarịye.” Mie ḅụ Jọnị nwẹnị kẹ ọ̀ sara.

16Jọnị minji mẹ kẹ Jizọsị sara tẹso gbọrụ sakị, Jizọsị nwẹnị minji mẹ ḅio mẹnjị iwo ḅo. Anịtẹso So nwẹnị finji Jizọsị pịrị tẹ ọ̀ nwẹnị Tamụnọ Fịafịa Tẹmẹ ḅe ẹrị ori olosịkịya kịka tẹ kuro-ḅo ori ọgọnọ gbanarị. 17#Suk 22.2; Dev 2.7; Ayị 42.1; Mat 12.18; 17.5; Mak 1.11; Luk 9.35Anịtẹso gbọrụ pọkọ nwẹnị So-ḅio sime tẹ ḅẹẹ, “Ḅie ì ḅẹlẹma Tụḅọ ḅee, ọ̀ ḅụụ à ḅioḅẹlẹ nyanam.”

Currently Selected:

Matiyo 3: KBTP

Highlight

Copy