Matiyo 4
4
Jizọsị Ḅuru-ịmọm Tẹ Ekwesu Ọ̀ Daaḍikim
(Mak 1.12-13; Luk 4.1-13)
1 #
Hib 2.18; 4.15 Anịtẹso Fịafịa Tẹmẹ ḅe nwẹnị Jizọsị ḅọrọma ịkpa mẹ ḅio mu, Ekwesu ḅe ọ̀ daaḍiki ḅẹ ḅara. 2Jizọsị ḍin amesi na eneḅaka amesi na kẹ ḅuru-ịmọ fama tẹso, ḅuru nwẹnị ọ̀ tarị. 3Anịtẹso Ekwesu ḅe nwẹnị ọ̀ dama-ḅo tẹ ọ̀ ḅẹẹ, “Ị́yẹrị kọkọ Tamụnọ Tụḅọ. Tọn mịna ḍụḅarị apakịrị ma pịrị tẹ arị fịturu kpo kpo sọ.”
4 #
Dit 8.3
Kụma Jizọsị nwẹnị Si-ḅọ ḅe pakịrị, “Fịafịa Ḍiri mẹ ḅẹẹm, ‘Tomi inetẹ fịye ngẹrị fị ḅụ ḍumo-sime ḅịa, kụma Tamụnọ ḅịḅị paka-ḅoarị ẹkwẹn ḅụ mie ịn ḅọrọtẹ ḍumo ḅarịye.’ ”
5Anịtẹso Ekwesu ḅe mịẹtẹ Jizọsị Jeruselemu, Fịafịa Ama mẹ mum, tẹ ọ̀ nwẹnị Tamụnọ-warị mẹ ḅẹ geletẹịn anga ḅụ sịẹsime. 6#Dev 91.11,12Ekwesu ḅe nwẹnị ọ̀ ḅẹẹ, “Ị́yẹrị kọkọ Tamụnọ Tụḅọ. Ḍosi-koroo!” Gbala Fịafịa Ḍiri mẹ ḅẹẹ wararị:
Tamụnọ tọn ori enjẹlị apụ pịrị ḅa,
ini ịna aḅara ḅụ ị́ tịrẹ ḅa,
tẹ ị́ aḅụọ kịngẹ sọ ḍụḅarị bịan ḅịa.
7 #
Dit 6.16
Jizọsị nwẹnị pakịrị, “Kụma Fịafịa Ḍiri mẹ kọkọ pịkị ḅẹẹ, ‘KỊNỊNYANAḄỌ ị́ Tamụnọ ḅe daaḍiki ma.’ ”
8Anịtẹso Ekwesu ḅe nwẹnị mịẹtẹ Jizọsị gele wararị tụndụ ọgọnọ kpọlị. Ọ̀ nwẹnị tomikiri ḅẹ asịẹ ma na, arịḅẹ opu mamgba na kẹ Jizọsị ḍie. 9Ekwesu ḅe nwẹnị ḅẹẹ, “Mie-mẹmgba à kẹ ị́ pịrị ḅa, ị́ kparakị tẹ ị̀ tẹkẹ kụma.”
10 #
Dit 6.13
Anịtẹso Jizọsị nwẹnị pakịrị, “Ekwesu, mịanga ini ị́ fọnọ ḅelemaa! Fịafịa Ḍiri mẹ ḅẹẹm, ‘KỊNỊNYANAḄỌ ị́ Tamụnọ ḅe tẹkẹ tẹ fịrịmẹnjị ori ngẹrị pịrịị.’ ”
11Anịtẹso Ekwesu ḅe nwẹnị Jizọsị koroma-so, tẹ enjẹlị apụ nwẹnị ḅo ḅarasụa Ọ̀ pịrị.
