Luku 14

Jizọsị Foin Obi Kọnḅọ Gwọm

1Gbọrụ Ịnyọsara-Ene ḅụ, Jizọsị mu gbọrụ opu Farịsiiḅọ warị ye fị ḅẹ mu sakị, tomi ori ẹbị lamam. 2Anịanga ḅuru-obi kọn-arị gbọrụḅọ Jizọsị dama-ḅom. 3Tẹ Jizọsị nwẹnị anịanga sime Oloko toluma apụ na Farịsiiapụ na ḅii, “Wamịna Oloko ḅụ Ịnyọsara-Ene ḅụ obi gwọ, gwọ mụnọọ gwọ gwọ-a?”

4Kụma ịn ḅịḅị fie ḅẹ ḅii-a. Jizọsị nwẹnị tomḅọ ḅe ọkị tẹ ọ̀ gwọ, tẹ ọ̀ ḅẹẹ tẹ ò so. 5#Mat 12.11Anịtẹso Jizọsị nwẹnị ịn ḅẹẹ, “Ọmịna ḅụ tụḅọ emi, tẹ mḅọ tụḅọ, anịanịa nambulo, Ịnyọsara-Ene ḅụ ḅịkị suḅe ḅio koro kụma anị gbọrụ sakị ḅụ ọ̀ pakama-ḅo ḅịa?” 6Kụma miemẹ ini inetẹ pakịrị-a.

Ḅụụ-iderima Na Igoni Da Warị Suu Na

7Jizọsị ẹrịm mịnẹ ini ere-ịya-alalị gotẹ sịn ḅo apụ ma ḅẹ ja apụ iḅitẹịn anga ḍọkị ḍọkị tẹ lẹgịarị ẹrẹsị ọ̀ mị egberi mẹ gbaa ịn pịrịm: 8#Egb 25.6,7“Kịnị ị́ sịn ere-ịya-alalị fị ḅẹ ḅo ḅẹḅẹ mu iḅitẹịn kiri ḅụ lẹgị ḅẹ ḍọkị ma. Ẹbịsịya warị nyanaḅọ ḅe sịn apụ ḅụ ị́ nẹngị ḅọ paka ḅa, 9tẹ warị nyanaḅọ tẹ ọmịnị maa apụ sịn ḅọ ḅe ḅofa ḅo ị́ ḅẹẹ, ‘Mịanga saakị ḅieḅe pịrị.’ Anị sakị ị́ ḅụụ-jịrị ḅụ mu iderima tẹịn anga mẹ ḅụ lẹgị ḅa. 10Anie nakara, ịn fịye gotẹ ị́ sịnm ḅẹḅẹ, mu iderima tẹịn anga lẹgị, tẹ warị nyanaḅọ ḅe rẹ ḅo ị́ ḅẹẹ, ‘Ì ikiaḅọ, mịanga rẹ mie ị́ lẹgị ye, sisi saakị iwoma iḅi mịanga nẹngị anga ḅoo!’ Anị nwẹnị inweni-mgba tọrọkọ kụn kẹ ị́ pịrị ḅa. 11#Mat 23.12; Luk 18.14Amịna ḅụụ saakị-gelema ḅọ, gelema ḅọ, mḅọ iderima ḅa; anị sakị amịna ḅụụ iderima ḅọ, iderima ḅọ mḅọ opu sọ ḅa.”

