Matiyo 2

Ye-nimi Opu-apụ Sunsin Jizọsị Pịrị Ḅẹ Tẹ Jeruselemu Ḅom

1Judiya ḅẹ Bẹtịlịhẹmụ ama ḅụ mie Jizọsị iyi ye. Anị sakị mẹ ḅụ Ẹrọdị anie Judiya ḅẹ amadaḅọ. Tẹ Jizọsị iyi tẹ amụ ala-a ogbo tomi nwẹnị ịrụa saakịarị pakịrị anga mẹ ḅụ sime tẹ sunsin ọ̀ pịrị ḅẹ tẹ Jeruselemu ḅo. Arị atomi ma lolia-ḍikiapụ. 2Tẹ gbelam, “Tọ anga ịn Juu-ḅẹ-apụ amadaḅọ sọ ḅẹ tụḅọ ḅe iyi? Wa ò lolia ẹrịm ịrụa saakịarị pakịrị anga mẹ ḅụ anị paka sakị, tẹ sunsin ọ̀ pịrị ḅẹ ḅo tẹẹ.”

3Ama-da Ẹrọdị miemẹ naa sakị, anị kpọma ọ̀ ḅụụ-ḅalaḅalamam, anie anị pịkị kẹ Jeruselemu ḅụ sime-ḅọ sime-ḅọ sọ mịẹ ḅara. 4Ọ̀ nwẹnị agbamịẹapụ ma na, oloko toluma apụ mamgba na sịn ḅo kobiri, tẹ in gbela, “Mẹsaya ḅe tọ-anga ini ori iyi ḅẹ?”

5Ịn nwẹnị pakịrị, “Judiya ḅẹ Bẹtịlịhẹmụ ama mẹ ḅụ mie ori iyi ḅarịye.” Gbala Tamụnọ ḍuko tẹ ori ịkịankoroḅọ ḅe kẹẹ koroma wararị:

6 # May 5.2 “Ị́yẹrị Judiya ḅẹ Bẹtịlịhẹmụ ama,

Judiya ḅụ kịnị ẹrẹ naa tẹ ama ma ḅụ gbọrụ ḅọkọ ḅụ sọ iderima tẹịn-a,

í ḅio ḅụ sịḅịda ḅarị ḅọ paka-ḅo ḅa

ị̀ atomi Izirẹlịapụ ma datụkụma ḅarị ḅọ.”

7Mie ḅụ Ẹrọdị nwẹnị ịrụa saakịarị pakịrị anga ḅụ sime tẹ ḅo apụ ma sịn sikima tẹ ḅọị ḅara kẹ in gbela nimi, karakaramatẹ nwẹn ḅẹẹ lolia mẹ tarị ḅụụ pakama sakị. 8Anịtẹso ọ̀ nwẹnị mịna aị ma ḍuko ịn pịrị tẹ ịn fịrịma Bẹtịlịhẹmụ mu mịnẹ: “Ó mu tẹ tọrụ kẹ kiri lama tẹ iḅiọkụ tụḅọ ḅe ḍọkị-ẹrị, tẹ mịẹtẹ à nimi, yẹrị sọ mu sunsin ọ̀ pịrị ḅarị ḅara.”

9Ini amadaḅọ ḅe ḍuko ye mẹ naa tẹso, ịn nwẹnị mẹnjị in muarị anga mẹ mu, tẹ ịrụa-saakịarị-anga anga mẹ ḅụ ini anị ẹrị tẹso, lolia mẹ nwẹnị ịna tọrọkọ tarị mu nwenii tẹ tụḅọ ḅe sime anga mẹ ḅụ daasịẹ So-tọrụ ḅụ. 10In lolia mẹ ẹrị ye mẹ nwẹnị kpọma ịna ḅioḅẹlẹma lama. 11Ịn warị mẹ sọ mu sakị ịn tụḅọ ḅe na, ò iyingi Meri na ẹrị tẹ kparakị tẹ sunsin ọ̀ pịrịm. Anịtẹso ịn nwẹnị ngọ pakama-ḅo ḍie ọ̀ pịrị. Ịn kẹ ọ̀ pịrị ngọ ma anie golu na, ye la lamatẹ kụnụaị anie ịn kẹ fịranịkịnịsẹnịsị na, maa na sịn aị.

12Anịtẹso in jen etela ḅụ ḅọrọ so ịna ama mum. Tamụnọ ḍawọ-jụ ḅụ ịna ḅeri nụnụ tẹ ẹrẹsị, mịnẹ ịn ḅarị pịkịma Ẹrọdị dama-mu ma.