Jizọsị Ọ̀ Kọrịnama Saakịm Galili Ḅụ
(Mak 1.14-15; Luk 4.14-15)
12 #
Mat 14.3; Mak 6.17; Luk 3.19,20 Jizọsị ḅo naam mịnẹ ịn Jọnị kun ikoli suu tẹ ḅẹẹ sakị, ò Judiya koroma so Galili mum. 13#Jọn 2.12Ò so sakị ò mu Nazarẹtị ḅụ anga-a, kụma Kepanọmụ nwẹn-sịn, Galili tọrụ akaka ḅẹ ama ḅụ mie ò mu anga ye, (anị ama mẹ anie Romu ḅẹrẹtọn mẹ ḅẹ sịḅịda ama Galili ḅụ), tẹ Zẹbulọnị na Nafutali na ye-yọ ḅụ anị simem. 14Miemẹ gotẹ mịẹ ye anie ịkịankoro Ayịzaya ḍuko ye paka ḅarị ḅara:
15 #
Ayị 9.1,2 “Zẹbulọnị ama na, Nafutali ama na,
Jodanị tọrụ saḅa ḅụ ideri koro tọrụ akaka mu etela ḅụ emi ye-yọ mẹ
Galili ḅụ, igoniapụ ama mẹ!
16Kanakana ḅio anga apụ ma opu bele ẹrị ḅa,
fịị kanakana ye-yọ ḅụ anga apụ ma, bele ḅịya ịn sarama ḅa.”
17 #
Mat 3.2
Anị sakị ḅụ mie Jizọsị saakị ori oku mẹ ḍuko tomi pịrị tẹ ḅẹẹ ye: “Ọmịnị ọmịna asi ḅụ ḅara-siin tẹ pịkịị, gbala Tamụnọ Ama-da mẹ ḅo kpeki tẹ ẹrẹsị.”
Jizọsị Inia Inji-ḅaapụ Sịn Ọkịm
(Mak 1.16-20; Luk 5.1-11)
18Jizọsị Galili tọrụ akaka ḅụ mẹnjịma muarị ogbo ọ̀ nwẹnị maa mịnapụ tẹ inji ḅaa kọrịnama kọrịarị apụ na bịama, anie Sayịmọnị tẹ ịn Pita kẹ sịn ḅọ ḅe na ori iyimbere Anduru na, ini ịgbọ kẹ inji ḅaarị Galili tọrụ mẹ ḅụ. 19Jizọsị nwẹnị ịn ḅẹẹ, “Ó ḅo ì ḍukamẹnjịị, àrị ó toluma tẹ ó tomi kun-kun-ḅo ḅa.” 20Anị gbọrụ kiri ịn nwẹnị ịna ịgbọ ma ḅụ ḅara-siin tẹ ò ḍukamẹnjị.
21Tẹ ọ̀ mẹnjị tọrọkọ mu tẹso, ọ̀ pịkị jen maa mịnapụ ẹrịm, Jemusị na Jọnị na, ini anie Zẹbidi nwẹn-sịn gbọrụḅọ awọmẹ. Ini na ịna ḍaḅọ na ịna arụ ḅio sime tẹ ịgbọ sụlẹ simem. Jizọsị nwẹnị ịn sịn, 22tẹ anị gbọrụ kiri ịn nwẹnị arụ mẹ na ịna ḍaḅọ na koroma tẹ Jizọsị ḍukamẹnjị.
Jizọsị Ye-tolumam, Tamụnọ Ẹkwẹn Kọnm Pịkị Obi Gwọm
(Luk 6.17-19)
23 #
Mat 9.35; Mak 1.39 Jizọsị mu Galili ikelema-koro ḅụ sime ama-awarị ma ḅio ye-toluma tẹ pịkị Tamụnọ ama-da tẹ ḅẹrẹtọn-arị mẹ ḅẹ Iḅi Oku mẹ ḍuko ma-ḅọrọm, tẹ pịkị kịrị-kịrị ḅụụ kụrọ-a apụ na obi apụ na gwọm. 24Ò gboloma ye mu bebe Siriya sịẹ mẹ kana-korom, miemẹ mịẹtẹ ịn nwẹnị obi apụ mamgba kẹ mu ọ̀ la, obi mẹ sime-ḅara, sime-ḅara sọ — oru sịḅị ḅio sime apụ-o, ịsịla-obi kọn apụ-o, ngụrọ-kọnapụ-o, tẹ Jizọsị nwẹnị inimgba gwọ. 25Opu tomi ogbo-ogbo tẹ Galili na, ịn kẹ Oyi Ama ma nwẹn-sịn iri mẹ na, Jeruselemu na, Judiya na, pịkị Jodanị saḅa anga na ḅụ sime tẹ ḅo apụ gbii-gbiima Jizọsị ḍukamẹnjịm.
Currently Selected:
Matiyo 4: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