12Anịtẹso Jizọsị nwẹnị warị nyanaḅọ ḅe ḅẹẹ, “Jen sakị í fịye kẹ kịnị sịn-arị ḅẹḅẹ, í ikiapụ, anịanịa ị́ amịnapụ, anịanịa ị́ na kpeki tẹ anga igbigi nyana apụ, ḍiki tẹ sịn ma, ini sọ ḅofa fịye kẹ ị́ sịn tẹ ị́ kẹ ịn pịrị fịye kẹ ị́ gbẹẹ. 13Kụma ị́ fịye gotẹ kịnị sịn ḅẹ sakị, igoin-apụ na, ngụrọ-kọnapụ na, ekeliapụ na, tọrụngbọ-pụụntẹ-apụ na mie ị́ sịn ḅarịye. 14Anị sakị ini ma ini inetẹ ị́ gbẹẹ ḅịa sakị í ḅo boma ḅa. Iḅi apụ fị-ḅụ-saakị ḅẹ ene mẹ ḅụ Tamụnọ kẹ ị́ gbẹẹ ḅa.”

Jizọsị Ere-Ịya-Alalị Ḅẹ Egberi Gbaam

(Mat 22.1-10)

15Fịye mẹ suku lẹgị sime gbọrụḅọ nwẹnị miemẹ naa, tẹ Jizọsị ḅẹẹ, “Tamụnọ Ama-da yọ mẹ ḅẹ dẹbịlẹ mẹ suku ye fị ḅarị apụ ma, ḅioḅẹlẹ sime ịn pịrị wararị!”

16Jizọsị nwẹnị ọ̀ ḅẹẹ, “Gbọrụ sakị gbọrụ tomḅọ opu alalị gbo koroma tẹ tọnwa atomi sịnm. 17Sakị mẹ laa tẹso, ori ọ̀ fịrịmẹnjịḅọ fịrịma pakamam mịnẹ ò mu ịn sịntẹ apụ ma ḅẹẹ, ‘Ó ḅoo, ye goyegoye tẹlẹma tẹ!’ 18Kụma inimgba, ọrụḅọ-ọrụḅọ nwẹnị tẹkẹ-ḅịḅị kẹ fịrịma mịnẹ ịn ḅarị inetẹ ḅo ḅịa. Tarị ḅọ ḅe ḍuko fịrịmẹnjịḅọ ḅe pịrịm, ‘À piri fẹẹ wararị, à mu anị ḍiki ḅa. Ọ̀ ḅẹẹ ori ịganị ma.’ 19Osi ḅọ mẹẹ, ‘Mie à paa oyia anambulo fẹẹ ḅara, àrị ịn kẹ kọrịnama kọrị ḍiki ḅẹ muarị. Sisi ọ̀ ḅẹẹ ori ịganị ma.’ 20Jụmọ ḅẹẹm; ‘Mịọkụ, mịọkụ àrị ẹrẹḅọ simem, ọkọẹrẹsị àrị inetẹ ḅo ḅịa.’

21“Fịrịmẹnjịḅọ ḅe nwẹnị arịmgba ḍuko ọ̀ nyanaḅọ ḅe pịrị. Ịganị ḅụ ọ̀ nwẹnị fịrịmẹnjịḅọ ḅe ḅẹẹ, ‘Fọnya ama ḅio ḅẹ etela ma na, ọpọkụrụ ma na mu tẹ igoin-apụ na, ngụrọ-kọnapụ na, tọrụngbọ-pụụntẹ-apụ na, ekeliapụ na kẹ pịkị ḅoo.’ 22Ala-a kụma fịrịmẹnjịḅọ ḅe ḅo tẹ ḅẹẹ tẹ, ‘Ị̀ nyanaḅọ, àrị ị́ ḅẹẹ ḅara mịẹ tẹ, kụma kiri paa foo ja apụ pịrị wararị.’ 23Mie ḅụ ọ̀ nyanaḅọ ḅe fịrịmẹnjịḅọ ḅe ḅẹẹm, ‘Mẹnjị paka piri ọgọnọ ḅẹ etela ma na mẹnjị-ḅọrọ-anga ma na mu tẹ mịẹtẹ tomi sọ ḅo, mịẹtẹ ị̀ warị mẹ ḅin-jịkịjịkị ḅarị ḅara. 24À ḍuko ọmịnị-mgba pịrịarị mịnẹ tarị sịn apụ ma ḅẹ gbọrụḅọ-sọ ị̀ ḅoḅiri fịye mẹ kẹ ḅịḅị lama ḅịa!’ ”