Josẹfụ Meri Na Jizọsị Na Kẹ Mangị-so Ijiputi Mum

13Ịrụa saakịarị pakịrị anga mẹ ḅụ sime tẹ ḅo apụ ma so tẹso, Josẹfụ nwẹnị ḍawọ, tẹ ḍawọ-jụ mẹ ḅụ KỊNỊNYANAḄỌ ḅe enjẹlị ẹrị, tẹ enjẹlị ḅe ọ̀ ḅẹẹm, “Ẹrọdị tụḅọ ḅe ḅaa ḅẹ tẹ ọ̀ ḍọkị ḅa. Ọkọ ẹrẹsị, saakị tẹ tụḅọ ḅe na iyingiḅọ na ọkị mangị so Ijiputi muu, tẹ anịanga sime nwenii àrị ị́ ḅẹẹ tẹ ị́ anịanga koroma-so ḅẹ sakị la.”

14Josẹfụ nwẹnị saakị tẹ tụḅọ ḅe na iyingiḅọ na ọkị tẹ ḍin-ḍin-ḍin kẹ so Ijiputi mu. 15#Hos 11.1Anịanga mie ò sime nwenii tẹ Ẹrọdị fịị ye. Miemẹ gotẹ mịẹ ye KỊNỊNYANAḄỌ ḅe ịkịankoroḅọ ḅe ḅụ ḅọrọ tẹ ḍuko ye mẹ paka ḅarị ḅara, “Arị Ijiputi ḅụ ị̀ tụḅọ ḅe sịn pakama ḅom.”

Amadaḅọ Ẹrọdị Ḍọkọḍọkọ-Awọmẹ Ma Ḅaam

16Ẹrọdị ḅo nimi tẹ mịnẹ ịrụa saakịarị pakịrị anga mẹ ḅụ sime tẹ ḅo apụ ma oḅori kẹ ọ̀ sịn tẹ ḅẹẹ sakị, ori ịganị ḅụramam. Ọ̀ nwẹnị tọn mịnẹ in mu Bẹtịlịhẹmụ na anị kpeki ama ma na ḅụ sime owiapụ-awọmẹ, maa kụra sịḅị ḅụ ḅọrọtẹ apụ ḅụ ideri, ḅaa famaa. Ò gotẹ mị-ḅara kịẹn ye anie ḅo apụ ma ḅara ḅụ ò lolia mẹ tarị paka sakị gbela nimi tẹ.

17Mị ḅọkọ ḅụ ịkịankoro Jerimaya koro ịkịan mẹ ḅo paka tẹẹ:

18 # Jer 31.15 “Rama ḅụ kịnị owu fie ye naam,

kururu owu pọkọ, akụ tẹmẹ ḅụ.

Resẹlị árị awọmẹ gotẹ owuarị

á dedema naa ḍụkụ-a, ịn fịị tẹ ẹrẹsị.”

Josẹfụ Meri Na Jizọsị Na Kẹ Ijiputi Ḅụ Pịkịma-som

19Ẹrọdị fịị ḅọrọ tẹso, Josẹfụ ḍawọ tẹ KỊNỊNYANAḄỌ ḅe enjẹlị Ijiputi ḅụ 20ọ̀ ḅẹẹm, “Saakị tẹ tụḅọ ḅe na iyingiḅọ na kẹ pịkịma so Izirẹlị muu, kẹ gotẹ ọkọ ḅẹẹarị, tụḅọ ḅe ḅaa ḅẹ ḍọkị sime apụ ma ịn fịị tẹẹ.” 21Mie ḅụ Josẹfụ nwẹnị saakị tẹ tụḅọ ḅe na, iyingiḅọ na ọkị pịkịma so Izirẹlị mu.

22Kụma Josẹfụ ḅo naa tẹ mịnẹ Akilọsị ọ̀ ḍa Ẹrọdị kiri ọkị tẹ Judiya ḅụ ama-da tẹ ḅẹẹ sakị, anịanga mu mẹ nwẹnị ọ̀ ḅalafama. Ḍawọ-jụ mẹ ḅụ in jaị sọ ḍuko ọ̀ pịrịm, mie ḅụ ọ̀ nwẹnị Galili ibe mu, 23#Mak 1.24; Luk 2.39; Jọn 1.45tẹ Nazarẹtị nwẹn-sịn gbọrụ ama kẹ ori ama sọma. Tẹ miemẹ nwẹnị mịẹtẹ ịkịankoro apụ ma ḍuko ye mẹ paka tẹ ye sọ: “Ịn kẹ ọ̀ sịn ḅarịye Nazarini.”

Currently Selected:

Matiyo 2: KBTP

Highlight

Copy