Sime Kịrayịsị Ḍukamẹnjịḅọ Pịrị Ye Kụrọ La Ḅara

(Mat 10.37-38)

25Gbọrụ sakị opu tomina-ogbo-ogbo Jizọsị na mẹnjịma muarị ogbo ọ̀ nwẹnị pịkị tẹ ịn ḅẹẹ, 26#Mat 10.37“Ị̀ dama-ḅo ḅọ, ḅo ḅọ inetẹ ì ḍukamẹnjịḅọ sọ ḅịa, mḅọ ị̀ ḅẹlẹma mḅọ ḍaḅọ na, iyingiḅọ na, taḅọ na, awọ na, owiapụ-amịnapụ na, eremịna amịnapụ na, mḅọ ḅụụ ḅioju sọ na nẹngị sikima. 27#Mat 10.38; 16.24; Mak 8.34; Luk 9.23Ḅẹḅọ-ḅẹḅọ tẹ amịna ẹngbẹsẹ-sịn dogi tẹ ị̀ ọḅụ mẹnjị-a ḅọ inetẹ ì ḍukamẹnjịḅọ sọ ḅịa.

28“Ọmịna ḅụ tụḅọ warị nama ḅẹ tẹ tarị sịḅịḅio kịẹn anị pịrị ḅịa, mḅọ ḅara simearị igbigi kọrịnama mẹ kọrị fama ḅarị ḅoto. 29Mḅọ ọkọ mịẹ-a ḅẹḅẹ mḅọ inetẹ nama fama ḅịa, mḅọ suku mẹ saakị tẹso, ọkụma, tẹ ọkọ kẹ anị ẹrị apụ mamgba mḅọ ḍẹrị, 30tẹ ḅẹẹ ḅa, ‘Ḅị tomḅọ ḅe saakị wararị warị mẹ ori inetẹ nama fama-a!’

31“Gbọrụ amadaḅọ mu jen amadaḅọ na owu-sọ ḅẹ muarị tẹ ori nyana ọmụapụ puku sọnọ ẹndẹ finji, osi-ḅọ nyana ọmụapụ maa puku oyia ẹndẹ finji ḅẹ kụma, ọ̀ tarị lẹgị tẹ kuroma ḍiki ḅa ori ịnyọ inetẹ osi-ḅọ ḅe da ḅarị ḅoto. 32Ori ẹrịm ori ịnyọ la-a ḅẹḅẹ, ori iḅi sakị kịnị fịrịma mu ala-jụ osi amadaḅọ ḅe na ḅẹrẹ fama ḅẹ ḍọkị ḅa.” 33Ḍuko gbaịn ḅụ Jizọsị nwẹnị ḅẹẹ, “Anị gbọrụ ḅara ḅụ ọmịna ḅụ amịna nyana ye, nyana ye ḅụ ḅara sịn-a tẹ inetẹ ì ḍukamẹnjị ḅẹ ḅọ ofori.

Jizọsị Ye Mịẹ-a Fụn Egberi Gbaam

(Mat 5.13; Mak 9.50)

34“Fụn anie iḅiye, kụma fụn mẹ ḅarị fụn ḅẹlẹ-a ḅẹḅẹ anị mịẹ tẹ anị pịkị fụn ḅẹlẹ ḅẹ ọkụ ofori. 35Kiri ḅụ sọ anị mịẹ ḅẹ ye ḅarị ofori, kẹ ye ḍiḅi ḅẹ fun na sara gboloma ḅụ sọ anị ḅarị iḅi-a. Anị kẹ sara nguma kịngẹ mie anị sime pịrị tẹ ye. Naa ḅii ḅọ naa!”

Currently Selected:

Luku 14: KBTP

Highlight

Copy